Read Southern Kisi Chɛ̄nɛ̍se̍ē 31 Bible Online

Chɛ̄nɛ̍se̍ē 31 - Southern Kisi bible

Chɛ̄nɛ̍se̍ē 31

¹O̍ ko̍ŋ kɔ̍ɔ̍lī, mi̍ Che̍kɔ̍pū tu̍ɛ̍ī māā pūa̍a̍ Le̍bāŋnda̍ ā chō dīmīo̍o̍, māā ndu̍ Che̍kɔ̍pū o̍ chu̍a̍ nyɛ᷄m fi̍nyā nda᷄ŋ kpo̍u̍. Āā, sūl o̍ sūl Che̍kɔ̍pū sɔ̍la̍, māā o̍ nyɛ᷄m fi̍nyā nda᷄ŋ ni᷄ŋ o̍ sɔ̍la̍ ndu̍ ni̍.

²Mi̍ Che̍kɔ̍pū sa̍a̍lu᷄ŋ vɛ̍lɛ̄ māā Le̍bāŋ o̍ chi̍ lɛ̍ ndu̍ nyīnā māā pāāndū le̍.

³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Che̍kɔ̍pū āā, “Che̍kɔ̍pū, chɔ̍ŋ mā mi̍i̍ŋgu̍ o̍ lɛ̄ŋndē fi̍nya̍a̍ nūmnda̍ ni᷄ŋ. Mi̍i̍ŋgu̍ŋ o̍ wānāā nūmnda̍ lo̍. I̍ cho̍ wā nu̍m kɔ̄ɔ̄lī.”

⁴O̍ ko̍ŋ, mi̍ Che̍kɔ̍pū vi̍ām le̍ mī Lu̍e̍chɛ̄l nda̍ Li̍yā a̍ ko̍ma̍l ndu̍ nāa̍ o̍ wa̍ chɔ̄lūāā ndūa̍a̍ īkɛ̄i̍ o̍ po̍llo̍ ni᷄ŋ nda̍.

⁵Mɛ̄ɛ̍ nda̍ hīŋ, mbo̍ dīmūl nda̍ āā, “I̍ sa̍a̍lu̍ŋ māā fi̍nyā nyā o̍ chi̍ lɛ̍ ya̍ nyīnā māā pāāndū le̍. Kɛ̍ ndu̍yɛ̍, Mɛ̄lɛ̄ka̍ fi̍nyā nūu̍ ō sōōlūū wo̍ ō chō ya̍ kɔ̄ɔ̄lī.

⁶Nya̍ pi̍la̍ lā sīnā mɛ̄ɛ̍ ya̍ sa̍a̍ŋgi̍a̍l fi̍nyā nya̍ a̍ kɔ̄l nūu̍ kpo̍u̍ yɛ̍.

⁷Kɛ̍, a̍ sāŋgā nī ko̍ŋ fa̍ū, mi̍ fi̍nyā nyā to̍sāl la̍ ka̍fāla̍ŋ, mbo̍ māŋgālā pāāwā nūu̍ mi̍ nyɛ̄ kōŋ kūā bɛ̄mbɔ̄ɔ̍ tɔ̍. Kɛ̍ o̍ ko̍ŋ ni̍ŋ fa̍ū, Mɛ̄lɛ̄ka̍ chɛ᷄l ndu̍ mbō yɔ᷄ŋ ya̍ nyɛ̄ le̍.

⁸Mi̍ ī yɔ̄nu᷄ŋ, yālāā Le̍bāŋ dīmī āā, ‘Chɔ̄lūāā pōnyɛ̍i̍ya̍ ki̍nɛ̍i̍ nda̍ cho̍ wā pāāwā nūmndo̍ ni̍’ le̍, chūāūwāā pōnyɛ̍i̍ya̍ ko̍ni̍ chɔ̄lūa̍a̍ kpo̍u̍ a̍ ku̍ām ni᷅ŋ ni̍. Yālāā o̍ di̍mī āā, ‘Chɔ̄lūa̍a̍ nɔ̍ tīndi̍a̍ŋ nda̍ cho̍ wā pāāwā nūmndo̍ ni̍,’ le̍, chūāūwāa̍ nɔ̍ tīndi̍a̍ŋ nda̍ ko̍ni̍ nda̍ kūām ni᷅ŋ ni̍.

