Read Southern Kisi Chɛ̄nɛ̍se̍ē 24 Bible Online

Chɛ̄nɛ̍se̍ē 24 - Southern Kisi bible

Chɛ̄nɛ̍se̍ē 24

¹A̍ bōōndi̍i̍ ke̍ŋ, E̍bīlāha᷅m wa̍ ni᷅ŋ ō yūvɛ̍i̍ ta̍u̍, ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ du̍a̍ū ndu̍ sa̍lā o̍ nɛ̄ī o̍ nɛ̄ī ni̍ŋ.

²O̍ ko̍ŋ, mi̍ E̍bīlāha᷅m ve̍e̍lū bu̍ɛ̍ī wa̍ bu̍ɛ̍i̍yāā ndūa̍a̍ bōlle̍ŋ o̍ ndu̍ lo̍ chi̍ɛ̍ī ni̍ŋ, ndu̍yɛ̍ mbo̍ wā nyɛ̄m ndɔ᷄ŋ kpo̍u̍ bɔ̍lle̍ŋ ndo̍.

³Mbo̍ dīmūl ndu̍ āā, “I̍ hɛ̍na̍ŋ mā kɔ̍ nu̍u̍vīāā la̍nɔ̍ɔ̍ le̍ Āa̍se̍ po̍ nī. Kɛ̍ ndu̍yɛ̍, chu̍ā wānā la̍nɔ̍ wa̍ā Ke̍na̍na̍i̍tīi̍ya̍ tɛ̄ɛ̄ŋ, a̍ ya̍ I̍ cha̍l ha̍ā tɛ̄ɛ̄ŋ na̍ŋ nda̍ le̍ pa̍. O̍ lɛ̄ŋndē nīle̍ŋ ni᷄ŋ nāa̍ ya̍ I̍ fu̍la̍ wa̍, lo̍ŋ ŋ̄ kɔ̍ ni̍ mā kɔ̍ pu̍ū la̍nɔ̍ɔ̍ wānāā nīa̍a̍ tɛ̄ɛ̄ŋ le̍ po̍ nūu̍. Le̍la̍ŋ, wo̍u̍ ba̍a̍ ya̍ o̍ lɔ̄lūla̍ŋ tɛ̄ɛ̄ŋ mā mɛ̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ cho̍ Mɛ̄lɛ̄ka̍ le̍ chi̍e̍ēŋndo̍ kpo̍u̍ wo̍, māā ā tōsā ni̍ŋ mɛ̄ɛ̍ ya̍ I̍ di̍mu̍l nu̍m yɛ̍.”

⁴

⁵Mi̍ bu̍ɛ̍ī ndɔ̄ɔ̍ nyūnā ndu̍ āā, “Kɛ̍ tē ō wa̍ yɛ̄ mī chūā kōŋ ō kɛ̄ɛ̍ le̍ hūnɔ̄ɔ̍ na̍nu᷄ŋ, bāā I̍ mi̍i̍ŋgū a̍ po̍ nu̍mndo̍ o̍ lɛ̄ŋndē nūmnde̍ŋ ni᷄ŋ nāa̍ ŋ̄ chɛ᷄ŋ nda̍?”

⁶Mi̍ E̍bīlāha᷅m kɛ̍ɛ̄ āā, “Ɛ̄ɛ̍. Mi̍i̍ŋgū a̍ po̍ nūu̍ lo̍ŋ kpo̍so̍ŋ te̍.

⁷Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ o̍ fo̍ndāŋ ndɔ̄ɔ̍ chōo̍ cho̍o̍ wo̍, ō chō ki̍i̍la̍nɔ̍ ndɔ̄ɔ̍ yɔ̄ŋ nu̍m lāchī, mbō tōsa̍ mā pu̍u̍ la̍nɔ̍ɔ̍ wānāā nīa̍a̍ tɛ̄ɛ̄ŋ le̍ po̍ nūu̍. Ndu̍ Mɛ̍lɛ̄ka̍, ndu̍ chu̍a̍ ya̍ o̍ lɛ̄ŋndē nīle̍ŋ ni᷄ŋ nāa̍ nda̍ vēlū ya̍ wa̍ ni̍ mbo̍ hūŋ a̍ ya̍ na̍ŋ. Mbo̍ chūēl la̍ būŋgɛ̄i̍ mbo̍ mēna᷄ŋ āā, ‘I̍ cho̍ wānāa̍ fu̍lā ni̍ŋ o̍ pūlālē nūmnde̍ŋ ni᷄ŋ nda̍, lɛ̄ŋnde̍ŋ nde᷅ŋ kē nyɛ̄ ndā.’ ”

⁸Mi̍ E̍bīlāha᷅m di̍mūl bu̍ɛ̍īyo̍ āā, “Kɛ̍, tē wānā la̍nɔ̍ wa̍ā o̍ na̍a̍lo̍ ō kɛ̄ɛ̍ le̍ hūnɔ̄ɔ̍ pɛ̍, mɛ̄ɛ̍ a̍ fu̍la̍ o̍ sēndi̍o̍o̍ bɛ̄ŋgu̍. Kɛ̍ ndu̍yɛ̍, mi̍i̍ŋgū a̍ po̍ nūu̍ o̍ na̍a̍lo̍ lo̍ŋ kpo̍so̍ŋ te̍.”

