Read Southern Kisi Chɛ̄nɛ̍se̍ē 11 Bible Online

Chɛ̄nɛ̍se̍ē 11 - Southern Kisi bible

Chɛ̄nɛ̍se̍ē 11

¹A̍ bōōndi̍i̍ ke̍ŋ, sūɛ̍i̍ ma̍ŋgālɛ̄i̍ ī pīlɛ̍ kpe̍ wa̍ o̍ chi̍e̍ēŋndo̍ chōo̍ ni̍. Ndu̍yɛ̍, vēēlū pīlɔ̍ɔ̄ kpe̍ nda̍ a̍a̍ ve̍e̍lū nyɔ̍ɔ̍ŋ ni̍.

²O̍ ko̍ŋ, mi̍ wāŋnda̍ cha᷄ŋ ba̍lɔ̄ɔ̍ o̍ chi̍e̍ēŋndo̍ ni᷄ŋ, ma̍ kūā bā pāa̍le̍ŋ lē chāŋndo̍. Ā lo̍ bālɔ̄ɔ̍ ma̍ sāālu᷄ŋ dɛ̍ŋgbɛ̍ bɛ̍ndōo̍ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ ma̍ chāl lo̍ŋ.

³Ma̍ dīmu̍la᷅ŋ āā, “Ŋ̄ lɔ̄ɔ̄nūŋ kpi̍līki̍o̍ŋ, mī ŋ̄ lōm mu̍ŋ mī ŋ̄ kēndū nyɛ̄ kɛ̄ndɛ̍ī mī ŋ̄ tāŋgu̍lūŋ.” O̍ ko̍ŋ, ma̍ lūāā kpi̍līki̍o̍ŋ ma̍ kāndū tāŋgūllo̍ a̍ mu̍ŋ sɔ̍ŋgɔ̍ pōūta̍ŋ, ndu̍yɛ̍, ko̍tɛ̍i̍yo̍ wa̍ sɔ̍ŋgɔ̍ mɔ̍tɛ̄i̍yo̍ le̍ kpi̍līki̍o̍ŋ hāndɔ̄ɔ̍ ni̍.

⁴O̍ ko̍ŋ kɔ̍ɔ̍lī, ma̍ dīmu̍la᷅ŋ āā, “Ŋ̄ tēŋgu̍lu᷅ŋ na̍a̍ pi̍la̍ chi̍e̍e̍ bɛ̍ndōo̍, mī ŋ̄ tāŋgu̍l chīɛ̄ī tɔ̍ɔ̍ma̍ bɛ̄ndōo̍, mī tūllo̍ fūūlu̍u̍ o̍ ha̍la̍ di̍, le̍ mī ŋ̄ fūla̍ tɔ̍ɔ̍. Ko̍ŋ to̍sā ŋ̄ se̍ŋnūŋ ndɛ̍ o̍ chi̍e̍ēŋndo̍ chōo̍ kpo̍u̍ le̍.”

⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ cha̍ŋ o̍ fo̍ndāŋ ndɔ̄ɔ̍, mbo̍ tūāl o̍ chi̍e̍ēŋndo̍ chōo̍ le̍ mbō chē chi̍e̍e̍ bɛ̍ndū ŋ̄wāŋndā chīe̍e̍ a̍ wa̍ tāŋgūllo̍ wo̍, a̍ chīɛ̄ī vīlɛ̄ī kōŋ.

⁶Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ dīmī āā, “Chūāā ŋ̄wāŋndā chīe̍e̍ a̍ cho̍ dīōmndo̍ ō pīlɛ̍, ndu̍yɛ̍ sūɛ̍i̍ ma̍ŋgālɛ̄ī pīlɛ̍i̍ kpe̍ nda̍ sūāā ni̍. Nyɛ̄ nda̍ chō ho̍ō tōsāa̍ wo̍, kāndɔ̍ɔ̍ ko̍ nda̍ kāndu̍ wɔ̄ ni̍. Tē wānā ma̍l nda̍ pɛ̍, nyɛ̄ o̍ nyɛ̄ nda̍ yēēma̍ ā chō wā tōsāa̍.

