Read Southern Dagaare Yel 8 Bible Online

Yel 8 - Southern Dagaare bible

Yel 8

¹A Pilee naŋ da wa lage a suni ayopoĩ soba, a zie da ŋmaa la vooroŋ a tenvelaa[14] poɔ a te ta ŋa gogo kyɛle.

²Ka N da nyɛ malekere ayopoĩ na naŋ maŋ are a Naaŋmen niŋesogɔ, ka ba da de eelɛ ayopoĩ ko ba.

³A maleke kaŋ da taa la salema laa ba naŋ maŋ eŋ ensɛnse o poɔ a nyege, a da wa are a Naaŋmen bagmaalkuuri niŋesogɔ. Ba da ko o la ensɛnse yaga ka o na nyege laŋ ne a nensonne zaa puoruu naŋ be a salema bagmaalkuuri zu naŋ da be a nakogi niŋesogɔ.

⁴A ensɛnse nyoore[15] ane a nensonne puoruu da yi la a maleke nu poɔ a do a Naaŋmen niŋesogɔ.

⁵Lɛ la ka a maleke da de a laa na ba naŋ maŋ eŋ ensɛnse o poɔ a nyege, a da moɔ vũũ yi a Naaŋmen bagmaalkuuri zu a paale a laa a kyɛ de lɔɔ a tendaa zu. Lɛ la ka saa da tanna, a hoorɔ, a nyegrɛ kyɛ ka a teŋɛ da gbigri.

⁶Pampana, a malekere ayopoĩ na naŋ da taa a eelɛ ayopoĩ da narɛɛ la ka ba peɛle a eelɛ.

⁷A maleke dɛndɛŋ soba da peɛle la o eele, ka sakubo ane vũũ naŋ pulli ne zẽẽ da wa yi, ka ba da de a lɔɔ a tendaa zu, ka a tendaa zaa poŋ ziiri ata, ziyeni da nyɔge vũũ di, ka a teere poŋ ziiri ata, ziyeni da nyɔge vũũ di, ka a mɔmaara zaa da nyɔge vũũ di.

⁸A maleke bayi soba da peɛle la a o eele, ka ba da de bonkaŋ naŋ waa ŋa taŋkpoŋ naŋ dire vũũ lɔɔ eŋ a mane poɔ.

⁹A mane poŋ ziiri ata, ziyeni da leɛ la zẽẽ, ka a mane poɔ bonvoba poŋ ziiri ata, ziyeni boma da kpi, ka a gboe poŋ ziiri ata, ziyeni deme da sãã.

¹⁰A maleke bata soba da peɛle la a o eele, ka ŋmarbi-kpoŋ kaŋ da yi sazu le, a dire ŋa vũũdaa. O da le la bare ane bulnimie poŋ ziiri ata, ziyeni zu.

¹¹A ŋmarbiri yuori da la Te-tuo. A koɔ̃ zaa poŋ ziiri ata, ziyeni da leɛ la kɔŋtuo, ka noba yaga naŋ da nyu a koɔ̃ da kpi, a koɔ̃ naŋ da waa tuo zuiŋ.

¹²A maleke banaare soba da peɛle la a o eele, ka ba ŋmɛ a ŋmenaa poŋ ziiri ata, ziyeni ane a kyuu naŋ poŋ ziiri ata, ziyeni ane a ŋmarbie naŋ poŋ ziiri ata, ziyeni, ka a lɛ vɛŋ ka a ŋmenaa, kyuu ane a ŋmarbie kyaane poŋ ziiri ata, ziyeni da ligi. Ba da pigi la a ŋmenaa saŋ kyaane poŋ ziiri ata, ziyeni, ka o da ba taa veɛloŋ, lɛ meŋ la ka a da waa ko a tensogɔ.

¹³N pãã da kaaɛ la, a da nyɛ tuu naŋ ɛgrɛ a sazu poɔ a kyɛ woŋ ka o kono ne kɔkɔkpeɛŋaa, “A saŋ a eelɛ na naŋ kyɛre naŋ na wa koŋ, ka a malekere bata nara ka a peɛle, a noba naŋ be a teŋɛzu yuori la we, we, we!”