⁹Mɛ̄ɛ̍ nu̍a̍ā Mɛ̄lɛ̄ka̍ lōōku̍ chɔ̄lūa̍a̍ fi̍nyā nyā wa̍ chūā ni̍ mbo̍ kē ya̍.

¹⁰“Bōōndi̍i̍ pi᷅lɛ̍ a̍ te̍le̍ŋ chɔ̄lūa̍a̍ nɔ̄ hēlɔ̄ɔ̍ wo̍, mi̍ sɔ᷅l lūa̍a̍ŋ. O̍ lɔ̄mā nīma̍ sɔ̍la᷄ŋ ni᷄ŋ, mi̍ cha᷅ chūīŋāā tōōyīa̍a̍, a̍ nɔ̍ tīndi̍a̍ŋ nda̍ a̍ ā pōnyɛ̍i̍ya̍, ma̍ wā chūīŋāā lāāndūa̍a̍ hēlɔ̄ɔ̍.

¹¹O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ vēēlū ya̍ o̍ lɔ̄mā sɔ̄lāāmā māŋ ni᷄ŋ āā, ‘Che̍kɔ̍pū.’ Mi̍ chɛ᷅l a̍a̍, ‘Ēe̍.’

¹²Mbo̍ dīmūl la̍ āā, ‘Chu̍a̍ wɔ̍ hɔ᷅lla̍ mā to̍fa̍, chu̍i̍ŋāā tōōyīa̍a̍ cho̍ chūīŋnda̍ hēlɔ̄ɔ̍ wa̍, ā nɔ̄ tīndi̍a̍ŋ, ā pūm ā pōnyɛ̍i̍. Chɔ̄ɔ̍ ya̍ I̍ che᷅ nyɛ̄ o̍ nyɛ̄ Le̍bāŋ cho̍ tōsāa̍ a̍ nūm ndo̍ ni̍, le̍la̍ŋ ya̍ I̍ to̍sa̍ le̍nde̍ ni̍.

¹³Ya̍ cho̍ Mɛ̍lɛ̄ka̍ ni̍, ya̍ chɔ̍mnu̍ŋ nu̍m Bɛ̍tɛ̄ɛ̄l, nāa̍ ŋ̄ ba᷄ŋ pōūwo̍ le̍ nu̍m yīyāla᷄ŋndo̍ wa̍ ni̍. Pāa̍le̍ le̍ŋ, ma̍ tālā chūɛ̄īmā ɔ̄li̍fīi̍ya̍ŋ o̍ pōū kōŋ chōo̍, ma̍ chūā būŋgɛ̄i̍ nāa̍ ya̍ chu̍a̍. Chɔ̍ŋ ni̍ko̍ mā fa̍ŋa̍ŋ na̍ŋ, mā mi̍i̍ŋgu̍ o̍ lɛ̄ŋndē nūmnde̍ŋ ni᷄ŋ, nāa̍ ŋ̄ vēlu᷄ŋ nda̍.’ ”

¹⁴Mɛ̄ɛ̍ Che̍kɔ̍pū chi̍i̍ nda̍ chɔ̄m, mi̍ Lu̍e̍chɛ̄l nda̍ Li̍yā a̍ mu̍lī āā, “Ŋ̄ nɔ̍ lɛ̍ nyɛ̄ o̍ nyɛ̄ o̍ fi̍nyā nāa̍ lo̍ chi̍ɛ̍ī ni̍ŋ māā nyɛ̄m kɛ᷅ le̍.

¹⁵Ŋ̄ chō ni᷅ŋ māchūāā māā lāmīāl ndu̍ o̍ hɔ̄l. Ō pīsi̍ na̍a̍ o̍ nyɛ̄ sɔ̄lāa̍ bɛ̄ŋgu̍, mbo̍ chīī bɛ̍ɛ̍ nyɛ̍ sɔ̄la̍a̍ kōŋ di̍o̍.

