Read Southern Dagaare Hib 12 Bible Online

Hib 12 - Southern Dagaare bible

Hib 12

¹Azuiŋ, a dansediribe yaga naŋ seŋ ŋaa ŋmaagyili te, yɛ e ka te togi tuobu zaa ane a yelbieri na naŋ maŋ gbiŋ te taa bare. Yɛ e ka te zo a zogantaa zoobu na poɔ te naŋ be ne kannyiri,

²a kaara Yeezu naŋ waa a te yeldeebo piiluu ane a baaroo zie. A Yeezu naŋ da kaa a noɔ naŋ bebe ko O nendaare kaŋ zuiŋ, O da sage kpi la a dagaraa zu, a ba zo vi, a pãã do zeŋ O zemmo zie a Naaŋmen naaloŋ nuduluŋ seŋ.

³Yɛ teɛre nyɛ lɛ dɔgɛɛ O naŋ da di a yelbebe deme zie, ka lɛ vɛŋ ka yɛ ta wa bale bee a yoɔre nuuri.

⁴A moɔbo yɛ naŋ moɔrɔ ne a yelbieri, yɛ naŋ ba mɔ te ta ka yɛ kyiri yɛ zẽẽ sɛre.

⁵Yɛ mɔɔ inni la a yɛlɛ Naaŋmen naŋ da yeli teɛ yɛ aŋa O bibiiri: “N bie, ta de a Naaŋmen toori tagebo gyɔkɔlɛɛ lɛ, bee ka fo nuuri yoɔre ka O naŋ wa tage fo toori;

⁶Bonso, neɛ a Daana naŋ nɔŋ toori la ka O maŋ tage, kyɛ dɔgre neɛ na zaa naŋ sage de ka o e O bie.”

⁷Yɛ di kannyiri a tuo yɛ naŋ wono a yɛ tobo tagebo zuiŋ. Naaŋmen tagra la a yɛ tobo ka O wuli ka yɛ waa la O bibiiri. Bi-buo la bebe ka o dɔgrebɔ ba maŋ tage o toori?

⁸Ka Naaŋmen ba maŋ tage yɛ tobo lɛ O naŋ maŋ tage O bibiiri tobo, ka lɛ yɛ ba waa O meŋɛ bidɔgre, kyɛ yɛ waa la sɛnsɛmbiiri.[21]

⁹Lɛ yoŋ naane, te taa la dɔgrebɔ a teŋɛzu naŋ maŋ tage te tobo kyɛ ka te naŋ eŋnɛ ba. Ka lɛ a ba seŋ ka te maaleŋ sigri temenne ko a seere zaa Saa kyɛ voorɔ be?

¹⁰Bonso, a te dɔgrebɔ maŋ tage la te tobo bebie belaa lɛ a seŋ lɛ ba naŋ boɔrɔ, kyɛ Naaŋmen maŋ tage la te tobo a te maaloo zuiŋ ka ka te na poɔ a O sonnoŋ poɔ.

¹¹Pampana eŋ, toori tagebo maŋ sãã ŋa o naŋ buoro gaŋ o naŋ soma, kyɛ a puoriŋ, a maŋ yi la tɔnɔ naŋ maŋ waana ne maaroŋ ane mennoŋ a ko banaŋ ba naŋ tage a ba tobo.

¹²Azuiŋ, yɛ zɛge a yɛ nuuri naŋ yoɔre kyɛ e ka a yɛ dumo naŋ bale taa kpeɛ̃õ,

¹³kyɛ maale sobie naŋ tori ko a yɛ gbɛɛ ka ka a gbɛre naŋ wɔge ta wa vere yi o tɔnnoo zie, kyɛ na toɔ̃ nyɛ sammo.

¹⁴Yɛ eŋ faŋ a boɔrɔ ka maaroŋ be yɛ ne noba zaa zie ane a sonnoŋ na neɛ naŋ ba taa o, kontoɔ̃ nyɛ a Daana.