⁹O̍ ko̍ŋ, mi̍ bu̍ɛ̍i̍ E̍bīlāha᷅mndo̍ ho̍ō wōū bāa̍ wāna̍ ndɔ̄ ba̍nāa̍ o̍ lɔ̄lūla̍ŋ tɛ̄ɛ̄ŋ, mbo̍ mēna᷄ŋ māā ō chō tōsā mɛ̄ɛ̍ E̍bīlāha᷅m di̍mi̍ yɛ̍.

¹⁰O̍ ko̍ŋ kɔ̍ɔ̍lī, mi̍ fi̍nyā bu̍ɛ̍īyo̍ ho̍ō chūā nyɔ̍mi̍a̍a̍ tɔ̍. Mbo̍ chūā wōlɔ̄ɔ̄la̍ŋ a̍ nyɛ̄m kɛ̄ndɛ̄ kɛ̍ndɛ᷄ŋ wāna̍ ndɔ̄ ba̍nāa̍ ta̍u̍, mbo̍ dōvī mu̍ŋ nyɔ̍mi̍a̍a̍ o̍ lākɔ̄ɔ̄. Mbo̍ cha᷄ŋ kɔ᷅la̍ŋ lɛ̄ŋndē Mɛ̄sōpōte̍e̍mīāāle̍ŋ, o̍ chi̍e̍e̍ Nāhɔ̍ɔ̄ wo̍.

¹¹A̍ pāa̍le̍ yɔ̍ŋga᷄ŋnde̍ŋ, a̍ bōōndi̍i̍ wāŋ lāāndūa̍a̍ kūā o̍ pēēlo̍ ve̍ ki̍nɛ̍i̍, mbo̍ fūūlūū chi̍e̍e̍ le̍kɔ̍ɔ̍. Mbo̍ tōsā mi̍ chɔ̄lūāā o̍ wa̍ kɔ̄la̍ŋ nda̍ ā hīnī lɛ̄ŋ le̍ pɛ̄ŋgīo̍o̍.

¹²O̍ ko̍ŋ kɔ̍ɔ̍lī, mi̍ fi̍nyā bu̍ɛ̍īyo̍ ho̍ō ō pīɛ̄ī Mɛ̄lɛ̄ka̍ āā, “Mɛ̄lɛ̄ka̍ Ya̍a̍wɛ̄ɛ̄, nūm Mɛ̄lɛ̄ka̍ wāna̍ nī ba̍nāa̍ E̍bīlāha᷅m o̍ pi̍ɛ̍ī yo̍, to̍sa̍l wa᷅na̍ nī ba̍nāa̍ dɛ̍nɛ̍ kɛ̍ndɛ̄, mā to̍sa̍ mī sūɛ̍i̍ ya̍ hi᷅ŋ le̍ ndi̍ ve̍ ī bɛ̄ɛ̄ndi̍a̍ŋ.

¹³Ā chē ya̍ o̍ so̍o̍ŋ ko̍lāā chi̍o̍o̍ īkɛ̄i̍. Chūāā lāāndūa̍a̍ ve̍lu᷄ŋ chi̍e̍e̍ na̍ŋ nda̍ chō su̍ŋ su̍ŋ ka̍ndɔ̄ɔ̄ hūnɔ̄ɔ̍ le̍ mɛ̄ŋnda̍ŋ kɔ̄ndɔ̄ɔ̍.

¹⁴Chūā lāāndū ya̍ cho̍ mɛ̄ŋnda̍ŋ pīɛ̄ī a̍a̍, ‘Yāndi̍i̍ tu̍su̍l la̍ kpɛ̍ɛ̍nɛ̍i̍ nu̍m i̍ māmɛ̄ŋnde̍ mī ko̍l,’ tē ō dīmi̍ pɛ̍ āā, ‘Ko̍l, tē a̍ ko̍l pɛ̍ I̍ kɔ̍ndū vɛ̄lɛ̄ nyɔ̍mi̍a̍a̍ nu̍mnda̍ ā ko᷄l’ lo̍, mɛ̄ɛ̍ ō wa̍ ndu̍ nūm Mɛ̄lɛ̄ka̍ hɛ̄li̍ le̍ wāa̍ la̍nɔ̍ɔ̍ le̍ bu̍ɛ̍ī nūmndo̍ Āa̍se̍ ni̍. Tē he̍ī yɔ̄nu̍ŋ pɛ̍, mɛ̄ɛ̍ I̍ si̍na̍ dɔ̍ɔ̍ māā a̍ to̍sa̍l wāna̍ nī ba̍nāa̍ dɛ̍nɛ̍ kɛ̍ndɛ̄.”

¹⁵Kɛ̍ bu̍ɛ̍i̍ E̍bīlāha᷅m ndo̍ ō chīi̍ bɛ̍ɛ̍ su̍ɛ̍i̍ le̍, mi̍ Lūībɛ̍kā, chu̍a̍ Bɛ̄tīhɔ̍ɔ̄ wo̍, ō hūŋ a̍ kpɛ̍ɛ̍nɛ̍i̍ o̍ chōŋgu̍ le̍ mɛ̄ŋnda̍ŋ kɔ̄ndɔ̄ɔ̍. Bɛ̄tīhɔ̍ɔ̄ yɛ̍, ndu̍ pɔ̄mbɔ̄ɔ̍ E̍bīlāha᷅m ndu̍ yɔ̍nūŋ māā Nāhɔ̍ɔ̄ ni̍, pūa̍a̍ nda̍ vēlū nda̍ la̍a̍ ndɔ̄ wa̍ ō pīlɔ̍ɔ̍ wa̍ ko̍ŋ ni̍.

