Read Southern Kisi Chɛ̄nɛ̍se̍ē 19 Bible Online

Chɛ̄nɛ̍se̍ē 19 - Southern Kisi bible

Chɛ̄nɛ̍se̍ē 19

¹O̍ ko̍ŋ kɔ̍ɔ̍lī, mi̍ ki̍i̍la̍a̍ Mɛ̄lɛ̄ka̍ā ŋīɔ̍ɔ̍ŋāā kāŋ ā hūŋ So̍dɔ̄m īchɔ̄llo̍. Lɔ̍tū wa̍ īchāli̍ o̍ dīō sāāsa̍ chi̍o̍o̍ sōndōo̍, mbo̍ chā nda̍ hūnɔ̄ɔ̍. Chɔ̄ɔ̍ nda̍ mbo̍ cha᷄ŋ, mbo̍ kūā nda̍ lāchī. Mbo̍ kɔ̍ tu̍ndu᷄ŋ nda̍ o̍ lābɛ̄ŋgu̍ ni᷄ŋ, mbo̍ bāŋ hɔ̄lla̍ lɛ̄ŋ.

²Mbo̍ dīmī āā, “Fāllo̍, lā hu᷄ŋ mī lā kɔ̍ lɔ̄l o̍ chīɛ̄ī nūu̍. Ŋ̄ kūɛ̄ pɛ̍ lā pūlū pēlo᷄ŋ lā lɔ᷄l. Lē sɛ̄ pɛ̄ lā pēna̍ lākɔ̄.” Ma̍ kɛ̄ɛ̄, ma̍ dīmī āā, “Ŋ̄ chō mālɔ̄ o̍ bɛ̍ɛ̄ na̍ŋ.”

³Kɛ̍, mbo̍ lō nda̍ nyɔ̄ɔ̄lōo̍ ma̍ chɛ̄l. Ma̍ kūā nda̍ nda̍ā o̍ ndu̍ lo̍ chi̍ɛ̍ī ni̍ŋ. Mɛ̄ɛ̍ nda̍ fūūlu̍u̍, mi̍ Lɔ̍tū to̍o̍sīāl nda̍ nyɛ̄ dīa̍a̍. Mbo̍ tōōsīāl nda̍ bēe̍dīi̍ nda̍ do̍ū yi̍i̍sīi̍ lo̍o̍ ma̍ dīā.

⁴Kɛ̍ te̍le̍ŋ lāhīni̍ bɛ̍ɛ̍ fu̍u̍lu̍u̍ le̍, mi̍ pūa̍a̍ So̍dɔ̄m a̍ ku̍a̍ndu᷄ŋ kpo̍u̍, chūāāmbɔ̄ ni̍ bɛ̄ndū ni̍, ma̍ hu᷄ŋ ba̍lū chīɛ̍i̍ Lɔ̍tū wo̍.

⁵Ma̍ vēēlū āā, “Lɔ̍tū, ɔ̍ɔ̄ pūa̍a̍ hi᷅ŋ nu̍m o̍ bɛ̄ŋgu̍ cho̍o̍ chu̍ɛ̍llɛ̄ŋ nda̍? So̍li̍ nda̍ na̍ŋ mī ŋ̄ wa̍ a̍ nda̍.”

⁶Mi̍ Lɔ̍tū fu̍lā nāa̍ nda̍ chūā, mbo̍ mīŋgī dīo̍o̍ kīndā.

⁷Mbo̍ nyɔ̄ɔ̄lū nda̍ āā, “Lā yāndi̍i̍ wānāā nīa̍a̍, lā to̍sā dɛ̍nɛ̍ wɔ̍ɔ̍ŋ wāā le̍nde̍ a̍ pūa̍a̍ ha̍ā le̍.

⁸Ō wa̍ bɛ̍ɛ̍ chu̍a̍ā nīāā la̍a̍ndūāā ŋīɔ̍ɔ̍ŋnda̍, mi̍ chē bɛ̍ɛ̍ ā hīu̍ wɔ̍ bɛ̍ɛ̍ wa̍nā pɔ̍nɔ̍ kɔ̍ɔ̍lī le̍ ni̍, ō wa̍ bɛ̍ɛ̍ nda̍ I̍ so̍lūl nya̍ nda̍, mī lā tōsa̍ nyɛ̄ nya̍ yēēma̍ a̍ nda̍ wo̍. Kɛ̍, mī lā ma᷄l mīālla̍ ha̍ā. Kāni̍ fu̍u̍le̍, ya̍ yi̍ya̍ nda̍ ni̍. Mīāl nī nda̍ chō ni̍.”

