Read Southern Dagaare 2 Pit 1 Bible Online

2 Pit 1 - Southern Dagaare bible

2 Pit 1

¹Maa Saamon Piita, naŋ waa Yeezu Kirista tontonɔ ane O apostolii la sɛgrɛ a lɛtɛ ŋa korɔ banaŋ naŋ nyɛ a yeldeebo naŋ e bon-yuori aŋa te deni a yi a mennoŋ naŋ be a te Naaŋmen ane te Daana Yeezu Kirista zie:

²Ka Naaŋmen garaaseɛ ane maaroŋ be yɛ zie yaga lɛ a yi a bammo yɛ naŋ taa a Naaŋmen ane a te Daana Yeezu Kirista eŋɛ.

³A O Naaŋmennoŋ kpeɛ̃õ ko te la bonzaa a naŋ seŋ ka te taa te nyɔvore poɔ ane Naaŋmennoŋ a yi te naŋ baŋ a soba na naŋ boɔle te a O meŋɛ puubu ane O mennoŋ eŋɛ.

⁴A lɛ zuiŋ, O tu la a boma ama zie a eŋ noɔre naŋ taa yuori kyɛ e kpoŋ yaga ko te, ka ka yɛ tu a zie a zo yi a faaloŋ na naŋ be a teŋɛzu a vɔlfaare zuiŋ, a pãã toɔ̃ poɔ a Naaŋmen waaloŋ poɔ.

⁵A yeli ŋa zuiŋ, yɛ mɔ yɛ moɔbo zaa a de yelveɛle eebo teɛ ne a yɛ yeldeebo, a de a yɛ yelbammo teɛ ne a yɛ yelveɛle,

⁶a de meŋɛ-bantaabo teɛ ne a yelbammo, a de kannyiri teɛ ne meŋɛ-bantaabo, a de kannyiri diibu teɛ ne Naaŋmennoŋ,

⁷a de yɔɔloŋ nɔmmo teɛ ne a Naaŋmennoŋ, a de nɔmmo teɛ ne a yɔɔloŋ nɔmmo.

⁸Bonso, ka a yɛlɛ ama wa erɛ yɛ poɔ a gɛrɛ niŋe, a na e la ka yɛ toɔnɔ tonɔ tonveɛle a te Daana Yeezu Kirista bammo yɛ naŋ taa eŋɛ.

⁹Bonso, soba na zaa naŋ ba taa a yɛlɛ ama ba nyɛrɛ tɔɔre kyɛ o zɔŋɛɛ la, kyɛ inni a dɛndɛŋ yelbebe ba naŋ da pɛge bare yɛlɛ.

¹⁰Azuiŋ, n yɔɔmine ane n yɔɔpuuli, yɛ eŋ faŋ yaga zaa ka yɛ wuli a yɛ boɔlaa ane ba naŋ kaa-iri yɛ. Bonso, ka yɛnee wa erɛ a ŋaa, yɛ daŋ koŋ baŋ ŋmɛ gbɛre le.

¹¹A ŋaa poɔ la ka yɛ na nyɛ a sori kpɛ a te Daana ane te Faara Yeezu Kirista naaloŋ naŋ ba taa baaraa poɔ.

¹²Azuiŋ, N boɔrɔ la ka N leɛ-teɛrɛ yɛ a yɛlɛ ama tegitegilɛ, aneazaa ka yɛ daŋ baŋ a la, kyɛ are a yelmeŋɛ ba naŋ yeli ko yɛ poɔ kpeɛŋaa.

¹³N naŋ naŋ be a teŋɛzu kyɛ a voorɔ, a soma la ka N maŋ leɛ-teɛre yɛ,

¹⁴N naŋ baŋ ka a koŋ kɔɔre kyɛ ka N kpi zuiŋ, bonso, a te Daana Yeezu Kirista sereŋ eɛɛ la ka a sãã weliweli ko ma.

¹⁵N na mɔ la n moɔbo zaa ka ka maa wa leɛ gaa, ka yɛ maŋ toɔ̃ leɛ-teɛre a yɛlɛ ama vuo zaa poɔ.

¹⁶A ba e ŋa nyaayɛlɛ la ka te da de manna ne sensellɛ korɔ yɛ, te naŋ da yele a te Daana Yeezu Kirista kpeɛ̃õ ane O leɛ-waabo yɛlɛ korɔ yɛ, kyɛ temenne nimie la da nyɛ a O naaloŋ veɛloŋ.

¹⁷Bonso, O da nyɛ la emmo ane puubu yi a Saa Naaŋmen zie saŋ na a kɔkɔre na naŋ da yi a Naaŋmen Naaloŋ Veɛloŋ a yele, “A N Bidɔɔ la a ŋa, N Poyɛŋ Bie, N poɔ pɛle ne O la yaga.”

¹⁸Temenne da woŋ la a kɔkɔre ŋa ka o yi Sazu wa, te ne O naŋ da be a taŋsoŋ zu.

¹⁹Lɛnso, te nyɛ la a Ŋmen-yelmanneba yelyelii ka a sereŋ waa lɛ. A pãã seŋ ka yɛ mɔ a eŋ toori velaa kyɛlle a yeli ŋa aŋa fentelɛ naŋ kyaane lige poɔ, a te ta saŋ na zie naŋ wa vɛlɛ kyɛ ka zinyaakyeŋkyoɔlaa puri yɛ sukyie poore.

²⁰A ferɛɛ la ka yɛ daŋ baŋ a yeli ŋa tɛgɛ, ka a Ŋmen-yelmanneba yelyelii kanzaa naŋ be a gansoŋ poɔ ba e ba kanzaa meŋɛ yelyelii,

²¹bonso, a Ŋmen-yelmanna yelyelii kanzaa ba yi nensaala zie, kyɛ a Vooroŋ Soŋ la ko ba faŋ ka ba yele a Naaŋmen yelbie.