¹⁶Ndu̍yɛ̍, nāŋɔ̄ɔ̍ pi̍la̍ Lūībɛ̍ka̍ ndu̍ o̍o̍ na̍ŋ ni̍, ndu̍ o̍o̍ hi̍u̍ wɔ̍ bɛ̍ɛ̍ wa̍nā pɔ̍nɔ̍ kɔ̍ɔ̍lī le̍, ō wa̍ wɔ̄ yūfu̍a̍a̍nɔ̍. Mbo̍ tūāl o̍ so̍o̍ŋndo̍. Mbo̍ kūāndū mɛ̄ŋnda̍ŋ kpɛ̍ɛ̍nɛ̍i̍ cha̍, mbo̍ hēl a̍ ma̍ŋ.

¹⁷Mi̍ fi̍nyā bu̍ɛ̍īyo̍ kūā ndu̍ lāchī chɔ̍ chɔ̍, mbo̍ pīɛ̄ī ndu̍ mɛ̄ŋnda̍ŋ āā, “Chūa̍a̍, yāndi̍i̍ tu̍su̍l la̍ kpɛ̍ɛ̍nɛ̍i̍ nu̍mnde̍ I̍ kɔ̍l nyɛ᷅ pɔ̄mbɔ̄ fɔ̍.”

¹⁸Mi̍ Lūībɛ̍kā tu̍sī dɔ̍ɔ̍ kpɛ̍ɛ̍nɛ̍i̍ chɔ̍ chɔ̍ o̍ bāla̍ŋ chōo̍, mbo̍ dīmūl ndu̍ āā, “Ko̍l, fāllo̍.”

¹⁹Mɛ̄ɛ̍ o̍ ko̍l, mi̍ Lūūbɛ̍kā dīmī āā, “I̍ cho̍ vɛ̄lɛ̄ kɔ̄ndɔ̄ɔ̄ mī nyɔ̄mi̍a̍a̍ nu̍mnda̍ ā ko᷄l kpo̍u̍.”

²⁰Mi̍ Lūībɛ̍kā hu̍lū mɛ̄ŋma̍ wa̍ o̍ kpɛ̍ɛ̍nɛ̍i̍ ni᷄ŋ nda̍ŋ o̍ nyɛ̄ chɔ̄lūa̍a̍ kōl le̍ni̍ŋ ndo̍ ni᷄ŋ. Mbo̍ kūā vɛ̄lɛ̄ o̍ so̍o̍ŋndo̍ mbo̍ kūāndū mɛ̄ŋnda̍ŋ, mbo̍ hu᷄ŋ hu̍lū lēni᷄ŋ. Ō lo̍ ma̍ŋ vīlīo̍o̍ mi̍ nyɔ̍mi̍a̍a̍ kpo̍u̍ a̍ kɔ̍l.

²¹Mɛ̄ɛ̍ nda̍ chīi̍ kōlɔ̄ɔ̍ kpo̍u̍, mi̍ fi̍nyā bu̍ɛ̍īyo̍ ō mēī do̍ŋ, mbo̍ tōfā Lūībɛ̍kā ha̍a̍a̍. Mbo̍ nyūnā ndu̍ pi̍la̍ o̍ kɔ̄l ni᷄ŋ āā, “Bāā sūɛ̍i̍ wāna̍ ni̍ ba̍nāa̍ ō vēm ya̍ ve̍, bāā mbō wa̍ ndi̍ Mɛ̄lɛ̄ka̍ Ya̍a̍wɛ̄ɛ̄ o̍ bɛ̍ɛ̍ndi̍a̍a̍ he̍ī ni̍?”

²²Mɛ̄ɛ̍ nyɔ̍mi̍a̍a̍ chīi̍ kōlɔ̄ɔ̍, mi̍ fi̍nyā bu̍ɛ̍īyo̍ chūā kēlɛ̄i̍ īko̍o̍līi̍ye̍ le̍ bāa̍ o̍ mīli̍ŋ, mbo̍ kē chūāāmbɔ̄ɔ̍. Mbo̍ chūā vɛ̄lɛ̄ kēla᷄ŋ ŋ̄ko̍o̍līi̍yo̍ŋ ŋ̄ mūu̍ŋ le̍ wōo̍ŋndo̍ o̍ bā, mbo̍ kē ndu̍.

²³Mi̍ fi̍nyā bu̍ɛ̍īyo̍ nyūnā ndu̍ āā, “Ō nɛ̄ɛ̍nɛ̍ ve̍lū yɛ̄ nu̍m?”