⁷Le̍la̍ŋ, ŋ̄ to᷄l mī ŋ̄ kɔ̍ la̍a̍sīāā sūɛ̍i̍ nda̍ dīmī ve̍, o̍ ko̍ŋ, ō pīlɛ̍ sōo̍ ni᷅ŋ bɛ̍ɛ̍ chāa̍ŋ ndɔ̄ si̍nā lɛ̍ ndu̍ lāpɛ̄ŋgu̍ le̍.”

⁸O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ pu̍u̍sīāā nda̍ lo̍ŋ. Ma̍ sāŋnu᷄ŋ ba᷅ o̍ bā fe̍e̍ o̍ chi̍e̍ēŋndo̍ chōo̍. Chi̍e̍e̍ bɛ̍ndū nda̍ wa̍ tāŋgūllo̍ wo̍ mbo̍ mɛ̄ɛ̄lū.

⁹Le̍ sa̍bū kōŋ nda̍ ke̍ chi̍e̍e̍ ka̍lāa̍ dīōla̍ŋ ni̍ āā, Ba̍bɛ̄ɛ̄l,[9] kāni̍ fu̍u̍le̍, lo̍ŋ Mɛ̄lɛ̄ka̍ Ya̍a̍wɛ̄ɛ̄ la̍a̍si̍a̍a̍ sɔ̄ɔ̍ŋ wāŋnda̍ o̍ lāsōndō o̍ chi̍e̍ēŋndo̍ chōo̍ kpo̍u̍ ni̍. Lo̍ŋ Mɛ̄lɛ̄ka̍ Ya̍a̍wɛ̄ɛ̄ pu̍u̍si̍a̍a̍ nda̍ ni̍, ma̍ sāŋnu᷄ŋ o̍ chi̍e̍ēŋndo̍ ni᷄ŋ kpo̍u̍.

¹⁰Wānāa̍ ve̍lu᷄ŋ o̍ pūlāle̍ Si̍ɛ̄m nde̍ŋ chōo̍ wa̍ cho̍ ha̍ā ni̍. Fāŋa᷅ŋ mɛ̄ŋmā hūna᷄ŋ mā fāŋa̍ŋ o̍ chi̍e̍ēŋndo̍ chōo̍ wo̍, wɔ̄sīla̍ŋ lā hīōū lā tīɔ̍ɔ̍ŋ mi̍ Si̍ɛ̄m vi̍a̍lū Āpa̍a̍sīāā. Wɔ̄sī kōŋ Si̍ɛ̄m chi̍ŋa̍ wɔ̄sīla̍ŋ kɛ̄mɛ̄ (100) ni̍.

¹¹O̍ ko̍ŋ kɔ̍ɔ̍lī, mi̍ Si̍ɛ̄m vi̍a̍lū vɛ̄lɛ̄ chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ vīōlɔ᷄ŋ Āpa̍a̍sīāā wo̍, mi̍ Si̍ɛ̄m chi̍ī vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋūɛ̍ɛ̍nu̍ (500). Mɛ̄ɛ̍ Si̍ɛ̄m chi̍i̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē ŋɔ᷄mpu᷅m (600), ma̍lāŋ o̍ wū.

¹²Mɛ̄ɛ̍ Āpa̍a̍sīāā wa̍ wɔ̄sīla̍ŋ be̍le̍-ya̍a̍ a̍ lā ŋūɛ̍ɛ̍nu̍, mbo̍ vīālū Si̍ɛ̍lā.

¹³O̍ ndu̍ kɔ̍ɔ̍lī, mi̍ Āpa̍a̍sīāā vi̍a̍lū vɛ̄lɛ̄ chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ vīōlɔ᷄ŋ Si̍ɛ̍lā wo̍, mi̍ Āpa̍a̍sīāā chi̍ī vɛ̄lɛ̄ wɔ̄sīla̍ŋ kɛ̄mɔ̄ɔ̍ lē hīɔ̍ɔ̍lu̍ a̍ lā yāa̍ (403) ma̍lāŋ o̍ wū.

¹⁴Mɛ̄ɛ̍ Si̍ɛ̍lā wa̍ wɔ̄sīla̍ŋ be̍le̍-ya̍a̍, mbo̍ vīālū Ɛ̍bā.

¹⁵O̍ ndu̍ kɔ̍ɔ̍lī, mbo̍ vīālū chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ vīōlɔ᷄ŋ Ɛ̍bā wo̍, mi̍ Si̍ɛ̍lā chi̍ī vɛ̄lɛ̄ wɔ̄sīla̍ŋ kɛ̄mɔ̄ɔ̍ lē hīɔ̍ɔ̍lu̍ a̍ lā yāa̍ (403) ma̍lāŋ o̍ wū.

