Read Southern Dagaare Hib 9 Bible Online

Hib 9 - Southern Dagaare bible

Hib 9

¹Pampana, a nɔ-eŋnaa dɛndɛŋ soba taa la puoruu dɔlɔ ane a teŋɛzu puoruu zie.

²Bonso, ba da ti la sege, ka fentel-daa, tabole ane a boroboro ba naŋ de ko Naaŋmen be a dɛndɛŋ sege poɔ. Ona la ka ba boɔlɔ a Zisoŋ.

³A patiisa ayi soba puoriŋ, sege da be la be ka ba da boɔlɔ Zisonne zaa Zisoŋ.

⁴Naaŋmen salema bagmaalkuuri ba naŋ maŋ nyege a ensɛnse da be la o poɔ ane a nɔ-eŋnaa daga ba naŋ de salema lanne ne o poɔ lamboe zaa. Duulee naŋ taa a maana[11] ane a Aarɔn daŋgbale naŋ torɔ yire gbɛnne ane a nɔ-eŋnaa Kusi-pane da be la a nɔ-eŋnaa daga ŋa poɔ.

⁵A nɔ-eŋnaa daga zu da taa la puubu malekere ka a kyigi pɔge a nembaalonzoe dakogi zusogɔ. Te koŋ baŋ manne a boma ŋa yɛlɛ nɛnɛ pampana.

⁶A yɛlɛ ama naŋ wa nare biŋ baare, a Naaŋmen bagmaale wederebɛ maŋ kpɛ la a sege dɛndɛŋ na poɔ bebiri zaa, a tonɔ ba bagmaale tuulo feroo toma.

⁷Kyɛ a Naaŋmen bagmaalkare neŋkpoŋ yoŋ la da maŋ kpɛ a sege ayi soba poɔ dayeni yoŋ, yuoni zaa poɔ, o naŋ da maŋ wa de zẽẽ maale ne bagre a peere ne o meŋɛ yelbebe ane a noba yelbebe ba naŋ ba baŋ kyɛ e.

⁸A yeli ŋa eŋɛ, a Vooroŋ Soŋ wuli ka a zisoŋ zie sori naŋ ba yuo sɛre, a saŋ na zaa poɔ a sege dɛndɛŋ soba naŋ naŋ kyɛnɛ are.

⁹A sege dɛndɛŋ soba ŋa la a saŋ ŋa yelmannaa, a saŋ na ba naŋ maŋ terɛ kyɔɔtaare kyɛ maala bagre naŋ koŋ baŋ vɛŋ ka puoripuoro teɛroŋ tori o zaa,

¹⁰kyɛ kaara bondiraa ane bonnyuuri yoŋ ane yelfaare dɛgre peeroo ane sobie naŋ kyaare a eŋɛ la ka ba da biŋ a na te ta saŋ ba naŋ na sɛgre yɛlɛ ka a are velaa.

¹¹Kyɛ a Kirista naŋ da wa, a waa a bonveɛle na naŋ waa Naaŋmen bagmaalkare neŋkpoŋ, o pãã tu la a sege naŋ e kpoŋ yaga kyɛ veɛlɛ o zaa (nuuri naane ka ba maale ne o, a tɛgɛ la: o ba e teŋɛzu bon-iraa),

¹²a kpɛ a Zisoŋ Zie dayeni yoŋ. O da ba de boore ane naabilii zẽẽ kpɛ ne, kyɛ O meŋɛ zẽẽ la ka O da de kpɛ ne, a pãã nyɛ nyɔvore naŋ ba taa baaroo faabo.

¹³Bonso, ka boore ane naadɛɛ zẽẽ, a de ne naasaraa tɛmpɛloŋ meroo da maŋ pɛge banaŋ naŋ dɛge ne yelfaare ka ba leɛ veɛlɛ,

¹⁴wola ka a Kirista zẽẽ O naŋ tu a Vooroŋ Soŋ naŋ ba taa baaraa zie a de O meŋɛ naŋ ba taa saanaa zaa ko Naaŋmen koŋ baŋ maale a te sukyie yaga zaa a yi ne yɛlɛ naŋ ba taa tɔnɔ zie ka te na toɔ̃ puoro a Naaŋmen-vore!