²⁴Mi̍ chūāāmbɔ̄ɔ̍ mūlī āā, “Bɛ̄tīhɔ̍ɔ̄ ve̍lū ya̍ ni̍, fāllo̍ Nāhɔ̍ɔ̄ nda̍ Mi̍li̍kāā la̍a̍ ndɔ̄, po̍ ndāa̍.” Mbo̍ nyūnā ndu̍ āā, “Ŋ̄ sɔ̄lā pa̍ na̍a̍ hi̍nīa̍a̍ o̍ fi̍nyā nūmndo̍ chi̍ɛ̍ī ni̍ŋ?”

²⁵Mi̍ chūāāmbɔ̄ɔ̍ mūlī āā, “E̍ī, ŋ̄ nɔ̄ nāa̍ hi̍nīa̍a̍. Ŋ̄ nɔ̄ vɛ̄lɛ̄ bīllo̍ tūu̍le̍ŋ le̍ mī nyɔ̍mi̍a̍a̍ nu̍mnda̍ ā dē.”

²⁶O̍ ko̍ŋ, mi̍ fi̍nyā bu̍ɛ̍īyo̍ tūndū bōlle̍ŋ, mbo̍ pīɛ̄ī Mɛ̄lɛ̄ka̍ āā,

²⁷“Mɛ̄lɛ̄ka̍ Ya̍a̍wɛ̄ɛ̄, nūm wāna̍ nī ba̍nāa̍ ō pīɛ̄ī yo̍, I̍ me̍l nu̍m ba̍li̍ka̍ le̍ mɛ̄ɛ̍ ŋ̄ tōsa̍ nyɛ̄ ŋ̄ chūe̍l wāna̍ nī ba̍nāa̍ būŋgɛ̄i̍yo̍ yɛ̍. Ba̍li̍ka̍ Mɛ̄lɛ̄ka̍ Ya̍a̍wɛ̄ɛ̄, le̍ mɛ̄ɛ̍ ŋ̄ hīŋ a̍ ya̍ sa̍kpō o̍ wānāa̍ wāna̍ nī ba̍nāa̍ wa̍ lo̍ yɛ̍.”

²⁸Mi̍ chūāāmbɔ̄ lāāndōo̍ ho̍ō ō nyāānu᷄ŋ kɛ᷅, mbo̍ kɔ̍ di̍mūl yu̍ŋgu̍ kāla̍ ndɔ̄ɔ̍ nyɛ̄ o̍ nyɛ̍ yɔ̍nu̍ŋ.

²⁹Lūībe̍kā ndu̍ o̍o̍ nɔ̍ yēmāa̍ dīōla̍ŋ āā, Le̍bāŋ. Mɛ̄ɛ̍ Lūībɛ̍kā to̍mbo̍la̍ nyɛ̄ fi̍nyā bu̍ɛ̍īyo̍ dīmi̍ wo̍ mi̍ Le̍bāŋ tu̍ɛ̍ī, ndu̍yɛ̍ mbo̍ chā kēla᷄ŋ ŋ̄ko̍o̍līi̍yo̍ŋ ŋ̄ bāā yēma̍ ndɔ̄ o̍ mīli̍ŋ a̍ o̍ lābā, mbo̍ kūā a̍ kīlta̍ŋ le̍ fi̍nyā bu̍ɛ̍īyo̍ dēmūllo̍. Mɛ̄ɛ̍ o̍ ku̍ɛ̄, mbo̍ kōmāl ndu̍ īsīsi̍ nyɔ̍mi̍a̍a̍ ndūa̍a̍ īkɛ̄i̍ o̍ so̍o̍ŋ ko̍lāa̍ lo̍ŋ.

³⁰

³¹Mi̍ Le̍bāŋ di̍mūl ndu̍ āā, “Ŋ̄ kɔ̄ŋnu᷅ŋ chi̍e̍e̍ fāllo̍. Wāna̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū sa̍lā wo̍ ŋ̄ chō ni̍, vɛ᷅ mā si̍m na̍ŋ a̍ he᷅l chi̍e̍e̍ le̍? I̍ bɛ̍ɛ̍ndi̍a̍a̍ ni᷅ŋ yīya̍a̍ le̍ nūm. Nyɔ̍mi̍a̍a̍ nu̍mnda̍ bɛ̍ɛ̍ fo̍ndāa̍ chō le̍ nda̍.”

³²Mi̍ fi̍nyā bu̍ɛ̍īyo̍ ō tūāl Le̍ba̍ŋ kɔ̄ɔ̄lī, ma̍ kūā o̍ chīɛ̄īyo̍. Mɛ̄ɛ̍ nda̍ fūūlu̍u̍, mi̍ Le̍bāŋ tu̍sī wōlɔ̄ɔ̄la̍ wa̍ nyɔ̍mi̍a̍a̍ o̍ lākɔ̄ɔ̄ la̍ŋ. Mbo̍ dōū nda̍ bīllo̍ le̍ mā dē. O̍ ko̍ŋ kɔ̍ɔ̍lī, mbo̍ pɛ̄ŋgɛ̄lāl nda̍ bīllo̍ le̍ mā hīni̍. Mbo̍ sōlī mɛ̄ŋnda̍ŋ mi̍ fi̍nyāa̍ a̍ wānāā o̍ hi᷅ŋ kɔ̄ɔ̄lī wa̍ ā pūlū pēlo᷄ŋ.