¹⁶Nyɛ̄ o̍ nyɛ̄ Mɛ̄lɛ̄ka̍ bīī fi̍nyā nāa̍ o̍ bā mbo̍ kē nu̍m, o̍ na̍a̍ cho̍ ko̍ŋ ni̍, na̍a̍ chūāūwāā nāa̍. Le̍la̍ŋ, to̍sa̍ nyɛ᷅ o̍ nyɛ̄ Mɛ̄lɛ̄ka̍ dīmu̍l nu̍m le̍ tōsāa̍.”

¹⁷O̍ ko̍ŋ kɔ̍ɔ̍lī, mi̍ Che̍kɔ̍pū bɛ̍ɛ̍ndīa̍ŋ le̍ kɔ̄la̍ŋ o̍ Āa̍se̍ fi̍nyā ndɔ̄ lo̍, o̍ lɛ̄ŋndē Ke̍nāŋnde̍ŋ ni᷄ŋ. Mbo̍ chūā chūāūwāā ndūa̍a̍ a̍ lāāndāā ndūa̍a̍, mbo̍ hēēlū nda̍ o̍ nyɔ̍mi̍a̍a̍ chōo̍, mi̍ ndu̍ si᷅m chɔ̄lūāā ndūa̍a̍ o̍ sɔ̍la̍ wa̍ kɔ̄ɔ̄lī mbo̍ kūā a̍ nda̍ a̍ nyɛ̄ o̍ nyɛ̄ o̍ nɔ̍, o̍ lɛ̄ŋndē Mɛ̄sōpōte̍e̍mīāā le̍ŋ ni᷄ŋ.

¹⁸

¹⁹Bōōndi̍i̍ ke̍ŋ, Le̍bāŋ ndu̍ o̍o̍ ku̍ɛ̄ nāa̍ nda̍ wa̍ sāa̍ ndūa̍a̍ māndāa̍ o̍ po̍llo̍ ni᷄ŋ nda̍, le̍ nda̍ yīīŋnde̍ kīlīo̍o̍. O̍ ko̍ŋ, mi̍ Lu̍e̍chɛ̄l chu̍ā nyɛ̄m yu̍ŋgu̍ fi̍nyā ndā so̍o̍lūū māā mɛ̄lɛ̄ka̍a̍ ndā wo̍ŋ mbo̍ kūa̍ŋ a̍ mu̍ŋ.

²⁰Mɛ̄ɛ̍ Le̍bāŋ A̍lu̍e̍mīāānɔ̄ ku̍ɛ̄ sāa̍ yīīŋnde̍ kīlīo̍o̍, mi̍ Che̍kɔ̍pū yi̍i̍lūl ndu̍ wo̍yāa̍. Mbo̍ kūānu᷄ŋ, bāli̍ kōŋ bɛ̍ɛ̍, ō dōu̍ ndu̍ le̍.

²¹Nyɛ̄ o̍ nyɛ̄ ndu̍ o̍o̍ nɔ̍, mbo̍ kūāndū kpo̍u̍ mbo̍ kūānu᷄ŋ. Ma̍ lō kɔ̄la̍ŋ ma̍ tāŋ Yūfi̍lu̍a̍ti̍i̍ya̍ŋ, ma̍ sāā ni᷅ŋ kɔ̄la̍ŋ bā lɛ̄ŋndē ŋ̄pēmbūle̍ŋ Ki̍li̍a̍a̍dī pɔ̍.

²²O̍ ko̍ŋ kɔ̍ɔ̍lī, ma̍ dīmūl Le̍bāŋ o̍ pālɛ̍i̍ yāa̍ ndɔ̄ɔ̍ ni᷅ŋ māā Che̍kɔ̍pū chi̍mbū mbo̍ kūa̍ŋ.

²³Dīmūllo̍ ndu̍, mbo̍ chūā pūa̍a̍ ndūa̍a̍ ma̍ tīsā Che̍kɔ̍pū kɔ̄ɔ̄lī. Ma̍ kūā le̍ pālɛ̍i̍ ī ŋɔ᷄mmɛ̍ū. Le̍ kɔ̄la̍ŋ ni᷅ŋ ā lɛ̄ŋndē ŋ̄pēmbūle̍ŋ Ki̍i̍li̍a̍dī, ma̍ kāndū nda̍ bēndāllo̍.

