Read Southern Dagaare Yel 5 Bible Online

Yel 5 - Southern Dagaare bible

Yel 5

¹N pãã da nyɛ la a soba na naŋ da zeŋ a nakogi zu, ka o taa gane o nuduluŋ poɔ, ka ba da sɛge eŋ a gane poɔ ane o puoriŋ, kyɛ da mare a noɔre pɔge ziiri ayopoĩ ne suni;

²kyɛ ka N da nyɛ maleke kaŋ naŋ taa faŋ ka o moɔlɔ ne kɔkɔkpeɛŋaa a yele, “Aŋ la seŋ ne ka o lage a suni kyɛ yuo a gane?”

³Ka neɛzaa da kye a tenvelaa[10] poɔ bee a teŋɛzu bee a teŋɛ pare a na toɔ̃ yuo a gane bee a kaa o poɔ.

⁴Ka N da piili kono yaga zaa, ba naŋ da ba nyɛ neɛzaa ka o seŋ ne ka o yuo a gane bee a kaa o poɔ zuiŋ.

⁵Lɛ la ka a neŋkpoŋ kaŋ da yeli ko ma, “Ta kono. Nyɛ, a Gyuda bale Gbeŋni, a Davil Nyeɛne[11] zɔɔtoɔ̃ɛɛ la, ka lɛ vɛŋ ka o na toɔ̃ lagre a suni ba naŋ mare ziiri ayopoĩ kyɛ yuo a gane.”

⁶Lɛ la ka N da nyɛ a Pilee ka o are a nakogi ane a bonvoba anaare ane a nembɛrɛ sogɔŋ, a da waa ŋa ba naŋ ko, ka O da taa eelɛ ayopoĩ ane nimie ayopoĩ naŋ waa a Naaŋmen seere ayopoĩ ba naŋ da toŋ a tendaa ziiri zaa.

⁷O da gaa te de la a gane yi a soba na naŋ da zeŋ a nakogi zu nuduluŋ poɔ.

⁸O naŋ da wa te de a gane baare, a bonvoba anaare ane a nembɛrɛ lezare ne banaare da le vɔgle la muro a Pilee niŋesogɔ, ka ba kanzaa taa koriŋgyo ane salema laa naŋ paale ne ensɛnse, ana la a nensonne puoruu.

⁹Ba da yiele la yieluŋ paalaa: “Fo seŋɛɛ la ka fo de a gane a lagre a suni bare, bonso, ba da ko fo la, kyɛ ka fo da de fo zẽẽ yɔɔ de ne nensonne naŋ yi a bale zaa poɔ ane kɔkɔɛ zaa poɔ ane nemboorɔ zaa poɔ ane tenne zaa poore ko Naaŋmen.

¹⁰Fo eɛɛ la ka ba waa namine ane Naaŋmen bagmaale wederebɛ, a tonɔ korɔ a te Naaŋmen, kyɛ ba na di la naaloŋ a teŋɛzu.”

¹¹Lɛ la ka N da kaa, a da woŋ malekere yaga kɔkɔɛ. A malekere da ŋmaa-gyili la a nakogi ane a bonvoba ane a nembɛrɛ. Ba da waa la turi turi turi kombaŋsɔre.

¹²Ba da yiele la ne kɔkɔkpeɛne a yele: “A Pilee na ba naŋ da ko seŋ ne la ka o nyɛ kpeɛ̃õ ane naboma ane yɛŋ ane faŋ ane emmo ane puubu ane maaloo!”

¹³Lɛ la ka N da woŋ bon-iri zaa naŋ be a tenvelaa poɔ ane a teŋɛzu ane a teŋɛ pare ane a mane poɔ ane a boma zaa naŋ be a poore ka a yiele: “Ka a soba na naŋ zeŋ a nakogi zu ane a Pilee nyɛ maaloo ane emmo ane puubu ane faŋ tegitegilɛ!”

¹⁴Ka a bonvoba anaare da yeli, “Ameena[12]!” Kyɛ ka a nembɛrɛ da le vɔgle muro kyɛ puori Naaŋmen ne emmo.