Read Southern Kisi Chɛ̄nɛ̍se̍ē 26 Bible Online

Chɛ̄nɛ̍se̍ē 26 - Southern Kisi bible

Chɛ̄nɛ̍se̍ē 26

¹Mi̍ ī yɔ̄nu᷄ŋ, mi̍ yīmā chēle̍ŋ mā dēl vɛ̄lɛ̄ o̍ lɛ̄ŋnde̍ŋ ni᷄ŋ, ō fāŋa̍ŋ o̍ yīma̍ de̍l a̍ bōōndi̍i̍ E̍bīlāha᷅m wa̍ yōōmū ve̍. Mɛ̄ɛ̍ yīa̍a̍ŋ ma᷅ŋ mā de᷄l, mi̍ Āa̍se̍ ku̍ā Kɛ̍lūāā chi̍e̍e̍ nāa̍ Māsāa̍ Ābīmɛ̍lɛ̍kī chu̍a̍, o̍ wa̍ māsā bɛ̍ndōo̍ le̍ Fīli̍i̍tīāŋnda̍ wo̍.

²Kāni̍, yīmā māŋ dēlɔ̄ɔ̍, mī Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ ndu̍. Mbo̍ dīmūl ndu̍ āā, “Ku̍ā o̍ lɛ̄ŋndē I̍chi̍pīle̍ŋ ni᷄ŋ te̍. Cha̍l na̍ŋ o̍ lɛ̄ŋnde̍ŋ nde᷅ŋ ni᷄ŋ nāa̍ ya̍ I̍ cho̍ nu̍m chɔ̄m nda̍.

³Wa̍ na̍nu᷄ŋ o̍ lɛ̄ŋnde̍ŋ nde᷅ŋ ni᷄ŋ. I̍ cho̍ wā nu̍m kɔ̄ɔ̄lī, ndu̍yɛ̍ mī dɔ̍ū nu̍m sa̍lā. I̍ cho̍ nu̍m lɛ̄ŋnde̍ŋ nde᷅ŋ kpo̍u̍ ke᷅, nya̍ wānāa̍ fu̍lā ni̍ŋ o̍ pūlālē nūmnde̍ŋ chōo̍ wa̍. Būŋgɛ̄ī ya̍ I̍ chu̍e̍l E̍bīlāha᷅m fi̍nyā nu᷄m nde̍, I̍ cho̍ ndi̍ pēēlū.

⁴I̍ cho̍ tōsā, mī wānāa̍ cho̍ fūlā o̍ pūlālē nūmnde̍ŋ chōo̍ wa̍ ā kūi̍i̍ mā wa̍ māā lōo̍ŋ o̍ ha̍la̍a̍ ni᷄ŋ. Ndu̍yɛ̍, pūlālē nūmnde̍ lēŋ ya̍ I̍ ke̍ lɛ̄ŋnde̍ŋ nde᷅ŋ fa̍ū ni̍. Ndu̍yɛ̍ o̍ ko̍ŋ kɔ̍ɔ̍lī, o̍ sa̍bū chūāā nūm a̍ ma̍māa̍ ni᷄ŋ ya̍ I̍ du̍a̍ū ni̍ŋ lɛ᷅ŋnde̍ kpo̍u̍ o̍ chi̍e̍ēŋndo̍ chōo̍ sa̍lā ni̍.

⁵I̍ cho̍ he̍ī tōsā, kāni̍ fo̍ndōle̍, le̍ mɛ̄ɛ̍ E̍bīlāha᷅m tu̍e̍ī ya̍ dīōm mbo̍ tōsā nyɛ̄ ya̍ I̍ di̍mu̍l ndu̍ wo̍, o̍ ko̍ŋ kɔ̍ɔ̍lī, mbo̍ chūā sāwāla̍ nīla̍ŋ kpo̍u̍ yɛ̍.”

⁶Le̍ he̍ī, mi̍ Āa̍se̍ cha᷅l Kɛ̍lūāā chi̍e̍e̍.

⁷O̍ ko̍ŋ kɔ̍ɔ̍lī, mɛ̄ɛ̍ pūa̍a̍ lo̍ŋ a̍ nyu̍na̍ ndu̍ a̍ Lūībɛ̍ka̍ o̍kɔ̄ɔ̄, mbo̍ dīmūl nda̍ āā, “Yēma̍ nūu̍ o̍ cho̍ ni̍.” Le̍ mɛ̄ɛ̍ Lūībɛ̍kā ndu̍ o̍o̍ na̍ŋ yɛ̄ ta̍u̍ yɛ̍, mi̍ Āa̍se̍ yɔ᷅ŋ sīōōŋnde̍ māā tē ō dīmi̍ pɛ̍ māā la̍a̍ ndɔ̄ ni̍, pūa̍a̍ chi̍e̍e̍ lo̍ŋ a̍ di̍ī ndu̍ le̍ la̍a̍ ndɔ̄.

