Read Southern Kisi Chɛ̄nɛ̍se̍ē 17 Bible Online

Chɛ̄nɛ̍se̍ē 17 - Southern Kisi bible

Chɛ̄nɛ̍se̍ē 17

¹Mɛ̄ɛ̍ E̍bīlām wa̍ wɔ̄sīla̍ŋ be̍le̍-ŋɔ̍ma̍hīɔ̍ɔ̍lu̍ a̍ lā ŋɔ̄ma̍hīɔ̍ɔ̍lu̍ (99), mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ ndu̍. Mbo̍ dīmūl E̍bīlām āā, “Ya̍ cho̍ Mɛ̄lɛ̄ka̍ kpu̍lu̍ŋgūma̍ bɛ̄ndōo̍ ni̍. To̍sa̍ nyɛ̄ ya̍ I̍ di̍mūl nu̍m ndo̍, ndu̍yɛ̍, mā to̍sa̍ nyɛ̍ bɛ̍nda̍ ya̍ o̍ hɔ̄l lo̍.

²I̍ cho̍ kpe̍ma̍a̍ yīī na̍a̍ nūm tɛ̍ɛ̄ŋ, ndu̍yɛ̍, mī to̍sa̍ mā ku̍i̍i̍ cha̍po̍o̍li̍.”

³Mi̍ E̍bīlām tu̍ndu᷄ŋ, mbo̍ bāŋ hɔ̄lla̍ lɛ̄ŋ. Mi̍ Mɛ̄lɛ̄ka̍ dīmūl ndu̍ āā,

⁴“Kpe̍ma̍a̍ ya̍ I̍ cho̍ ho̍ō yīī na̍a̍ nūm tɛ̍ɛ̄ŋ ni̍. Ā chō wā fi̍nyāa̍ le̍ kāa̍la̍ŋ ta̍u̍ ta̍u̍.

⁵Dīōlā nūmnda̍ cho̍ lɛ̍ āā, E̍bīlām te̍. Dīōlā nūmnda̍ŋ ni᷅ŋ āā, E̍bīlāha᷅m.[12]

⁶I̍ cho̍ tōsā mī pūlālē nūmnde̍ŋ lē kūɛ̄ a̍ kūīīyo̍ ta̍u̍ ta̍u̍. I̍ cho̍ tōsā mī kāa̍la̍ŋ ta̍u̍ la̍ fu̍la̍ o̍ nūm ni̍ŋ, ndu̍yɛ̍, mī māsāā bɛ̍ndūa̍a̍ fūla̍ o̍ pūlālē nūmnde̍ŋ chōo̍.

⁷“I̍ cho̍ kpe̍ma̍a̍ yīī na̍a̍ nūm tɛ̍ɛ̄ŋ a̍ wāŋnda̍ o̍ pūlālē nūmnde̍ŋ chōo̍, chɔ̍ŋ a̍ bōōnde̍i̍ he̍ī mbō kūɛ̄ le̍ fɛ̍ɛ̍ŋ a̍ fɛ̍ɛ̍ŋ. Kpe̍ma̍ ko̍ŋ cho̍ ni̍ māā, nūm ni̍, a̍ pūlālē nūmnde̍ŋ, I̍ cho̍ wā Mɛ̄lɛ̄ka̍ nyā.

⁸Nūm ni̍, pūlāle̍ fu̍lā ni̍ŋ o̍ nūm ni̍ŋ nde̍ŋ ni̍, lɛ̄ŋndē Ke̍nāŋnde̍ŋ nde᷅ŋ kpo̍u̍, lē nya̍ chō le᷅ŋ ni᷄ŋ māā lāmīāl le̍ŋ, I̍ cho̍ nya̍ le̍ŋ kē. I̍ cho̍ chūāā nūm a̍ ma̍māa̍ le̍ŋ kē nyɛ̄ ndā le̍ fɛ̍ɛ̍ŋ a̍ fɛ̍ɛ̍ŋ. Ndu̍yɛ̍, I̍ cho̍ wā Mɛ̄lɛ̄ka̍ ndā.”

