Read Southern Dagaare Yel 14 Bible Online

Yel 14 - Southern Dagaare bible

Yel 14

¹N pãã da kaaɛ la a da nyɛ a Pilee ka O are a Zaayɔn Taŋzu! Ka noba turi lezaapoi ne turi anaare ba naŋ da sɛge a Pilee yuori ane a O Saa yuori eŋ a ba gberi eŋɛ da be O zie.

²N da woŋ la kɔkɔre ka o yi a saluoni poɔ a waa ŋa kɔŋyaga naŋ dɔɔnɔ, a waa ŋa saa naŋ tanna yaga zaa. A kɔkɔre N naŋ da woŋ da waa ŋa noba naŋ ŋmeɛrɛ ba pɛnne ka a kono.

³Ba da yiele la yieluŋ paalaa a nakogi niŋesogɔ ane a bonvoba anaare niŋesogɔ ane a nɛmbɛrɛ niŋesogɔ. Neɛzaa da kontoɔ̃ zanne a yieluŋ na ka a noba turi lezaapoi ne turi anaare ba naŋ da faa a teŋɛzu yoŋ naane.

⁴A bama la da ba dɛge bamenne ne pɔgeba, bonso, ba da waa la bitorri[25]. A bama la da tuuro a Pilee zie na zaa O naŋ da maŋ gɛrɛ. Ba da faa ba la yi ne nensaalba poɔ ka ba waa dɛndɛŋ noba ko Naaŋmen ane a Pilee,

⁵ka zirii zaa daŋ ba yi ba nɔɛ poore; ba ba taa saanaa zaa.

⁶N pãã da nyɛ la a maleke kaŋ ka o ɛgrɛ a sazu poɔ, a da taa a Ŋmen-yelnoore na naŋ ba taa baaraa ka o moɔle ko a banaŋ naŋ be a teŋɛzu; a tenne zaa ane a nemboorɔ zaa ane a kɔkɔɛ zaa ane a nensaalba zaa.

⁷O da yeli la yɛlɛ ne kɔkɔkpeɛŋaa a yele, “Yɛ zoro Naaŋmen a kyɛ ire O yuori, bonso, a O sɛrɛɛdiibu saŋ taɛ la. Yɛ puoro a soba na naŋ iri sazu ane a teŋɛ, a mane ane a bulnimie.”

⁸Lɛ la ka a maleke kaŋ, a ayi soba da tu a yele, “Baabilɔŋ, a teŋyuori lee la, o lee la! O eɛɛ la ka a tenne zaa nyu a o peɛ̃mo toma supuriyaaraa dãã.”

⁹Lɛ la ka a maleke kaŋ, a bata soba meŋ da tu ba a kyeerɛ ne kɔkɔkpeɛŋaa, “A banaŋ naŋ puoro a wɛdoŋɔ ane a o teebo, a kyɛ eŋ a ŋmaaroŋ a ba gberi eŋɛ bee ba nuuri eŋɛ,

¹⁰meŋ na nyu la a Naaŋmen supuriyaaraa dããkpeɛŋaa ba naŋ pore a yoŋ ka bonzaa ba pulli, a eŋ a O suuri ŋmanlee poɔ. Ba na dɔgre ba la ne vũũ ane gyirimuri[26] a maleke sonne niŋesogɔ ane a Pilee niŋesogɔ.

¹¹A ba dɔgroŋ nyoore[27] na iri duoro la saa tegitegilɛ. A banaŋ naŋ puoro a wɛdoŋɔ ane a o teebo ane neɛzaa naŋ de a o yuori ŋmaaroŋ daŋ koŋ nyɛ pɛnnoo ŋmenaa bee tensogɔ.”

¹²A nensonne, a banaŋ naŋ tuuro a Naaŋmen nɔɛ kyɛ kpimare a ba yeldeebo a Yeezu eŋɛ kannyiri diibu yelteɛbo la ŋa.

¹³N da woŋ la kɔkɔre kaŋ ka o yele a saluoni poɔ, “Sɛge a yeli ŋa: A piili pampana kyɛ gɛrɛ, banaŋ naŋ kpiire a Daana eŋɛ nyɛ la maaloo.” A Vooroŋ Soŋ yelee la, “Õõ, ba na pɛnne la a ba toma eŋɛ, bonso, a ba tonsonne tuuro ba la.”

¹⁴N pãã da kaaɛ la a nyɛ zunzug-pelaa ka neɛ kaŋ da zeŋ a zunzugri poɔ a waa ŋa a Nensaala Bie, a vɔgle salema nazupili kyɛ ka Gɔraa[28] naŋ dire be O nu poɔ!

¹⁵A maleke kaŋ da wa yi la a Naaŋmen puoruudie poɔ a boɔlɔ a soba na naŋ da zeŋ a zunzugri poɔ ne kɔkɔkpeɛŋaa a yele, “De a fo gɔraa kyɛ ne a boma, bonso, a boma kyeɛbo saŋ taɛ la, ka a tendaa boma be a zaa.”

¹⁶Lɛ la ka a soba na naŋ da zeŋ a zunzugri poɔ da lɔɔ a o gɔraa eŋ a teŋɛzu, ka ba da kyɛ a tendaa boma.

¹⁷Lɛ la ka a maleke kaŋ da wa yi a Naaŋmen puoruudie naŋ be a tenvelaa[29] poɔ, a meŋ da taa gɔraa naŋ dire.

¹⁸A maleke kaŋ pãã da wa yi la a Naaŋmen bagmaalkuuri zie. A maleke ŋa taa la kpeɛ̃õ vũũ zu, ka o da boɔle a onaŋ naŋ da taa a gɔraa naŋ dire ne kɔkɔkpeɛŋaa a yele, “De a fo gɔraa naŋ dire a kyɛ ne a dããteere lantaa, bonso, a tewɔmɔ moɔɛ la.”

¹⁹Lɛ la ka a maleke da lɔɔ a o gɔraa eŋ a teŋɛzu a da kyɛ a tendaa tewɔmɔ a wuo lantaa a da de a lɔɔ eŋ a Naaŋmen supuriyaaraa dãã maaloo zie naŋ waa kpoŋ.

²⁰Ba da neɛ la a tewɔmɔ a dãã maaloo zie naŋ da be a teŋkpoŋ yeŋ poɔ, ka zẽẽ da yi a dãã maaloo zie a do te seŋ ŋa wiri kyɛ da zoro a te ta ŋa mɛlɛ kɔɔraayi.