Read Southern Kisi Chɛ̄nɛ̍se̍ē 29 Bible Online

Chɛ̄nɛ̍se̍ē 29 - Southern Kisi bible

Chɛ̄nɛ̍se̍ē 29

¹Mi̍ Che̍kɔ̍pū hi̍a̍ū lāchī a̍ kɔ̄la̍ŋ o̍ lɛ̄ŋnde̍ŋ bā pāa̍le̍ŋ lē chāŋ ndo̍.

²Ō lo̍ kɔ̄la̍ŋ, mbo̍ fūūlūū o̍ so̍o̍ŋ māmɛ̄ŋndo̍ o̍ po̍llo̍ ni᷄ŋ. Sāa̍ ā wa̍ īhīni̍ o̍ so̍o̍ŋ māmɛ̄ŋ ko̍ŋ īkɛ̄i̍ ku̍ndāla̍ŋ lā a̍a̍. Ndu̍yɛ̍ so̍o̍ŋ ko̍ŋ wāŋnda̍ nda̍ a̍a̍ ku̍a̍ndū le̍ chɔ̄lūa̍a̍ kōlɔ̄ɔ̍ ni̍. Pōū bɛ̄ndōo̍ wa̍ ō hāndāā o̍ so̍o̍ŋndo̍ ho̍ō sōndōo̍.

³Ndu̍yɛ̍ so̍o̍ŋndo̍ ndu̍ o̍o̍ lo̍ o̍ ki̍ndāā mī sāa̍ kpo̍u̍ a̍ chu̍ū chūūŋgi̍āŋ. Ā chūū hūnɔ̄ɔ̄ pɛ̍, wānāā māndāā lāsāa̍ ā fāŋa̍ pōūwo̍ o̍ so̍o̍ŋndo̍ sōndōo̍, ā kɔ̄ndū mɛ̄ŋnda̍ŋ, sāa̍ ko᷄l. Tē ā chīi̍ kōlɔ̄ɔ̍ pɛ̍, ā mīŋgi̍ vɛ̄lɛ̄ pōū kōŋ o̍ sōndōo̍.

⁴O̍ ko̍ŋ kɔ̍ɔ̍lī, mi̍ Che̍kɔ̍pū nyu̍nā wānāā māndāā lāsāa̍ ha̍ā āā, “Chāāŋāā nīa̍a̍, kūɛ̍ɛ̍nɛ̍ nya̍ chɛ᷄ŋ yɛ̍?” Ma̍ mūlī āā, “Ŋ̄ chɛ᷄ŋ Ha̍lūāŋ.”

⁵Mbo̍ nyūnā nda̍ āā, “Lā sīnā Le̍bāŋ, po̍ ma̍ma̍ Nāhɔ̍ɔ̄ wō?” Ma̍ dīmī āā, “E̍ī, ŋ̄ sīnā ndu̍.”

⁶Mbo̍ nyūnā nda̍ āā, “Ō chō kɛ̄ndɛ᷄?” Ma̍ dīmī āā, “Ō chō kɛ̄ndɛ̄. Nu̍a̍ wɔ̍ bɛ̍ɛ̍ Lu̍e̍chɛ̄l chu̍a̍ ndɔ̄ hu̍nɔ̄ɔ̍ a̍ sāa̍.”

⁷Mi̍ Che̍kɔ̍pū di̍mūl nda̍ āā, “Pāa̍le̍ŋ lē chō wɔ̄ ta̍u̍, ō fūūlu̍u̍ wɔ̍ te̍le̍ŋ chɔ̄lūa̍a̍ chūūŋgi̍āŋ na̍a̍ pi᷅lɛ̍ le̍. Lā ke̍ nda̍ mɛ̄ŋnda̍ŋ, mī lā ma᷄l nda̍ mā kɔ̍ chɔ̍ɔ̍lū di̍o̍la̍ŋ.”

