Read Southern Kisi Chɛ̄nɛ̍se̍ē 1 Bible Online

Chɛ̄nɛ̍se̍ē 1 - Southern Kisi bible

Chɛ̄nɛ̍se̍ē 1

¹Yāu̍wo̍ ho̍ō ndu̍ chɔ̍m a̍ mɛ̄ɛ̍ Mɛ̄lɛ̄ka̍ tōōsi̍a̍a̍ fo̍ndāŋ nda̍ŋ chōo̍ cho̍o̍ a̍ lɛ̄ŋ o̍ kāndɔ᷄ŋndo̍ ni̍,

²nyɛ̄ o̍ nyɛ̄ wa̍ mu̍lu̍kɛ̄lɛ̍ɛ̄, ndu̍yɛ̍ nyɛ̄ o̍ nyɛ̄ bɛ̍ɛ̍ ve̍ le̍cho̍ō le̍. Chi̍e̍ēŋndo̍ wa̍ ō kūmbāā kpo̍u̍ a̍ mɛ̄ŋnda̍ŋ, mi̍ nyūmnda̍ŋ mā wā mā tūālāā o̍ mɛ̄ŋnda̍ŋ chōo̍ kpi᷅ŋgbi̍. Ndu̍yɛ̍, nyi̍na̍ Mɛ̄lɛ̄ka̍a̍ ō wa̍ bālɔ̄ɔ̍ o̍ mɛ̄ŋnda̍ŋ chōo̍.

³Mī Mɛ̄lɛ̄ka̍ dīmī āā, “Nyɛ̄ wa̍wo̍ŋndo̍ ō wa̍.” Mi̍ nyɛ̄ wa̍wo̍ŋndo̍ ō wā.

⁴Mi̍ Mɛ̄lɛ̄ka̍ chā māā nyɛ̄ wa̍wo̍ŋ o̍ to̍o̍si̍a̍a̍ wo̍ ō bɛ̄nda̍. Mi̍ Mɛ̄lɛ̄ka̍ pīɔ̄ū nyɛ̄ wa̍wo̍ŋndo̍ tɛ̄ɛ̄ŋ nda̍ nyūmnda̍ŋ.

⁵Mbo̍ kē nyɛ̄ wa̍wo̍ŋndo̍ dīōla̍ŋ āā, īpāla̍a̍, mbo̍ kē nyūmnda̍ŋ dīōla̍ŋ āā, īchɔ̄llo̍. Mi̍ nyūmnda̍ŋ mā tūāl, mi̍ pāa̍le̍ŋ lē sīā dīi̍mā ndɔ̄ɔ̍. Mi̍ pāa̍le̍ tāse̍le̍ŋ lē hīāū.

⁶Mi̍ Mɛ̄lɛ̄ka̍ dīmī āā, “Nyɛ̄ tīīla᷄ŋndo̍ ō tōsa̍ŋ o̍ mɛ̄ŋnda̍ŋ tɛ̄ɛ̄ŋ, mbō pīɔ̍u̍ mɛ̄ŋnda̍ŋ tɛ̄ɛ̄ŋ sālā tīɔ̍ɔ̍ŋ.” Mi̍ ī yɔ̍nu̍ŋ mɛ̄ɛ̍ Mɛ̄lɛ̄ka̍ dīmi̍ yɛ̍.

⁷Mi̍ Mɛ̄lɛ̄ka̍ tōōsīāā nyɛ̄ tīīla᷄ŋ bɛ̍ndōo̍ o̍ mɛ̄ŋnda̍ŋ tɛ̄ɛ̄ŋ. Mbo̍ pīɔ̄ū mɛ̄ŋnda̍ŋ sālā tīɔ̍ɔ̍ŋ. Mi̍ mɛ̄ŋnda̍ŋ mā ti᷄ŋ mā lō o̍ nyɛ̄ tīīla᷄ŋ ko̍ŋ bɛ̄ŋgu̍, mi̍ ma᷅ŋ mā wā lēkɔ̍ɔ̍lī.

⁸Mi̍ Mɛ̄lɛ̄ka̍ kē nyɛ̄ tīīla᷄ŋ bɛ̍ndū kōŋ dīōla̍ŋ āā, ha̍la̍a̍. Mi̍ nyūmnda̍ŋ mā tūāl. Mi̍ pāa̍le̍ŋ lē sīā dīīmā ndɔ̄ɔ̍. Mī pāa̍le̍ di̍i̍ŋ ndɔ̄le̍ŋ lē hīāū.