⁸Mi̍ Āa̍se̍ cha᷅l Kɛ̍lūāā chi̍e̍e̍ le̍ te̍le̍ŋ vi̍lɛ̄ī. Pāa̍le̍ pi᷅lɛ̍, Māsāa̍ Ābīmɛ̍lɛ̍kī wa̍ o̍ ndu̍ lo̍ chi̍ɛ̍ī ni̍ŋ, mbo̍ wā nūa̍a̍ o̍ dīō pɔ̄mbɔ̄ɔ̍, mbo̍ chā Āa̍se̍ cho̍ Lūībɛ̍ka̍ kɔ̄ɔ̄mīa̍ŋndo̍.

⁹O̍ ko̍ŋ kɔ̍ɔ̍lī, mi̍ Ābīmɛ̍lɛ̍kī vi̍ām le̍ Āa̍se̍. Mbo̍ dīmūl ndu̍ āā, “Mɛ̄ɛ̄māā la̍a̍ nu̍m Lūībɛ̍kā cho̍ ni̍, ma̍ dīmī māā yēmā nu̍m ni̍. Vɛ᷅ ma̍ tōsā le̍nde̍?” Mi̍ Āa̍se̍ di̍mūl ndu̍ āā, “I̍ di̍mi̍ le̍nde̍ fo̍ndōle̍, yɔ̄ŋi̍ nda̍ a̍a̍ di̍i̍ ya̍ le̍ ndu̍.”

¹⁰Mi̍ Ābīmɛ̍lɛ̍kī di̍mūl ndu̍ āā, “Mɛ̄ɛ̍ a̍ to̍sa̍ su̍ɛ̍i̍ kɛ̍ndɛ̄ a̍ na̍a̍ le̍. Tē ndu̍ o̍o̍ lo̍ yɛ̄ o̍ ko̍ŋ mī wānā pi᷅lɛ̍ ndu̍ o̍o̍ tɛ᷅m a̍ la̍a̍ nu̍m, mɛ̄ɛ̍ nūm kpe̍e̍kpe̍i̍ wa̍ tōsā ni̍, mī na̍a̍ ŋ̍ to̍sa̍ yɔ̄ŋ wɔ̄ɔ̍ŋndo̍.”

¹¹Sīnāa̍ le̍nde̍, mi̍ Ābīmɛ̍lɛ̍kī si̍lā wāŋnda̍ kpo̍u̍. Mbo̍ dīmūl nda̍ āā, “Wānā o̍ wānā lā pi̍la᷄ŋ po̍o̍ ho̍ō nda̍ la̍a̍ ndɔ̄ le̍. Wānā o̍ wāna̍ yɔ̍ŋ ō pīlɛ̍ bɛ̍ɛ̍ nyɛ̍ pɛ̍ a̍ sɔ̍la̍ pīɔ̍mndo̍.”

¹²Mi̍ Āa̍se̍ to̍sā wa̍li̍ īchīɔ̍ɔ̍ wɔ̄sī kōŋ. Ndu̍yɛ̍ nyɛ̄ o̍ nyɛ̄ o̍ sa̍ŋ o̍ chīɛ̄ī ndūɛ̍i̍ ni᷄ŋ mi̍ ŋ̄ nāŋ, mi̍ ŋ̄ kūām lɔ̍pī lɔ̍pī bɛ̄ndū. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍ū ndu̍ sa̍lā ta̍u̍.

¹³Mbo̍ sɔ̄lā nyɔ̄ɔ̍ŋ, mbo̍ sūl sūllo̍ pi̍la̍.

¹⁴Mi̍ sāa̍ kūīī ndu̍ o̍ bā, a̍ nāūwa̍ cha᷅po̍o̍li̍. Mi̍ chīɛ̄ī ndɔ̄ɔ̍ pīā a̍ wāŋndā chīe̍e̍ya̍. Le̍ he̍ī, mi̍ Fīli̍i̍tīāāle̍ŋ, ā o̍ wa̍ o̍ lɛ̄ŋndē ndāle̍ŋ ni᷄ŋ nda̍ ā sāā ndu̍ pāŋālāa̍.

