Read Southern Dagaare 1 Gyn 5 Bible Online

1 Gyn 5 - Southern Dagaare bible

1 Gyn 5

¹Neɛzaa naŋ sage de ka Yeezu la a Kirista waa la neɛ Naaŋmen naŋ dɔge. Neɛzaa naŋ nɔŋ a bidɔgrɔ maŋ nɔŋ la a bie meŋ.

²Ŋaa zie la ka te maŋ baŋ ka te nɔŋ la a Naaŋmen bibiiri, ka tenee wa nɔŋ Naaŋmen kyɛ sagra O nɔɛ.

³Bonso, a Naaŋmen nɔmmo la ŋa, ka te sagra a O nɔɛ. Kyɛ a O nɔɛ tuubu ba waa tuo,

⁴bonso, Naaŋmen naŋ dɔge neɛzaa maŋ zɔɔtoɔ̃ la a andonɛɛ. Kyɛ a kpeɛ̃õ na naŋ zɔɔtoɔ̃ a andonɛɛ la a te yeldeebo.

⁵Aŋ la maŋ zɔɔtoɔ̃ a andonɛɛ, ka neɛ naŋ sage de ka Yeezu waa la Naaŋmen Bie naane?

⁶Yeezu Kirista la a soba na naŋ tu koɔ̃ ane zẽẽ zie wa. A ba e koɔ̃ yoŋ, kyɛ koɔ̃ ane zẽẽ la. Kyɛ a Vooroŋ Soŋ la a dansedire, bonso a Vooroŋ Soŋ la a yelmeŋɛ.

⁷Dansediribe bata la bebe:

⁸a Vooroŋ, a koɔ̃ ane a zẽẽ, kyɛ a ba bata ŋa taa la noɔre yeni.

⁹Ka teneŋ derɛ nensaalba danseɛ, Naaŋmen danseɛ la e kpoŋ, bonso, a danseɛ Naaŋmen naŋ di ko a O Bie la ŋa.

¹⁰Banaŋ naŋ sage de a Naaŋmen Bie maŋ taa la a danseɛ ŋa ba sukyie poɔ. Banaŋ naŋ ba sage de Naaŋmen eɛɛ la ka O e zirŋmaara ne ba naŋ ba sage de a danseɛ O naŋ di kyaare ne a O Bie.

¹¹Kyɛ a danseɛ la ŋa: Naaŋmen ko te la nyɔvore naŋ ba taa baaraa, ka a nyɔvore ŋa be a O Bie poɔ.

¹²Soba na zaa naŋ taa a Bie taa la nyɔvore, ka soba na zaa naŋ ba taa a Naaŋmen Bie meŋ ba taa nyɔvore.

¹³N sɛgrɛ la a yɛlɛ ama korɔ yɛnee naŋ sage de a Naaŋmen Bie yuori, ka ka yɛ na baŋ ka yɛ taa la nyɔvore naŋ ba taa baaraa.

¹⁴Kyɛ bon naŋ so ka te ba taa dabeɛ̃ Naaŋmen niŋesogɔ la, ka tenee wa sɔre bonzaa naŋ tu O poboɔbo, O maŋ kyɛlle woŋ la.

¹⁵Ka tenee baŋ ka O maŋ kyɛlle woŋ la bonzaa te na maŋ sɔre, te baŋ ka te nyɛ la a bon te naŋ sɔre yi O zie.

¹⁶Ka fooŋ wa nyɛ fo yɔɔ bee fo yɔɔpuulee ka o erɛ yelbieri naŋ ba e kũũ yelbieri, puori sɔre Naaŋmen, O na ko o la nyɔvore; banaŋ yelbieri naŋ ba e kũũ yelbieri. Kyɛ yelbieri kaŋ bebe la a e kũũ yelbieri, ona yɛlɛ naane ka N yeli ka yɛ puori.

¹⁷Yelfaare zaa e la yelbieri, kyɛ yelbieri kaŋ bebe la a ba e kũũ yelbieri.

¹⁸Te baŋɛɛ la ka banaŋ Naaŋmen naŋ dɔge ba erɛ yelbieri, kyɛ a soba na Naaŋmen naŋ dɔge maŋ gu ba la taa ka a faaloŋ soba koŋ seene ba.

¹⁹Te baŋ ka te e la Naaŋmen bibiiri, kyɛ ka a andonɛɛ zaa be a faaloŋ soba kpeɛ̃õ puliŋ.

²⁰Te baŋ ka a Naaŋmen Bie waɛ la, a wa ko te yelbammo ka ka te na baŋ neɛ na naŋ waa a yelmeŋɛ soba. Kyɛ te be la a O Bie Yeezu Kirista naŋ e a yelmeŋɛ soba poɔ. O sereŋ waa la Naaŋmen ane nyɔvore naŋ ba taa baaroo.

²¹N bibiiri, yɛ gu yɛmenne yi tebɛ enne.