³³O̍ ko̍ŋ kɔ̍ɔ̍lī, ma̍ chūū nda̍ nyɛ̄ dīa̍a̍. Kɛ̍ mi̍ fi̍nyā bu̍ɛ̍īyo̍ dīmī āā, “Mɛ̄ɛ̍ mī dɔ̍ɔ̍nu᷄ŋ fɛ̍ɛ̍ŋ ko̍na̍ sa̍bu̍ chu̍u̍ ya̍ na̍ŋ ndo̍, mālāŋ ya̍ di̍ā nyɛ̍ dīa̍a̍.” Mi̍ Le̍bāŋ di̍mūl ndu̍ āā, “Mɛ̄ɛ̍ dɔ̍ɔ̍nu᷄ŋ ko̍na̍.”

³⁴O̍ ko̍ŋ kɔ̍ɔ̍lī, mbo̍ dūa̍a̍ŋ ko̍na̍ āā, “Bu̍ɛ̍i̍ E̍bīlāha᷅mndo̍ ya̍ cho̍ ni̍.

³⁵Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū wāna̍ nī ba̍nāa̍ E̍bīlāha᷅m sa̍lā, mbo̍ sūlī ndu̍ ta̍u̍ ta̍u̍. Ō ke̍ ndu̍ chɔ̄lūa̍a̍ ta̍u̍, sāa̍, a̍ nāūwa̍, a̍ nyɔ̍mi̍a̍a̍, a̍ sōfɛ̍li̍a̍a̍. O̍ ko̍ŋ kɔ̍ɔ̍lī, mbo̍ kē ndu̍ ko̍o̍līi̍yo̍ŋ a̍ ka̍ni̍ŋ hu̍mbo᷄ŋ. Mbo̍ kē ndu̍ bu̍ɛ̍i̍yāā wāŋ pīāāndūa̍a̍ a̍ bu̍ɛ̍i̍yāā wāŋ lāāndūa̍a̍.

³⁶O̍ fūla̍ o̍ ko̍ŋ kɔ̍ɔ̍lī, mi̍ Mɛ̄lɛ̄ka̍ tōsā mi̍ Se̍lūā la̍nɔ̍ɔ̍ wāna̍ nī ba̍nāa̍ ō vīlūl ndu̍ pōo̍. Mi̍ chē bɛ̍ɛ̍ Se̍lūā wa̍ ō yūvɛ̍i̍ a̍ bōōndi̍i̍ ke̍ŋ ni̍. Ndu̍yɛ̍, wāna̍ nī ba̍nāa̍ ō ke̍ po̍ ndɔ̄ ko̍ŋ nyɛ̄ o̍ nyɛ̄ o̍ nɔ̍ fa̍ū.

³⁷Mi̍ wāna̍ nī ba̍nāa̍ ō kē ya̍ sēndi̍o̍o̍ māā tē I̍ to̍sā ni̍ŋ pɛ̍ nyɛ᷅ o̍ di̍mu̍l la̍ wo̍. Mbo̍ dīmūl la̍ āā, ‘I̍ hɛ̍na̍ŋ nu̍m mā pu̍u̍ la̍nɔ̍ɔ̍ le̍ po̍ nūu̍. Kɛ̍ ndu̍yɛ̍, Ke̍na̍na̍i̍tīi̍ya̍ ā ya̍ I̍ cho̍ ha̍ā o̍ lɛ̄ŋndē ndāle̍ŋ ni᷄ŋ nda̍, chu̍ā wānā la̍nɔ̍ chu̍a̍u̍wāā ndāa̍ tɛ̄ɛ̄ŋ le̍ po̍ nūu̍ le̍ pa̍.

³⁸O̍ yu̍ŋgu̍ fi̍nyā nūu̍ lo̍ ŋ̄ kɔ̍ ni̍ mā chu̍a̍ la̍nɔ̍ɔ̍ wānāā nīa̍a̍ tɛ̄ɛ̄ŋ le̍ po̍ nūu̍.’

³⁹Mi̍ nyu̍nā wāna̍ nī ba̍nāa̍ a̍a̍, ‘Kɛ̍ tē wānā la̍nɔ̍ ko̍ŋ ō kɛ̄ɛ̍ yɛ̄ le̍ hūnɔ̄ɔ̍?’

⁴⁰Mbo̍ dīmūl la̍ āā, ‘Mɛ̄lɛ̄ka̍ Ya̍a̍wɛ̄ɛ̄ ō ya̍ I̍ cho̍ sāāŋgīāllo̍ lɔ̍ɔ̍ lɔ̍ɔ̍ wo̍ chō ki̍i̍la̍nɔ̍ ndɔ̄ɔ̍ yɔ̄ŋ, mbō wa̍ a̍ nūm la̍tu̍lu̍ ndu̍yɛ̍, mbō māla̍ nu̍m mā pu̍u̍ la̍nɔ̍ɔ̍ wānāā nīa̍a̍ tɛ̄ɛ̄ŋ, o̍ yu̍ŋgu̍ fi̍nyā nūu̍ chōo̍ le̍ po̍ nūu̍.

⁴¹Tē wānāā nīa̍a̍ ā kɛ̄ɛ̍ yɛ̄ le̍ nu̍m chūā kōŋ kīo̍o̍ pɛ̍, mɛ̄ɛ̍ sēndi̍ ya̍ I̍ ke̍ nu̍m ndo̍ ō cho̍ lɛ̍ nu̍m chōo̍ le̍.’

