Read Southern Dagaare Yel 10 Bible Online

Yel 10 - Southern Dagaare bible

Yel 10

¹N da la nyɛ la a maleke kaŋ naŋ taa faŋ ka o da yi a saluoni sigre waana, ka zunzugri da pilli pɔge o kyɛ ka sagoŋgoŋ[18] da be o zu eŋɛ. A o niŋe da waa ŋa ŋmenaa ka o gbɛɛ meŋ da waa ŋa vũũdaare.

²O da taa la ganlee naŋ yuo a be o nu poɔ. O naŋ da de o duluŋ gbɛre eŋ a mane poɔ kyɛ de o gɔɔ gbɛre biŋ a dondoli zu,

³o da tanne la yaga zaa aŋa gbeŋni naŋ hoorɔ. O naŋ da tanne a lɛ, a saa da tanne la gbɛre boyopoi.

⁴A saa naŋ da wa tanne a gbɛre boyopoi baare, N da boɔrɔ la ka N sɛge, kyɛ N da woŋ la kɔkɔre naŋ yi sazu a yele, “Sɔgle bon a saa tannoo gbɛre boyopoi naŋ yeli, kyɛ ta sɛge a biŋ.”

⁵Lɛ la ka a maleke na N naŋ da nyɛ ka o are a mane poɔ ane a dondoli zu ka o zɛge o nuduluŋ tɔgle a saluoni

⁶kyɛ pɔ a soba na naŋ voorɔ tegitegilɛ, ona la iri a sazu ane boma naŋ be o poɔ, a iri a teŋɛ ane boma naŋ be o poɔ, a kyɛ iri a mane ane boma naŋ be o poɔ, “A koŋ la kɔɔre,

⁷kyɛ a bebie na a maleke bayopoi soba naŋ na wa peɛle a o eele, a Naaŋmen yelsɔglɔ na nyɛ la eebo aŋa lɛ O naŋ da moɔle ko a O tontonema, a Ŋmen-yelmanneba.”

⁸Lɛ la ka a kɔkɔre na N naŋ da woŋ a saluoni poɔ ka o da laboreŋ yeli yɛlɛ ko ma, a yele, “Gaa te de a ganlee na naŋ yuo be a maleke na naŋ are a mane poɔ ane a dondoli zu nu poɔ.”

⁹Lɛ la ka N da gaa a maleke zie a te yeli ko o ka o de a ganlee ko ma; ka o da yeli ko ma, “De ɔɔ, o na waa la tuo fo poɔŋ, kyɛ noma aŋa seere a fo noɔre poɔ.”

¹⁰A lɛ la ka N da de a ganlee yi a maleke nu poɔ a ɔɔ. O da noma la aŋa seere a n noɔre poɔ, kyɛ N naŋ da wa ɔɔ o baare, o da waa la tuo a n poɔŋ.

¹¹Lɛ la ka ba da yeli ko ma, “A ferɛɛ la ka fo laboreŋ yeli Ŋmen-yelmanna yelyelii a kyaara ne noba yaga ane tenne ane kɔkɔɛ ane namine.”