Read Southern Dagaare Yel 11 Bible Online

Yel 11 - Southern Dagaare bible

Yel 11

¹Ba pãã da de la damannaa kaŋ naŋ waa ŋa daŋgbale ko ma, kyɛ da yeli ko ma, “Wa manne a Naaŋmen puoruudie ane a Naaŋmen bagmaalkuuri kyɛ sɔre a banaŋ naŋ be a be a puoro,

²kyɛ ta manne a Naaŋmen puoruudie kyaaraa. Bare a be, bonso, ba de o la ko a tenne noba ka ba na neɛ a tensoŋ kpoŋ kyuuri lezaayi ane ayi.

³Kyɛ N na ko la a N dansediribe bayi naŋ su boɔre kparre kpeɛ̃õ ka ba yeli Ŋmen-yelmanna yelyelii bebie turi dɔgle kɔɔraayi ne lezaata.”

⁴A ama la a kããteere ayi ane a fentele ayi naŋ are a tendaa Daana niŋesogɔ.

⁵Ka neɛzaa wa boɔrɔ ka o e ba yelfaa zaa, vũũ maŋ yi la ba nɔɛ poore a di a ba dɔndɔnne; neɛzaa naŋ boɔrɔ ka o e ba yelfaa, a ferɛɛ la ka ba ko ba a ŋaa ne o zu.

⁶Ba taa la kpeɛ̃õ a na toɔ̃ nyɔge a saluoni taa ka saa na ta mi, a bebie na poɔ ba naŋ na yele a Ŋmen-yelmanna yelyelii. Ba taa la kpeɛ̃õ a koɔ̃ zaa zu a na toɔ̃ e ka a leɛ zẽẽ kyɛ e ka baaloŋ faa boorɔ zaa le a teŋɛzu a seŋ lɛ ba naŋ boɔrɔ.

⁷Ka ba naŋ wa di a ba danseɛ baare, a wɛdoŋɔ na naŋ na wa yi a bogzuluŋ naŋ ba taa baaraa poɔ na zɔɔ ne ba la a toɔ̃ ba a kyɛ ko ba,

⁸ka a ba enne gaŋ a teŋkpoŋ sokoɔraa zu, ka Ŋmen-yelmanna yelyelii poɔ ka ba boɔlɔ Sodom bee Igyipiti. A be meŋ la ka ba da kpa a ba Daana a dagaraa zu.

⁹Bebie ata ane kyɛle poɔ, nemparɛɛ parɛɛ ane bale bale ane tenne na kaara la a ba enne a kyɛ zagre ka ba ũũ ba,

¹⁰ka teŋɛzu noba na taa popeɛloŋ a ba kũũ zuiŋ a kyɛ di tigri a ko taa kyɔɔtaare, bonso, a Ŋmen-yelmanneba bama bayi da dɔgre ba la.

¹¹Kyɛ a bebie ata ne ŋmaa puoriŋ, nyɔvore vooroŋ naŋ yi a Naaŋmen zie da kpɛ ba la, ka ba da iri are, ka dabeɛ̃ da kpɛ a banaŋ naŋ da nyɛ ba.

¹²Lɛ la ka ba da woŋ kɔkɔkpeɛŋaa kaŋ ka o yi a saluoni a yele yɛlɛ korɔ ba, “Yɛ do wa kyɛ!” Ba da do la a sazu a zunzugri poɔ ka a ba dɔndɔnne da kaara ba.

¹³A lɛ poɔ, a teŋɛ da gbigree la yaga zaa, ka a teŋkpoŋ poŋ ziiri pie, ziyeni da le. Noba turi ayopoĩ da kpi la a teŋɛ gbigruu poɔ, ka dabeɛ̃ da kpɛ a banaŋ naŋ kyɛre ka ba da danne a tenvelaa[19] Naaŋmen.

¹⁴A woore ayi soba wa tɔle gaaɛ la. A koŋ kɔɔre kyɛ ka a woore ata soba wa.

¹⁵A maleke bayopoi soba pãã da peɛle la a o eele, ka kɔkɔkpeɛne da yele yɛlɛ tenvelaa poɔ, a yele: “A tendaa naaloŋ leɛ la a te Daana ane a O Mɛzaaya[20] naaloŋ, ka O na di naaloŋ tegitegilɛ.”

¹⁶Lɛ la ka a nembɛrɛ lezare ne banaare naŋ da zeŋ a ba nakogri zuri a Naaŋmen niŋesogɔ da le vɔgle muro a kyɛ puori Naaŋmen,

¹⁷a yiele: “Te puoro fo la bareka, Naaŋmen, Kpeɛ̃õ Zaa Daana, fõõ la bebe a kyɛ da bebe, bonso, fo de la a fo kpeɛ̃õ naŋ waa kpoŋ a piili dire naaloŋ.

¹⁸A tenne noba suuri da iree la, kyɛ a fo supuriyaaraa waɛ la, ka a kuuni sɛrɛɛdiibu saŋ ta, bonso, fo yɔɔ la a fo tontonema, a Ŋmen-yelmanneba ane a nensonne ane a banaŋ zaa naŋ zoro a fo yuori, a ba bilii ane a ba bɛrɛ, a kyɛ saana a banaŋ naŋ sãã a tendaa.”

¹⁹Lɛ la ka a Naaŋmen puoruudie da yuo a tenvelaa poɔ, ka a Naaŋmen nɔɛ daga da sãã a Naaŋmen puoruudie poɔ; ka saa da nyegrɛ, a hoorɔ, a tanna, ka a teŋɛ gbigre kyɛ ka sakubo naŋ waa bɛrɛ da lere.