¹⁵So̍o̍ŋnda̍ māmɛ̄ŋndā bu̍ɛ̍i̍yāa̍ E̍bīlāha᷅m fi̍nyā ndɔ̄ wa̍ nda̍ a̍a̍ to̍ū bōōndi̍i̍ o̍ wa̍ īchāli̍ la̍ŋ, mi̍ Fīli̍i̍tīāŋnda̍ ha̍ā ā mīŋgī pūūlōo̍ lēni᷄ŋ, ma̍ bāŋūl la̍ŋ fɛ̍su̍ fɛ̍su̍.

¹⁶O̍ ko̍ŋ kɔ̍ɔ̍lī, mi̍ Ābīmɛ̍lɛ̍kī o̍ di̍mūl Āa̍se̍ āā, “Na̍a̍ nya̍ā ŋ̄ su᷅l na̍ŋ te̍. Ā hīōū na̍a̍ kpāāyā, le̍la̍ŋ fa̍ŋa̍ŋ na̍a̍ na̍ŋ.”

¹⁷Āa̍se̍ bɛ̍ɛ̍ mbo̍ fāŋa᷄ŋ lo̍ŋ, mbo̍ kɔ̍ ki̍lā cha᷄lta̍ŋ o̍ lɛ̄ŋndē dɛ̍ŋgbɛ̍le̍ŋ Kɛ̍lūāā, mbō chāl lo̍ŋ le̍ te̍le̍ŋ ti̍ŋ.

¹⁸Mi̍ Āa̍se̍ mu̍li᷄ŋ, so̍o̍ŋnda̍ māmɛ̄ŋndā E̍bīlāha᷅m fi̍nyā ndɔ̄ ndu̍ o̍o̍ to̍ū, kɛ̍ mi̍ Fīli̍i̍tīāŋnda̍ ā mīŋgī la̍ŋ bāŋūl la̍ŋ, mbo̍ mīŋgī la̍ŋ tōūwɔ̄ɔ̄ wu̍ E̍bīlāha᷅m vi᷅ wo̍. Dīōlā E̍bīlāha᷅m ndu̍ o̍o̍ ke̍ so̍o̍ŋnda̍ la̍ŋ nda̍ŋ, mbo̍ mīŋgī la̍ŋ dīōlā lāŋ kē kpɛ̍ kpɛ̍.

¹⁹O̍ ko̍ŋ kɔ̍ɔ̍lī, mi̍ bu̍ɛ̍i̍yāa̍ Āa̍se̍ wa̍ tūāū so̍o̍ŋ māmɛ̄ŋndo̍ nāa̍ nda̍ wa̍ ka̍ŋ o̍ lɛ̄ŋndē dɛ̍ŋgbɛ̍le̍ŋ ni᷄ŋ nda̍. Ma̍ kōmāl mɛ̄ŋnda̍ŋ.

²⁰Kɛ̍ mi̍ wānāā māndāā lāchɔ̄lūa̍a̍ o̍ lɛ̄ŋndē lēŋ ni᷄ŋ a̍ pūū so̍o̍ŋ ko̍ŋ. Ma̍ dīmī māā nda̍ nɔ̍ ni̍. Ma̍ sɛ̄ɛ̄ŋgi̍āŋ le̍cho̍o̍ nda̍ wānāā māndāā lāchɔ̄lūa̍a̍ Āa̍se̍ wa̍. Mi̍ Āa̍se̍ ke᷅ so̍o̍ŋ ka̍lāa̍ dīōla̍ŋ āā, E̍sɛ̍kī, kāni̍ fu̍u̍le̍, le̍ mɛ̄ɛ̍ nda̍ sɛ̄ɛ̄ŋgi̍āŋ a̍ ndu̍ le̍cho̍o̍ yɛ̍.

²¹Mi̍ bu̍ɛ̍i̍yāa̍ Āa̍sīa̍a̍ ā tūāū so̍o̍ŋ che̍le̍ŋ. Ndu̍ bɛ̍ɛ̍, ma̍ sɛ̄ɛ̄ŋgi̍āŋ o̍ ndu̍ cho̍o̍. Le̍ he̍ī, mbo̍ kē ko̍ŋ di̍ōla̍ŋ ā, Si̍ti̍nāā.