¹⁵A yeli ŋa zuiŋ la so ka a Kirista e a nɔ-eŋ paalaa yelmaala, ka ka a banaŋ ba naŋ boɔle na toɔ̃ nyɛ a noɔre naŋ ba taa baaraa ba naŋ eŋ gbandiruŋ.[12] Bonso, kũũ koɛ la a faa ba yi ne a dɛndɛŋ nɔ-eŋnaa yelfaare poɔ.

¹⁶Neɛ naŋ eŋ noɔre kyaare ne o kũũ puori boma pommu, a ferɛɛ la ka ba wuli ka a soba naŋ eŋ a noɔre sereŋ kpie la.

¹⁷A soba kũũ puoriŋ saŋ yoŋ la ka a noɔre na baŋ toŋ toma, bonso, a noɔre ba tonɔ a o soba nyɔvore saŋ.

¹⁸Lɛnso ka a nɔ-eŋnaa dɛndɛŋ soba da koŋ baŋ biŋ ka zẽẽ ba kyiri.

¹⁹Bonso, a saŋ na Moozul naŋ da maŋ wa manne a Naaŋmen nɔɛ zaa ko a noba zaa kyaare ne a bege, o da maŋ de la naabilii ane boore zẽẽ ane koɔ̃ a pãã de pekɔɔloŋ zeere leŋ ne bilɛɛma-mun-eɛraa[13] a mere ne a bege gane ane a noba zaa,

²⁰a yele, “A nɔ-eŋnaa zẽẽ la a ŋa Naaŋmen naŋ biŋ ko yɛ.”

²¹A lɛ ne o zu la ka o da maŋ de a zẽẽ mere ne a sege ane a bagmaale tontomboma zaa.

²²Serɛzaa, a Naaŋmen bege poɔ, a boma yaga zie zaa ka ba da maŋ peere ne zẽẽ, kyɛ ka zẽẽ ba kyiri, yelbebe sudi meŋ ba kyebe.

²³A lɛ zuiŋ la ka a da fere ka ba maŋ e a ŋaa a peere a boma naŋ manne ne tenvelaa[14] boma, kyɛ a tenvelaa boma meŋɛ eŋ boɔrɛɛ bagmaale naŋ gaŋ ama.

²⁴Bonso, a Kirista da ba kpɛ a zisoŋ zie ba naŋ de nensaalba nuuri maale ne ka o waa a tenvelaa bon-tɔgle-maalaa meŋɛ, kyɛ O da kpɛ la tenvelaa meŋɛ, a pãã na maŋ are a Naaŋmen niŋesogɔ te zuiŋ.

²⁵Kyɛ O koŋ de O meŋɛ maale ne bagre bie la bie zaa aŋa a Naaŋmen bagmaalkare neŋkpoŋ naŋ da maŋ kpɛ a Zisoŋ Zie yuoni la yuoni zaa ne zẽẽ naŋ ba e o meŋɛ zẽẽ.

²⁶Bonso, ka a naŋ da waa lɛ, a da na seŋ ka O woŋ tuo gbɛɛ yaga a yi a teŋɛ piiluu saŋ zaa. Kyɛ lɛ a naŋ waa, O wa la dayeni yoŋ a bebi-baare saŋ ka O de O meŋɛ maale bagre ka a te yelbebe nyɛ sudi.

²⁷A ŋa lɛ a naŋ sɛgre biŋ ka nensaalba maŋ kpi dayeni yoŋ kyɛ ka a lɛ puoriŋ ka ba di ba sɛrɛɛ,

²⁸lɛ la ka Kirista da de O meŋɛ maale bagre dayeni yoŋ ka O de neŋyaga yelbebe bare. O na la leɛ wa la a boyi soba kyɛ a koŋ e yelbebe zuiŋ, kyɛ O na wa la ka O faa banaŋ naŋ eŋ faŋ a kyɛllɛ O.