⁸Kɛ̍ ma̍ dīmūl ndu̍ āā, “Mɛ̄ɛ̍ mā chūū chūūŋgi̍āŋ na̍a̍ pi᷅lɛ̍, mī ŋ̄ fāŋa̍ pōūwo̍ o̍ so̍o̍ŋndo̍ sōndōo̍, mālāŋ na̍a̍ ŋ̄ nāŋ mɛ᷅ŋnda̍ŋ mā ko᷄l.”

⁹Che̍kɔ̍pū lo̍ sūɛ̍i̍, mi̍ Lu̍e̍chɛ̄l hu᷅ŋ a̍ sāa̍ fi̍nyā ndɔ̄ wa̍, kāni̍, ndu̍ ndu̍ o̍o̍ ma̍ndā nda̍ ni̍.

¹⁰Mɛ̄ɛ̍ Che̍kɔ̍pū chɛ̍ Lu̍e̍chɛ̄l, chu̍a̍ Le̍bāŋ bɔ̍m ndɔ̄ wo̍, mbo̍ chā sāa̍ bōm ndɔ̄ wa̍, mbo̍ kūā mbo̍ kɔ̍ fa̍ŋā pōūwo̍ o̍ so̍o̍ŋ māmɛ̄ŋndo̍ sōndōo̍. Mbo̍ nāŋ mɛ̄ŋnda̍ŋ, mi̍ chɔ̄lūa̍a̍ Le̍bāŋ bɔ̍m ndɔ̄ wa̍ ā kōl kpo̍u̍.

¹¹Mɛ̄ɛ̍ o̍ chi̍i̍, mbo̍ kɔ̄ma᷄ŋ Lu̍e̍chɛ̄l mbo̍ sɔ̄sā ndu̍ kūu̍wo̍. Mi̍ Che̍kɔ̍pū cha᷅ŋ kpe̍le̍ŋ, ā kɔ̄l kɛ̄ndɛ̍ wa̍ ndu̍ o̍.

¹²Mbo̍ dīmūl Lu̍e̍chɛ̄l māā tōōŋgo̍o̍ fi̍nyā ndɔ̄ o̍ cho̍ ni̍, māā Lūībɛ̍ka̍ ve̍lū ndu̍ ni̍. O̍ ko̍ŋ kɔ̍ɔ̍lī, mi̍ Lu̍e̍chɛ̄l ku̍ā a̍ kīlta̍ŋ mbo̍ kɔ̍ di̍mūl fi̍nyā ndɔ̄.

¹³Mɛ̄ɛ̍ Le̍bāŋ tu̍e̍ī māā po̍ yēma̍ ndɔ̄ wo̍ hīŋ, mbo̍ kūā ndu̍ lāchi̍ a̍ kīlta̍ŋ. Mbo̍ dēmūl ndu̍, mbo̍ sɔ̄sā ndu̍ kūu̍wo̍. Mbo̍ kūā a̍ ndu̍ o̍ chīɛ̄īyo̍. O̍ ko̍ŋ kɔ̍ɔ̍lī, mi̍ Che̍kɔ̍pū do̍u̍nu᷄ŋ ndu̍ nyɛ̄ o̍ nyɛ̄ fe̍e̍ ko̍na̍.

¹⁴Mi̍ Le̍bāŋ di̍mūl ndu̍ āā, “Tōnya̍ i̍ cho̍ ni̍. Ya̍ ve̍lū nu̍m ni̍, kōo̍ma̍ nīa̍ŋ kpe̍e̍kpe̍i̍ ŋ̄ chō ni̍.” Mbo̍ chīī pāŋge̍i̍ ī pīlɛ̍ lo̍ŋ.

