Read Southern Dagaare Yel 20 Bible Online

Yel 20 - Southern Dagaare bible

Yel 20

¹N pãã da nyɛ la maleke kaŋ ka o yi a saluoni waana, a taa a bogzuluŋ naŋ ba taa baaraa saafebiri ane banzɔlɔ tegroŋ o nu poɔ.

²O da nyɔge la a wa-beɛ, a dakoroŋ waabo na, ona la a Sebɛlbɛllɛ bee Setaana, a leŋ bare yuomo turi,

³kyɛ da de o lɔɔ eŋ a bogi poɔ a da nyɔge lare kyɛ bɛ a bogi noɔre pɔge, ka o koŋ la bɛlle a tenne kyɛ te ta saŋ na a yuomo turi naŋ baare. A lɛ puoriŋ, a ferɛɛ la ka ba yuo o bare ka o wa yi belaa.

⁴Lɛ la ka N da nyɛ nakogri, ka ba da de kpeɛ̃õ ko a banaŋ naŋ zeŋ a nakogri zu ka ba di sɛrɛɛ. N da nyɛ la a banaŋ meŋ zuri ba naŋ da kyɛ-ŋmaa seere, ba naŋ da di a Yeezu danseɛ ane a Naaŋmen yelbiri danseɛ zuiŋ. Ba da ba puori a wɛdoŋɔ bee a o teebo, a da ba de a o ŋmaaroŋ a ba gberi bee ba nuuri eŋɛ. Ba da leɛ-iri voorɔ la ka ba ne Kirista da di naaloŋ yuomo turi.

⁵(A kuuni na naŋ kyɛre da ba la leɛ-iri voorɔ kyɛ te ta saŋ na a yuomo turi naŋ baare.) A kũũ leɛ-iruu dɛndɛŋ soba la a ŋa.

⁶Banaŋ naŋ poɔ a dɛndɛŋ kũũ leɛ-iruu poɔ nyɛ la maaloo ane sonnoŋ. A kũũ boyi soba ba taa kpeɛ̃õ ba zu, kyɛ ba na e la Naaŋmen ane a Kirista bagmaale wederebɛ a laŋ ne O di naaloŋ yuomo turi.

⁷Ka a yuomo turi wa te baare, ba na yuo la a Setaana bare a o nempagdie poɔ,

⁸ka o yi wa bɛlle a tenne zaa naŋ be a tendaa lamboe anaare, ba naŋ boɔlɔ Gɔg ane Magɔg, ka ka o na toɔ̃ laŋ ba taa ka ba yi tammo. Ba waa la yaga aŋa mane biiree.

⁹Ba da kyɛŋ la a tendaa zaa zu kyɛ da ŋmaagyili a nensonne kpeɛbozie ane a teŋkpoŋ Naaŋmen naŋ nɔŋ. Ka vũũ da yi sazu sigi wa di ba.

¹⁰Kyɛ ka ba da de a sebɛlbɛllɛ naŋ da bɛlle ba lɔɔ eŋ baa vũũ ane gyirimuri[38] poɔ. A be la ka a wɛdoŋɔ ane a kaŋwaa Ŋmen-yelmanna da be, ka ba na dɔgre ba ŋmenaa ane tensogɔ tegitegilɛ.

¹¹N pãã da nyɛ la nakog-pelaa naŋ waa kpoŋ ane a soba na naŋ da zeŋ o zu. A teŋɛ ane a sazu da zo yi la O niŋesogɔ, ka ba da ba nyɛ zie zaa na ko a.

¹²N da nyɛ la a kuuni, a nembɛrɛ ane a bibiiri ka ba are a nakogi niŋesogɔ kyɛ ka ba da yuo gama. Ba da yuo la gane kaŋ meŋ, a nyɔvore gane a kyɛ da di a kuuni sɛrɛɛ a seŋ ba yel-erre ba naŋ da sɛge eŋ a gama poɔ lɛ.

¹³A mane da iri la a kuuni naŋ be o poɔ tere, Kũũ ane Dazugovũũ meŋ da iri la a kuuni naŋ da be a poore tere ka ba da di ba zaa sɛrɛɛ a seŋ bonna ba naŋ da e.

¹⁴Lɛ la ka ba da de Kũũ ane Dazugovũũ lɔɔ eŋ a baa vũũ poɔ. A kũũ boyi soba la a ŋa, a baa vũũ.

¹⁵Kyɛ ba da de la soba na zaa yuori ba naŋ ba sɛge eŋ a nyɔvore gane poɔ lɔɔ eŋ a baa vũũ poɔ.