Read Southern Dagaare Yel 18 Bible Online

Yel 18 - Southern Dagaare bible

Yel 18

¹A ŋaa puoriŋ N da nyɛ la a maleke kaŋ ka o yi sazu sigre waana, a taa kpeɛ̃õ yaga zaa; ka a tendaa zaa da kyaane ne a o veɛloŋ.

²O da boɔle ne la kɔkɔkpeɛŋaa a yele: “Baabilɔŋ a teŋyuori lee la, o lee la! O leɛ la sefaare kpeɛbozie, a leɛ sefaare zaa sɔgloo zie, a leɛ nuuli faare zaa sɔgloo zie, a leɛ bonfaare ane wɛdonfaare sɔgloo zie.

³Bonso, a tenne zaa da nyu la a o peɛ̃mo toma suuri dãã, ka a tendaa namine ne o da toŋ peɛ̃mo toma ka a o bondaanoŋ kpeɛ̃õ e ka a teŋɛzu yɛreyɛrebɛ kpɛ naaloŋ poɔ.”

⁴Lɛ la ka N da woŋ kɔkɔre kaŋ a saluoni poɔ ka o yele: “N noba, yɛ wa yi o poɔ, ka yɛ na ta wa poɔ a o yelbebe poɔ, ka a lɛ vɛŋ ka yɛ ta wa poɔ a o yelwolɔ poɔ;

⁵bonso, a o yelbebe gboŋ do te ta la a saluoni, ka Naaŋmen leɛ-teɛre a o yelfaare.

⁶Yɛ e ko o aŋa lɛ o naŋ da e ko a noba, kyɛ leɛ yɔɔ a o yel-erre san-yɔɔ gbɛre boyi; yɛ pulli a o ŋmanlee poɔ, dãã naŋ e kpeɛŋaa gbɛre boyi ko o.

⁷A lɛ o naŋ puuro o meŋɛ a kyɛ wono noɔ, a lɛ meŋ la ka yɛ na ko o dɔgroŋ ane posaanaa ka a seŋ. Bonso, o yeli la o poɔŋ: ‘N dire la naaloŋ aŋa pɔgenaa; N ba waa pɔgekoɔre, ka posaanaa daŋ koŋ kpɛ ma zaa,’

⁸azuiŋ a o yelwolɔ na wa la bebi-yeni; kũũ ane konni ane kɔŋkpoŋ, kyɛ ka ba nyege o ne vũũ; bonso, a Daana Naaŋmen naŋ di o sɛrɛɛ taa la kpeɛ̃õ.”

⁹A teŋɛzu namine ne o naŋ da toŋ a peɛ̃mo toma kyɛ laŋ woŋ noɔ ne o na koŋ la, a ŋmɛ kpɛlle ka ba naŋ wa nyɛ a nyoore[33] naŋ yire a vũũ naŋ dire o poɔ.

¹⁰Ba na are la tɔɔre zaa a o dɔgroŋ dabeɛ̃ zuiŋ a kyɛ yeli: “Woo, woo, a teŋkpoŋ kpoŋ, Baabilɔŋ, a teŋkpoŋ naŋ taa faŋ! Ba di la a fo sɛrɛɛ gogo yeni yoŋ poɔ.”

¹¹A teŋɛzu yɛreyɛrebɛ na ŋma la nentaŋ a koŋ o, neɛzaa naŋ ba daara a ba boma zuiŋ,

¹²salema, selem-pelaa, peɛmɛ ane kusi-veɛle; pɛmpeɛle, pɛnzeere, pɛmɛ naŋ nyegrɛ ane kpareze-kpoŋ; daa zaa boorɔ naŋ nyuuro velaa; wɔɔnyemɛ bommaale boorɔ zaa, daare daaroŋ naŋ ba wono bommaale boorɔ zaa, kur-zeɛ, kuri ane kusi-pelaa;

¹³pɛlaa, zeɛre bommeelɛ, ensɛnse, turaali, gboŋgbori nyɔfeera zɔŋ; dãã, kãã, zɔŋ-baaloŋ ane kyi, nii ane peere, wie ane torikori, gbaŋgbaare ane noba ba naŋ fere nyɔge.

¹⁴“A tewɔmɔ fo naŋ da nɔŋ yaga zaa yi la fo zie gaa, ka a fo naboma ane a fo veɛloŋ zaa bɔre, ka fo daŋ koŋ la nyɛ a togitogi zaa!”

¹⁵A boma ama yɛreyɛrebɛ naŋ nyɛ ba naboma yi o zie na are la tɔɔre zaa a o dɔgroŋ dabeɛ̃ zuiŋ, a ŋmaara nentaŋ a kyɛ ŋmeɛrɛ kpɛlle yaga zaa a yele:

¹⁶“Woo, woo, a teŋkpoŋ kpoŋ, naŋ da su kparpelaa, a su kparre zeɛ ane kpareze-kpoŋ ka ba lenni ne salema, ane lɛɛbie ane kusi-veɛle!

¹⁷Bonso, a bondaanoŋ ŋa zaa wɛɛ la gogo yeni poɔ!” A gboe mɔnneba ane a gboe tontonema ane a gboe kpeɛrebɛ ane a banaŋ zaa yɛroŋ naŋ be a mane zu da are la tɔɔre zaa,

¹⁸a ŋmɛ kpɛlle ba naŋ da wa nyɛ a nyoore naŋ yire a vũũ naŋ dire o poɔ: “Tembuo la da waa ŋa a teŋkpoŋ kpoŋ ŋa?”

¹⁹Ba da ɔnnɔ la tɛne ennɛ ba zuri eŋɛ, a ŋmaara nentaŋ, a kono kyeerɛ: Woo, woo, a teŋkpoŋ kpoŋ, a be la ka a banaŋ naŋ taa gboe a mane zu da kpɛ naaloŋ a o bondaanoŋ zuiŋ! Bonso, gogo yeni poɔ la ka ba e ka o wɛ o zaa.

²⁰Sazu ane yɛnee nensonne ane apostoliimine ane Ŋmen-yelmanneba, yɛ kyellɛ o zuiŋ! Bonso, Naaŋmen di la o sɛrɛɛ ne bon o naŋ e ko yɛ.

²¹Lɛ la ka maleke kaŋ naŋ taa faŋ da de kuuri naŋ waa ŋa neɛre kuuri a lɔɔ eŋ a mane poɔ, a yele: “A faŋ ŋa tɔ la ka ba na de ne Baabilɔŋ a teŋkpoŋ lɔɔ bare ka neɛzaa koŋ la nyɛ o.

²²Ba koŋ la woŋ koriŋgyo ane yieluŋ ane wulee ane eelɛ konni fo poɔ; ba koŋ la nyɛ toma zaa gɔbaa fo poɔ; ba koŋ la woŋ neɛre kuuri konni fo poɔ;

²³ba koŋ la nyɛ fentelɛ kyaane fo poɔ; ba koŋ la woŋ a serpaalaa ane a pɔgpaalaa kɔkɔre fo poɔ; bonso, a fo yɛreyɛrebɛ da waa la yɛreyɛr-nembɛrɛ a teŋɛzu, kyɛ ka fo da bɛlle a tenne zaa ne a fo sɔyɛlɛ.

²⁴A fo poɔ la ka ba da nyɛ a Ŋmen-yelmanneba ane a nensonne ane a banaŋ zaa ba naŋ da ko a teŋɛzu zẽẽ.”