⁴²“Mɛ̄ɛ̍ ya̍ I̍ fu̍u̍lu̍u̍ o̍ so̍o̍ŋ ko̍lāa̍, mi̍ pi̍ɛ̍ī Mɛ̄lɛ̄ka̍ a̍a̍, ‘Mɛ̄lɛ̄ka̍ Ya̍a̍wɛ̄ɛ̄, nūm wāna̍ nī ba̍nāa̍ E̍bīlāha᷅m cho̍ pīɛ̄īyo̍ wo̍, yāndi̍i̍ ma̍la̍ ya̍ mī dɛ̍nɛ̍la̍ ya̍ I̍ hi᷅ŋ le̍ la̍ŋ nda̍ŋ lā bɛ̄ɛ̄ndi̍a̍ŋ.

⁴³Mi̍ chē ya̍ o̍ so̍o̍ŋ ko̍lāa̍ īkɛ̄i̍ mi̍ wa᷅ chūmndo̍. Chūāāmbɔ̄ lāāndu̍ cho̍ hūnɔ̄ɔ̄ le̍ mɛ̄ŋnda̍ŋ kɔ̄ndɔ̄ɔ̍, mī pi̍ɛ̍i̍ ndu̍ mɛ̄ŋnda̍ŋ a̍a̍, “Yāndi̍i̍ ke̍ ya̍ mɛ̄ŋnda̍ŋ o̍ kpɛ̍ɛ̍nɛ̍i̍ nu̍mnde̍ ni᷄ŋ mī ko̍l fɔ̍,”

⁴⁴mbo̍ dīmi̍ āā, “Ko̍l, tē a̍ ko̍l pɛ̍ I̍ kɔ̍ndū vɛ̄lɛ̄ nyɔ̍mi̍a̍a̍ nu̍mnda̍ ā ko᷄l,” lo̍, ō wa̍ ndu̍ nūm Mɛ̄lɛ̄ka̍ Ya̍a̍wɛ̄ɛ̄ hɛ̄li̍ le̍ wāna̍ ni̍ ba̍nāa̍ po̍ ndɔ̄ɔ̍ ni̍.’

⁴⁵Lɔ̍ɔ̍pa̍ ya̍ I̍ chi̍ī pi̍ɛ̍īle̍ŋ o̍ kɔ̄l ni᷄ŋ, mi̍ Lūībɛ̍kā hu᷅ŋ bɛ̍ɛ̍ a̍ kpɛ̍ɛ̍nɛ̍i̍ ndūɛ̄ī ku̍a̍ndāā māmɛ̄ŋnde̍ o̍ chōŋgu̍. Mbo̍ tūāl mbo̍ kūāndū mɛ̄ŋnda̍ŋ. Mi̍ di̍mūl ndu̍ a̍a̍, ‘Yāndi̍i̍ ke̍ ya̍ I̍ kɔ̍l fɔ̍.’

⁴⁶Pīɛ̄īyo̍ ndu̍ dɔ̍ɔ̍, mbo̍ tūsi᷄ŋ bɛ̍ɛ̍ kpɛ̍ɛ̍nɛ̍i̍ o̍ chōŋgu̍. Mbo̍ dīmūl lā āā, ‘Ko̍l, tē a̍ ko̍l pɛ̍, I̍ kɔ̍ndū vɛ̄lɛ̄ nyɔ̍mi̍a̍a̍ nu̍mnda̍ ā ko᷄l.’

⁴⁷O̍ ko̍ŋ kɔ̍ɔ̍lī, mi̍ nyu̍nā ndu̍ a̍a̍, ‘Ō nɛ̄ɛ̍nɛ̍ ve̍lū yɛ̄ nu̍m?’ Mbo̍ dīmī āā, ‘Bɛ̄tīhɔ̍ɔ̄ ve̍lū ya̍ ni̍, fāllo̍ Nāhɔ̍ɔ̄ nda̍ Mi̍li̍kāā po̍ ndāa̍.’ O̍ ko̍ŋ kɔ̍ɔ̍lī, mi̍ wo̍ū ndu̍ kēlɛ̄i̍ o̍ mīli̍ŋ, mi̍ wo̍ū ndu̍ mu᷅ŋ o̍ lābā.

⁴⁸O̍ ko̍ŋ kɔ̍ɔ̍lī, mi̍ ba᷅ŋ wūla̍ŋ mi̍ so̍o̍lūū Mɛ̄lɛ̄ka̍ Ya̍a̍wɛ̄ɛ̄. Mi̍ me᷅l Mɛ̄lɛ̄ka̍ ba̍li̍ka̍, ō wāna̍ nī ba̍nāa̍ E̍bīlāha᷅m pi̍ɛ̍īyo̍, o̍ hi᷅ŋ a̍ ya̍ sa̍kpō nāa̍ Lūībɛ̍ka̍ chu̍a̍ wo̍. Wāna̍ nī ba̍nāa̍ chūā wānāā ndūa̍a̍, le̍ mbō wa̍ la̍nɔ̍ɔ̍ le̍ po̍ ndɔ̄ɔ̍.

