Read Southern Dagaare 2 Pit 2 Bible Online

2 Pit 2 - Southern Dagaare bible

2 Pit 2

¹Kaŋwaa Ŋmen-yelmanneba mine meŋ da yi la a noba poɔ aŋa lɛ zirii wulwulibo naŋ na wa be yɛ poɔ, a sɔgle taa ba kankanbie naŋ na wa ne sããmo. Ba gba na zagre la a Neŋkpoŋ naŋ da da ba bare, a pãã bɔ sããmo ko bamenne wieouŋ zaa.

²Kyɛ anealɛzaa, noba yaga na tu la a ba yelfaare sobie, ka noba erɛ a yelmeŋɛ sori laara a ba zirii kannoo zuiŋ.

³A ba bombɔ-gaŋne poɔ, ba na neɛ yɛ la ne ba bɛllɛ yelbie. Naaŋmen di la ba sɛrɛɛ sanzaa, ka ba dɔgroŋ ane ba sããmo peɛle.

⁴Ka Naaŋmen da ba bare a malekere na naŋ da e yelbieri weɛlɛ, kyɛ da lɔɔ ba eŋ dazugovũũ poɔ, a leŋ ba ne banzɔlɔ biŋ ligruŋ kpoŋ poɔ a na te ta a sɛrɛɛdiibu saŋ,

⁵ka O naŋ da dɔgre a dakoroŋ saŋ teŋɛ, aneazaa ka O da faa la Nowa ane noba mine bayopoi, a mennoŋ yelmanna, a saŋ na Naaŋmen naŋ da e ka kɔmpiiri wa ŋmɛ a nenfaare teŋɛ;

⁶ka O naŋ da e ka a Sodom ane Gomora tenne di vũũ leɛ tɛmpɛloŋ a wɛ, ka a lɛ e wuluu kyaare ne bon naŋ waana a nenfaare zu.

⁷Naaŋmen da faa la Lɔte naŋ da e nemmeŋɛ, a Lɔte poɔ naŋ da sãã ne a tookoŋwoŋyɛlɛ deme nemboŋyɛlɛ

⁸(bonso, a nemmeŋɛ ŋa naŋ da maŋ be a nenfaare poɔ bebiri zaa a da nyɛrɛ kyɛ wono a yelfaare ba naŋ maŋ erɛ, o poɔ da maŋ sãã la yaga),

⁹lɛ la ka a Daana baŋ lɛ O naŋ na maŋ faa a nemmenne yi ba yelwonni poɔ kyɛ eŋ a nenfaare dɔgroŋ poɔ te ta a sɛrɛɛdiibu daare;

¹⁰a gaŋ a zaa, banaŋ naŋ nɔŋ eŋgane vɔlfaare yɛlɛ kyɛ ba eŋnɛ nembɛrɛ. A ba zukuoŋ-yɛlɛ zuiŋ, ba da ba zoro dabeɛ̃ ka ba to noba naŋ taa gyeremɛ zoma,

¹¹kyɛ malekere naŋ waa kpoŋ a taa faŋ ane kpeɛ̃õ, da ba to a nenfaare yosãã zoma a Daana niŋesogɔ.

¹²Kyɛ a noba bama waa ŋa donne naŋ ba taa teɛroŋ, a maŋ bonnɔ erɛ yɛlɛ, ka ba dɔge a na nyɔge ko. Ba maŋ toorɔ la zoma yɛlɛ ba naŋ ba baŋ a tɛgɛ, kyɛ ka ba naŋ wa sãã a bon-iri na, ba meŋ na sãã la,

¹³a nyɛ dɔgɛɛ a ba yelfaare zuiŋ. Ba maŋ de la yelfa-dɛgɛ ka a e ba popɛle yɛlɛ ŋmenaa saŋ. Ba e la noba naŋ mɔge dɛgre a erɛ vi yɛlɛ, a maŋ erɛ dɛgre yɛlɛ ka ba naŋ wa laŋ dire tige ne yɛ.

¹⁴Ba eŋ la peɛ̃mo toma nimie, a ba bala yelbieri eebo. Ba maŋ bɛlle nyɔge la banaŋ yeldeebo naŋ ba e kpeɛŋaa. Ba milli ne la bombɔ-gaŋne. Ba waa la noba ba naŋ kaa-eŋ!

¹⁵Ba bare la a sobiri naŋ tori kyɛ bɔre tu a Bɔsɔ bidɔɔ Balaam sobiri. Ona la nɔŋ san-yɔɔ naŋ yi yelfaare toma tommo eŋɛ.

¹⁶Ba da nyare la o zu a o faaloŋ zuiŋ, ka boŋɔ naŋ ba yele yɛlɛ da yeli yɛlɛ ne nensaala kɔkɔre a pigi a Ŋmen-yelmanna yɛŋya-yɛlɛ bare.

¹⁷Ba waa la bulnimiri naŋ ba yire koɔ̃ ane uli sasekpeɛŋaa naŋ fuuro gɛrɛ ne. Ba na la ka ba bare a ligruŋ kpoŋ kyɛllɛ ne.

¹⁸Ba maŋ yeli la yelbi-bɛrɛ naŋ ba taa tɛgɛ kyɛ de eŋgane vɔlfaare yɛlɛ bɛlle ne noba na naŋ da zo yi a banaŋ naŋ da be tuluu poɔ.

¹⁹Ba maŋ eŋ la noɔre ko ba ka ba na e la ka ba so bamenne kyɛ ka bamenne waa yelfaare gbaŋgbaare. Bonso, noba maŋ e la gbaŋgbaare ko bon naŋ toɔ̃ ba.

²⁰Bonso, banaŋ naŋ zo yi a teŋɛzu yelfaare poɔ, ba naŋ wa baŋ a te Daana ane a te Faara Yeezu Kirista zuiŋ, kyɛ wa leɛ gaa te kpɛ a poɔ, ka a toɔ̃ ba, a na waa la faa yaga ko ba gaŋ a dɛndɛŋ na.

²¹Ka ba naŋ da ba daŋ baŋ a mennoŋ sori togitogi zaa, a da na seɛ ko ba la a gaŋ ba naŋ wa baŋ a yelmeŋɛ sori kyɛ leɛ puori a bare a Naaŋmen nɔsoŋ ba naŋ da de ko ba.

²²A yɛlɛ eɛɛ ba zie a kyaare ne lɛ a sekpɔgre naŋ yeli: “A baa leɛ di la o meŋɛ tiiri,” ka, “a dobaa ba naŋ so koɔ̃ leɛ gaa meele mɛmɛrɛɛ.”