¹⁶Mɛ̄ɛ̍ Ɛ̍bā wa̍ wɔ̄sīla̍ŋ be̍le̍-ya̍a̍ a̍ lā hīɔ̍ɔ̍lu̍, mbo̍ vīālū Pɛ̍lɛ̍kī.

¹⁷O̍ ndu̍ kɔ̍ɔ̍lī, mbo̍ vīālū chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ vīōlɔ᷄ŋ Pɛ̍lɛ̍kī wo̍, mi̍ Ɛ̍bā chi̍ī vɛ̄lɛ̄ wɔ̄sīla̍ŋ kɛ̄mɔ̄ɔ̍ lē hīɔ̍ɔ̍lu̍ a̍ be̍le̍-ya̍a̍ (430). Mɛ̄ɛ̍, Ɛ̍bā chi̍i̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē hīɔ̍ɔ̍lu̍ a̍ be̍le̍-ŋɔ̍mpu᷅m ā lā ŋɔ᷄mpu᷅m (466) mālāŋ o̍ wū.

¹⁸Mɛ̄ɛ̍ Pɛ̍lɛ̍kī wa̍ wɔ̄sīla̍ŋ be̍le̍-ya̍a̍, mbo̍ vīālū Lu̍ɛ̍yū.

¹⁹O̍ ndu̍ kɔ̍ɔ̍lī, mbo̍ vīālū chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ vīōlɔ᷄ŋ Lu̍ɛ̍yū wo̍, mi̍ Pɛ̍lɛ̍kī chi̍ī vɛ̄lɛ̄ wɔ̄sīla̍ŋ kɛ̄mɔ̄ɔ̍ lē dīi̍ŋ a̍ lā ŋɔ̄ma̍hīɔ̍ɔ̍lu̍ (209). Mɛ̄ɛ̍, Pɛ̍lɛ̍kī chi̍i̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē dīi̍ŋ a̍ be̍le̍-ya̍a̍ a̍ lā ŋɔ̄ma̍hīɔ̍ɔ̍lu̍ (239) ma̍lāŋ o̍ wū.

²⁰Mɛ̄ɛ̍ Lu̍ɛ̍yū wa̍ wɔ̄sīla̍ŋ be̍le̍-ya̍a̍ a̍ lā tīɔ̍ɔ̍ŋ, mbo̍ vīālū Sɛ̍lu̍kī.

²¹O̍ ndu̍ kɔ̍ɔ̍lī, mbo̍ vīālū chu̍a̍u̍wāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ vīōlɔ᷄ŋ Sɛ̍lu̍kī wo̍, mi̍ Lu̍ɛ̍yū chi̍ī vɛ̄lɛ̄ wɔ̄sīla̍ŋ kɛ̄mɔ̄ɔ̍ lē dīi̍ŋ a̍ lā ŋɔ᷄mmɛ̍ū (207). Mɛ̄ɛ̍, Lu̍ɛ̍yū chi̍i̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē dīi̍ŋ a̍ be̍le̍-ya̍a̍ a̍ lā ŋɔ̄ma̍hīɔ̍ɔ̍lu̍ (239) ma̍lāŋ o̍ wū.

²²Mɛ̄ɛ̍ Sɛ̍lu̍kī wa̍ wɔ̄sīla̍ŋ be̍le̍-ya̍a̍, mbo̍ vīālū Nāhɔ̍ɔ̄.

²³O̍ ndu̍ kɔ̍ɔ̍lī, mbo̍ vīālū chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ vīōlɔ᷄ŋ Nāhɔ̍ɔ̄ wo̍, mi̍ Sɛ̍lu̍kī chi̍ī vɛ̄lɛ̄ wɔ̄sīla̍ŋ kɛ̄mɔ̄ɔ̍ lēdīi̍ŋ (200). Mɛ̄ɛ̍, Sɛ̍lu̍kī chi̍i̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē dīi̍ŋ a̍ be̍le̍-ya̍a̍ (230) ma̍lāŋ o̍ wū.