⁴⁹Le̍la̍ŋ, lā yīya̍ŋ a̍ wāna̍ nī ba̍nāa̍ mī lā mūli̍ ndu̍ dīōm ō kɛ̄ndɛ̄. Tē lā chɛ᷄l nyɛ̄ o̍ nyu̍na̍ nya̍ wo̍ pɛ̍, lā dīmu̍l la̍. Tē lā chɛ᷄l vɛ̍lɛ̄ le̍, lā dīmi̍, I̍ to̍fa̍ nāa̍ che᷅le̍ŋ.”

⁵⁰O̍ ko̍ŋ kɔ̍ɔ̍lī, mi̍ Le̍bāŋ nda̍ Bɛ̄tīhɔ̍ɔ̄ a̍ di̍mī āā, “Mɛ̄lɛ̄ka̍ Ya̍a̍wɛ̄ɛ̄ pi̍la̍ kɛ̍ɛ̍si̍a̍a̍ sūɛ̍i̍ he̍ī ni̍, le̍la̍ŋ na̍a̍ ŋ̄ nɔ̍ mɛ̍ɛ̍ di̍mīāā lēni᷄ŋ te̍.

⁵¹A̍ che᷄ŋ Lu̍ībɛ̍kā, chu̍a̍ ndu̍ lā kɔ̍, mbō kɔ̍ wa᷅ la̍nɔ̍ɔ̍ le̍ wānā nu̍m bānāa̍ po̍ ndɔ̄ɔ̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍.”

⁵²Mɛ̄ɛ̍ nda̍ dīmi̍ le̍nde̍, mi̍ bu̍ɛ̍i̍ E̍bīlāha᷅m ndo̍ ō cha᷄ŋ mbo̍ bāŋ wūla̍ŋ mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄.

⁵³O̍ ko̍ŋ kɔ̍ɔ̍lī, mbo̍ hūŋ a̍ kēla᷄ŋ ŋ̄ko̍o̍līi̍yo̍ŋ, a̍ yɔ̄lɔ᷄ŋ ŋ̄ko̍o̍līi̍lyo̍ŋ, a̍ nyɛ̄lā chūɛ̄ɛ̄na᷄ŋ nda̍ŋ, mbo̍ kē Lūībɛ̍kā. Mbo̍ hūŋ vɛ̄lɛ̄ a̍ nyɛ̄m tɔ̍ɔ̍ŋ yɛ̍ yɔ̍ŋ mbo̍ kē yēmāa̍ Lūībɛ̍ka̍ a̍ kāla̍ ndɔ̄.

⁵⁴O̍ ko̍ŋ kɔ̍ɔ̍lī, mi̍ fi̍nyā bu̍ɛ̍īyo̍ a̍ pūa̍a̍ o̍ hi᷅ŋ kɔ̄ɔ̄lī wa̍ ā dīā nyɛ̄ dīa̍a̍. Ma̍ lɔ̄l lo̍ŋ nyu᷅mmā māŋ. Mɛ̄ɛ̍ pāa̍le̍ŋ lē sɛ̄ īdīi̍yo̍, mbo̍ dīmūl nda̍ āā, “Lā ma᷄l na̍a̍ ni̍ko̍ ŋ̍pe̍lū, ŋ̄ mīīŋgū wa᷅na̍ nī ba̍nāa̍ o̍ ībūŋ.”

⁵⁵Kɛ̍ mi̍ chūa̍a̍ yēma̍ ndɔ̄ a̍ kālāa̍ ā dīmī āā, “Chūa̍a̍ lo̍ wɔ̍ na̍ŋ le̍ te̍le̍ŋnda̍ ti̍ŋ, tē pālɛ̍i̍ hīōū pɛ̍ tɔ̍, ō kūɛ̄.”

⁵⁶Kɛ̍ mi̍ fi̍nyā bu̍ɛ̍īyo̍ dīmī āā, “Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ ya̍ mālā o̍ sūɛ̍i̍ he̍ī ni᷄ŋ nu̍a̍ā yɛ̍, lā yāndi̍i̍, lā kɛ̍sī lɛ̄ ya̍ kɛ̄sī chēle̍ŋ te̍. Lā tōsa̍ mī I̍ mi̍i̍ŋgu̍ wāna̍ nī ba̍nāa̍ o̍ ībūŋ.”

⁵⁷Ma̍ dīmī āā, “Mɛ̄ɛ̍ ŋ̄ vēēlū wɔ̍ chūa̍a̍ pi̍la̍, mī ŋ̄ nyūna̍ ndu̍.”

⁵⁸Ma̍ vēēlū Lūībɛ̍ka̍, ma̍ nyūnā ndu̍ āā, “A̍ chɛ̍l mā kūɛ̄ nya̍ fi̍nyāa̍ ho̍ō?” Mbo̍ dīmī āā, “I̍ chɛ̍l mī ŋ̄ kūɛ̄ na̍a̍ ndu̍.”

⁵⁹O̍ ko̍ŋ kɔ̍ɔ̍lī, mi̍ wānāa̍ Lūībɛ̍ka̍a̍ ā yɔ̄ŋgū Lūībɛ̍ka̍ nda̍ chu̍a̍ wa̍ ndu̍ māndāa̍ wo̍, le̍ mā kūɛ̄ nda̍ bu̍ɛ̍i̍ E̍bīlāha᷅m ndo̍ a̍ pūa̍a̍ o̍ hi᷅ŋ kɔ̄ɔ̄lī wa̍.