²²O̍ ko̍ŋ kɔ̍ɔ̍lī, mi̍ Āa̍se̍ fa̍ŋa᷄ŋ mbo̍ kɔ̍ to̍ū so̍o̍ŋ che̍le̍ŋ. Ko̍ŋ ndu̍ ā sɛ̄ɛ̄ŋgi̍āŋ o̍ ndu̍ cho̍o̍ le̍. Le̍ he̍ī, mbo̍ kē ndu̍ dīōla̍ŋ āā, Lūɛ̄hōbo̍tī. Mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ o̍ ke̍ na̍a̍ ni᷅ŋ fo̍ndāŋndo̍. I̍ chō ni᷅ŋ dɛ̍nɛ̍ kɛ̍ndɛ̄ sɔ̄lā o̍ lɛ̄ŋnde̍ŋ nde᷅ŋ ni᷄ŋ.”

²³Mi̍ Āa̍se̍ ma᷅l lo̍ŋ mbo̍ hēl Bīɛ̄ɛ̄si̍ɛ̍bā.

²⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ ndu̍ Bīɛ̄ɛ̄si̍ɛ̍bā lo̍ŋ nyu᷅mmā māŋ. Mbo̍ dīmūl ndu̍ āā, “Ya̍ cho̍ Mɛ̄lɛ̄ka̍ E̍bīlāha᷅m fi̍nyā nūm pi̍ɛ̍ī yo̍ ni̍. Le̍la̍ŋ, yɔ᷅ŋ īsīōōŋ te̍. I̍ cho̍ nu̍m kɔ̄ɔ̄lī, ndu̍yɛ̍, I̍ cho̍ nu̍m sa̍lā dɔ̄wɔ̄ɔ̄, mī I̍ to̍sa̍ mī pūlālē nūmnde̍ŋ lē kūɛ̄ a̍ kūīīyo̍ ta̍u̍ ta̍u̍. I̍ cho̍ he̍ī tōsā le̍ sa̍bu̍ bu̍ɛ̍ī nūu̍ E̍bīlāha᷅m ndo̍.”

²⁵O̍ ko̍ŋ, mi̍ Āa̍se̍ ta̍ŋgūl ma̍āŋndo̍ lo̍ŋ le̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ mbo̍ sōōlūū ndu̍ lo̍ŋ. O̍ ko̍ŋ kɔ̍ɔ̍lī, mbo̍ tūāndū tɛ̍ndīi̍ ndɔ̄ɔ̍, mbo̍ chāl lo̍ŋ. Mi̍ bu̍ɛ̍i̍yāā ndūa̍a̍ a̍ tūāū so̍o̍ŋ māmɛ̄ŋndo̍ lo̍ŋ.

²⁶O̍ ko̍ŋ kɔ̍ɔ̍lī, mi̍ Māsāa̍ Ābīmɛ̍lɛ̍kī cha̍ŋ Kɛ̍lūāā chi̍e̍e̍ mbo̍ hūŋ nāa̍ Āa̍se̍ chu̍a̍. Wāa̍ hūnɔ̄ɔ̍, mbo̍ chūā lāŋgba̍ā ndūāā ka᷅lla̍ ā ŋīɔ̍ɔ̍ŋ, wāna̍ ndɔ̄ si̍lāa̍, A̍hu̍sāā, a̍ Fi̍kɔ̄l, o̍ wa̍ pūa̍a̍ ndūa̍a̍ chɔ̄ūwa̍ bōlle̍ŋ ndo̍.

²⁷Mɛ̍ɛ̍ nda̍ hi᷄ŋ, mi̍ Āa̍se̍ di̍mūl nda̍ āā, “Lā tu᷄l la̍ lēyɛ̄ mi̍ lā tūāū ya̍ o̍ nya̍ lo̍ chi̍e̍e̍, lā vɛ᷅ vɛ̄lɛ̄ hūnɔ̄ɔ̍ nāa̍ ya̍ chu̍a̍?”

