Read Southern Dagaare Yel 12 Bible Online

Yel 12 - Southern Dagaare bible

Yel 12

¹Yelwulaa naŋ waa kpoŋ da sãã la a saluoni poɔ: pɔge kaŋ da su la a ŋmenaa aŋa kparoo kyɛ ka a kyuu be o gbɛɛ puliŋ, ka nazupili naŋ taa ŋmarbie pie ne ayi da be o zu eŋɛ.

²A pɔge da taa la poɔ a ta dɔgebo ka a o poɔ da beɛrɛ ka o da kono a pɛnɛ.

³Lɛ la ka yelwulaa kaŋ meŋ da la sãã a saluoni poɔ: wa-beɛ kaŋ naŋ waa kpoŋ a e zeɛ tõẽtõẽ, a taa zuri ayopoĩ ane eelɛ pie ka nazupile da be a zuri zaa eŋɛ.

⁴A o zoore da tage la a ŋmarbie naŋ be a sazu poɔ poŋ ziiri ata, ziyeni lɔɔ a teŋɛzu. A wa-beɛ pãã da are la a pɔge naŋ boɔrɔ ka o dɔge niŋesogɔ, ka ka o na vɔle a pɔge bie ka o naŋ wa dɔge o.

⁵A pɔge da dɔge la bidɔɔ, ona la na di naaloŋ a tenne zaa zu ne gandaaloŋ. Kyɛ ba da faa la a o bie a de o do ne Naaŋmen zie ane a O nakogi zie,

⁶kyɛ ka a pɔge da zo kpɛ a wɛgyɛŋ poɔ, be la ka Naaŋmen da nare zie bare o, ka ba na toɔ̃ kaa o zie a be bebie turi dɔgle kɔɔraayi ne lezaata.

⁷Zɔɔre da le la a tenvelaa[21] poɔ; Mikɛl ane o malekere da zɔɔ ne la a wɛdombeɛ ka a wa-beɛ ane o malekere meŋ da zɔɔ ne ba.

⁸Kyɛ ba da zɔɔtoɔ̃ la a wa-beɛ ane o malekere, ka ba da ba la taa zie a tenvelaa poɔ.

⁹Ba da de la a wa-beɛ naŋ waa kpoŋ lɔɔ bare ka o sigi a teŋɛzu, a dakoroŋ saŋ waabo na, ona la ka ba boɔlɔ Sebɛlbɛllɛ bee Setaana, a tendaa zaa bɛlbɛllɛ. Ba da lɔɔ o la bare ka o sigi wa a teŋɛzu, a lɔɔ a o malekere meŋ poɔ o eŋɛ.

¹⁰N pãã da woŋ la kɔkɔre naŋ yele yɛlɛ kpeɛŋaa a tenvelaa poɔ, a moɔlɔ: “Pampana ŋa, a te Naaŋmen faabo ane gandaaloŋ ane naaloŋ taɛ la, ka a O Mɛzaaya[22] kpeɛ̃õ meŋ ta, bonso, ba de la a soba na naŋ maŋ korɔ a te yɔɔmine saanaa lɔɔ bare a teŋɛzu, ona la maŋ korɔ ba saanaa ŋmenaa ane tensogɔ a te Naaŋmen niŋesogɔ.

¹¹Kyɛ ba zɔɔtoɔ̃ o la ne a Pilee zẽẽ ane a ba yelbiri danseɛ, bonso, ba da ba kpimare nyɔvore, haali ka ba naŋ da na kpi gba.

¹²Yɛnee naŋ be tenvelaa poɔ, yɛ kyellɛ! Kyɛ a tendaa ane a mane yuori la we bonso, a sebɛlbɛllɛ sigi wa la a yɛ zie ne supuriyaaraa, o naŋ baŋ ka a o saŋ ba la seŋ bon zuiŋ!”

¹³Lɛnso, a wa-beɛ naŋ da wa nyɛ ka ba da de o lɔɔ bare a teŋɛzu, o da digre la a pɔge na naŋ da dɔge a bidɔɔ.

¹⁴Kyɛ ba da ko la a pɔge a tuu-kpoŋ na begɛ ayi ka o na toɔ̃ ɛge yi a waabo zie a kpɛ a wɛgyɛŋ poɔ, a zie na ba naŋ na kaa o zie yuomo ata ne ŋmaa.

¹⁵Lɛ la ka a waabo da ogi koɔ̃ yi a o noɔre poɔ aŋa baa ka a zoro tuuro a pɔge, ka a kɔmpiiri na de a pɔge gaa ne.

¹⁶Kyɛ a teŋɛ da wa soŋ la a pɔge; o da yuo la o noɔre a vɔle a baa na a wa-beɛ naŋ da ogi yi a o noɔre poɔ.

¹⁷Lɛ la ka a wa-beɛ suuri da iri ne a pɔge, ka o da gaa ka o zɔɔ ne a pɔge biiri na naŋ kyɛre, a banaŋ naŋ tuuro a Naaŋmen nɔɛ a kyɛ sage di a Yeezu danseɛ.

¹⁸A wa-beɛ pãã da te are la a mane noɔre biiree poɔ.