⁹Mi̍ Mɛ̄lɛ̄ka̍ dīmī āā, “Mɛ̄ŋma̍ cho̍ o̍ ha̍la̍a̍ bɛ̄ŋgu̍ wa᷅ŋ mā chūūŋgi̍āŋ ni̍ko̍ na̍a̍ pi᷅lɛ̍, mī lɛ̄ŋndē vēsɛ̍i̍le̍ŋ lē fūla̍.” Mi̍ ī yɔ̍nu̍ŋ le̍nde̍.

¹⁰Mi̍ Mɛ̄lɛ̄ka̍ kē lɛ̄ŋndē vēsɛ̍i̍le̍ŋ dīōla̍ŋ āā, chi̍e̍ēŋndo̍ lɛ̍ŋ. Mbo̍ kē mɛ̄ŋma̍ chu̍u̍ŋgi̍āŋ na̍a̍ pi᷅lɛ̍ wa̍ŋ dīōla̍ŋ āā, pēe̍ mɛ̄ŋmā īhɛ᷄llo̍. Mi̍ Mɛ̄lɛ̄ka̍ chā māā ō bɛ̄nda̍.

¹¹Mi̍ Mɛ̄lɛ̄ka̍ dīmī āā, “Lɛ̄ŋnde̍ŋ lē tōsa̍ ni̍ko̍ mī nyɛ̄ o̍ nyɛ̄ pūīyāā vīl o̍ chi̍e̍ēŋndo̍ chōo̍ a̍ yɔ̄mnde̍. Nyɛ᷄m chu̍u̍lū mī ŋ̄ tōsa̍ ku̍lu̍la̍ŋ ndo̍ŋ a̍ yɔ̄mīī kūāmɛ̍i̍ ku̍ām a̍ būŋnda̍ŋ lēni᷄ŋ nde̍ bɛ̍ɛ̍, lā wu᷅l o̍ chi̍e̍ēŋndo̍ chōo̍ a̍ su̍u̍la̍ŋ yɛ̍ yɛ̍.” Mi̍ ī yɔ̄nu᷄ŋ le̍nde̍.

¹²Mi̍ lɛ̄ŋnde̍ŋ lē tōsā mi̍ nyɛ̄ o̍ nyɛ̄ pūīyāā a̍ yɔ̄mnde̍, a̍ nyɛ᷄m chu̍u̍lū mī ŋ̄ tōsa̍ ku̍lu̍la̍ŋ ndo̍ŋ, a̍ yɔ̄mīī kūāmɛ̄i̍ ku̍ām a̍ būŋnda̍ŋ lēni᷄ŋ nde̍, mi̍ lā wūl o̍ chi̍e̍ēŋndo̍ chōo̍ a̍ su̍u̍la̍ŋ yɛ̍ yɛ̍. Mi̍ Mɛ̄lɛ̄ka̍ chā māā ō bɛ̄nda̍.

¹³Mi̍ nyūmnda̍ŋ mā tūāl, mi̍ pāa̍le̍ŋ lē sīā dīi̍mā ndɔ̄ɔ̍. Mi̍ pāa̍le̍ ya̍a̍ ndɔ̄le̍ŋ lē hīāū.

¹⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmī āā, “Nyɛ᷄m yɔ̍ŋgū nyɛ̄ wa̍wo̍ŋndo̍ wo̍ŋ ŋ̄ wa̍ ni̍ko̍ o̍ ha̍la̍a̍ ni᷄ŋ cho̍o̍ cho̍o̍. Nyɔ̄ɔ̍ŋ mu᷅ŋ ŋ̄ wa̍ le̍ īpāla̍a̍ a̍ īchɔ̄llo̍ pīɔ̄ūwo̍ tɛ̄ɛ̄ŋ. Ŋ̄ wa̍ ta̍a̍māsi̍la̍ŋ ndu̍yɛ̍, mī ŋ̄ wa̍ le̍ bōōndu̍ŋ yɛ̍ yɔ̍ŋ chɔ̄mndo̍ o̍ wɔ̄sīo̍o̍ ni᷄ŋ, a̍ le̍ pālɛ̍i̍ a̍ wɔ̄sīla̍ŋ chɔ̄mndo̍.

¹⁵Nyɔ̄ɔ̍ŋ mu᷅ŋ wa̍ vɛ̍lɛ̄ o̍ ha̍la̍a̍ ni᷄ŋ cho̍o̍ cho̍o̍ le̍ nyɛ̄ wa̍wo̍ŋndo̍ yɔ̄ŋgōo̍ o̍ chi̍e̍ēŋndo̍ chōo̍.” Mi̍ ī yɔ̍nu̍ŋ le̍nde̍.