¹⁵O̍ ko̍ŋ kɔ̍ɔ̍lī, mi̍ Le̍bāŋ di̍mūl Che̍kɔ̍pū āā, “Ā chō bɛ̍ɛ̍ to̍o̍ŋgo̍o̍ nī ni̍, kɛ̍ ndu̍yɛ̍ ō bɛ̍ndā mā wa̍ ya̍ sāāŋgīāllo̍ fo̍ndō le̍. Le̍la̍ŋ, chɔ̍m ya̍ nyɛ̄ ya̍ I̍ pa̍a̍wā nu̍m le̍ wa̍li̍ ŋ̄ chō ya̍ tōsāllo̍ wo̍.”

¹⁶Ndu̍yɛ̍, wāŋ lāāndūa̍a̍ ā ŋīɔ̍ɔ̍ŋ Le̍bāŋ ndu̍ o̍o̍ ve̍lū ni̍. Wānā ba̍nāa̍ wa̍ Li̍yā ni̍, chūāāmbɔ̄ɔ̍ wa̍ Lu̍e̍chɛ̄l ni̍.

¹⁷Li̍yā ndu̍, hɔ̄lta̍ŋ lā wa̍ ndu̍ nu̍a̍ā ta̍fūlāā, kɛ̍ Lu̍e̍chɛ̄l ndu̍ ndu̍ nāŋɔ̄ɔ̄ kpe̍e̍kpe̍i̍ wānā la̍nɔ̍ɔ̍ na᷄ŋ ndo̍ ndu̍ o̍o̍ na̍ŋ ni̍.

¹⁸Che̍kɔ̍pū ndu̍ o̍o̍ ka̍a̍la̍ Lu̍e̍chɛ̄l ta̍u̍. Le̍ he̍ī, mbo̍ dīmūl Le̍bāŋ āā, “I̍ ye̍e̍ma̍ mī to̍sa̍l nu̍m wa̍llo̍ le̍ wɔ̄sīla̍ŋ lā ŋɔ᷄mmɛ̍ū le̍ mā ke̍ ya̍ chūā nūmndo̍, o̍ pɔ̄mbɔ̄ɔ̍, ndu̍ yɔ̍nūŋ māā Lu̍e̍chɛ̄l ni̍.”

¹⁹Mi̍ Le̍bāŋ di̍mūl ndu̍ āā, “Yɔ̄ŋi̍ ya̍ I̍ ke̍ wa̍nā pɔ̍nɔ̍ che᷅le̍ŋ ndu̍ yɛ̍, I̍ na᷅ŋ kɔ᷅l mī ke̍ nu̍m ndu̍. Le̍la̍ŋ, wa̍ ya̍ bɛ̄ŋgu̍ cho̍o̍ na̍ŋ.”

²⁰O̍ ko̍ŋ, mi̍ Che̍kɔ̍pū to̍sāl Le̍ba̍ŋ wa̍llo̍ le̍ wɔ̄sīla̍ŋ lā ŋɔ᷄mmɛ̍ū le̍ mbō ke̍ ndu̍ Lu̍e̍chɛ̄l māā la̍nɔ̍. Kɛ̍ Che̍kɔ̍pū ndu̍ o̍o̍ cha᷅ bɛ̍ɛ̍ ko̍ wɔ̍sīlā ŋɔ᷄mmɛ̍ū la̍ŋ āā pālɛ̍i̍ ti̍ŋ ko̍ni̍, kāni̍ fo̍ndōle̍, a̍ kāālā ndu̍ o̍o̍ ka̍a̍la̍ Lu̍e̍chɛ̄l wo̍.

²¹Mɛ̄ɛ̍ Che̍kɔ̍pū to̍sa̍ wa̍llo̍ le̍ wɔ̄sīlā ŋɔ᷄mmɛ̍ū la̍ŋ, mbo̍ dīmūl Le̍bāŋ āā, “Ke̍ ya̍ ni̍ko̍ la̍a̍ nūu̍ ō hīo̍u̍ ya̍ kɔ̍ɔ̍lī, kāni̍, I̍ chi̍i̍ wa̍llo̍ le̍ ndu̍.”