⁹Mi̍ Mɛ̄lɛ̄ka̍ dīmūl E̍bīlāha᷅m āā, “Nūm E̍bīlāha᷅m, nyɛ̍ di̍mi̍ŋ o̍ kpe̍ma̍a̍ ho̍ō ni᷄ŋ ndo̍, ā nɔ̄ mā to̍sa̍ ndu̍, nūm ni̍, a̍ pūlāle̍ fu̍lā ni̍ŋ o̍ nūm ni̍ŋ nde̍ŋ, mbō kūɛ̄ a̍ lāchī kɛ̄.

¹⁰Kpe̍ma̍ ya̍ I̍ yi̍i̍ ho̍ō na̍a̍ nūm tɛ̍ɛ̄ŋ a̍ pūlāle̍ fu̍lā ni̍ŋ o̍ nūm ni̍ŋ nde̍ŋ ndo̍, pɛ᷄l nya̍a̍ lēni᷄ŋ ndu̍ cho̍ ni̍ māā, wānā pɔ̍nɔ̍ o̍ wānā pɔ̍nɔ̍ cho̍ nya̍ tɛ̄ɛ̄ŋ, ō nɔ̄ mbō sɔ̄la̍ hīvīo̍o̍ o̍ chīɛ̄ī kɔ̄ɔ̄lī.

¹¹Ā nɔ̄ mā sɔ̄la̍ hīvīo̍o̍, he̍ī wa̍ māā tāāmāsi̍ le̍ kpe̍ma̍ cho̍ na̍a̍ tɛ̄ɛ̄ŋ na̍a̍ nya̍ā wo̍.

¹²Chɔ̍ŋ a̍ bōōnde̍i̍ he̍ī, chɛ̄lɛ̄kpɛ̍ o̍ chɛ̄lɛ̄kpɛ̍ wa̍nā pɔ̍nɔ̍ ve̍lu᷄ŋ nya̍ tɛ̄ɛ̄ŋ pɛ̍, mbō chīŋa̍ pālɛ̍i̍ ī ŋɔ̄ma̍a̍, ō nɔ̄ mbō sɔ̄la̍ hīvīo̍o̍. Ō wa̍ chɛ̄lɛ̄kpɛ̍ ve̍lu᷄ŋ o̍ nūmndo̍ chi̍ɛ̍ī ni̍ŋ ni̍, ō wa̍ chɛ̄ ŋ̄ pēndū wāna̍ lēkāa̍ o̍ bā, o̍ fu̍la̍ bɛ̍ɛ̍ o̍ pūlālē nūmnde̍ŋ chōo̍ le̍ wo̍ ni̍, fa̍ū ā nɔ̄ mā sɔ̄la̍ hīvīo̍o̍ o̍ chīɛ̄ī kɔ̄ɔ̄lī.

¹³Ō wa̍ vi̍o̍lɔ̄ɔ̄ wāā o̍ yu̍ŋgu̍ nu̍mndo̍ chōo̍, ō wa̍ chɛ̄ ŋ̄ pēndū a̍ nyɛ̄ sɔ̄lāā ni̍, kpo̍u̍ ā nɔ̄ mā sɔ̄la̍ hīvīo̍o̍. Tāāmāsi̍o̍o̍ cho̍ ho̍ō o̍ dīāllūŋ nyāa̍ŋ ni᷄ŋ ni̍, le̍ chɔ̄mndo̍ māā kpe̍ma̍ fɛ̍ɛ̍ŋ a̍ fɛ̍ɛ̍ŋ ndo̍ nya̍ yīi̍ ni᷅ŋ ho̍ō a̍ ya̍ ni̍.

¹⁴Wānā o̍ wāna̍ sɔ̍la̍ hi̍vīo̍o̍ nya̍ tɛ̄ɛ̄ŋ te̍, mɛ̄ɛ̍ wānā ko̍ŋ chō wā ō kpēēŋāā īkɛ̄i̍ ō ve᷅ lɛ̍ wāna̍ nī le̍. Kāni̍ fu̍u̍le̍, ō tɛ̄ɛ̄mbu̍u̍ kpe̍ma̍ cho̍ na̍a̍ tɛ̄ɛ̄ŋ na̍a̍ ndu̍ wo̍.”

