Read Southern Dagaare Hib 3 Bible Online

Hib 3 - Southern Dagaare bible

Hib 3

¹Azuiŋ, n yɔɔmine ane n yɔɔpuuli naŋ e nensonne a poɔ a tenvelaa[2] noba boɔlaa poɔ, yɛ nyɛ a Yeezu ka O waa apostolii ane a te yeldeebo Naaŋmen bagmaalkare neŋkpoŋ,

²da taa la yelmennoŋ ko a soba na naŋ iri O aŋa lɛ a Moozul meŋ “naŋ da taa yelmennoŋ a Naaŋmen yiri zaa poɔ.”

³Kyɛ Yeezu seŋ ne la puubu yaga gaŋ a Moozul, aŋa lɛ a yimeɛrɛ naŋ maŋ taa puubu yaga gaŋ a yiri o naŋ mɛ.

⁴(Bonso, yiri zaa maŋ taa la o meɛrɛ, kyɛ a boma zaa meɛrɛ la Naaŋmen.)

⁵A Moozul da taa la yelmennoŋ o naŋ da waa tontonɔ a Naaŋmen yiri zaa poɔ, a na di danseɛ kyaare ne a yɛlɛ ba naŋ na wa yeli a puoriŋ.

⁶Kyɛ Kirista naŋ waa a Naaŋmen bidɔɔ, O da taa la yelmennoŋ a Naaŋmen yiri zaa zu. Tenee la a O yiri, ka teneŋ wa nyɔge a te bambaare taa kpeɛŋaa ane a pɔloo naŋ kyaare ne teɛretɔroo.[3]

⁷Azuiŋ, aŋa lɛ a Vooroŋ Soŋ naŋ yeli: “Zenɛ, ka yɛnee wa woŋ a O kɔkɔre,

⁸yɛ ta dare a yɛ sukyie aŋa lɛ a yɛ sããkommine naŋ da zɔɔ ne Naaŋmen a saŋ ba naŋ da e ba nyɛ a wɛgyɛŋ poɔ.

⁹Be la ka a yɛ sããkommine da e ma nyɛ, aneazaa ka ba da nyɛ la a N tontonne

¹⁰yuomo lezaayi. Azuiŋ, N suuri da iri ne ba la, ka N da yeli, ‘Tegitegilɛ ka ba sukyie maŋ bɔre yi N zie, kyɛ ka ba ba baŋ N sobie.’

¹¹A N suuri naŋ da iri poɔ la ka N da pɔ, a yeli: ‘Ba koŋ kpɛ a N pɛnnoo poɔ.’ ”

¹²N yɔɔmine ane n yɔɔpuuli, yɛ gu yɛmenne velaa, ka yɛ kanzaa ta wa taa sukyiri faa naŋ ba taa yeldeebo naŋ na vɛŋ ka o bare a Naaŋmen-vore tuubu.

¹³Kyɛ yɛ yele yɛlɛ teɛrɛ taa bebiri zaa, bebiri zaa yɛ naŋ boɔlɔ “zenɛ,” ka ka yelbebe bɛllɛ ta wa dare yɛ kanzaa sukyiri.

¹⁴Bonso, te leɛ la a Kirista tonton-taaba ka tenee wa nyɔge a te dɛndɛŋ yeldeebo taa kpeɛŋaa te ta a baaraa saŋ.

¹⁵Aŋa ba naŋ da yeli lɛ: “A zenɛ, ka yɛnee wa woŋ a O kɔkɔre, yɛ ta dare a yɛ sukyie aŋa lɛ a yɛ sããkommine naŋ da zɔɔ ne Naaŋmen.”

¹⁶Pampana, ammine da la a banaŋ naŋ da woŋ a yɛlɛ kyɛ da zɔɔrɔ ne Naaŋmen? A banaŋ zaa naŋ da be a Moozul wederoŋ puliŋ ka o da taa ba yi ne a Igyipiti teŋɛ poɔ naane be?

¹⁷Kyɛ ammine la ka O suuri da iri ne yuomo lezaayi? A banaŋ naŋ da e a yelbebe, a da le kpi a wɛgyɛŋ poɔ naane be?

¹⁸Ka ammine la ka O da pɔ a yeli ka ba koŋ kpɛ a O pɛnnoo poɔ, ka a tookoŋwoŋyɛlɛ deme naane?

¹⁹Lɛnso, te nyɛɛ la ka ba da ba toɔ̃ kpɛ a pɛnnoo poɔ ba naŋ da ba taa yeldeebo zuiŋ.