Read Southern Dagaare Yel 7 Bible Online

Yel 7 - Southern Dagaare bible

Yel 7

¹A ŋaa puoriŋ, N da nyɛ la malekere banaare ka ba are a tendaa lamboe anaare, a nyɔge a tendaa saseere anaare taa, ka saseɛ zaa na ta fu a teŋɛzu bee a mane zu bee a fu a teɛ kanzaa eŋɛ.

²N da nyɛ la a maleke kaŋ naŋ taa a Naaŋmen-vore ŋmaaroŋ ka o yi a ŋmenaa puribu zie duoro. O da boɔle la a malekere anaare na ba naŋ da tere kpeɛ̃õ ka ba sãã a teŋɛ ane a mane ne kɔkɔkpeɛŋaa,

³a yele, “Yɛ ta sãã a teŋɛ bee a mane bee a teere, a te ta saŋ na te naŋ eŋ a te Naaŋmen tontonema ŋmaaroŋ a ba gberi enne.”

⁴N da woŋ la a banaŋ ba naŋ da eŋ a ŋmaaroŋ noɔre, ka ba da waa noba turi lezaapoi ne turi anaare. Ba da eŋ ba la ŋmaaroŋ ka ba da yi a Izerayɛl biiri bale zaa poɔ:

⁵Turi pie ne turi ayi la da yi a Gyuda bale poɔ ka ba da eŋ a ŋmaaroŋ, ka turi pie ne turi ayi da yi a Uruben bale poɔ, ka turi pie ne turi ayi da yi a Gad bale poɔ,

⁶ka turi pie ne turi ayi da yi a Asɛ bale poɔ, ka turi pie ne turi ayi da yi a Nafetali bale poɔ, ka turi pie ne turi ayi da yi a Manaasɛ bale poɔ,

⁷ka turi pie ne turi ayi da yi a Simeon bale poɔ, ka turi pie ne turi ayi da yi a Levi bale poɔ, ka turi pie ne turi ayi da yi a Isaaka bale poɔ

⁸ka turi pie ne turi ayi da yi a Zɛbulun bale poɔ, ka turi pie ne turi ayi da yi a Yuzɛb bale poɔ, ka turi pie ne turi ayi da yi a Bɛŋgyamen bale poɔ ka ba da eŋ a ŋmaaroŋ.

⁹A ŋaa puoriŋ, N da kaaɛ la a nyɛ nembeɛoŋ ka neɛzaa da koŋ baŋ sɔre ba. Ba da yi la a tenne zaa poore, a yi a bale zaa poore ane nemboorɔ zaa poɔ ane kɔkɔɛ zaa poɔ. Ba da su la kparpeɛle kyɛ taa kpaakpaa vaare ba nuuri poɔ a da are a nakogi ane a Pilee niŋesogɔ.

¹⁰Ba da kyeerɛ la ne kɔkɔkpeɛne, a yele: “A te Naaŋmen naŋ zeŋ a nakogi zu ane a Pilee la so faabo!”

¹¹A malekere zaa naŋ da are gyeere a nakogi ane a nembɛrɛ ane a bonvoba anaare zaa da le vɔgle la muro a nakogi niŋesogɔ kyɛ puori Naaŋmen,

¹²a yiele, “Ameena[13]! Ka a te Naaŋmen nyɛ dannoo ane puubu ane yɛŋ ane ameseɛrɛ puoruu ane emmo ane kpeɛ̃õ ane faŋ tegitegilɛ! Ameena.”

¹³Lɛ la ka a neŋkpoŋ kaŋ da yeli yɛlɛ ko ma, a soorɔ, “Aŋ mine la a noba bama naŋ su a kparpeɛle? Yeŋ la ka ba yi?”

¹⁴Ka N da yeli sɔge o, “Neŋkpoŋ, fõõ la a soba na naŋ baŋ.” Lɛ la ka o da yeli ko ma, “A bama la a noba na naŋ yi a dɔgroŋ kpoŋ na poɔ; ba pɛge la a ba kparre a Pilee zẽẽ poɔ a e ka a e pelaa.

¹⁵A ŋaa zuiŋ la so ka ba are a Naaŋmen nakogi niŋesogɔ a puoro O ŋmenaa ane tensogɔ a puoruudie poɔ, ka a soba na naŋ zeŋ a nakogi zu na gu ba taa.

¹⁶Kɔŋ daŋ koŋ la kpɛ ba zaa, ka kɔŋnyuuri meŋ koŋ la kpɛ ba zaa; a ŋmenaa daŋ koŋ la ŋmɛ ba zaa, bee ka toloŋ zaa kpɛ ba;

¹⁷bonso, a Pilee naŋ be a nakogi sogɔŋ na e la ba kyeenɛ, O na taa ba la gaa ne bulnimie koɔ̃ naŋ terɛ nyɔvore zie, kyɛ Naaŋmen na eɛre la ba nentaŋ bare a ba nimie poore.”