¹⁵Yɛ kaara velaa ka neɛzaa ta wa fãã a Naaŋmen garaaseɛ nyaabo, ka a lɛ vɛŋ ka yɛ kanzaa wa iri buli aŋa teɛ nyagre naŋ waa tuo a wa ne dɔɔne naŋ na dɛge yɛ noba yaga.

¹⁶Yɛ kaara velaa ka neɛzaa ta wa waa ŋa Esɔ naŋ da waa peɛ̃mo toma soba ane neɛ naŋ ba zoro Naaŋmen, a da de o kponnuŋ koɔre bondirii o naŋ na di dayeni eŋɛ.

¹⁷Yɛ baŋ ka a lɛ puoriŋ, o naŋ da wa boɔrɔ ka o di a o saa maaloo gbandiruŋ,[22] ba da mɔŋ o la, bonso, vuo da ba kyebe ka o na leɛ o eebo, aneazaa ka o da bɔ la a maaloo ne nentaŋ.

¹⁸Yɛ ba wa bon yɛ naŋ na toɔ̃ seene zie, aŋa vũũzele naŋ dire, ligruŋ ane zi-ulmo, ane sasekpoŋ;

¹⁹aŋa eele konni ane kɔkɔre kaŋ yelbie naŋ vɛŋ ka a noba naŋ woŋ o yɛlɛ sɔrɔ ka yelbiri zaa ta la yeli poɔ.

²⁰(Bonso, ba da ba taa kannyiri a na toɔ̃ tu a noɔre ba naŋ da ko ba, “Ka doŋɔ gba wa tɔ a taŋ, ba na za o la ko ne kubo.”

²¹Serɛzaa, a yɛlɛ ba naŋ da nyɛ da taa la dabeɛ̃ yaga ka a Moozul da yeli, “N miine la ne dabeɛ̃.”)

²²Kyɛ yɛ wa la a Zaayɔn Taŋ ane a Naaŋmen-vore teŋkpoŋ, a tenvelaa[23] Gyɛruzɛlɛm, a wa malekere ba naŋ koŋ baŋ sɔre naŋ lantaa ne popeɛloŋ zie.

²³Yɛ wa la a bidɛnne ba naŋ sɛge ba yoe eŋ a tenvelaa poɔ laŋne zie ane a Naaŋmen naŋ waa a nensaalba zaa sɛredire zie. Yɛ wa la a nensonne seere naŋ tori zie.

²⁴Yɛ wa la Yeezu, a nɔpaalaa yelmaala zie ane a zẽẽ ba naŋ mere ka a yele yɛlɛ velaa gaŋ a Abɛl zẽẽ.

²⁵Yɛ kaara velaa a ta wa zagre a soba na naŋ yele a yɛlɛ. Bonso, ka ba naŋ da ba yi a poɔ ba naŋ da zagre a soba na naŋ kpãã ba a teŋɛzu, wola ka te na e toɔ̃ yi a poɔ ka tenee wa zagre a soba na naŋ kpaana te yi a tenvelaa poɔ.

²⁶A saŋ na poɔ, O kɔkɔre da zɛŋ la a teŋɛ, kyɛ pampana, O eŋ la noɔre, “A teŋɛ yoŋ naane ka N na laboreŋ zɛŋ, kyɛ N na zɛŋ la a sazu meŋ.”

²⁷A yeluu ŋa, “Laboriŋ,” wulee lɛ ba naŋ na iri a teŋɛzu bon-iri ba naŋ na zɛŋ ka ka boma ba naŋ kontoɔ̃ zɛŋ na bebe.

²⁸Azuiŋ, te naŋ pãã na nyɛ naaloŋ ba naŋ kontoɔ̃ zɛŋ zuiŋ, yɛ e ka te puori Naaŋmen ameseɛrɛ ane puoruu naŋ seŋ ne ane emmo ane dabeɛ̃.

²⁹Bonso, a te Naaŋmen sereŋ waa la vũũdi Naaŋmen.