⁹Ma̍ dīmūl Lɔ̍tū āā, “Fa̍ŋa̍ŋ na̍a̍ o̍ nɛ̄ī.” Ma̍ dīmī āā, “Nūm mīāllo̍, nu᷄m chɔ᷅m na̍a̍ nyɛ̄ na̍a̍ ŋ̄ tōsā wo̍ ni̍? Tē a̍ fe̍e̍ŋ na̍a̍ o̍ nɛ̄ī le̍ nyɛ̄ na̍a̍ ŋ̄ chō tōsā a̍ nūm ndo̍ ō hīāū ni̍ŋ bɛ̍ɛ̍ o̍ nda̍a̍.” Ma̍ nyi̍ndū Lɔ̍tū, ma̍ kūā le̍ dīo̍o̍ pīɔ̄lɔ̄ɔ̍.

¹⁰Kɛ̍ mi̍ pūa̍a̍ ŋi̍ɔ̍ɔ̍ŋnda̍ kūmbī dīo̍o̍ ma̍ sāā Lɔ̍tū, ma̍ nāŋ ndu̍ chīɛ̄ī ni̍ŋ, ma̍ kīndā dīo̍o̍.

¹¹Mɛ̄ɛ̍ nda̍ kīnda̍ dīo̍o̍, ma̍ tōsā pūa̍a̍ wa̍ ka̍ŋ o̍ Lɔ̍tū lo̍ dīō wa̍ ki̍nɛ̍i̍, chūāāmbɔ̄ ni̍, bɛ̄ndū ni̍, ma̍ sūmā lēpīlɛ̍ kpu̍lūku̍. Ma̍ sāā dīo̍o̍ nūūvīa̍a̍, mā kēēlīāā ba᷅la̍ŋ, kɛ̍ ā sēēlu̍ŋ di̍o̍o̍ le̍.

¹²O̍ kɔ̍ŋ kɔ̍ɔ̍lī, mi̍ pūa̍a̍ ŋi̍ɔ̍ɔ̍ŋnda̍ ha̍ā ā dīmūl Lɔ̍tū āā, “Tē ā nɔ̄ ŋ̄wāŋ chi̍e̍e̍ na̍ŋ pɛ̍, lēfūāā nūm ni̍, chūāā nūm a̍ vi̍a̍lāā ni̍, mɛ̄ɛ̍ fa̍ŋa̍ŋ a̍ nda̍ chi̍e̍e̍ na̍ŋ.

¹³Kāni̍ fu̍u̍le̍, tɔ̍ɔ̍ dɛ̍nɛ̍ wɔ̍ɔ̍ŋ wāŋnda̍ chi̍e̍e̍ na̍ŋ o̍ ko̍ma̍l ni̍ŋ bɔ̄ɔ̍ Mɛ̍lɛ̄ka̍ Ya̍a̍wɛ̄ɛ̄ ta̍u̍ ta̍u̍. Le̍ ndu̍ tɛ̄ɛ̄mbūūwo̍ o̍ vēm na̍a̍ ni̍.”

¹⁴Mɛ̄ɛ̍ nda̍ dīmu̍l Lɔ̍tū le̍nde̍, mbo̍ kɔ̍ di̍mūl pūa̍a̍ nda̍ a̍a̍ nɔ̍ le̍ chūāūwāā ndūāā ŋi̍ɔ̍ɔ̍ŋnda̍ chūa̍a̍ o̍ nɔ̄ɔ̍ ni᷄ŋ nda̍ āā, “Lā chɔ᷄ŋ lā ŋ̄ fūla᷅ŋ chi̍e̍e̍ na̍ŋ. Mɛ̄lɛ̄ka̍ Ya̍a̍wɛ̄ɛ̄ o̍ cho̍ su̍ŋ su̍ŋ ndu̍ tɛ̄ɛ̄mbūū.” Kɛ̍ lēfūāā ndūa̍a̍ nda̍ a̍a̍ cha᷅ ko̍ bɛ̍ɛ̍ māā, māmɔ̄ɔ̄la̍ŋ o̍ wa̍ dīmīo̍o̍ ni̍.

