Read Southern Kisi Chɛ̄nɛ̍se̍ē 16 Bible Online

Chɛ̄nɛ̍se̍ē 16 - Southern Kisi bible

Chɛ̄nɛ̍se̍ē 16

¹Mbo̍ lō o̍ ko̍ŋ ha̍a̍a̍ Se̍lūāī, la̍nɔ̍ɔ̍ E̍bīlām ō vi̍lū chu̍a̍ le̍. Kɛ̍ Se̍lūāī ndu̍ o̍o̍ nɔ̍ chūāāmbɔ̄ lāāndū chɛ̄ I̍chi̍pīnɔ̄ɔ̍ chīɛ̄ī ni̍ŋ, dīōla̍ŋ āā, Ha̍kāā.

²Mi̍ Se̍lūāī lo᷅ o̍ ko̍ŋ mbo̍ dīmūl E̍bīlām pɔ̍nɔ̍ ndɔ̄ āā, “Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ ya̍ wōlɔ̄ɔ̄ le̍ yɛ̍, ā chē chūāāmbɔ̄ nī chi̍ɔ̍ɔ̍ ho̍ō. Hi̍vi̍ŋ ndu̍ kɔ̄ɔ̄lī, kɛ̄lɛ̄ŋgāā dɔ̍ɔ̍ mbō vēlū chūāūwa̍, mī sɔ̍la̍ yu̍ŋgo̍o̍ o̍ ndu̍ ni̍ŋ.” Mi̍ E̍bīlām chɛ᷅l nyɛ̄ Se̍lūāī di̍mu̍l ndu̍ wo̍.

³Wɔ̄sī E̍bīlām chi̍ŋa̍ wɔ̄sīla̍ŋ tɔ̍ o̍ lɛ̄ŋndē Ke̍nāŋnde̍ŋ ni᷄ŋ ndo̍, wɔ̄sī kōŋ Se̍lūāī chu̍a̍ Ha̍kāā mbo̍ kē E̍bīlām ndu̍ māā la̍nɔ̍ ni̍, ndu̍ yɔ̍nūŋ ni̍ māā chūā chɛ̄ I̍chi̍pīnɔ̍ wa̍ ndu̍ o̍ bā wo̍.

⁴O̍ ko̍ŋ, mi̍ Ha̍kāā chu̍ā yo᷄llo̍. Mɛ̄ɛ̍ Ha̍kāā si̍na̍ māā ō chō a̍ yo᷄llo̍, mbo̍ sāā Se̍lūāī tɛ̄ɛ̄nda᷄ŋndo̍.

⁵O̍ ko̍ŋ kɔ̍ɔ̍lī, mi̍ Se̍lūāī di̍mūl E̍bīlām āā, “Nyɛ̄ o̍ nyɛ̄ chūāāmbɔ̄ɔ̍ ho̍ō chō ya̍ tōsāllo̍, nu᷄m hi᷅ŋ a̍ ndi̍ ni̍. I̍ ke̍ nu̍m chɛ̄ nūu̍ ma̍ hi̍vi᷄ŋ kɔ̍ɔ̍lī. Kɛ̍ mɛ̄ɛ̍ o̍ si̍na̍ ni᷅ŋ māā ō chō a̍ yo᷄llo̍, le̍la̍ŋ o̍ cho̍ ya̍ tɛ̄ɛ̄nda᷄ŋndo̍ ni̍. Kɛ̍ ndu̍yɛ̍, Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ yāmɛ̍ī kēŋ kīōlɔ̄ɔ̄ na̍a̍ nūm tɛ̍ɛ̍ŋ ni̍.”

⁶Mi̍ E̍bīlām di̍mūl ndu̍ āā, “Chɛ̄ nūmndo̍ ko̍ni̍ Ha̍kāā cho̍ ni̍. Nyɛ̄ ŋ̄ hɛ̄nāŋ le̍ tōsāa̍ a̍ ndu̍ wo̍ to̍sa̍.” O̍ ko̍ŋ, mi̍ Se̍lūāī sa̍ā Ha̍kāā bīyɔ̄ɔ̄ wɔ̄ɔ̍ŋndo̍. O̍ ko̍ŋ, mi̍ Ha̍kāā ma᷅l chīɛ̄īyo̍ mbo̍ nyāānu᷄ŋ.

⁷O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ ki̍i̍la̍nɔ̍ ndɔ̄ɔ̍ ō sāālu᷄ŋ Ha̍kāā o̍ mɛ̄ŋmā būūlūa̍ŋ īkɛ̄i̍ o̍ po̍llo̍ ni᷄ŋ. O̍ nɛ̄i̍ ku̍ɛ̄ Si̍ɔ̍ɔ̄ chi̍e̍e̍ wo̍ īkɛ̄i̍ mɛ̄ŋmā būūlūa̍ŋ māŋ mā chō ni̍.