¹⁵Mi̍ Mɛ̄lɛ̄ka̍ dīmūl E̍bīlāha᷅m āā, “Se̍lūāī la̍a̍ nu̍m ndu̍, a̍ nɔ̍ lɛ̍ mā ve̍e̍lu̍ ndu̍ āā Se̍lūāī le̍. Dīōlā ndɔ̄la̍ŋ ni̍ŋ āā Se̍lūā.[13]

¹⁶I̍ cho̍ ndu̍ sa̍lā dɔ̄wɔ̄ɔ̄, ndu̍yɛ̍ o̍ ko̍ŋ kɔ̍ɔ̍lī, mī to̍sa̍ mbō vīlu̍l nu̍m pōo̍. I̍ cho̍ ndu̍ sa̍lā dɔ̄wɔ̄ɔ̄, ndu̍yɛ̍ mbō sīmnu᷄ŋ ka̍lāa̍ le̍ kāa̍la̍ŋ ta̍u̍ ta̍u̍. Māsāā bɛ̍ndūa̍a̍ ā fūlā ni̍ŋ o̍ pūlālē ndɔ̄le̍ŋ chōo̍.”

¹⁷O̍ ko̍ŋ, mi̍ E̍bīlāha᷅m tu̍ndu᷄ŋ, mbo̍ bāŋ hɔ̄lla̍ lɛ̄ŋ, mbo̍ mām. Mbo̍ dīmūl ndu̍ pi̍la̍ āā, “Ya̍ cho̍ ni᷅ŋ ho̍ō wɔ̄sīla̍ŋ kɛ̄mɛ̄ wo̍ (100), ya̍ vi̍a̍lū vɛ̍lɛ̄ ni̍? Se̍lūā la̍a̍ nī bɛ̍ɛ̍, ndu̍ cho̍ ni᷄ŋ ho̍ō wɔ̄sīla̍ŋ be̍le̍-ŋɔ̍ma̍hīɔ̍ɔ̍lu̍ (90) wo̍, ndu̍ vi̍a̍lū vɛ̍lɛ̄ ni̍?”

¹⁸Mi̍ E̍bīlāha᷅m lo᷅ o̍ ko̍ŋ mbo̍ dīmūl Mɛ̄lɛ̄ka̍ āā, “Ō wa̍ bɛ̍ɛ̍ I̍si̍mɛ̄ɛ̄l ndu̍ lo̍o̍ chi̍ɛ̍ī nūu̍, Māsānɔ̄ɔ̍.”

¹⁹Mi̍ Mɛ̄lɛ̄ka̍ dīmī āā, “Sāko̍, ō cho̍ I̍si̍mɛ̄ɛ̄l le̍ cho̍ chīɛ̄ī nūmndo̍ lōō le̍. Se̍lūā la̍a̍ nu̍m chō nu̍m pōo̍ vīlūl, ndu̍yɛ̍ mā ke̍ ndu̍ dīōla̍ŋ āā, Āa̍se̍.[14] I̍ cho̍ kpe̍ma̍a̍ yīī na̍a̍ ndu̍ tɛ̍ɛ̄ŋ a̍ pūlālē ndɔ̄le̍ŋ le̍ fɛ̍ɛ̍ŋ a̍ fɛ̍ɛ̍ŋ.