²⁴Kɛ̍ nyūmmā māŋ, mi̍ Mɛ̄lɛ̄ka̍ hūŋ nāa̍ Le̍bāŋ A̍lu̍e̍mīāānɔ̄ chu̍a̍ o̍ lɔ̄mā sɔ̄la᷄ŋ ni᷄ŋ. Mi̍ Mɛ̄lɛ̄ka̍ dīmūl ndu̍ āā, “Le̍bāŋ, ma̍nda̍ŋ. Yɔ᷅ŋ Che̍kɔ̍pū nyɛ̄ o̍ nyɛ̄ le̍.”

²⁵O̍ ko̍ŋ kɔ̍ɔ̍lī, mi̍ Le̍bāŋ be̍ndāl Che̍kɔ̍pū dīi̍mā ndɔ̄ ko̍ŋ. A̍ bōōndi̍i̍ ke̍ŋ Che̍kɔ̍pū nda̍ wānāā ndūa̍a̍ nda̍ a̍a̍ bɛ̍ɛ̍ndi̍a̍a̍ ni᷅ŋ fo̍ndāa̍ o̍ lɛ̄ŋndē ŋ̄pēmbūle̍ŋ Ki̍i̍li̍a̍dī lo̍ŋ le̍ mā lɔ᷄l lo̍ŋ nyu᷅mmā māŋ. Le̍bāŋ bɛ̍ɛ̍, ma̍ bɛ̄ɛ̄ndīāā fo̍ndāa̍ le̍ lūa̍a̍ŋ o̍ lɛ̄ŋndē ŋ̄pēmbūlē lēŋ Ki̍i̍li̍a̍dī lo̍ŋ nyu᷅mmā māŋ.

²⁶O̍ ko̍ŋ, mi̍ Le̍bāŋ kɔ̍ nyu̍nā Che̍kɔ̍pū āā, “Vɛ᷅ ya̍ wo̍yā wāā nu̍a̍ā tōsāllo̍? Vɛ᷅ hūŋnɔ᷄ŋndo̍ a̍ chūāūwāā nīa̍a̍ mɛ̄ɛ̍ wānā yɔ᷅ŋ āā chīa̍a̍ ŋ̄ bīī o̍ chɔ̄ūwo̍ ni̍?

²⁷Vɛ᷅ ma̍ tōsāl la̍ ka̍fālā wāā le̍nde̍? Vɛ᷅ hūnɔ̄ɔ̍ le̍nde̍ sɔ̍ɔ̍ sɔ̍ɔ̍ a̍ di̍mu̍l lā mi̍ ya̍ i̍i̍ cho̍ŋgu̍ŋ nu̍m a̍ kɔ̄l kɛ̄ndɛ̄ le̍? Tē nūm o̍o̍ di̍mu̍l la̍ pɛ̍, ŋ̄ wa̍ fɛ̍ɛ̍ŋ kɔ̍l kɛ̄ndɛ̄ bɛ̄ndōo̍ tōsā a̍ nyɛ̄ chāa̍ le̍ kɔ̄lā nūmnda̍ŋ.

²⁸Kɛ̍ chūāūwāā nīāā ma̍māa̍ ni̍, kālāa̍ ndāa̍ ni̍, a̍ to̍sa̍ I̍ cho̍ŋgu̍ŋ ndɛ̍ nda̍ le̍. Dīɔ̄mnde̍ pi̍la̍ ŋ̄ tōsa̍ he̍ī ni̍.

²⁹A̍ nyɛ̄ ŋ̄ tōsa̍ ho̍ō wo̍, ya̍ i̍i̍ nɔ̍ kpāāyā mī yɔ̍ŋ nu̍m nyɛ̄. Kɛ̍ ndu̍yɛ̍, Mɛ̄lɛ̄ka̍ fi̍nyā nūm cho̍ pīɛ̄īyo̍ wo̍, sīla̍ ya̍ o̍ lɔ̄mā sɔ̄la᷄ŋ ni᷄ŋ chɔ̍chɔ̄l. Mbo̍ dīmūl la̍ āā, ‘Le̍bāŋ, ma̍nda̍ŋ. Yɔ᷅ŋ Che̍kɔ̍pū nyɛ̄ o̍ nyɛ̄ le̍.’