¹⁵Pāa̍le̍ŋ sīɔ̍ɔ̍ īdīi̍yo̍, mi̍ ki̍i̍la̍a̍ Mɛ̄lɛ̄ka̍ā ŋīɔ̍ɔ̍ŋnda̍ ā dɛ̄ɛ̄nīāā Lɔ̍tū. Ma̍ dīmūl ndu̍ āā, “Chɔ̍ŋ chɔ̍ chɔ̍ mā chu̍a̍ la̍a̍ nu̍m a̍ chūāā nūm a̍ la̍a̍ndūāā ŋīɔ̍ɔ̍ŋnda̍, mī lā fāŋa̍ŋ na̍ŋ, yɔ̄ŋi̍ Mɛ̄lɛ̄ka̍ mɔ̄sɔ̍ŋa̍ nya̍ dīū nya̍ wāŋnda̍ So̍dɔ̄m.”

¹⁶Mi̍ Lɔ̍tū sa̍ā ta̍ma̍lta̍ŋ. Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍i̍i̍nu᷄ŋ ndu̍ īnyīɛ̍ɛ̍. O̍ ko̍ŋ, mi̍ ki̍i̍la̍a̍ Mɛ̄lɛ̄ka̍a̍ sāālīāā nda̍ bāla̍ŋ, ndu̍ ni̍, la̍a̍ ndɔ̄ ni̍, a̍ chūāūwāā ndūāā la̍a̍ndūāā ŋīɔ̍ɔ̍ŋnda̍, ma̍ fāŋā nda̍ chi̍e̍e̍.

¹⁷Mɛ̄ɛ̍ nda̍ fāŋa̍ nda̍ chi̍e̍e̍, ma̍ dīmūl nda̍ āā, “Lā nyāānu̍ŋ yɔ̍ŋi̍ nya̍ sɔ̄la̍ pi̍ɔ̍mndo̍. Lā kɔ̍ kɛ̄, lā to̍fa᷄ŋ kɔ̍ɔ̍lī le̍. Lā si᷅m bā o̍ bā o̍ dɛ̄ɛ̄lāla̍ŋ ni᷄ŋ na̍ŋ te̍. Lā kɔ̍ o̍ pēmbo᷄ŋ kɛ̄, yɔ̄ŋi̍ nya̍ sɔ̄la̍ pi̍ɔ̍mndo̍.”

¹⁸Mi̍ Lɔ̍tū di̍mūl nda̍ āā, “Yāndi̍i̍ fāllo̍, ŋ̄ ku̍ā o̍ pēmbo᷄ŋ ndo̍ŋ pɔ̍ɔ̍li̍ le̍.

¹⁹Lā chīi̍ ya̍ ni᷅ŋ īnyīɛ̍ɛ̍ tūīīnɔ᷄ŋ mi̍ lā pīŋī yōōmūlā nāāla̍ŋ. Kɛ̍, I̍ nɔ̍lā lɛ̍ fūūlūūwo̍ o̍ pēmbo᷄ŋ ndo̍ŋ pɔ̍ɔ̍li̍ le̍, yɔ̄ŋi̍ kpūndɛ̍ kālāa̍ kōma̍l la̍ nɛ̄ī tɛ̍ɛ̄ŋ mī vi᷅.

²⁰Nu̍a̍ wɔ̍ chi̍e̍e̍ pɔ̍mbɔ̄ɔ̍ nda̍. Ndu̍ ndu̍ cho̍ ti᷄ŋ kpɛ̍ɛ̍lūŋ, ŋ̄ nyāānūŋ ndɔ̍ lo̍ŋ. Ō cho̍ chi̍e̍e̍ bɔ̍ɔ̍ le̍. Lo̍ŋ ndu̍ ŋ̄ wā lo̍ŋ nyɛ̄ yɔ̍nūŋ na̍a̍ le̍.”

²¹Mi̍ ki̍i̍la̍nɔ̍ Mɛ̄lɛ̄ka̍a̍ mūlī āā, “I̍ chɛ̍l nu̍m mī lā kūɛ̄ lo̍ŋ. I̍ cho̍ chi̍e̍e̍ ŋ̄ chō ko̍ŋ di̍mīo̍o̍ wo̍ tɛ̄ɛ̄mbūū le̍.

²²Le̍la̍ŋ, lā kēle̍ŋa̍ la̍kɔ̍ lo̍ŋ. Mɛ̄ɛ̍ mī lā fūūlu̍u̍ lo̍ŋ, mālāŋ ya̍ to̍sā nyɛ̄ o̍ nyɛ̄.” Le̍ he̍ī, ma̍ kē chi̍e̍e̍ ko̍ŋ dīōla̍ŋ āā, So̍wā.[15]

²³A̍ te̍le̍ŋ yɛ̄ɛ̄ŋndē īdīi̍le̍ŋ ki̍nɛ̍i̍ Lɔ̍tū fu̍u̍lūū So̍wā ni̍.

²⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ yīŋndē bɛ̄ŋnde̍ŋ lē cha᷅ŋ cho̍o̍ cho̍o̍ a̍ pōūtā lēyīŋnda̍ŋ,

²⁵mi̍ lē hu᷅ŋ lɔ̍m So̍dɔ̄m a̍ Kōmo̍o̍lūā a̍ wānā o̍ wāna̍ wa̍ lo̍ŋ. O̍ ko̍ŋ kɔ̍ɔ̍lī, mi̍ lē lūām yōndōo̍ a̍ tɔ̄lɔ̄ɔ̄ o̍ tɔ̄lɔ̄ɔ̍ wa̍ o̍ dɛ̄ɛ̄lāla̍ Chɔ̍ɔ̍dāŋ nda̍ŋ ni᷄ŋ.

²⁶Kɛ̍, la̍nɔ̍ɔ̍ Lɔ̍tū ndu̍ ndu̍, bōōndi̍i̍ nda̍ wa̍ kɔ̄la̍ŋ nde̍, ō wa̍ pɔ̍nɔ̍ɔ̍ kɔ̄ɔ̄lī, mbo̍ mūli᷄ŋ mbo̍ nūānu᷄ŋ kɔ̍ɔ̍lī. O̍ ko̍ŋ, mbo̍ sīmnu᷄ŋ su̍ŋgbu̍le̍ īhɛ᷄l.

²⁷Pāa̍le̍ŋ sīɔ̍ɔ̍ dīi̍mā ndɔ̄ɔ̍ pu̍u̍ŋ, mi̍ E̍bīlāha᷅m ku̍ā o̍ fo̍ndāŋ o̍ si̍m Mɛ̄lɛ̄ka̍ Ya̍a̍wɛ̄ɛ̄ lāchī wo̍.

²⁸Mbo̍ sīm lo̍ŋ mbo̍ tōfā bā So̍dɔ̄m a̍ Kōmo̍o̍lūā wo̍. Mbo̍ tōfā kūmbū dɛ̄ɛ̄lāla̍ Pīo̍o̍ Chɔ̍ɔ̍dāŋ nda̍ŋ. Tōfāa̍, mbo̍ chā kūmi̍i̍ bɛ̍ndūe̍i̍ hēlɔ̄ɔ̍ tu̍ū, mɛ̄ɛ̍ nda̍ māl nu̍a̍ā chīɔ̍ɔ̍ŋ o̍ yīŋ yɛ̍.

²⁹Mɛ̄ɛ̍ nu̍a̍ā Mɛ̄lɛ̄ka̍ lōōku̍ chi̍e̍e̍ŋ bɛ̍ndūŋ mūu̍ŋndo̍ŋ mu᷅ŋ tɛ̄ɛ̄mbūū ni̍, nāa̍ Lɔ̍tū wa̍ īchāli̍ wa̍. Kɛ̍, mi̍ Mɛ̄lɛ̄ka̍ yīya᷄ŋ le̍ E̍bīlāha᷅m, mbo̍ pīŋī Lɔ̍tū.

³⁰O̍ ko̍ŋ kɔ̍ɔ̍lī, mi̍ Lɔ̍tū fa̍ŋa᷄ŋ So̍wā chi̍e̍e̍. Mbo̍ kūānu᷄ŋ o̍ pēmbo᷄ŋ tɛ̄ɛ̄ŋ nda̍ chūāūwāā ndūāā la̍a̍ndūāā ŋīɔ̍ɔ̍ŋnda̍, kāni̍ fu̍u̍le̍, sīōōŋnde̍ wa̍ ndu̍ le̍ cha᷄lle̍ So̍wā. Le̍ he̍ī, mbo̍ chūā chūāūwāā ndūa̍a̍ ma̍ kɔ̍ wa̍nu᷄ŋ o̍ būūlōo̍ ni᷄ŋ o̍ pēmbo᷄ŋ tɛ̄ɛ̄ŋ.

³¹Pāa̍le̍ pi᷅lɛ̍, mi̍ chūā ndɔ̍ tāso̍o̍ dīmūl pɔ̄mbɔ̄ ndɔ̍ āā, “Yu̍wɛ̍i̍ kɛ̄kɛ̍ nāa̍ chō ni᷅ŋ nu̍a̍ā ni̍. Ndu̍yɛ̍, o̍ lɛ̄ŋnde̍ŋ nde᷅ŋ ni᷄ŋ kīnɛ̍i̍, ŋ̄ sɔ̍lā wa̍nā pɔ̍nɔ̍ o̍ wānā pɔ̍nɔ̍ o̍ chu̍ā na̍a̍ o̍ nɔ̄ ni̍ŋ mī ŋ̄ vēlū a̍ ndu̍ le̍.