²²O̍ ko̍ŋ kɔ̍ɔ̍lī, mi̍ Le̍bāŋ to̍o̍sīāā nyɛ̄ dīa̍a̍ cha̍po̍o̍li̍ le̍ bɔ̄ŋa᷅ŋ nɔ̄ kɛ̍sīa̍a̍. Mbo̍ vēēlū wāŋnda̍ ta̍u̍ o̍ fo̍ndāŋ kōŋ.

²³Kɛ̍, mɛ̄ɛ̍ nyūmnda̍ŋ mā tōl, mi̍ Le̍bāŋ to̍o̍sīāā chūā ndɔ̍ tāso̍o̍, Li̍yā. Mbo̍ hūŋ a̍ ndu̍ o̍ Che̍kɔ̍pū lo̍ chi̍ɛ̍ī ni̍ŋ. Kɛ̍ Che̍kɔ̍pū si̍na̍ māā Li̍yā le̍, mbo̍ hi̍vi᷄ŋ ndu̍ kɔ̄ɔ̄lī nyūmmā māŋ.

²⁴Mi̍ Le̍bāŋ chu̍ā bu̍ɛ̍i̍yāā ndūāā la̍a̍ndūa̍a̍ ō pīlɛ̍, dīōla̍ŋ āā, Si̍li̍pāā, mbo̍ yɔ̄ŋgū Li̍yā le̍ wāa̍ wāna̍ ndɔ̄ ma̍lāā.

²⁵Mɛ̄ɛ̍ pāa̍le̍ŋ lē sɛ̄ īdīi̍yo̍, mi̍ Che̍kɔ̍pū sa̍a̍lu᷄ŋ māā Li̍ya̍ nda̍ chūu̍ ndu̍ ni̍. Mbo̍ nyūnā Le̍bāŋ āā, “Vɛ᷅ ya̍ tōsāllo̍ nu̍a̍ā? Vɛ᷅ I̍ to̍sa̍ wa̍llo̍ pɛ̍ le̍ Lu̍e̍chɛ̄l, ā mīī ya̍ Li̍ya̍ chūū? Vɛ᷅ ya̍ hūīīyo̍ ho̍ō?”

²⁶Mi̍ Le̍bāŋ di̍mī āā, “Na̍a̍ na̍a̍, o̍ lɛ̄ŋndē nāāle̍ŋ ni᷄ŋ ŋ̄ kɛ̍sī chu̍a̍a̍mbɔ̄ɔ̍ o̍ nɔ̄ɔ̍ bɛ̄ ndɔ̍ tāse̍ le̍.

²⁷Le̍la̍ŋ si̍o̍u̍ ni̍ko̍ lɔ̍lta̍ ndɔ̄la̍ lɔ̍ɔ̍ pi᷅lɛ̍la̍ŋ. A̍ chi̍i̍ lɔ᷄lta̍ ndɔ̄la̍ŋ pɛ̍, I̍ ke̍ vɛ̄lɛ̄ nu̍m ō pīlɔ̍ɔ̄, a̍ to̍sa̍l la̍ vɛ̄lɛ̄ wa̍llo̍ le̍ wɔ̄sīla̍ŋ lā ŋɔ᷄mmɛ̍ū.”

²⁸Mi̍ Che̍kɔ̍pū to̍sā mɛ̄ɛ̍ Le̍bāŋ di̍mi̍ yɛ̍. Mbo̍ sīōū lɔ᷄lta̍ lɔ̍ɔ̍ pi᷅lɛ̍la̍ Li̍yā la̍ŋ. Mi̍ Le̍bāŋ ke᷅ vɛ̄lɛ̄ ndu̍ Lu̍e̍chɛ̄l chu̍a̍ ndɔ̄.

²⁹Mi̍ Le̍bāŋ chu̍ā bu̍ɛ̍i̍yāā ndūāā la̍a̍ndūa̍a̍ ō pīlɔ̍ɔ̍ dīōla̍ŋ āā, Bi̍li̍hāā, mbo̍ yɔ̄ŋgū ndu̍ le̍ Lu̍e̍chɛ̄l chu̍a̍ ndɔ̍ kālāa̍.