³⁰I̍ si̍nā māā wānāā nūmnda̍ ŋ̄ yēēma̍ ni᷅ŋ ta̍u̍ ni̍, nyɛ̄ kōŋ ŋ̄ hīŋnu᷄ŋ hu̍nɔ̄ɔ̍ ho̍ō ni̍. Kɛ̍ ndu̍yɛ̍, vɛ᷅ ma̍ chīīmbūū nyɛ̄m ni̍ŋ na̍a̍ ŋ̄ sōōlūū na̍a̍ yu̍ŋgu̍ nūu̍ māā mɛ̄lɛ̄ka̍ā nāā wo̍ŋ ma̍ hūŋnu̍ŋ a̍ mu̍ŋ?”

³¹Mi̍ Che̍kɔ̍pū mu̍lī āā, “I̍ chi̍mbu̍ fo̍ndō le̍, sīōōŋnde̍ wa̍ ya̍ māā tē ya̍ i̍i̍ di̍mu̍l nu̍m pɛ̍ māā I̍ cho̍ lākɔ̄ŋnɔ᷄ŋ, a̍ wa̍ chūāūwāā nūmnda̍ pūū ya̍ o̍ bā a̍ ka̍ka̍.

³²A̍ nyɛ̄m nya̍ŋ nya̍ sōōlūū wo̍ŋ o̍kɔ̄ɔ̄ yɛ̍, I̍ chu̍e̍ nyɛ᷅m wāā le̍nde̍ le̍. Mɛ̄ɛ̄ndi̍a̍ŋ, tē a̍ sa̍a̍lu̍ŋ mu̍ŋ wāna̍ nī o̍ bā pɛ̍, wānā ko̍ŋ ō sɔ̄la̍ pi̍ɔ̍mndo̍. Pūa̍a̍ cho̍ ha̍ā na̍a̍ īkɛ̄i̍ ya̍, nda̍ cho̍ se̍īya̍ na̍a̍ nūm tɛ̍ɛ̄ŋ ni̍. Nyɛ̄ o̍ nyɛ̄ nūm a̍ sa̍a̍lu̍ŋ o̍ nyɛ̄m nu᷄ŋ tɛ̄ɛ̄ŋ pɛ̍, so̍li̍ ndu̍ nda̍ o̍ hɔ̄l mā chē.” Kɛ̍ mɛ̄ɛ̄māā Lu̍e̍chɛ̍l chi̍i̍mbu̍u̍ nyɛ̄m fi̍nyā ndɔ̄ nda̍ yu̍ŋgu̍ ndɔ̄ɔ̍ ā sōōlūū mu᷅ŋ ndo̍ŋ ni̍, kɛ̍ Che̍kɔ̍pū si̍na̍ nu̍a̍ā le̍.

³³O̍ ko̍ŋ kɔ̍ɔ̍lī, mi̍ Le̍bāŋ lu̍ɛ̍ī o̍ tɛ̍ndɛ̄i̍ Che̍kɔ̍pū wo̍ ni᷄ŋ mbo̍ mɛ̄ɛ̄ndīa̍ŋ. Wāŋ lāāndūāā bu̍ɛ̍i̍yāā ŋīɔ̍ɔ̍ŋnda̍ bɛ̍ɛ̍ mbo̍ lūɛ̄ī o̍ tɛ̍ndɛ̄i̍ ndāa̍ ni᷄ŋ, mbo̍ mɛ̄ɛ̄ndīa̍ŋ si̍lɔ̍. Kɛ̍, ō sēēlu̍ŋ nyɛ᷅m ndɔ̄ŋ mu̍ŋ te̍. Mbo̍ mɛ̄ɛ̄ndīa̍ŋ o̍ tɛ̍ndīi̍ Li̍yā wo̍ ni᷄ŋ mbo̍ fūlā. Mbo̍ lūɛ̄ī o̍ Lu̍e̍chɛ̄l lo̍.