¹⁶Mi̍ Mɛ̄lɛ̄ka̍ tōōsīāā nyɛ᷄m yɔ̍ŋgū nyɛ̄ wa̍wo̍ŋndo̍ wo̍ŋ ŋ̄ bɛ̄ndo᷄ŋ le̍nde̍ ŋ̍ mūu̍ŋ. Mi̍ ō bɛ̄ndū tāso̍o̍ ō wā le̍ nyɛ̄ wa̍wo̍ŋndo̍ yɔ̄ŋgōo̍ īpāla̍, mi̍ ō bɛ̄ndū dīi̍ŋ ndɔ̄ɔ̍ ō wā le̍ īchɔ̄l. Mbo̍ tōōsīāā vɛ̄lɛ̄ lōo̍ŋ.

¹⁷Mi̍ Mɛ̄lɛ̄ka̍ hāndū mu̍ŋ o̍ ha̍la̍a̍ ni᷄ŋ cho̍o̍ cho̍o̍ le̍nde̍ kpɛ̍ kpɛ̍, le̍ nyɛ̄ wa̍wo̍ŋndo̍ yɔ̄ŋgōo̍ o̍ chi̍e̍ēŋndo̍ chōo̍,

¹⁸īpāla̍ a̍ īchɔ̄l, a̍ le̍ nyɛ̄ wa̍wo̍ŋndo̍ pīɔ̄ūwo̍ tɛ̄ɛ̄ŋ a̍ nyūmnda̍ŋ. Mi̍ Mɛ̄lɛ̄ka̍ chā māā ō bɛ̄nda̍.

¹⁹Mi̍ nyūmnda̍ŋ mā tūāl mi̍ pāa̍le̍ŋ lē sīā dīi̍mā ndɔ̄ɔ̍. Mi̍ pāa̍le̍ hi̍ɔ̍ɔ̍lu̍le̍ŋ lē hīāū.

²⁰Mi̍ Mɛ̄lɛ̄ka̍ dīmī āā, “Nyāā yōōmāā yɛ̍ yi̍a̍a̍ ā wa̍ ni̍ko̍, mā pɛ̄ o̍ pēēla̍ŋ. Yōūwa̍ bɛ̍ɛ̍ ā wa̍ mā bālu̍ chōo̍ cho̍o̍ o̍ ha̍la̍a̍ ni᷄ŋ.”

²¹O̍ ko̍ŋ, mi̍ Mɛ̄lɛ̄ka̍ tōōsīāā vīsīāā pēēyāā bɛ̄ndūa̍a̍ a̍ nyɛ̄ o̍ nyɛ̄ yōōmāā ma̍ pīā o̍ pēēla̍ŋ ni᷄ŋ, a̍ su̍u̍la̍ŋ le̍nde̍ yɛ̍ yɛ̍. Yōūwa̍ bɛ̍ɛ̍ mbo̍ tōōsīāā nda̍ a̍ su̍u̍la̍ŋ yɛ̍ yɛ̍. Mi̍ Mɛ̄lɛ̄ka̍ chā māā ō bɛ̄nda̍.

²²Mi̍ Mɛ̄lɛ̄ka̍ dūāū nda̍ sa̍lā āā, “Lā tōsa̍ chu̍a̍ūwa̍ mī lā kūi̍i̍, mī lā pɛ̄ o̍ pēēla̍ŋ. Yōūwa̍ bɛ̍ɛ̍ ā kūi̍i̍, o̍ chi̍e̍ēŋndo̍ chōo̍.”

²³Mi̍ nyūmnda̍ŋ mā tūāl mi̍ pāa̍le̍ŋ lē sīā dīi̍mā ndɔ̄ɔ̍. Mi̍ pāa̍le̍ ŋu̍ɛ̍ɛ̍nu̍le̍ŋ lē hīāū.

²⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmī āā, “Lɛ̄ŋnde̍ŋ lē tōsa̍ ni̍ko̍ mī vīsīāā su̍u̍la̍ yɛ̍ yi̍a̍a̍ ā fūla̍ lɛ̄ŋ a̍ su̍u̍la̍ŋ yɛ̍ yɛ̍, vīsīāā chi̍e̍e̍ ni̍ŋnda̍ ni̍, a̍ vīsīāā yōndūa̍a̍ nɔ̍ kɛ̄kɛ̍u̍la̍ŋ nda̍.” Mi̍ ī yɔ̍nu̍ŋ le̍nde̍.