²⁰A̍ I̍si̍mɛ̄ɛ̄l ndu̍ ndu̍ o̍kɔ̄ɔ̄, I̍ tu̍e̍ī nyɛ̄ ŋ̄ nyūna̍ a̍ ndu̍ o̍kɔ̄ɔ̄ wo̍. I̍ cho̍ ndu̍ sa̍lā dɔ̄wɔ̄ɔ̄. I̍ cho̍ tōsā mbō kūi̍i̍ ta̍u̍ ta̍u̍, mī wānāā fāŋgā ā vēlu᷄ŋ o̍ pūlālē ndɔ̄le̍ŋ chōo̍. Chūāūwāā lēmāsāa̍, pūa̍a̍ ŋ̄wāŋ tɔ̍ a̍ wānāā ŋīɔ̍ɔ̍ŋ ā vīālūŋ ni̍ŋ o̍ pūlālē ndɔ̄le̍ŋ chōo̍. Ndu̍yɛ̍, I̍ cho̍ pūlālē ndɔ̄le̍ŋ sīīŋgūū lɛ̄ŋndē bɛ̄ndū.

²¹Kɛ̍ ndu̍yɛ̍, Āa̍se̍, ō Se̍lūā cho̍ nu̍m vīlūl pɛ̄ŋgo̍o̍ ho̍ō nyīlāsīāŋ ndo̍, a̍ ndu̍ ya̍ I̍ cho̍ kpe̍ma̍a̍ yīī ni̍.”

²²Mɛ̄ɛ̍ Mɛ̄lɛ̄ka̍ chīi̍ sūūki̍āŋndo̍ nda̍ E̍bīlāha᷅m, mi̍ Mɛ̄lɛ̄ka̍ kūānu᷄ŋ.

²³O̍ ko̍ŋ kɔ̍ɔ̍lī, mi̍ E̍bīlāha᷅m to̍sā mɛ̄ɛ̍ Mɛ̄lɛ̄ka̍ dīmu̍l ndu̍ yɛ̍. Mbo̍ kūā a̍ I̍si̍mɛ̄ɛ̄l po̍ ndɔ̄, a̍ po̍ o̍ po̍ wa̍ o̍ ndu̍ lo̍ chi̍ɛ̍ī ni̍ŋ, chīa̍a̍ ve̍lu᷄ŋ o̍ ndu̍ lo̍ chi̍ɛ̍ī ni̍ŋ nda̍ ni̍, chīāā o̍ pe̍ndū a̍ nyɛ̄ sɔ̄lāa̍ wa̍ ni̍, nda̍ kpo̍u̍, mbo̍ kɔ̍ hi̍vī nda̍ o̍ chīɛ̄ī kɔ̄ɔ̄lī pāa̍le̍ le̍ŋ kpe̍e̍kpe̍i̍.

²⁴E̍bīlāha᷅m wa̍ wɔ̄sīla̍ŋ be̍le̍-ŋɔ̍ma̍hīɔ̍ɔ̍lu̍ a̍ lā ŋɔ̄ma̍hīɔ̍ɔ̍lu̍ (99), mbo̍ sɔ̄lā hīvīo̍o̍ o̍ chīɛ̄ī kɔ̄ɔ̄lī.

²⁵I̍si̍mɛ̄ɛ̄l po̍ ndɔ̄ wa̍ wɔ̄sīla̍ŋ tɔ̍ a̍ lā yāa̍, mbo̍ sɔ̄lā hīvīo̍o̍ o̍ chīɛ̄ī kɔ̄ɔ̄lī.

²⁶O̍ pāa̍le̍ pi᷅lɛ̍lē lēŋ chōo̍ E̍bīlāha᷅m nda̍ nda̍ I̍si̍mɛ̄ɛ̄l po̍ ndɔ̄ a̍ sɔ̍lā hīvīo̍o̍ ni̍.

²⁷Pūa̍a̍ kpo̍u̍ o̍ E̍bīlāha᷅m ndo̍ chi̍ɛ̍ī ni̍ŋ, chīa̍a̍ ve̍lu᷄ŋ o̍ ndu̍ lo̍ chi̍ɛ̍ī ni̍ŋ nda̍ ni̍, chīāā o̍ pe̍ndū a̍ nyɛ̄ sɔ̄lāa̍ wa̍ ni̍, pāa̍le̍ le̍ŋ nda̍ sɔ̄la̍ hīvīo̍o̍ ni̍.