³⁴Lu̍e̍chɛ̄l ndu̍ o̍o̍ chu̍a̍ ni᷅ŋ nyɔ̄ɔ̍ŋ mu᷅ŋ mbo̍ wōū o̍ nyɛ̄ nda̍ hāndū nyɔ̍mi̍ɔ̍ɔ̍ o̍ kɔ̄ɔ̄ le̍ chālle̍ wo̍ ni᷄ŋ. Mɛ̄ɛ̍ o̍ wo̍u̍, mbo̍ kɛ̄sī, mbo̍ chālnu᷄ŋ le̍cho̍o̍. Mɛ̄ɛ̍ Le̍bāŋ lu̍ɛ̍ī, mbo̍ kīndīlīāā nyɛ̄ o̍ nyɛ̄ fe̍e̍ o̍ tɛ̍ndīi̍yo̍ ni᷄ŋ, kɛ̍ ō sēēlu̍ŋ nyɛ᷅m ndɔ᷄ŋ mu᷅ŋ te̍.

³⁵O̍ ko̍ŋ kɔ̍ɔ̍lī, mi̍ Lu̍e̍chɛ̄l di̍mūl fi̍nyā ndɔ̍ āā, “Fāllo̍, du̍a̍a̍ŋ tu̍mbe̍ le̍ mɛ̄ɛ̍ ŋ̄ lūɛ̄ī I̍ che̍ŋ īsi̍si̍ le̍ nu̍m bɛ̄ɛ̄le̍ŋ kīo̍o̍ le̍ yɛ̍. I̍ cho̍ kɛ̍ndi̍a̍a̍ le̍, pāŋgi̍i̍ nīi̍ ya̍ che᷅ ni̍.” O̍ ko̍ŋ, mi̍ Le̍bāŋ nu̍u̍vīāā, kɛ̍ ō chi̍ nyɛ᷅m ndɔ̍ŋ nda̍ sōōlūū nda̍ yu̍ŋgu̍ ndɔ̄ɔ̍ māā mɛ̄lɛ̄ka̍ā ndā wo̍ŋ te̍.

³⁶Nūūvīāā kōŋ ō chi̍ mu̍ŋ te̍, mi̍ Che̍kɔ̍pū du̍a̍u̍nu᷄ŋ tu̍mbe̍. Mbo̍ dīmūl Le̍bāŋ āā, “Ɔ̍ɔ̄ ni̍ko̍ su̍ɛ̍i̍ ya̍ tɛ̍ɛ̍mbu̍u̍ a̍ nūm, ma̍ tūāl la̍ nyāānɔ᷄ŋndo̍ kɔ̄ɔ̄lī le̍ ndi̍ ve̍?

³⁷A̍ nu̍u̍vi̍a̍a̍ o̍ nyɛ̄m nu᷄ŋ tɛ̄ɛ̄ŋ kpe̍de̍, ɔ̍ɔ̄ ni᷅ŋ wōlɔ̄ɔ̄ nu᷄m ŋ̄ sāālu̍ŋ o̍ nyɛ̄m nu᷄ŋ tɛ̄ɛ̄ŋ ndo̍? Tē a̍ sa̍a̍lu̍ŋ dɔ̍ɔ̍ yɛ̄ nūm pɛ̍, mɛ̄ɛ̍ so̍li̍ wɔ̍ ndu̍ na̍ŋ wa̍nāā nīa̍a̍ a̍ wa̍nāā nūm a̍ ŋ̄ hīŋ kɔ̄ɔ̄lī wa̍ o̍ hɔ̄l, mā kēlū na̍a̍ yāmɛ̍i̍ tɛ̄ɛ̄ŋ na̍a̍ nūm.”

³⁸Mi̍ Che̍kɔ̍pū hi̍a̍ū lāchī a̍ sūɛ̍i̍ nāa̍ Le̍bāŋ chu̍a̍ āā, “Wɔ̄sīlā bi̍di̍i̍ŋ ndā ya̍ I̍ chi̍i̍ la᷅ŋ wa̍llo̍ nu̍m o̍ bā la̍ŋ ki̍nɛ̍i̍, sāā nu̍mnda̍ ni̍, chūīŋāā nūmnda̍ ni̍, ō pīlɛ̍ bɛ̍ɛ̍ ō kɛ̄ɛ̍ le̍ chūāūwa̍ kōmɔ̄ɔ̍ le̍, kɛ̄lɛ̄ŋgāā mī ō pīlɛ̍ bɛ̍ɛ̍ o̍ vi̍i̍ku̍u̍. Ndu̍yɛ̍, wɔ̄sīla̍ŋ nda᷅ŋ kpo̍u̍ chɔ̄lū nūmndo̍ ō pīlɛ̍ bɛ̍ɛ̍ I̍ di̍i̍ ndu̍ mī de᷅ le̍.

