Read Southern Dagaare Yel 1 Bible Online

Yel 1 - Southern Dagaare bible

Yel 1

¹A yɛlɛ Naaŋmen naŋ iri wuli a Yeezu Kirista ka O de wuli a O tontonema bon naŋ koŋ kɔɔre kyɛ wa e. O da toŋ la O maleke ka o te e ka a O tontonɔ Gyɔɔn baŋ a yɛlɛ ama.

²A Gyɔɔn da di la a Naaŋmen yelbiri danseɛ a Yeezu Kirista naŋ da di ane a yɛlɛ na zaa o naŋ da nyɛ danseɛ.

³A soba na naŋ kanne a Ŋmen-yelmanna yelyelii ama ka a yi gboligboli na nyɛ la maaloo, ka banaŋ naŋ woŋ kyɛ de bonna ba naŋ sɛge meŋ nyɛ maaloo; bonso, a saŋ tara la.

⁴Maa Gyɔɔn la sɛgrɛ korɔ a puoruu laŋne yie ayopoĩ naŋ be a Ezeya poɔ: Ka a Naaŋmen naŋ bebe, a Onaŋ naŋ da bebe kyɛ na la wa garaaseɛ ne maaroŋ be yɛ zie. Ka a seere ayopoĩ naŋ be a O nakogi niŋesogɔ meŋ ko yɛ garaaseɛ ane maaroŋ.

⁵Ka a Yeezu Kirista, a yelmeŋɛ dansedire, a bidɛndɛŋ naŋ leɛ-iri yi a kũũ poɔ a kyɛ di naaloŋ a tendaa namine zaa zu ko yɛ garaaseɛ ane maaroŋ. Ka a Onaŋ naŋ nɔnɔ te a kyɛ faa te yi a te yelbebe poɔ ne a O zẽẽ,

⁶a kyɛ e ka te waa namine boorɔ, Naaŋmen bagmaale wederebɛ, a tonɔ korɔ a O Naaŋmen ane a O Saa nyɛ puubu ane kpeɛ̃õ tegitegilɛ. Ameena.[1]

⁷Yɛ nyɛ! O yi la a sagama poɔ waana; ka nensaala zaa na nyɛ O, haali a banaŋ naŋ kyɔge O ne a kpane;[2] kyɛ a tendaa nemboorɔ zaa na koŋ la O yɛlɛ. A lɛ la ka a na waa. Ameena.

⁸A Daana Naaŋmen la yele, “Maa la a Alefa ane a Omega,”[3] a soba na naŋ bebe, a soba na naŋ da bebe a kyɛ na la wa, a Kpeɛ̃õ Zaa Soba.

⁹Maa Gyɔɔn, a yɛ yɔɔ naŋ laŋ ne yɛ a Yeezu poɔ ka te zaa laŋ dire dɔgɛɛ, a laŋ naaloŋ, a laŋ dire kannyiri, da be la mandoba kaŋ naŋ be a mane sogɔŋ ka ba da boɔlɔ Patmɔse, a Naaŋmen yelbiri ane a Yeezu danseɛ zuiŋ.

¹⁰A Vooroŋ Soŋ da wa sigi ma la a Daana bebiri daare kyɛ ka N da woŋ kɔkɔre naŋ yire gboligboli a n puoriŋ aŋa eele,

¹¹a yele, “Sɛge a yɛlɛ fo naŋ nyɛ eŋ gane poɔ a tere ka ba te ko a puoruu laŋne yie ayopoĩ naŋ be a Efesu poɔ, a Semaana poɔ, a Pɛgamu poɔ, a Taatira poɔ, a Saadise poɔ, a Filadɛlfiya poɔ ane a Laodisiya poɔ.”

¹²Lɛ la ka N da leɛ ka n nyɛ soba na kɔkɔre naŋ da yele a yɛlɛ korɔ ma, kyɛ N naŋ da leɛrɛ, N da nyɛ la salema fentel-daare ayopoĩ.

¹³N da nyɛ la neɛ kaŋ naŋ waa ŋa a Nensaala Bie ka o be a fentel-daare poɔ. O da su la kpar-wogi kyɛ leŋ salem-miri gyere O nyaa eŋɛ.

¹⁴A O zu ane a O zukɔɔloŋ da pɛlɛɛ la aŋa pekɔɔloŋ peɛle, a pɛle aŋa sakubo. A O nimie da waa ŋa vũũzele,

¹⁵ka O gbɛɛ da waa ŋa kur-zeɛ, ka O kɔkɔre da waa ŋa kɔŋyaga naŋ hoorɔ.

¹⁶O da taa la ŋmarbie ayopoĩ O nuduluŋ poɔ kyɛ ka zɔɔzɔɔ-soɔ naŋ taa nɔɛ ayi, a dire yaga zaa da wa yi O noɔre poɔ, ka O niŋe da waa ŋa ŋmenaa naŋ puri do o zaa.

¹⁷N naŋ da wa nyɛ O, N da le vɔgle la muro O gbɛɛ puliŋ a waa ŋa neɛ naŋ kpi. Kyɛ O da de la O nuduluŋ dɔgle n zu a kyɛ yele, “Ta zoro dabeɛ̃; maa la a dɛndɛŋ ane a baaraa,

¹⁸ane a soba na naŋ voorɔ. N da kpie la, kyɛ nyɛ, N voorɔ la tegitegilɛ; kyɛ N taa la Kũũ ane Dazugovũũ naaloŋ safobie.

¹⁹Pampana, sɛge bon fo naŋ nyɛ, bon naŋ erɛ ane a yeli naŋ na wa e a ŋaa puoriŋ.

²⁰A yɛlɛ naŋ sɔgle a kyaara ne a ŋmarbie ayopoĩ fo naŋ da nyɛ a N nuduluŋ poɔ ane a salema fentel-daare ayopoĩ la ŋa: a ŋmarbie ayopoĩ la a puoruu laŋne yie ayopoĩ na malekere, ka a fentel-daare ayopoĩ waa a puoruu laŋne yie ayopoĩ.”