²⁵Mi̍ Mɛ̄lɛ̄ka̍ tōōsīāā vīsīa̍a̍ le̍nde̍ o̍ chi̍e̍ēŋndo̍ chōo̍ a̍ su̍u̍la̍ŋ yɛ̍ yɛ̍, vīsīāā yōndūa̍a̍ bɛ̍ɛ̍ a̍ su̍u̍la̍ŋ yɛ̍ yɛ̍, vīsīāā chi̍e̍e̍ ni̍ŋnda̍ a̍ su̍u̍la̍ŋ yɛ̍ yɛ̍, a̍ vīsīa̍a̍ nɔ̍ kɛ̄kɛ̍u̍la̍ŋ nda̍ a̍ su̍u̍la̍ŋ yɛ̍ yɛ̍. Mi̍ Mɛ̄lɛ̄ka̍ chā māā ō bɛ̄nda̍.

²⁶Mi̍ Mɛ̄lɛ̄ka̍ dīmī āā, “Ŋ̄ tōōsi̍a̍āŋ wa᷅ŋndā chīe̍e̍ya̍ māā vēla᷅ŋ nāā. Ŋ̄ tōōsi̍a̍a̍ nda̍ mā nɔ̄ kpāāyāa̍ sūūwa̍ chōo̍ a̍ yōūwa̍, a̍ vīsīāā chi̍e̍e̍ ni̍ŋnda̍, a̍ vīsīāā yōndūa̍a̍ kpo̍u̍, a̍ vīsīāā lākɛ̄kɛ̍u̍va̍, a̍ chi̍e̍ēŋndo̍ kpo̍u̍.”

²⁷O̍ ko̍ŋ, mi̍ Mɛ̄lɛ̄ka̍ tōōsīāā wāna̍ chi̍o̍o̍ māā vēla᷅ŋ ndɔ̄. Māā ndu̍ pi̍la̍ o̍ to̍o̍si̍a̍a̍ ndu̍ ni̍. Mbo̍ tōōsīāā wānā pɔ̍nɔ̍ɔ̍ a̍ wānā la̍nɔ̍ɔ̍.

²⁸Mi̍ Mɛ̄lɛ̄ka̍ dūāū nda̍ sa̍lā āā, “Lā vīōlu̍ chu̍a̍ūwa̍ mī lā kūi̍i̍ mī lā pɛ̄ o̍ chi̍e̍ēŋndo̍ chōo̍, ndu̍yɛ̍ mī chi̍e̍ēŋndo̍ wa̍ nya̍ o̍ bā bɛ̄ŋgu̍. Lā wa̍ sūūwa̍ chōo̍, a̍ yōūwa̍ a̍ vīsīa̍a̍ kpo̍u̍ o̍ chi̍e̍ēŋndo̍ chōo̍.”

²⁹Mi̍ Mɛ̄lɛ̄ka̍ dīmī āā, “I̍ ke̍ nya̍ tɔ̄lɔ̄ɔ̄la̍ ku̍ām a̍ ku̍lu̍la̍ŋ lēni᷄ŋ nda̍ŋ fa̍ū, a̍ yɔ̄mīī kūāmɛ̍i̍ ku̍ām a̍ būŋnda̍ŋ lēni᷄ŋ nde̍ le̍ wāa̍ nyɛ̄ nyā di̍a̍ā, nyɛ̍m chu̍u̍lū mī ŋ̄ tōsa̍ ku̍lu̍la̍ŋ ndo̍ŋ ni̍, a̍ yɔ̄mīī kūāmɛ̄i̍ ku̍ām a̍ būŋnda̍ŋ lēni᷄ŋ nde̍.

³⁰Ndu̍yɛ̍, vīsī o̍ vīsi̍ cho̍ o̍ chi̍e̍ēŋndo̍ chōo̍ a̍ yōūwa̍ a̍ vīsīa̍a̍ nɔ̍ kɛ̄kɛ̍u̍la̍ŋ nda̍ a̍ nyɛ̄ o̍ nyɛ̍ cho̍ nyɛ̄ yōōmāā, I̍ ke̍ nda̍ bīllo̍ a̍ tɔ̄lɔ̄ɔ̄la̍ŋ le̍ wāa̍ nyɛ̄ ndā di̍a̍ā.” Mi̍ ī yɔ̍nu̍ŋ le̍nde̍.

³¹Mi̍ Mɛ̄lɛ̄ka̍ chā māā nyɛ̄ o̍ nyɛ̄ o̍ to̍o̍si̍a̍a̍ o̍ bɛ̄nda̍ ta̍u̍. Mi̍ nyūmnda̍ŋ mā tūāl, mi̍ pāa̍le̍ŋ lē sīā dīi̍mā ndɔ̄ɔ̍. Mī pāa̍le̍ ŋɔ̍mpu᷅mnde̍ŋ lē hīāū.