⁶⁰O̍ ko̍ŋ, ma̍ dūāū Lūībɛ̍ka̍ sa̍lā āā, “Yēma̍ nāa̍, Mɛ̄lɛ̄ka̍ dɔ̄u̍ nu̍m sa̍lā mā ku̍i̍i̍. Chūāā nūmnda̍ ā kūi̍i̍ mā wa̍ wāa̍la̍ŋ a̍ wāa̍la̍ŋ, ī yɔ̄nu̍ŋ le̍nde̍ fɔ̍. Mbɔ̄ wānāa̍ fu̍lā ni̍ŋ o̍ pūlālē nūmnde̍ŋ chōo̍ wa̍ ā kūūmbu̍ŋ ya̍a̍mɔ̍ɔ̍wa̍a̍ ndāa̍ chōo̍ fɔ̍!”

⁶¹O̍ ko̍ŋ kɔ̍ɔ̍lī, mi̍ Lūībɛ̍kā a̍ wānāā ndūāā ma̍lāa̍ ā bɛ̄ɛ̄ndīa̍ŋ. Ma̍ hēl o̍ nyɔ̍mi̍a̍a̍ chōo̍, ma̍ tūāl bu̍ɛ̍i̍ E̍bīlāha᷅m ndo̍ kɔ̄ɔ̄lī, ma̍ kūā nda̍ nda̍ā.

⁶²A̍ bōōndi̍i̍ ke̍ŋ, Āa̍se̍ ndu̍ o̍o̍ fa̍ŋa̍ŋ ni᷅ŋ nāa̍ nda̍ wa̍ īchāli̍ Bīāā La̍ha̍i̍ Lo̍ī wā. O̍ lɛ̄ŋndē Ke̍nāŋnde̍ŋ mātōū o̍ wa̍ ni᷅ŋ īchāli̍ ni̍.

⁶³Ō wa̍ a̍ pāa̍le̍ pi᷅lɛ̍ a̍ pāa̍le̍ yɔ̍ŋga᷄ŋ nde̍ŋ, mi̍ Āa̍se̍ ma᷅l mbo̍ dīām nɛ̄īyo̍ o̍ po̍llo̍ ni᷄ŋ. Mɛ̄ɛ̍ o̍ chu̍a̍ hɔ̄lla̍ mbo̍ to̍fā, mbo̍ chā nyɔ̍mi̍a̍a̍ hūnɔ̄ɔ̍.

⁶⁴Mī Lūībɛ̍kā to̍fa᷄ŋ la̍chi̍, mbo̍ chā Āa̍se̍ hūnɔ̄ɔ̍. Mɛ̄ɛ̍ o̍ che᷅ ndu̍, mbo̍ tūāl o̍ nyɔ̍mi̍ɔ̍ɔ̍ chōo̍.

⁶⁵Mbo̍ nyūnā fi̍nyā bu̍ɛ̍īyo̍ āā, “Po̍ kūɛ̍ɛ̍nɛ̍ cho̍ yɛ̄ ko̍ŋ hu̍nɔ̄ɔ̍ na̍a̍ dēmūllo̍?” Mi̍ fi̍nyā bu̍ɛ̍īyo̍ mūlī āā, “Wāna̍ nī ba̍nāa̍ cho̍ ko̍ŋ hu̍nɔ̄ɔ̍ ni̍.” Mɛ̄ɛ̍ o̍ di̍mu̍l ndu̍ le̍nde̍, mbo̍ chūā kōlāa̍ mbo̍ kūūmbu᷄ŋ o̍ hɔ̄l le̍ hɔ̄lla̍ vīōŋɔ̄ɔ̍.

⁶⁶O̍ ko̍ŋ kɔ̍ɔ̍lī, mi̍ fi̍nyā bu̍ɛ̍īyo̍ ō dōo̍ŋ Āa̍se̍ ko̍na̍ a̍ mɛ̄ɛ̍ o̍ mɛ̄ɛ̍ o̍ kɔ̍ to̍sā.

⁶⁷O̍ ko̍ŋ kɔ̍ɔ̍lī, mi̍ Āa̍se̍ hu᷅ŋ a̍ Lūībɛ̍ka̍ o̍ tɛ̍ndɛ̄i̍ Se̍lūā ka᷅la̍ ndɔ̄ wo̍ ni᷄ŋ. O̍ ko̍ŋ kɔ̍ɔ̍lī, mi̍ Lūībɛ̍kā si̍mnu᷄ŋ la̍a̍ ndɔ̄. Ndu̍yɛ̍, mi̍ Āa̍se̍ ka̍a̍lā Lūībɛ̍ka̍ ta̍u̍ ta̍u̍. Kɔ̄l tāmbɛ̍i̍ wa̍ Āa̍se̍ le̍ pīɔ̍m kāla̍ ndɔ̄ɔ̍ wo̍, mbo̍ sɔ̄lā ni᷅ŋ kɔ̄l nyɔ̄ɔ̄lāa̍.