Read Southern Dagaare Yel 16 Bible Online

Yel 16 - Southern Dagaare bible

Yel 16

¹N pãã da woŋ la kɔkɔre kaŋ a Naaŋmen puoruudie poɔ ka o yele yɛlɛ korɔ a malekere bayopoi na, “Yɛ gaa te kyiri a Naaŋmen supuriyaaraa naŋ be a laare ayopoĩ poɔ na eŋ a teŋɛzu.”

²Lɛ la ka a maleke dɛndɛŋ soba da gaa te kyiri a boma naŋ be a o laa poɔ dɔgle a teŋɛzu, ka felɛ naŋ buoro kyɛ nyuuro da yi a banaŋ naŋ da taa a wɛdoŋɔ ŋmaaroŋ a kyɛ puoro a o teebo enne.

³A maleke bayi soba da kyiri la a boma naŋ be a o laa poɔ eŋ a mane poɔ ka a mane koɔ̃ da leɛ waa ŋa kũũ zẽẽ, ka a mane poɔ bonvoba zaa da kpi.

⁴A maleke bata soba da kyiri la a boma naŋ be a o laa poɔ eŋ a bare ane a bulnimie poore ka a da leɛ zẽẽ.

⁵N da woŋ la a koɔ̃ zaa maleke ka o yele: “Soŋ Soba, fõõ naŋ bebe a kyɛ da bebe, fo waa la meŋɛ, bonso, fo di la a boma ama sɛrɛɛ;

⁶ba naŋ da kyiri a nensonne ane a Ŋmen-yelmanneba zẽẽ zuiŋ, fo ko ba la zẽẽ ka ba nyu. A yeli ŋa la seŋ ne ba!”

⁷N da woŋ la a Naaŋmen bagmaalkuuri ka o leɛ yeli sɔge: “Õõ, Daana Naaŋmen, a Kpeɛ̃õ Zaa Soba, a fo sɛrɛɛdiibu waa la serɛ kyɛ waa meŋɛ!”

⁸A maleke banaare soba da kyiri la a boma naŋ be a o laa poɔ dɔgle a ŋmenaa zu ka ba da ko a ŋmenaa sori ka o vuuli a noba ne vũũ.

⁹A vũũ toloŋ kpoŋ da vuuli ba la, kyɛ ba da ba leɛ ba eebo a de puubu ko Naaŋmen, kyɛ da kaara eŋnɛ a Naaŋmen yuori naŋ taa kpeɛ̃õ a yelwolɔ ama zu.

¹⁰A maleke banuu soba da kyiri la a boma naŋ be a o laa poɔ eŋ a wɛdoŋɔ nakogi zu, ka a o naaloŋ da be lige poɔ; a woore da eɛɛ la ka a noba da ɔɔ ba zelɛ.

¹¹Ba da kaa-eŋ la a tenvelaa[32] Naaŋmen a woore ane a felɛ naŋ da yi ba zuiŋ, kyɛ ba da ba leɛ ba eebo yi a ba yelfaare poɔ.

¹²A maleke bayoɔbo soba da kyiri la a boma naŋ be a o laa poɔ eŋ a Yuferate bakpoŋ poɔ ka o koɔ̃ da sere ka ka o toɔ̃ maale sobiri ko a namine naŋ yi a sapare.

¹³Lɛ la ka N da nyɛ sefaare ata naŋ waa ŋa pɔnteɛ ka a da wa yire a wa-beɛ ane a wɛdoŋɔ ane a kaŋwaa Ŋmen-yelmanneba nɔɛ poore.

¹⁴A boma ama waa la sefaare, a erɛ yelwulii, a maŋ gaa tatenne, a tendaa zaa namine ziiri a te laŋ ba taa ka ba zɔɔ, a Naaŋmen Kpeɛ̃õ Zaa Daana bebi-kpoŋ daare.

¹⁵(“Nyɛ, N waana la aŋa nannyige! Soba na naŋ bare goɔŋ a kyɛ su kparre a ba taa eŋkpoŋkpoli a yoɔrɔ ne ka vi na kpɛ o nyɛ la maaloo.”)

¹⁶Ba da laŋ ba la taa a zie na ba naŋ boɔlɔ a Hiburu kɔkɔre poɔ ka Hammagedon.

¹⁷A maleke bayopoi soba da kyiri la a boma naŋ be a o laa poɔ eŋ a saseɛ poɔ, ka kɔkɔkpeɛŋaa kaŋ da yi a nakogi zie, a Naaŋmen puoruudie poɔ, a yele, “A e baarɛɛ la!”

¹⁸Ka saa da nyegrɛ, a hoorɔ, a tanna kyɛ ka a teŋɛ da gbigri yaga zaa ka a lɛ tɔ daŋ ba e a yi lɛ saŋ nensaalba naŋ be a teŋɛzu, lɛ ka a teŋɛ gbigruu ŋa da waa faa seŋ.

¹⁹A teŋkpoŋ da poŋ la ziiri ata, ka a paaloŋ teŋkponni da le. Naaŋmen da leɛ-teɛre la a Baabilɔŋ, a teŋkpoŋ yɛlɛ a da de a o suuri naŋ da iri yaga dãã ŋmanlee ko o.

²⁰Ka a mandoba zaa da zo, ka ba da koŋ la nyɛ taŋ zaa;

²¹ka sakubo naŋ waa bɛrɛ ka kanzaa tegroŋ maŋ ta ŋa kilori lezaayi ne anuu da yi a sazu lere a noba zuri te ta lɛ saŋ ba naŋ kaa-eŋ Naaŋmen ne a sakubo naŋ dɔgrɔ ba, bonso, a dɔgroŋ da taa la dabeɛ̃ yaga.