⁸Mi̍ ki̍i̍la̍nɔ̍ Mɛ̄lɛ̄ka̍a̍ nyūnā Ha̍kāā āā, “Ha̍kāā, bu̍ɛ̍i̍ Se̍lūāī wo̍, kūɛ̍ɛ̍nɛ̍ ŋ̄ chɛ᷄ŋ yɛ̍? Ndu̍yɛ̍, kūɛ̍ɛ̍nɛ̍ ŋ̄ chō yɛ̄ la̍ŋ?” Mi̍ Ha̍kāā mu̍lūl ndu̍ āā, “Wāna̍ nī ba̍nāa̍ Se̍lūāī ya̍ I̍ cho̍ nyāānɔ᷄ŋndo̍ ni̍.”

⁹Mi̍ ki̍i̍la̍nɔ̍ Mɛ̄lɛ̄ka̍a̍ dīmūl ndu̍ āā, “Chɔ̍ŋ mā mi̍i̍ŋgu̍ nāa̍ wānā nu̍m bānāa̍ Se̍lūāī chu̍a̍. Ā kūɛ̄ pɛ̍, a̍ kɔ̍ tu̍si᷄ŋ to̍o̍lō ndu̍ o̍ bā bɛ̄ŋgu̍.”

¹⁰Mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ dīmūl ndu̍ vɛ̄lɛ̄ āā, “I̍ cho̍ tōsā wānāa̍ fu̍lā ni̍ŋ o̍ pūlālē nūmnde̍ŋ chōo̍ wa̍ ā kūīī ni̍ŋ ha̍a̍a̍ ā chu̍ū ni̍ŋ chɔ᷅m te̍.”

¹¹Mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ dīmūl ndu̍ vɛ̄lɛ̄ āā, “Ā chō a̍ yo᷄llo̍, ndu̍yɛ̍ wānā pɔ̍nɔ̍ɔ̍ ŋ̄ chō vīōlɔ̄ɔ̄ ni̍. Tē ā vēlū ndu̍ pɛ̍, ke̍ ndu̍ dīōla̍ŋ āā, I̍si̍mɛ̄ɛ̄l.[10] Kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̄ tu̍e̍ī cha᷄ŋ ŋ̄ wa̍ wo̍.

¹²Po̍ ŋ̄ chō vīōlɔ̄ɔ̄ wo̍ wā ni̍ŋ mɛ̄ɛ̍ sōfɛ̍lɛ̍ yōndōo̍ wā nu̍a̍ā yɛ̍. Ō sīmūl ni̍ŋ wa̍nā o̍ wānā, ndu̍yɛ̍, mī wānā o̍ wānā si̍mu̍l ndu̍. Ndu̍yɛ̍ sɛ̄ɛ̄ŋgi̍āŋndo̍ ō wā ni̍ŋ nda̍ tɛ̄ɛ̄ŋ nda̍ wānāya᷅ŋ ndɔ᷄ŋ.”

¹³O̍ ko̍ŋ, mi̍ Ha̍kāā ke̍ Mɛ̄lɛ̄ka̍ Ya̍a̍wɛ̄ɛ̄, o̍ so̍ō nāa̍ ndu̍ chu̍a̍ wo̍ dīōla̍ŋ āā, “Nu᷅m cho̍ Mɛ̄lɛ̄ka̍ cha᷅ ya̍ wo̍ ni̍.” Kāni̍ fo̍ndōle̍, mi̍ Ha̍kāā di̍mī āā, “Ya̍ kɛ̍i̍ che᷅ nu̍a̍ā Mɛ̄lɛ̄ka̍ o̍ cha᷅ ya̍ wo̍ ni̍ mi̍ wa᷅ yōōmū.”

¹⁴O̍ ko̍ŋ kɔ̍ɔ̍lī, ma̍ kē so̍o̍ŋ māmɛ̄ŋ kōŋ dīōla̍ŋ āā, “Bālāhāī Lu̍e̍ī.”[11] Ka̍dɛ̍sī tɛ̍ɛ̄ŋ a̍ Bɛ̍lu̍ɛ̍dī so̍o̍ŋ ko̍ŋ chō ni̍.

¹⁵O̍ ko̍ŋ kɔ̍ɔ̍lī, mi̍ Ha̍kāā vi̍lūl E̍bīlām pōo̍. Mi̍ E̍bīlām ke᷅ po̍ Ha̍kāā vi̍lu̍l ndu̍ wo̍ dīōla̍ŋ āā, I̍si̍mɛ̄ɛ̄l.

¹⁶E̍bīlām wa̍ wɔ̄sīla̍ŋ be̍le̍-ŋɔ̍ma̍a̍ a̍ lā ŋɔ᷄mpu᷅m (86) mi̍ Ha̍kāā vi̍lūl ndu̍ I̍si̍mɛ̄ɛ̄l.