Read Southern Dagaare Yel 13 Bible Online

Yel 13 - Southern Dagaare bible

Yel 13

¹N da nyɛ la wɛdoŋɔ kaŋ ka o wa yire a mane poɔ, a taa eelɛ pie ane zuri ayopoĩ; ka nazupile pie da be a o eelɛ eŋɛ kyɛ ka yoe naŋ toorɔ Naaŋmen zoma da be a o zuri eŋɛ.

²A wɛdoŋɔ na N naŋ da nyɛ da waa ŋa loɔraa, ka o gbɛɛ waa ŋa ɛbaa gbɛɛ, ka o noɔre da waa ŋa gbeŋni noɔre. A wa-beɛ da de la a o gandaaloŋ ane a o naaloŋ ane kpeɛ̃õ naŋ waa kpoŋ ko o.

³A e ŋa ba da ŋmɛ la a wɛdoŋɔ zu kaŋ eŋ fele a da boɔrɔ o koobo, kyɛ a fele da maaɛ la. A tendaa noba zaa nɔɛ da maaɛ la ka ba da tuuro a wɛdoŋɔ.

⁴Ba da puoro la a wa-beɛ, bonso, o da de la a o kpeɛ̃õ ko a wɛdoŋɔ, ka ba da puoro a wɛdoŋɔ meŋ a yele, “Nembuo la waa ŋa a wɛdoŋɔ, aŋ la na toɔ̃ zɔɔ ne o?”

⁵Ba da ko la a wɛdoŋɔ noɔre ka o yele pɔloo yɛlɛ kyɛ toorɔ Naaŋmen zoma, kyɛ ka ba da ko o sori ka o di kpeɛ̃õ kyuuri lezaayi ne ayi.

⁶O da haa la a o noɔre a toorɔ Naaŋmen zombie, a toorɔ a Naaŋmen yuori ane a O kpeɛbozie, a tɛgɛ la, banaŋ naŋ be tenvelaa[23] poɔ.

⁷Ba da ko o la sori meŋ ka o zɔɔ ne a nensonne a toɔ̃ ba. Ba da ko o la kpeɛ̃õ noba zaa zu ane nemboorɔ zaa zu ane kɔkɔɛ zaa ane tenne zaa zu,

⁸ka a noba zaa naŋ be a teŋɛzu na puoro o, neɛzaa yuori ba naŋ da ba sɛge eŋ a Pilee ba naŋ da ko nyɔvore gane poɔ a yi a tendaa piiluu saŋ.

⁹Vɛŋ ka soba na zaa naŋ taa toori kyɛlle woŋ:

¹⁰Ka ba naŋ na nyɔge fo ka fo e gbaŋgbaa, gbaŋgbaaloŋ poɔ la ka fo na kpɛ; ka fõõ ko neɛ ne zɔɔzɔɔ-soɔ, zɔɔzɔɔ-soɔ la ka ba na ko ne fo. A nensonne kannyiri diibu ane yeldeebo boɔlɔ la a ŋa.

¹¹N pãã da nyɛ la a wɛdoŋɔ kaŋ ka o da wa yi a teŋɛŋ; o da taa la eelɛ ayi aŋa pilee kyɛ ka o da yele yɛlɛ aŋa a wa-beɛ.

¹²O da are la a dɛndɛŋ wɛdoŋɔ gbɛbogriŋ, a de a dɛndɛŋ wɛdoŋɔ kpeɛ̃õ zaa toŋ ne toma. O da eɛɛ la ka a teŋɛ ane a o noba puoro a dɛndɛŋ wɛdoŋɔ, a onaŋ fele naŋ da maa na.

¹³O da erɛ la yelwulii bɛrɛ, a gba erɛ ka vũũ yire sazu sigre waana a teŋɛzu a nensaalba zaa niŋesogɔ.

¹⁴Kyɛ a sori ba naŋ da ko o ka o are a dɛndɛŋ wɛdoŋɔ gbɛbogriŋ a erɛ a yelwulii da eɛɛ la ka o da bɛllɛ a noba naŋ be a teŋɛzu, a yele korɔ ba ka ba mɛ teebo ko a dɛndɛŋ wɛdoŋɔ ba naŋ da de zɔɔzɔɔ-soɔ pere ne kyɛ ka o naŋ voorɔ.

¹⁵Ba da ko o la sori ka o ko a dɛndɛŋ wɛdoŋɔ teebo vooroŋ ka a teebo na toɔ̃ yeli yɛlɛ kyɛ tere noɔre ka ba ko a banaŋ naŋ koŋ puori a wɛdoŋɔ teebo.

¹⁶O da eɛɛ la ka ba eŋ ŋmaaroŋ a noba zaa nuduluŋ bee a ba gberi eŋɛ meŋ, a ba bilii ane ba nembɛrɛ, a bondaanema ane a nandaanema, a banaŋ naŋ so bamenne ane a gbaŋgbaare,

¹⁷ka neɛzaa da kontoɔ̃ da bon bee a koɔre bon ka o soba ba wa taa a ŋmaaroŋ. A tɛgɛ la, a wɛdoŋɔ yuori bee a o yuori ŋmaaroŋ noɔre.

¹⁸A yeli ŋa boɔrɔ la yɛŋ; vɛŋ ka soba na zaa naŋ baŋ a tɛgɛ sɔre baŋ a wɛdoŋɔ sɔr-noɔre, bonso, o waa la nensaala sɔr-noɔre. A o sɔr-noɔre waa la kɔɔraayoɔbo ane lezaata ne ayoɔbo.[24]