Read Southern Dagaare 1 Pit 3 Bible Online

1 Pit 3 - Southern Dagaare bible

1 Pit 3

¹Pɔgebɔ, a lɛ ne o zu, yɛ sigre yɛmenne korɔ yɛ serebɛ, ka lɛ vɛŋ ka a serebɛ mine naŋ ba sage de Naaŋmen yɛlɛ na sage de O yɛlɛ ka a pɔgeba gba ba yeli yelzaa ko a serebɛ,

²ka ba naŋ wa nyɛ a ba pɔgeba tonveɛle ane ba emmo.

³Yɛ ta vɛŋ ka yɛ veɛloŋ waa yeŋe veɛloŋ aŋa yɛ zuri palloo, salema boma yɛroo bee bonveɛle suubu;

⁴kyɛ yɛ vɛŋ ka a yɛ veɛloŋ yi a yɛmenne eroŋ naŋ veɛlɛ tegitegilɛ, a waa baaloŋ, a ba dɔɔnɔ. A ŋaa la veɛloŋ Naaŋmen niŋesogɔ.

⁵A ŋaa la ka a dakoroŋ saŋ pɔgsonne naŋ da de ba teɛretɔroo[5] eŋ Naaŋmen eŋɛ da maŋ vɛŋ ka ba veɛloŋ waa. Ba da maŋ sigre la bamenne korɔ ba serebɛ.

⁶A lɛ la ka Saara da sagra Aboraham noɔre a da maŋ boɔle o daana. Yɛ leɛ la o pɔgeyaare, saŋ na zaa yɛ naŋ wa erɛ velaa a ba zoro dabeɛ̃.

⁷Serebɛ, a lɛ ne o zu meŋ, yɛ kpeɛrɛ ne yɛ pɔgeba, a eŋnɛ ba, yɛ naŋ baŋ ka ba waa la bambaalba zuiŋ, bonso, ba meŋ waa la a Naaŋmen nyɔvore naŋ waa kyɔɔtaa gbandiribe.[6] Lɛ la ka yelzaa koŋ pigi a yɛ puoruu.

⁸A baaraa zaa, yɛ zaa yɛ taa teɛroŋ yeni, a soŋnɔ banaŋ naŋ be tuo poɔ, a nɔnɔ taa, a taa nimibaaloŋ ne taa ane Sigruumilluu.

⁹Yɛ ta leɛ yɔɔ neɛ naŋ e yɛ faa ne faaloŋ bee a leɛ to neɛ naŋ to yɛ, kyɛ yɛ maŋ leɛ yɔɔ neɛ naŋ sãã yɛ ne maaloo. A ŋaa eŋɛ la ka Naaŋmen da boɔle yɛ ka ka yɛ na di O maaloo gbandiruŋ.[7]

¹⁰Bonso: “Banaŋ naŋ boɔrɔ nyɔvore, a boɔrɔ ka ba nyɛ bebi-sonne, seŋ ka ba gu ba nɔɛ yi yelfaare yeluu poɔ kyɛ bare zirii ŋmaabo.

¹¹Ba leɛ ba puori ko yelfaare eebo kyɛ erɛ velaa; a boɔrɔ emmaaroŋ kyɛ moɔrɔ ka ba bɔ nyɛ o.

¹²Bonso, a Daana nimie pigre la a nemmenne, kyɛ ka O tobo yuo kyaare a ba puoruu. Kyɛ a Daana zɔɔrɔ ne la banaŋ naŋ erɛ yelfaare.”

¹³Pampana, nembuo mɔɔ la na e yɛ yelfaa, ka yɛneŋ wa kyerɛ ka yɛ e yɛlɛ naŋ e velaa?

¹⁴Kyɛ ka yɛneŋ gba dire dɔgɛɛ yɛ naŋ erɛ yelveɛle zuiŋ, yɛ nyɛ la maaloo. Yɛ ta zoro neɛzaa dabeɛ̃ bee a vɛŋ ka ba tɔ dabeɛ̃ eŋ yɛ,

¹⁵kyɛ yɛ eŋnɛ a Kirista, a yɛ Daana, yɛ sukyie pooreŋ. Yɛ nare tegitegilɛ ka yɛ manne ko neɛ na zaa naŋ wa soore yɛ yeli kyaare ne a teɛretɔroo yɛ naŋ taa,

¹⁶kyɛ yɛ maŋ manne a yɛlɛ ne sumaaroŋ ane emmo. Yɛ taa teɛroŋ sonne ka ka ba naŋ wa toorɔ yɛ, ka vi kpɛ a banaŋ naŋ erɛ yɛ faa a yɛ yelveɛle yɛ naŋ erɛ a Kirista zuiŋ.

¹⁷Bonso, ka yɛneŋ di dɔgɛɛ naŋ e Naaŋmen poboɔbo a yɛ yelveɛle zuiŋ, a naŋ seɛ yɛ naŋ di dɔgɛɛ yɛ yelfaare eŋɛ.

¹⁸Bonso, a Kirista meŋ da kpi la dayeni yoŋ a te yelbebe zuiŋ, nemmeŋɛ naŋ kpi ko nenfaare, ka ka O taa yɛ gaa ne Naaŋmen zie. Ba da ko O la eŋgane poɔ, kyɛ da e ka O voorɔ a seeloŋ poɔ.

¹⁹A lɛ poɔ la ka O da gaa te kanne a kpeemɛ a ba pɔgebo die poɔ.

²⁰Bana la da ba sage de a Naaŋmen yɛlɛ a saŋ na Naaŋmen naŋ da taa kannyiri ne ba a Nowa gbori maaloo saŋ. Noba fẽẽ lɛ, noba banii yoŋ la da nyɛ faabo a kɔmpiiri saŋ.

²¹A koɔ̃ ŋa da e la yelmannaa naŋ are ko suobu deebo naŋ maŋ faa yɛ pampana. A ba e ŋa eŋgane dɛgre sobaroo la, kyɛ a noɔre yɛ naŋ eŋ ko Naaŋmen ne teɛroŋ velaa a Yeezu Kirista kũũ leɛ-iruu eŋɛ la.

²²Ona la gaa tenvelaa,[8] a te be Naaŋmen nuduluŋ seŋ, a dire naaloŋ a malekere, a tenvelaa neŋkpeɛne ane faŋ deme zu.