²⁴Mɛ̄ɛ̍ Nāhɔ̍ɔ̄ wa̍ wɔ̄sīla̍ŋ bi̍di̍i̍ŋ a̍ lā ŋɔ̄ma̍hīɔ̍ɔ̍lu̍, mbo̍ vīālū Tɛ̍lūā.

²⁵O̍ ndu̍ kɔ̍ɔ̍lī, mbo̍ vīālū chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ vīōlɔ᷄ŋ Tɛ̍lūā wo̍, mi̍ Nāhɔ̍ɔ̄ chi̍ī vɛ̄lɛ̄ wɔ̄sīla̍ŋ kɛ̄mɛ̄ a̍ tɔ̍ a̍ lā ŋɔ̄ma̍hīɔ̍ɔ̍lu̍ (119). Mɛ̄ɛ̍, Na̍hɔ̄ɔ̄ chi̍i̍ wɔ̄sīla̍ŋ fa̍ū fa̍ū, kɛ̄mɛ̄ a̍ be̍le̍-hi̍ɔ̍ɔ̍lu̍ a̍ lā hi̍ɔ̍ɔ̍lu̍ (148) ma̍lāŋ o̍ wū.

²⁶Mɛ̄ɛ̍ Tɛ̍lūā wa̍ wɔ̄sīla̍ŋ be̍le̍-ŋɔ̍mmɛ̍ū (70), mbo̍ vīālū E̍bīlām, a̍ Nāhɔ̍ɔ̄, a̍ Ha̍lūāŋ.

²⁷Ko̍na̍a̍ cho̍ ho̍ō a̍ pūlāle̍ Tɛ̍lūāāle̍ŋ o̍kɔ̄ɔ̄ ni̍. Tɛ̍lūāā ve̍lū E̍bīlām ni̍, a̍ Nāhɔ̍ɔ̄, a̍ Ha̍lūāŋ. Ha̍lūāŋ ve̍lū Lɔ̍tū ni̍.

²⁸Kɛ̍, mi̍ Ha̍lūāŋ ndu̍ wū Tɛ̍lūā fi̍nyā ndɔ̍ tāse̍, Ɔ̍ɔ̄ chi̍e̍e̍ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ, nāa̍ nda̍ vēlū ndu̍ wa̍.

²⁹Mi̍ E̍bīlām nda̍ Nāhɔ̍ɔ̄ a̍ chu̍ā lāāndūa̍a̍. La̍nɔ̍ɔ̍ E̍bīlām dīōla̍ ndɔ̄la̍ŋ āā, Se̍lūāī, la̍nɔ̍ɔ̍ Nāhɔ̍ɔ̍ ndu̍ dīōla̍ŋ āā, Mi̍li̍kāā, chu̍a̍ Ha̍lūāŋ ndo̍. Ha̍lūāŋ ko̍ni̍ ve̍lū vɛ̄lɛ̄ I̍si̍kā ni̍.

³⁰Kɛ̍ Sa̍lūāī ndu̍ ndu̍ o̍o̍ nɔ̍ chu̍a̍ le̍, kāni̍ fo̍ndōle̍, ndu̍ o̍o̍ vi̍lū le̍.

³¹O̍ ko̍ŋ kɔ̍ɔ̍lī, mi̍ Tɛ̍lūā chu̍ā E̍bīlām po̍ ndɔ̄, a̍ Lɔ̍tū, po̍ ndɔ̍ ma̍mā, po̍ Ha̍lūāŋ ndo̍, a̍ Se̍lūāī la̍nɔ̍ɔ̍ E̍bīlām po̍ ndɔ̄, ma̍ fāŋa᷄ŋ Ɔ̍ɔ̄ chi̍e̍e̍ o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ. Ma̍ bīī kɔ̄la̍ŋ o̍ lɛ̄ŋndē Ke̍nāŋnde̍ŋ ni᷄ŋ. Kɛ̍ mɛ̄ɛ̍ nda̍ fūūlu̍u̍ Ha̍lūāŋ chi̍e̍e̍ ma̍ chāl lo̍ŋ.

³²Ha̍lūāŋ lo̍ŋ Tɛ̍lūā lo̍ ni᷅ŋ ni̍ ha̍a̍a̍ mbo̍ wū. Ō wa̍ wɔ̄sīla̍ŋ kɛ̄mɔ̄ɔ̍ le̍ di̍i̍ŋ a̍ lā ŋūɛ̍ɛ̍nu̍ (205) mbo̍ wū.