Read Southern Dagaare 1 Gyn 4 Bible Online

1 Gyn 4 - Southern Dagaare bible

1 Gyn 4

¹N poyɛŋ noba, yɛ ta sage de seɛ zaa yɛlɛ, kyɛ yɛ maŋ e a seere nyɛ ka a yi la Naaŋmen zie be, bonso, kaŋwaa Ŋmen-yelmanneba yaga yi kpɛ la a teŋɛzu.

²Ŋaa zie la ka yɛ na baŋ a Naaŋmen Vooroŋ: vooroŋ na zaa naŋ yeli ka Yeezu Kirista leɛ la nensaala, o yi la Naaŋmen zie,

³kyɛ vooroŋ na zaa naŋ yeli ka Yeezu ba yi Naaŋmen zie, o ba yi Naaŋmen zie. A zirii kirista vooroŋ ŋa yɛlɛ la ka yɛ da woŋ ka o waana la. Kyɛ pampana, o waɛ la baare.

⁴N bibiiri, yɛ yi la Naaŋmen zie, a zɔɔtoɔ̃ ba; bonso, a soba na naŋ be yɛ poɔ waa la kpoŋ gaŋ a soba na naŋ be a teŋɛzu.

⁵Ba e la a teŋɛzu noba, lɛnso ka bon ba naŋ yele waa a teŋɛzu yɛlɛ, ka a teŋɛzu noba pãã maŋ kyɛllɛ wono ba yɛlɛ.

⁶Te yi la Naaŋmen zie. Soba na zaa naŋ baŋ Naaŋmen maŋ kyɛlle woŋ la te yɛlɛ, kyɛ soba na zaa naŋ ba yi Naaŋmen zie ba kyɛllɛ te yɛlɛ. A ŋaa zie la ka te maŋ baŋ a yelmeŋɛ vooroŋ ane a tuluu vooroŋ.

⁷N poyɛŋ noba, yɛ e ka te nɔnɔ taa, bonso, nɔmmo yi la Naaŋmen zie. Neɛzaa naŋ taa nɔmmo, waa la neɛ Naaŋmen naŋ dɔge, ka o baŋ Naaŋmen.

⁸Soba na zaa naŋ ba taa nɔmmo ba baŋ Naaŋmen, bonso, Naaŋmen waa la nɔmmo.

⁹Ŋaa la ka a Naaŋmen nɔmmo da sãã te poɔ, Naaŋmen da toŋ la O Bidɔɔ yeni ka O wa a teŋɛzu, ka ka te na tu O zie a nyɛ nyɔvore.

¹⁰Ŋaa la nɔmmo: a ba e ŋa tenee la da nɔŋ Naaŋmen, kyɛ Ona la da nɔŋ te, a toŋ O Bie ka O wa leɛ te yelbebe sane bagmaale bon.

¹¹N poyɛŋ noba, a Naaŋmen naŋ pãã nɔŋ te a seŋ ŋaa, a seŋɛɛ la ka te meŋ nɔnɔ taa.

¹²Neɛzaa daŋ ba nyɛ Naaŋmen. Ka tenee wa nɔnɔ taa, Naaŋmen be la te poɔ, ka a O nɔmmo pãã e soŋ a te poɔ.

¹³A ŋaa zie ka te baŋ ka te be la Naaŋmen poɔ ka O meŋ be te poɔ, O naŋ ko te a O Vooroŋ Soŋ zuiŋ.

¹⁴Te nyɛɛ la kyɛ di danseɛ ka a Saa toŋ la a O Bidɔɔ ka O wa e a andonɛɛ Faara.

¹⁵Banaŋ zaa naŋ maŋ yeli ka Yeezu waa la Naaŋmen Bie, Naaŋmen maŋ be la ba poɔ ka ba meŋ be a Naaŋmen poɔ.

¹⁶Azuiŋ te baŋɛɛ la kyɛ sage a nɔmmo Naaŋmen naŋ nɔŋ te. Naaŋmen waa la nɔmmo, ka banaŋ zaa naŋ be nɔmmo poɔ be Naaŋmen poɔ, ka Naaŋmen meŋ be ba poɔ.

¹⁷Ŋaa la ka nɔmmo maŋ e soŋ a te poɔ: ka te na ta taa dabeɛ̃ a sɛrɛɛdiibu daare, bonso, a lɛ O naŋ waa, lɛ la ka te waa a teŋɛ ŋa zu.

¹⁸Dabeɛ̃ zaa ba kye nɔmmo poɔ, kyɛ nɔmmo naŋ e soŋ maŋ digi la dabeɛ̃ ka o yi. Bonso, dɔgroŋ la so ka dabeɛ̃ bebe, kyɛ neɛ na zaa naŋ zoro dabeɛ̃ ba taa nɔmmo naŋ e soŋ.

¹⁹Te nɔŋ O la, bonso, Ona la daŋ nɔŋ te.

²⁰Banaŋ naŋ yeli, “Te nɔŋ la Naaŋmen,” kyɛ kyiire ba yɔɔmine bee ba yɔɔpuuli waa la zirŋmaareba. Bonso, banaŋ naŋ ba nɔŋ ba yɔɔmine bee ba yɔɔpuuli ba naŋ maŋ nyɛ koŋ baŋ nɔŋ Naaŋmen ba naŋ ba nyɛ.

²¹A noɔre te naŋ de yi a Kirista zie la ŋa: banaŋ naŋ nɔŋ Naaŋmen seŋ ka ba nɔnɔ ba yɔɔmine ane ba yɔɔpuuli meŋ.