²⁸Ma̍ dīmūl ndu̍ āā, “Ŋ̄ sāālu̍ŋ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m kɔ̄ɔ̄lī. Le̍ sa̍bōo̍ ho̍ō, ŋ̄ hɛ̄na̍ŋ na̍a̍ nya̍ā mī kpe̍ma̍a̍ lūɛ̄ī na̍a̍ tɛ̄ɛ̄ŋ,

²⁹māā a̍ yɔ᷅ŋ ndɛ̍ na̍a̍ nyɛ̄ o̍ nyɛ̄ wɔ̄ɔ̍ŋ te̍. Kāni̍ fu̍u̍le̍, bōōndi̍i̍ ŋ̄ wa̍ na̍a̍ tɛ̄ɛ̄ŋ nde̍, nyɛ̄ o̍ nyɛ̄ wɔ̄ɔ̍ŋ ŋ̄ yɔ᷄ŋ nu̍m te̍, ndu̍yɛ̍, mi̍ ŋ̄ tōsāl nu̍m dɛ̍nɛ̍ kɛ̍ndɔ̄ɔ̍. Bōōndi̍i̍ ŋ̄ wa̍ mālɔ̄ɔ̍ ve̍ bɛ̍ɛ̍, ŋ̄ yɔ᷄ŋ nu̍m nyɛ̄ o̍ nyɛ̄ chēle̍ŋ te̍, ma̍ hūŋnu᷄ŋ yɛ̍lɛ̍kɛ̍lɛ̍ɛ̍. Wānā o̍ wānā si̍nā māā Mɛ̄lɛ̄ka̍ Ya̍a̍wɛ̄ɛ̍ dɔ̍ū nu̍m sa̍lāa̍ ho̍ō ni̍.”

³⁰O̍ ko̍ŋ kɔ̍ɔ̍lī, mi̍ Āa̍se̍ to̍o̍sīāā nyɛ̄ dīa̍a̍ cha᷅ cha᷅po̍o̍li̍ le̍ nda̍, ma̍ dīā mbo̍ kē nda̍ mūɛ̄īya̍ŋ ma̍ kōl.

³¹Dīi̍mā ndɔ̄ɔ̍, ma̍ pēnā chɔ̄nɔ᷄ŋ pu̍u̍ŋ. Ma̍ yīī kpe̍ma̍a̍ nda̍ Āa̍se̍ wa̍ā, ma̍ mēna᷄ŋ ve̍llāa̍ vēllē. Kpe̍ma̍ ko̍ŋ wa̍ ni̍ māā nda̍ yɔ᷅ŋ ndɛ̍ Āa̍se̍ nyɛ̄ le̍, Āa̍se̍ bɛ̍ɛ̍ ndu̍ yɔ᷅ŋ nda̍ nyɛ̄ le̍. Mi̍ Āa̍se̍ chōŋgu᷄ŋ nda̍. Ma̍ pīɔ̄ūvi̍āŋ a̍ kɔ̄ltā nyūlū, ma̍ mīīŋgū.

³²O̍ pāa̍le̍ pi᷅lɛ̍ lē le̍ŋ chōo̍, mi̍ Āa̍se̍ bu̍ɛ̍i̍yāā ndūa̍a̍ ā hu᷄ŋ do̍o̍ŋ ndu̍ ko̍na̍ māā ā tōū so̍o̍ŋ māmɛ̄ŋndo̍ ma̍ kōmāl mɛ̄ŋnda̍ŋ.

³³Mɛ̄ɛ̍ nda̍ do̍o̍ŋ ndu̍ ko̍na̍ le̍nde̍, mbo̍ kē so̍o̍ŋ ko̍ŋ dīōla̍ŋ āā, Si̍ɛ̍bā. Pāa̍le̍ hāūle̍ŋ bɛ̍ɛ̍ dīōlā lāŋ nda̍ vēēlū chi̍e̍e̍ cho̍ o̍ fo̍ndāŋ ko̍ŋ ndo̍ ni̍, āā, Bīɛ̄ɛ̄si̍ɛ̍bā.

³⁴Mɛ̄ɛ̍ I̍īsɔ̄ wa̍ wɔ̄sīla̍ŋ be̍le̍-hi̍ɔ̍ɔ̍lu̍, mbo̍ chūā chūāā lāāndūāā Hi̍ta̍i̍tīi̍ya̍ ā ŋīɔ̍ɔ̍ŋ o̍ nɔ̄ɔ̍ ni᷄ŋ. O̍ pīlɔ̍ɔ̄ dīōla̍ŋ āā, Chu̍dīī, Bi̍ɛ̍ɛ̍lūī chūā ndɔ̄ɔ̍, a̍ ho̍ō dīōla̍ŋ āā, Bāsīma̍tī, Ɛ̍lɔ̄ŋ chūā ndɔ̄ɔ̍.

³⁵Mi̍ lāāndūāā ŋīɔ̍ɔ̍ŋnda̍ ha̍ā ā chūū Āa̍se̍ kɔ̄l tāmbɛ̍i̍yo̍ ta̍u̍ nda̍ Lūībe̍kā.