Read Southern Dagaare Hib 5 Bible Online

Hib 5 - Southern Dagaare bible

Hib 5

¹Naaŋmen bagmaalkare neŋkpoŋ zaa ba naŋ kaa-iri nensaalba poɔ maŋ are la nensaalba gbɛbogriŋ a maala yɛlɛ kyaare ne Naaŋmen. Ona la maŋ tere kyɔɔtaare kyɛ maala bagre yelbebe sudi eŋɛ.

²O maŋ toɔ̃ taa la sumaaroŋ ne a babaŋneba ane banaŋ naŋ bɔre a sori, o meŋɛ naŋ na baŋ waa bambaala zuiŋ.

³Kyɛ a ŋaa zuiŋ, a ferɛɛ la ka o maŋ maale bagre a o meŋɛ yelbebe ane a noba meŋ deme eŋɛ.

⁴Neɛ deɛ koŋ baŋ de a emmo ŋa tɔ, ka Naaŋmen naane na boɔle o soba aŋa lɛ O naŋ da boɔle a Aarɔn.

⁵A lɛ meŋ zuiŋ la ka Kirista da ba duori O meŋɛ a leɛ Naaŋmen bagmaalkare neŋkpoŋ, kyɛ a soba na naŋ da kaa-iri O la da yeli ko O: “Fo waa la N Bidɔɔ, zenɛ ka N dɔge fo”,

⁶O da la yeli la a zie kaŋ meŋ: “Fo waa la Naaŋmen bagmaale wederɛ tegitegilɛ, a Mɛlekizɛdɛk tuuluŋ sori poɔ.”

⁷A Yeezu teŋɛzu nyɔvore saŋ, O da puoree la ane sɔroo, a ŋmɛ kpɛlle a ŋma nentaŋ a ko a soba na naŋ na toɔ̃ faa O yi ne kũũ poɔ, ka O da kyɛlle woŋ O yɛlɛ a O emmo ane O meŋɛ sigruu zuiŋ.

⁸Aneazaa ka O da waa la Bidɔɔ, O da zanne la noɔre sagoo a yi a dɔgɛɛ O naŋ da nyɛ poɔ.

⁹Ba naŋ pãã da wa e ka O tori baare, O da leɛ la faabo naŋ ba taa baaroo yiibu zie a ko banaŋ zaa naŋ sagra O noɔre,

¹⁰Naaŋmen naŋ da kaa-iri O ka O e bagmaalkare neŋkpoŋ a Mɛlekizɛdɛk tuuluŋ sori poɔ zuiŋ.

¹¹A kyaare ne a yeli ŋa, te taa la yɛlɛ yaga naŋ e kpeɛŋaa ka te manne a tɛgɛ ko yɛ, yɛ naŋ e salala ne yɛlɛ tɛgɛ bammo zuiŋ.

¹²Bonso, a naŋ wa ta ŋaa, a da seŋ ka yɛ waa wulwulibo, kyɛ ka yɛ naŋ boɔrɔ ka neɛ la wuli yɛ a Naaŋmen yelbiri zannoo piiluu yelbie. A naŋ da seŋ ka yɛ dire saabo, yɛ naŋ kyɛnɛ nyuuro la beroŋ koɔ̃.

¹³Bonso, neɛ na zaa naŋ naŋ nyuuro beroŋ koɔ̃, a soba naŋ waa la bibile, a ba kyele a na baŋ yelvelaa ane faaloŋ tɛɛtɛɛ.

¹⁴Saabo waa la noba naŋ baa bondiraa, a banaŋ yɛŋ naŋ kyele a yɛlɛ ba naŋ wuli ba, ka ba baŋ yelvelaa ane faaloŋ tɛɛtɛɛ.