Read Southern Dagaare Yel 6 Bible Online

Yel 6 - Southern Dagaare bible

Yel 6

¹N pãã da nyɛ la a Pilee ka O lage a suni ayopoĩ na kaŋ, kyɛ ka N da woŋ a bonvoba anaare na kaŋ ka o boɔle, ka a o kɔkɔre waa ŋa saa tannoo, “Wa!”

²N da kaaɛ la, a nyɛ wir-pelaa kaŋ! A soba na naŋ da zɔŋ a wiri da taa la tammo; ka ba da de nazupili ko o, ka o da wa yi a zɔɔrɔ toɔnɔ kyɛ na la zɔɔtoɔ̃.

³A Pilee naŋ da wa lage a suni ayi soba, N da woŋ la a bonvoba ayi soba ka o boɔle, “Wa!”

⁴Ka wiri kaŋ da wa yi, a waa zeɛ tõẽtõẽ lɛ. Ba da ko la a soba na naŋ zɔŋ a wiri sori ka o iri emmaaroŋ yi a teŋɛzu, ka ka noba na koorɔ taa; kyɛ ka ba da de zɔɔzɔɔ-sɔkpoŋ ko o.

⁵A Pilee naŋ da wa lage a suni ata soba, N da woŋ la a bonvoba ata soba ka o boɔle, “Wa!” N da kaaɛ la a nyɛ wir-sɔglaa! A soba na naŋ da zɔŋ a wiri da taa la boma ayi ba naŋ maŋ manne ne boma o nu poɔ,

⁶ka N da woŋ gɔmɔ naŋ waa ŋa kɔkɔre a bonvoba anaare sogɔŋ ka o yele, “Da kapelaa kookoolaa ne bebi-gbuli san-yɔɔ, kyɛ da kazeɛ kookoolaare ata ne bebi-gbuli san-yɔɔ kyɛ ta sãã a kãã ane a dãã bare!”

⁷A Pilee naŋ da wa lage a suni anaare soba, N da woŋ la a bonvoba anaare soba ka o boɔle, “Wa!”

⁸N da kaaɛ la a nyɛ wir-pugo! A soba na naŋ da zɔŋ a wiri yuori da la Kũũ, ka Dazugovũũ meŋ da tu o. Ba da ko ba la faŋ a tendaa zaa poŋ ziiri anaare, ziyeni zu, ka ba de zɔɔzɔɔ-soɔ, kɔŋkpoŋ, baaloŋ faa ane a teŋɛzu wɛdonne ko ne a noba.

⁹A Pilee naŋ da wa lage a suni anuu soba, N da nyɛ la a banaŋ ba naŋ da ko a Naaŋmen yelbiri ane a danseɛ ba naŋ da di zuiŋ, ka ba seere da be a Naaŋmen bagmaalkuuri puliŋ

¹⁰Ba da kyeerɛ ne la kɔkɔkpeɛne a yele, “Boma Zaa Daana, soŋ ane yelmeŋɛ soba, a na kɔɔre seŋ la wola kyɛ ka fo di a teŋɛzu noba sɛrɛɛ, a yɔɔ a banaŋ naŋ da kyiri te zẽẽ sane?”

¹¹Ba da ko la ba kanzaa kparpelaa a kyɛ yeli ko ba ka ba pɛnne belaa te ta saŋ na a ba tonton-taaba ane ba yɔɔmine ane ba yɔɔpuuli noɔre naŋ ta. A koŋ kɔɔre kyɛ ka ba ko ba aŋa ba naŋ da ko ba meŋ lɛ.

¹²A Pilee naŋ da wa lage a suni ayoɔbo soba, N da kaaɛ la a nyɛ ka a teŋɛ gbigri yaga zaa; ka a ŋmenaa soɔ kpirkpiri aŋa pɛn-sɔglaa, kyɛ ka a kyuu zaa moɔ aŋa zẽẽ,

¹³ka a ŋmarbie da yi a saluoni le a teŋɛzu aŋa kaŋkaŋ-wɔmɔ naŋ maŋ suoro lere, a sasekpeɛŋaa naŋ maŋ wa fu a ɔɔkpoŋ saŋ lɛ.

¹⁴A saluoni da bɔrɛɛ la aŋa ba naŋ pilli sɛŋ, ka tanne zaa ane mandoba zaa da ba la kye be a naŋ da are.

¹⁵Lɛ la ka a teŋɛzu namine ane a nembɛrɛ ane a sogyɛre nembɛrɛ ane a bondaanema ane a gandaare ane neɛzaa, a gbaŋgbaare ane noba naŋ so bamenne, da sɔgle bogri pooreŋ ane a piiri naŋ be a tanne pooreŋ.

¹⁶Ba da boɔlɔ la a tanne ane a piiri a yele, “Yɛ le pɔge te ka te sɔgle ka a soba na naŋ zeŋ a nakogi zu ta nyɛrɛ te, kyɛ sɔgle te yi a Pilee supuriyaaraa eŋɛ;

¹⁷bonso, a ba supuriyaaraa bebi-kpoŋ taaɛ la, aŋ la na toɔ̃ yi a poɔ?”