Read Southern Dagaare Yel 19 Bible Online

Yel 19 - Southern Dagaare bible

Yel 19

¹A ŋaa puoriŋ, N da woŋ la kpɛlle kaŋ naŋ waa ŋa nembeɛoŋ naŋ be a tenvelaa[34] poɔ kɔkɔɛ ka a kyaara yaga zaa yele: Haleluya! A te Naaŋmen la so faabo ane puubu ane kpeɛ̃õ,

²bonso, a O sɛrɛɛdiibu waa la serɛ kyɛ waa meŋɛ. O da di la a gyɛnter-kpoŋ na naŋ sãã a teŋɛ ne a o peɛ̃mo toma sɛrɛɛ, a kyɛ dɔgre o yaa a sane ne a Naaŋmen tontonema zẽẽ o naŋ da kyiri zuiŋ.

³Ba da la yelee la: “Haleluya! A nyoore[35] da yi la o zie a duoro saa tegitegilɛ.”

⁴Ka a nembɛrɛ lezare ne banaare ane a bonvoba anaare da le vɔgle muro a puori Naaŋmen naŋ da zeŋ a nakogi zu, a yele: “Ameena.[36] Haleluya!”

⁵Ka kɔkɔre kaŋ da yi a nakogi zie a yele: “Yɛ puu a te Naaŋmen, yɛnee zaa naŋ waa O tontonema, ane yɛ banaŋ zaa naŋ zoro O a yɛ bilii ane yɛ kponni.”

⁶Lɛ la ka N da woŋ kɔkɔre kaŋ naŋ waa ŋa nembeɛoŋ kɔkɔɛ, a waa ŋa kɔŋyaga naŋ dɔɔnɔ, a kyɛ waa ŋa saa naŋ tanna kpeɛŋaa zaa, a kono yele: “Haleluya! Bonso, a Daana a te Naaŋmen a Kpeɛ̃õ Zaa Soba di la naaloŋ.

⁷Yɛ e ka te kyellɛ kyɛ zɛge O yuori a kyɛ de a puubu ko O, bonso, a Pilee pɔge deebo saŋ taɛ la, ka a O pɔge nare o meŋɛ baare.

⁸Ba da tere la sori ka ba su o kparpelaa naŋ pɛle parepare ka dɛgre zaa ba kye o eŋɛ”; bonso, a kparpelaa la a nensonne tonsonne.

⁹Ka a maleke da yeli ko ma, “Sɛge a yeli ŋa: Banaŋ ba naŋ da boɔle ka ba wa a Pilee pɔgde tigri nyɛ la maaloo.” Ka o da yeli ko ma, “A Naaŋmen yelbie naŋ waa meŋɛ la ama.”

¹⁰Lɛ la ka N da le vɔgle muro o gbɛɛ puliŋ ka N puori o, kyɛ ka o da yeli ko ma, “A ba fere ka fo e a lɛ! N waa la fo tonton-tɔsoba a laŋ ne a fo yɔɔmine banaŋ naŋ sage de a Yeezu danseɛ. Puoro Naaŋmen! Bonso a Yeezu danseɛ la korɔ a banaŋ naŋ yele Ŋmen-yelmanneba yelyelii kpeɛ̃õ.”

¹¹N pãã da nyɛ la tenvelaa ka o yuo ka N da nyɛ wir-pelaa kaŋ! Ba da boɔlɔ la a soba na naŋ zɔŋ a wiri ka Mennoŋ ane Meŋɛ, kyɛ ka mennoŋ poɔ ka O da dire sɛrɛɛ a kyɛ yire tammo.

¹²A O nimie da waa ŋa vũũzele kyɛ ka nazupile yaga be o zu eŋɛ; kyɛ ka ba sɛge yuori kaŋ eŋ o eŋɛ ka neɛzaa ba baŋ o tɛgɛ ka O yoŋ naane.

¹³O da su la kparoo ba naŋ da de toŋ zẽẽ poɔ, ka ba da boɔlɔ O yuori ka A Naaŋmen Yelbiri.

¹⁴A tenvelaa sogyɛre da su la kparpeɛle naŋ pɛle parepare ka dɛgre zaa ba kye a eŋɛ a da zɔŋ wir-peɛle tuuro ne O.

¹⁵Zɔɔzɔɔ-soɔ naŋ dire yaga da wa yi la O noɔre poɔ, ona la ka O na de zɔɔtoɔ̃ ne a tenne noba kyɛ di naaloŋ ba zu ne nimikuoŋaa. O na neɛ la a nenfaare ba naŋ de lɔɔ eŋ a Naaŋmen, Kpeɛ̃õ Zaa Daana supuriyaaraa dãã maaloo zie ne gbɛɛ.

¹⁶A O kparoo eŋɛ ane a O gbɛkpoŋ eŋɛ, ba da sɛge la yuori ŋa eŋ, “Namine zaa Naa ane daanema zaa Daana.”

¹⁷N pãã da nyɛ la maleke ka o are a ŋmenaa poɔ kyɛ boɔle a nuuli zaa naŋ ɛgrɛ a sazu poɔ ne kɔkɔkpeɛŋaa a yele, “Yɛ wa lantaa a di a Naaŋmen tig-kpoŋ,

¹⁸a ɔɔ namine eŋnɛne, sogyɛre ane ba nembɛrɛ eŋnɛne, wie ane a zɔɔnema eŋnɛne; a ɔɔ a noba zaa eŋnɛne, a neɛ naŋ so o meŋɛ ane a gbaŋgbaa, a ba bilii ane a ba bɛrɛ.”

¹⁹Lɛ la ka N da nyɛ a wɛdoŋɔ ane a namine ne a ba sogyɛre ka ba da lantaa ka ba yi tammo ne a soba na naŋ zɔŋ a wiri ane a O sogyɛre.

²⁰Ba da nyɔge la a wɛdoŋɔ a laŋ ne a kaŋwaa Ŋmen-yelmanna naŋ da e yelwulii a wɛdoŋɔ niŋesogɔ a da tu be bɛlle a banaŋ naŋ da taa a wɛdoŋɔ ŋmaaroŋ ane a banaŋ naŋ puoro a wɛdoŋɔ teebo. Ba da lɔɔ la a bama bayi vore eŋ baa vũũ naŋ dire ne gyirimuri.[37]

²¹Kyɛ ba da ko la a banaŋ naŋ kyɛre ne zɔɔzɔɔ-soɔ naŋ da yi a soba na naŋ zɔŋ a wiri noɔre poɔ; ka nuuli zaa da di a ba enne a tege.