Read Southern Dagaare Yel 22 Bible Online

Yel 22 - Southern Dagaare bible

Yel 22

¹A maleke pãã da wuli ma la a nyɔvore baa koɔ̃ ka a koɔ̃ pɛle aŋa sakuurii a da zoro yire a Naaŋmen ane a Pilee nakogi zie,

²a tu a teŋkpoŋ sokoɔraa sogɔŋ. A nyɔvore teɛ da are la a baa lamboe ayi a wɔŋ wɔmɔ tɛɛtɛɛ pie ne ayi. O da maŋ wɔŋ la wɔmɔ kyuu zaa kyɛ ka a teɛ vaare da e tẽẽ a saŋna a tenne noba.

³Bonzaa Naaŋmen naŋ kaa-eŋ koŋ be a teŋkpoŋ poɔ. A Naaŋmen nakogi ane a Pilee nakogi la na be o poɔ kyɛ ka O tontonema puoro O.

⁴Ba na nyɛ la O niŋe kyɛ ka ba sɛge a O yuori eŋ a ba gberi eŋɛ.

⁵Tensogɔ koŋ la bebe; ba koŋ la boɔrɔ fentelɛ bee ŋmenaa veɛloŋ, bonso, a Daana Naaŋmen na la a ba veɛloŋ kyɛ ka ba di naaloŋ tegitegilɛ.

⁶O da yeli ko ma la, “A yelbie ama taa la dɛloo kyɛ waa yelmeŋɛ, bonso, a Daana, a Naaŋmen naŋ maŋ ko a O yelmanneba O vooroŋ la da toŋ a O maleke ka o wa wuli a o tontonema bon naŋ koŋ kɔɔre kyɛ e.”

⁷“Nyɛ, a deɛ koŋ kɔɔre kyɛ ka N wa! Soba na zaa naŋ sage de a Ŋmen-yelmanna yelbie ama naŋ be a gane ŋa poɔ nyɛ la maaloo.”

⁸Maa Gyɔɔn la a soba na naŋ da woŋ kyɛ nyɛ a yɛlɛ ama. N naŋ da wa kyɛlle woŋ kyɛ nyɛ a, N da le vɔgle la muro a maleke na naŋ da de a yɛlɛ wuli ma gbɛɛ puliŋ ka N puori o;

⁹kyɛ ka o da yeli ko ma, “A ba seŋ ka fo e a lɛ! Maa ne fo ane a fo yɔɔmine, a Ŋmen-yelmanneba ane a banaŋ naŋ sage de a gane ŋa poɔ yelbie waa la tonton-taaba. Puoro Naaŋmen!”

¹⁰A maleke da yeli ko ma la, “Ta wa pɔgrɔ a Ŋmen-yelmanna yelbie naŋ be a gane ŋa poɔ bara, bonso, a saŋ peɛlɛɛ la.

¹¹Vɛŋ ka a yelfa-errɛ naŋ kyɛnɛ erɛ yelfaare, ka a dɛgre soba naŋ kyɛnɛ waa dɛgre, ka a nemmeŋɛ naŋ kyɛnɛ erɛ yɛlɛ naŋ tori, ka a nensoŋ naŋ kyɛnɛ waa soŋ.”

¹²“Nyɛ, a koŋ kɔɔre kyɛ ka N wa; N taa la N san-yɔɔ waana ne ka N yɔɔ neɛzaa a seŋ lɛ o soba naŋ toŋ.

¹³Maa la a Alefa ane a Omega,[43] a dɛndɛŋ ane a baaraa, a piiluu ane a parebaaraa.”

¹⁴A banaŋ naŋ pɛge a ba kparre nyɛ la maaloo. Ba na nyɛ la sori di a nyɔvore teɛ wɔmɔ kyɛ tu a dendɔɛ kpɛ a teŋkpoŋ poɔ.

¹⁵A nenfaare ane a banaŋ naŋ erɛ sɔyɛlɛ ane a banaŋ naŋ tonɔ peɛ̃mo toma ane a neŋkooreba ane a banaŋ naŋ puoro tebɛ ane neɛzaa naŋ nɔŋ kyɛ ŋmaara zirii na be la a yeŋ poɔ.

¹⁶“Maa Yeezu la da toŋ a N maleke a fo zie ka o wa di a yeli ŋa danseɛ ko fo a puoruu laŋne yie zuiŋ. Maa la a Davil nyeɛne[44] ane o bale neɛ, a waa a zinyaakyeŋkyoɔlaa.”

¹⁷A Vooroŋ Soŋ ane a pɔgpaalaa yelee la, “Wa.” Kyɛ vɛŋ ka neɛ na zaa naŋ kyɛlle woŋ meŋ yeli, “Wa.” Neɛ na zaa kɔŋnyuuri naŋ kpɛ, vɛŋ ka o wa. Neɛzaa naŋ boɔrɔ a nyɔvore koɔ̃, o wa de nyu weɛlɛ.

¹⁸N kpãã la neɛzaa naŋ wono a Ŋmen-yelmanna yelbie naŋ be a gane ŋa poɔ: ka neɛzaa wa de yelzaa poɔ a yɛlɛ ama poɔ, Naaŋmen na de la a yelwolɔ na yɛlɛ ba naŋ manne a gane ŋa poɔ dɔgle o soba zu;

¹⁹ka neɛzaa meŋ wa iri yelzaa bare a Ŋmen-yelmanna yelbie naŋ be a gane ŋa poɔ, a nyɔvore teɛ ane a tensoŋ yɛlɛ ba naŋ manne a yɛlɛ eŋ a gane ŋa poɔ, Naaŋmen na iri la o soba deme bare.

²⁰A soba na naŋ di a yɛlɛ ama danseɛ yelee la, “Serɛzaa, N koŋ kɔɔre kyɛ wa.” Ameena.[45] Daana Yeezu, wa!

²¹Ka a Daana Yeezu garaaseɛ be a nensonne zaa zie. Ameena.