³²Le̍la̍ŋ, ŋ̄ ke̍ fi̍nyā nāa̍ mūɛ̄īya̍ŋ mī mā bīī ndu̍. Tē mā bīī ndu̍ pɛ̍, ŋ̄ tōsa̍ ō wa̍ a̍ na̍a̍ le̍ mī ŋ̄ sɔ̄la̍ bɛ̍ɛ̍ chu̍a̍ūwa̍ a̍ ndu̍.”

³³Nyūmmā māŋ, ma̍ kē Lɔ̍tū mūɛ̄īya̍ŋ. Mɛ̄ɛ̍ ma̍ bi̍ī ndu̍, mi̍ chūā ndɔ̍ tāso̍o̍ lūɛ̄ī, mbo̍ tōsā mi̍ fi̍nyā ndɔ̄ wa᷅ a̍ ndu̍, mbo̍ fūla᷄ŋ. Kɛ̍ Lɔ̍tū si̍na̍ le̍, kāni̍ fu̍u̍le̍, mūɛ̄īya̍ŋ mā wa̍ ndu̍ o̍ hɔ̄l.

³⁴Nyūmnda̍ŋ mā pīli̍a̍ŋ vɛ̄lɛ̄, mi̍ chūā ndɔ̍ tāso̍o̍ dīmūl pɔ̄mbɔ̄ ndɔ̍ āā, “Mi̍ ŋ̄ wā chɔ̍chɔ̄l na̍a̍ kɛ̄kɛ̍. Dɔ̍ɔ̍ ŋ̄ ke̍ vɛ̍lɛ̄ ndu̍ mūɛ̄īya̍ŋ. Tē mā bīī ndu̍ pɛ̍, nūm bɛ̍ɛ̍ ā lūɛ̄ī a̍ to̍sa̍ lā wa̍ nya̍ ndu̍, le̍ mī ŋ̄ sɔ̄lā bɛ̍ɛ̍ chu̍a̍ūwa̍ a̍ fi̍nyā nāa̍.”

³⁵Nyūmmā māŋ vɛ̍lɛ̄, ma̍ kē fi̍nyā nda̍ mūɛ̄īya̍ŋ. Mɛ̄ɛ̍ ma̍ bi̍ī ndu̍, mi̍ pɔ̄mbɔ̄ɔ̍ lūɛ̄ī ma̍ wā nda̍ fi̍nyā ndɔ̄, mbo̍ fūla᷄ŋ. Kɛ̍, ko̍ŋ bɛ̍ɛ̍ Lɔ̍tū si̍na̍ le̍, kāni̍ fu̍u̍le̍ mūɛ̄īya̍ŋ mā wa̍ ndu̍ o̍ hɔ̄l. Nda̍ nda̍ ŋi̍ɔ̍ɔ̍ŋ fa̍ū ma̍ chūā yo᷄lta̍ŋ.

³⁶Nu̍a̍ā Lɔ̍tū chūāūwāā ndūāā ŋi̍ɔ̍ɔ̍ŋnda̍ fa̍ū, a̍ lo̍o̍ku̍ chūāūwa̍ wo̍lɔ̄ɔ̄ a̍ fi̍nyā ndā ni̍.

³⁷Mi̍ chūā ndɔ̍ tāso̍o̍ vīālū pōo̍, mbo̍ kē ndu̍ dīōla̍ŋ āā, Mo̍wa̍bī. Pāa̍le̍ hāūle᷅ŋ bɛ̍ɛ̍ wānāā nda̍ vēēlū āā Mo̍wa̍bi̍tīi̍ya̍ wa̍, o̍ pūlālē po̍ ko̍ŋ ni᷄ŋ nda̍ fūla̍ ni̍.

³⁸Mi̍ pɔ̄mbɔ̄ɔ̍ bɛ̍ɛ̍ o̍ vi̍a̍lū pōo̍. Mbo̍ kē ndu̍ dīōla̍ŋ āā, Bēnāmmī. Pāa̍le̍ hāūle᷅ŋ bɛ̍ɛ̍ wānāā nda̍ vēēlū āā A̍mɔ᷅na̍i̍tīi̍ya̍ wa̍ o̍ pūlālē ndɔ̄le̍ŋ chōo̍ nda̍ fūla̍ ni̍.