Read Southern Dagaare Yel 17 Bible Online

Yel 17 - Southern Dagaare bible

Yel 17

¹A malekere bayopoi na kaŋ naŋ da taa a laare pãã da waɛ la a wa yeli ko ma, “Wa, N na wuli fo la lɛ ba naŋ na di a gyɛnter-kpoŋ sɛrɛɛ, a onaŋ naŋ zeŋ a kɔŋyaga zu.

²Ona la ka a teŋɛzu namine ne o da toŋ peɛ̃mo toma, ka a noba naŋ be a teŋɛzu kuoli ne a o peɛ̃mo toma dãã.”

³Lɛ la ka o da de ma seeloŋ poɔ kpɛ ne a wɛgyɛŋ poɔ ka N da te nyɛ pɔge kaŋ naŋ zeŋ wɛdoŋ-zeɛ kaŋ zu naŋ da paale ne yoe naŋ toorɔ Naaŋmen zoma, kyɛ ka o da taa zuri ayopoĩ ane eelɛ pie.

⁴A pɔge da su la kpareze-velaa, ka o lenni ne salema ane lɛɛbie ane kusi-veɛle. O da taa la salema ŋmanlee o nu poɔ ka o paale ne faaloŋ ane a o peɛ̃mo toma yeldɛgɛ;

⁵kyɛ ka ba da sɛge yuori kaŋ o tɛgɛ naŋ sɔgle eŋ o gbieŋ, “Baabilɔŋ a teŋyuori, gyɛnterre ane a tendaa faaloŋ ma.”

⁶N da nyɛ la a pɔge ka o kuoli ne a nensonne zẽẽ ane a Yeezu dansediribe zẽẽ. N naŋ da wa nyɛ o, N noɔre da maaɛ la yaga.

⁷Kyɛ ka a maleke da soore ma, “Bonso ka fo noɔre maa lɛ? N na yeli la a pɔge yelsɔglɔ ane a wɛdoŋɔ naŋ taa a zuri ayopoĩ ane a eelɛ pie naŋ tuo a pɔge yɛlɛ ko fo.

⁸A wɛdoŋɔ na fo naŋ da nyɛ da bebe la, kyɛ o ba la kyebe, kyɛ o boɔrɔ la ka o yi a bogzuluŋ naŋ ba taa baaraa poɔ, a do wa kpɛ sããmo poɔ. A banaŋ naŋ be a teŋɛzu ka ba da ba sɛge ba yoe eŋ a nyɔvore gane poɔ a yi a tendaa piiluu saŋ nɔɛ na maa la ka ba naŋ wa nyɛ a wɛdoŋɔ, bonso, o da bebe la, a ba la kyebe kyɛ na leɛ wa.”

⁹“A ŋaa boɔrɔ la neɛ naŋ taa yɛŋ: a zuri ayopoĩ waa la tanne ayopoĩ na zu a pɔge naŋ zeŋ; a meŋ waa la namine bayopoi,

¹⁰ka ba banuu le. Bon-yeni voorɔ la kyɛ ka a kaŋ naŋ ba wa sɛre, kyɛ ka o naŋ wa wa, a ferɛɛ la ka o bebe belaa lɛ.

¹¹A wɛdoŋɔ na fo naŋ da nyɛ ka o bebe kyɛ ba la kyebe na eŋ, o waa la a anii soba kyɛ o poɔ la a ayopoĩ na poɔ, kyɛ o gɛrɛ la ka ba sãã o bare.

¹²A eelɛ pie na fo naŋ da nyɛ waa la namine pie naŋ naŋ ba di ba naaloŋ sɛre, kyɛ ba na laŋ ne la a wɛdoŋɔ a nyɛ kpeɛ̃õ a waa namine gogo yeni yoŋ.

¹³A bama taa la teɛroŋ yeni a de a ba faŋ ane ba kpeɛ̃õ ko a wɛdoŋɔ.

¹⁴Ba na zɔɔ ne la a Pilee, kyɛ a Pilee na zɔɔtoɔ̃ ba la, bonso, Ona la a daanema zaa Daana ane namine zaa Naa, ka a banaŋ naŋ be O zie waa noba ba naŋ boɔle, a kaa-iri kyɛ ka ba taa yelmeŋɛ.”

¹⁵Ka a maleke da yeli ko ma, “A koɔ̃ na zaa fo naŋ da nyɛ, a be a gyɛnterɛ naŋ zeŋ, waa la nemboorɔ boorɔ ane nembeɛoŋ ane tenne ane kɔkɔɛ.

¹⁶Ka a eelɛ pie na fo naŋ da nyɛ, ana ane a wɛdoŋɔ na kyiire la a gyɛnterɛ; a na faa la o boma zaa kyɛ bare o ka o taa eŋkpoŋkpoli; a na ɔɔ la a o eŋnɛne a kyɛ nyege o ne vũũ.

¹⁷Bonso, Naaŋmen eŋ a la ba sukyie poɔ ka ba toŋ a O poboɔbo toma, ka a sage ka a de a ba naaloŋ ko a wɛdoŋɔ te ta lɛ saŋ a Naaŋmen yelbie naŋ tu a tuubu.

¹⁸A pɔge na fo naŋ da nyɛ waa la a teŋkpoŋ na naŋ dire naaloŋ a tendaa namine zu.”