³⁰Mi̍ Che̍kɔ̍pū hi̍vi᷄ŋ vɛ̍lɛ̄ Lu̍e̍chɛ̍l kɔ̄ɔ̄lī. Ndu̍yɛ̍ mi̍ Che̍kɔ̍pū ka̍a̍lā Lu̍e̍chɛ̄l mbo̍ hīāū a̍ Li̍yā. Mbo̍ tōsā vɛ̄lɛ̄ wa̍llo̍ le̍ Le̍bāŋ le̍ wɔ̄sīla̍ŋ lā ŋɔ᷄mmɛ̍ū.

³¹Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ che᷅ māā Li̍yā ndu̍ pɔ̍nɔ̍ɔ̍ kāāla̍ ndu̍ le̍, mbo̍ kē ndu̍ vīōlɔ̄ɔ̍. Kɛ̍, Lu̍e̍chɛ̄l ndu̍ ndu̍ o̍o̍ vi̍lū le̍.

³²O̍ ko̍ŋ kɔ̍ɔ̍lī, mi̍ Li̍yā chu̍ā yo᷄llo̍, mbo̍ vīālū pōo̍. Mbo̍ kē ndu̍ dīōla̍ŋ āā, Lūbɛ᷅ŋ. Mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ o̍ che᷅ nyɛ̄ nī pa̍lāa̍. Pōo̍ ho̍ō vīōlɔ̍ɔ̄ ni᷅ŋ, pɔ̍nɔ̍ nūu̍ chō ya̍ ni᷅ŋ kāālā.”

³³Mūlīo̍o̍, mbo̍ chūā vɛ̄lɛ̄ yo᷄llo̍ mbo̍ vīālū vɛ̄lɛ̄ pōo̍. Mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ tu̍e̍ī māā ya̍ ā tu᷄l la̍ yɛ̄le̍ŋ, le̍ he̍ī, ō chɔ̄ɔ̄lu̍ vɛ̄lɛ̄ ya̍ pōo̍ kē.” Mbo̍ kē ndu̍ dīōla̍ŋ āā, Si̍mīɔ̄ŋ.

³⁴O̍ ko̍ŋ kɔ̍ɔ̍lī, mbo̍ chūā vɛ̄lɛ̄ yo᷄llo̍, mbo̍ vīālū vɛ̄lɛ̄ pōo̍. Mbo̍ dīmī āā, “Pɛ̄ŋgo̍o̍ ho̍ō ni᷄ŋ, pɔ̍nɔ̍ nūu̍ ni̍, ya̍ ni̍, ŋ̄ chō wā ā mɔ̄ɔ̄sāā dīōm pīlɛ̍, kāni̍ fu̍u̍le̍, pūa̍a̍ ā yāa̍ wa̍ŋ ya̍ vi̍lu̍l ndu̍ ni̍.” Le̍ he̍ī, mbo̍ kē ndu̍ dīōla̍ŋ āā, Li̍va̍ī.

³⁵Mūlīo̍o̍, mbo̍ chūā yo᷄llo̍, mbo̍ vīālū vɛ̄lɛ̄ wānā pɔ̍nɔ̍ɔ̍. Mɛ̄ɛ̍ o̍ ve̍lū, mbo̍ dīmī āā, “Bōōnde̍i̍ he̍ī ni᷅ŋ, I̍ nɔ̍ mī sa̍ŋga̍la̍ Mɛ̄lɛ̄ka̍ Ya̍a̍wɛ̄ɛ̄.” O̍ ko̍ŋ, mbo̍ kē pōo̍mbɔ̄ kālāa̍ dīōla̍ŋ āā, Chu̍dā. O̍ ko̍ŋ kɔ̍ɔ̍lī, mbo̍ mɛ̄ɛ̄lū a̍ vīōlɔ̄ɔ̍.