Read Southern Dagaare 1 Gyn 2 Bible Online

1 Gyn 2 - Southern Dagaare bible

1 Gyn 2

¹N bibiiri, N sɛgrɛ la a yɛlɛ ama korɔ yɛ ka ka yɛ na ta erɛ yelbieri. Kyɛ ka yɛ kanzaa wa e yelbieri, te taa la soŋnɔ a Saa zie. Ona la Yeezu Kirista, a nemmeŋɛ.

²Ona la de O nyɔvore maale a te yelbebe sudi bagre, a te yoŋ yelbebe sudi naane kyɛ a tendaa noba zaa yelbebe sudi eŋɛ la.

³Pampana, yeli ŋa la na wuli ka te sereŋ baŋ O la, ka tenee wa sagra a O nɔɛ.

⁴Soba na zaa naŋ yeli, “N baŋ O la,” kyɛ ba sagra a O nɔɛ, waa la zirŋmaara, ka a yelmeŋɛ ba kye o zie.

⁵Kyɛ soba na zaa naŋ sagra derɛ O yɛlɛ, a soba ŋa zie la ka a Naaŋmen nɔmmo sereŋ nyɛ paaloo velaa. A ŋaa zie la ka te na sereŋ baŋ ka te be la O poɔ:

⁶soba na zaa naŋ yeli, “N laŋ ne O la,” seŋ ka o tu a sori na O naŋ da tu.

⁷N poyɛŋ noba, nɔpaalaa naane ka N sɛgrɛ korɔ yɛ, kyɛ a nɔkoraa na yɛ naŋ da taa yi a piiluu saŋ la. A nɔkoraa ŋa la a yelbiri na yɛ naŋ da woŋ.

⁸Kyɛ N sɛgrɛ la nɔpaalaa naŋ e yelmeŋɛ O poɔ ane yɛ meŋ poɔ korɔ yɛ, bonso, a ligruŋ tɔlɔ gɛrɛ la kyɛ ka a yelmeŋɛ kyaane a deɛ kyaana.

⁹Soba na zaa naŋ yeli, “N be la a kyaane poɔ,” kyɛ kyiiri o yɔɔ bee o yɔɔpuulee naŋ kyɛnɛ be la a lige poɔ.

¹⁰Soba na zaa naŋ nɔŋ o yɔɔ bee o yɔɔpuulee be la a kyaane poɔ, ka yelzaa ba kyebe na e ka o soba ŋmɛ gbɛre le.

¹¹Kyɛ soba na zaa naŋ kyiiri o kiristabi-tɔsoba be la ligruŋ poɔ, a kyɛnɛ ligruŋ poɔ, a ba baŋ benee o naŋ gɛrɛ, bonso, a ligruŋ eɛɛ la ka o be zɔnnoŋ poɔ.

¹²N bibiiri, N sɛgrɛ korɔ yɛ la, bonso, a yɛ yelbebe nyɛ la sudi a Yeezu yuori zuiŋ.

¹³N saamine, N sɛgrɛ korɔ yɛ la, bonso, yɛ baŋ la a soba na naŋ bebe a yi a piiluu saŋ. Baapaalba, N sɛgrɛ korɔ yɛ la, bonso, yɛ zɔɔtoɔ̃ la a faaloŋ soba.

¹⁴Bibiiri, N sɛgrɛ korɔ yɛ la, bonso, yɛ baŋ la a Saa. Saamine, N sɛgrɛ korɔ yɛ la, bonso, yɛ baŋ la a soba na naŋ bebe a yi a piiluu saŋ. Baapaalba, N sɛgrɛ korɔ yɛ la, bonso, yɛ taa la faŋ ka a Naaŋmen yelbiri be yɛ poɔ, kyɛ ka yɛ zɔɔtoɔ̃ a faaloŋ soba.

¹⁵Yɛ ta nɔŋ a teŋɛzu, bee a boma naŋ be o poɔ. Banaŋ naŋ nɔŋ a teŋɛzu, a Saa nɔmmo ba kye ba zie,

¹⁶bonso, a boma na zaa naŋ be a teŋɛzu (a eŋgane yelboɔre, boma nimie naŋ nɔŋ ka a nyɛrɛ, bondaanoŋ pɔloo) kanzaa ba yi a Saa zie, kyɛ a yi la a teŋɛzu.

¹⁷Kyɛ a teŋɛzu ane o poɔ boma zaa nensaalba naŋ boɔrɔ tɔlɔ gɛrɛ la, kyɛ banaŋ naŋ erɛ a Naaŋmen poboɔbo na bebe la tegitegilɛ.

¹⁸N bibiiri, a bebi-baaraa saŋ taɛ la! Aŋa yɛ naŋ da woŋ ka a zirii kirista waana la, pampana, a zirii kirista mine yaga waɛ la. A ŋaa zie la ka te baŋ ka a baaraa saŋ taɛ la.

¹⁹Ba da yi la te poɔ, kyɛ ba da ba e te noba, bonso, ka ba naŋ da e te noba, ba da na kyɛnɛ be la te poɔ. Kyɛ ba naŋ yi a te poɔ gaa wulee weliweli ka ba kanzaa ba waa te neɛ.

²⁰Kyɛ a Soŋ Soba da sɔ yɛ la kããsoŋ, ka yɛ zaa taa yelbammo.

²¹A ba e ŋa yɛ naŋ ba baŋ a yelmeŋɛ la so ka N sɛgrɛ korɔ yɛ, kyɛ yɛ naŋ baŋ a yelmeŋɛ zuiŋ la, a baŋ ka zirii zaa ba yire a yelmeŋɛ zie.

²²Aŋ la a zirŋmaara, ka a soba na naŋ ba sage ka Yeezu la a Kirista naane? A zirii kirista la ŋa, ona la a soba na naŋ zagre a Saa ne a O Bie.

²³Neɛ na zaa naŋ zagre a Bie ba taa a Saa, ka neɛzaa naŋ sage de a Bie yɛlɛ meŋ taa a Saa.

²⁴Yɛ vɛŋ ka a yɛlɛ yɛ naŋ da woŋ a piiluu saŋ be yɛ sukyie poɔ. Ka a yɛlɛ yɛ naŋ da woŋ a piiluu saŋ wa be yɛ sukyie poɔ, lɛ la ka yɛ pãã na be a Bie ane a Saa poɔ.

²⁵A bon ŋa la ka a Kirista da eŋ noɔre ka o na ko te la: nyɔvore naŋ ba taa baaraa.

²⁶N sɛgrɛ la a yɛlɛ ama korɔ yɛ a kyaare ne a banaŋ naŋ na wa bɛlle yɛ zuiŋ.

²⁷Yɛnee eŋ, a kããsoŋ soɔbo yɛ naŋ da nyɛ yi a Kirista zie be la yɛ eŋɛ. A lɛ zuiŋ a ba la fere ka neɛzaa la kanne yɛ. Kyɛ a O kããsoŋ soɔbo naŋ kanna yɛ a kyaare ne yelzaa naŋ e yelmeŋɛ, ka a ba e zirii, kyɛ yɛ be O poɔ aŋa lɛ O naŋ kanne yɛ.

²⁸N bibiiri, pampana, yɛ be a Kirista poɔ, ka ka Onaŋ wa sãã ka te na taa bambaare, ka vi ta kpɛ te O niŋesogɔ a O waabo saŋ.

²⁹Ka yɛnee baŋ ka a Kirista e la nemmeŋɛ, yɛ sereŋ na baŋ ka neɛzaa naŋ erɛ yɛlɛ ka a tori e la Naaŋmen bidɔgraa.