Read Southern Dagaare Yel 21 Bible Online

Yel 21 - Southern Dagaare bible

Yel 21

¹N pãã da nyɛ la tenvel-paalaa ane tempaalaa; bonso, a dɛndɛŋ saluoni ane a dɛndɛŋ teŋɛ da wa tɔle gaaɛ la, ka a mane meŋ da ba la kyebe.

²N da nyɛ la a tensoŋ, a Gyɛruzɛlɛm paalaa ka o yi a saluoni a Naaŋmen zie sigre waana a nare aŋa pɔgpaalaa naŋ su peɛmɛ a tuoro a o serɛ.

³N da woŋ la kɔkɔkpeɛŋaa ka o yele yɛlɛ yire a nakogi zie a yele: “Nyɛ, a Naaŋmen kpeɛbozie be la nensaalba sogɔŋ. O na kpeɛrɛ la ba poɔ a waa ba Naaŋmen; ka ba meŋ waa O noba, kyɛ Naaŋmen meŋɛ zaa na be la ba zie;

⁴O na eɛre la nentaŋ zaa bare ba nimieŋ. Kũũ koŋ la bebe; konni ane kpɛlle ŋmeɛbo ane woore koŋ la bebe, bonso, a dɛndɛŋ yɛlɛ wa tɔle gaaɛ la.”

⁵Ka a soba na naŋ da zeŋ a nakogi zu da yeli, “Nyɛ, N erɛ la ka a yɛlɛ zaa na leɛ yelpaalaa.” O da la yelee la, “Sɛge a yeli ŋa, bonso a yelbie ama taa la dɛloo kyɛ waa yelmeŋɛ.”

⁶Lɛ la ka O da yeli ko ma, “A e baarɛɛ la! Maa la a Alefa ane a Omega,[39] a piiluu ane a baaroo. A soba na kɔŋnyuuri naŋ kpɛ, N na ko o la kyɔɔtaa naŋ waa koɔ̃ naŋ yi a nyɔvore bulnimiri poɔ.

⁷A banaŋ naŋ zɔɔtoɔ̃ na di la a boma ama gbandiruŋ,[40] kyɛ N na waa la ba Naaŋmen ka ba meŋ waa N bibiiri.

⁸Kyɛ a dabeɛ̃ deme eŋ, a banaŋ naŋ ba taa yeldeebo, a nendɛgɛ, a neŋkooreba, a banaŋ naŋ toŋ peɛ̃mo toma, a banaŋ naŋ erɛ sɔyɛlɛ, a banaŋ naŋ puoro tebɛ ane zirŋmaareba zaa zie la a baa naŋ dire vũũ ane gyirimuri,[41] a kũũ boyi soba la a ŋa.”

⁹A malekere bayopoi na kaŋ naŋ da taa a laare ayopoĩ naŋ da paale ne a baaraa yelwolɔ ayopoĩ pãã da wa yeli ko ma la, “Wa, N na wuli fo la a pɔgpaalaa, a Pilee pɔge.”

¹⁰A seeloŋ poɔ, o da de ma la do ne taŋkpoŋ naŋ waa wogi zaa zu, a da te wuli ma Gyɛruzɛlɛm, a tensoŋ ka o yi sazu a Naaŋmen zie sigre waana.

¹¹O da taa la a Naaŋmen puubu kyɛ nyegrɛ aŋa kusi-nyegraa, a waa ŋa kusi-veɛle mine ba naŋ boɔlɔ gyaspa, a e weliweli aŋa sakuurii.

¹²O da taa la daŋkyinkpoŋ naŋ do yaga zaa a kyɛ taa dendɔɛ pie ne ayi ka malekere pie ne bayi are a dendɔɛ eŋɛ, kyɛ ka ba da sɛge a Izerayɛl bale pie ne bayi yoe eŋ a dendɔɛ eŋɛ.

¹³Dendɔɛ ata da be la a sapare seŋ, ka ata be sapare nugɔɔ,[42] ka ata be sapare nudoloŋ seŋ, ka ata meŋ be saniŋe.

¹⁴A teŋɛ daŋkyini da taa la daŋkyinpare pie ne ayi ka ba da sɛge a Pilee apostolii pie ne bayi yoe eŋ a daŋkyinpare pie ne ayi eŋɛ.

¹⁵A maleke na naŋ da yeli yɛlɛ ko ma da taa la salema damannaa ka o manne a teŋkpoŋ ane o dendɔɛ ane a o daŋkyime.

¹⁶A teŋkpoŋ da taa la lamboe anaare ka a zaa seŋ taa, a o wogruŋ ane a o yɛloŋ da seŋ la taa. O da manne la a teŋkpoŋ ne a o damannaa a nyɛ mɛlɛ turi ne kɔɔraanuu. A o wogruŋ ane a o yɛloŋ ane a o duobu zaa da seŋ la taa.

¹⁷A maleke meŋ da de la nensaala bommanne a manne a teŋkpoŋ daŋkyini a nyɛ mitare lezaata ne ayoɔbo.

¹⁸Kusi-veɛle mine ba naŋ boɔlɔ gyaspa la ka ba da de mɛ ne a daŋkyini, kyɛ mɛ a teŋkpoŋ ne salema ka o nyegrɛ aŋa kyaanaa.

¹⁹Ba da eŋ la kusi-veɛle boorɔ zaa a teŋkpoŋ daŋkyinpareŋ; a dɛndɛŋ soba la gyaspa, ka ayi soba waa safire, ka ata soba waa agate, ka anaare soba waa emeraade,

²⁰ka anuu soba waa ɔnese, ka ayoɔbo soba waa kaneliyan, ka ayopoĩ soba waa kirisolaite, ka anii soba waa berɛɛle, ka awae soba waa topaze, ka pie soba waa kirisopirase, ka pie ne yeni soba waa gyasin, ka pie ne ayi waa ametese.

²¹A dendɔɛ pie ne ayi da waa la kusi-veɛle pie ne ayi, ka a dendɔre kanzaa e kusi-yeni, kyɛ ka a teŋkpoŋ sokoɔraa da waa salema yoŋ, a nyegrɛ aŋa kyaanaa.

²²N da ba nyɛ Naaŋmen puoruudie zaa a teŋkpoŋ poɔ, bonso, Naaŋmen, a Kpeɛ̃õ Zaa Daana ane a Pilee da la a teŋkpoŋ puoruudie.

²³A da ba la ferɛ ka a teŋkpoŋ la boɔrɔ a ŋmenaa bee a kyuu veɛloŋ ka a kyaane eŋ o, bonso, a Naaŋmen veɛloŋ la o kyaane, ka a Pilee e o fentelɛ.

²⁴A tenne noba na kyɛnɛ ne la a o veɛloŋ, kyɛ ka teŋɛzu namine taa ba puubu wa kpɛ ne o poɔ.

²⁵Ba daŋ koŋ pɔge a o dendɔɛ a ŋmenaa saŋ; kyɛ tensogɔ meŋ koŋ kye a be.

²⁶Noba na taa la a tenne puubu ane a tenne emmo wa ne a be.

²⁷Kyɛ bondɛgre zaa koŋ kpɛ o poɔ, ka neɛzaa naŋ erɛ yelfa-dɛgɛ bee a ŋmaara zirii meŋ koŋ kpɛ o poɔ. A banaŋ yoŋ yoe ba naŋ sɛge eŋ a Pilee nyɔvore gane poɔ la na kpɛ o poɔ.