³⁹Ā yɔ᷄ŋ bɛ̍ɛ̍ āā vīsī bīyāa̍ ndu̍ o̍o̍ di̍ī ō pīlɛ̍ ni̍, i̍i̍ chu̍u̍ nu̍m ō vīlɛ̍i̍ ko̍ŋ le̍ nu̍m chɔ̄mndo̍ māā ō cho̍ dɛ̍nɛ̍ nī le̍ le̍. Lūɛ̄īnɔ᷄ŋndo̍ ya̍ i̍i̍ lu̍ɛ̍i̍nūŋ cho̍o̍ mī mi̍ŋgi̍ ndu̍ sɔ̍ŋgɔ̄ ni̍. Vīīya̍ bɛ̍ɛ̍ nda̍ a̍a̍ chi̍i̍mbu̍u̍ chɔ̄lōo̍ pɛ̍, ō wa̍ i̍pa̍la̍, ō wa̍ i̍chɔ̍l nda̍ chīīmbu̍u̍ ni̍, mɛ̄ɛ̍ mī nūm o̍o̍ to᷅l la̍ kɔ̄ɔ̄lī, mī mi̍ŋgi̍ ndu̍ sɔ̍ŋgɔ̍.

⁴⁰Le̍nde̍ ya̍ lo̍ fāfa̍la̍a̍ a̍ chɔ̄lūāā nūmnda̍ ni̍, pāa̍le̍ŋ lē lūāā ya̍ īpāla̍, hūēīye̍ ī pālā ya̍ īchɔ̄l, lē pūm hɔ̄lte̍ŋ bɛ̍ɛ̍ I̍ ku̍mbū mī lɔ̍l te̍.

⁴¹Le̍ wɔ̄sīla̍ŋ ndāŋ bi̍di̍i̍ŋ, I̍ cho̍ nu̍m sāāŋgīāllo̍. I̍ to̍sa̍ wa̍llo̍ le̍ wɔ̄sīla̍ŋ tɔ̍ a̍ lā hīɔ̍ɔ̍lu̍ le̍ chūāūwāā nūm ŋi̍ɔ̍ɔ̍ŋnda̍. Mi̍ ma̍ndā vɛ̄lɛ̄ chɔ̄lūāā nūmnda̍ le̍ wɔ̄sīla̍ŋ lā ŋɔ᷄mpu᷅m le̍ mā pa̍a̍wa̍ ya̍ a̍ ni̍a̍a̍. Kɛ̍ ma̍ tōsāl la̍ ka̍fāla̍ŋ. Ma̍ māŋgālā pāāwā nūu̍ mi̍ nyɛ̄ kōŋ kūā ni᷅ŋ bɛ̄mbɔ̄ɔ̍ tɔ̍.

⁴²Mɛ̄lɛ̄ka̍ ō fi̍nyāā nīa̍a̍, E̍bīlāha᷅m a̍ Āa̍se̍ a̍ pi̍ɛ̍īyo̍, ndu̍ ko̍ wa̍ ya̍ kɔ̄ɔ̄lī ni̍. Tē ndu̍ o̍o̍ ve̍ ko̍ŋ te̍, bālā fo̍ndō ŋ̄ wa̍ ya̍ mālɔ̄ɔ̄ ni̍ mī ya̍ i̍i̍ ku̍ɛ̄. Kɛ̍ mi̍ Mɛ̄lɛ̄ka̍ chā nyɛ̄ nī pa̍lāa̍, ndu̍yɛ̍ mbo̍ chā mɛ̄ɛ̍ ya̍ sa̍ŋga̍ yɛ̍. Le̍ sa̍bōo̍ ho̍ō, mi̍ ndu̍ pi̍la̍ ki̍lūl nu̍m yāmɛ̍i̍. Nyɛ̄ kōŋ kpe̍e̍kpe̍i̍ ndu̍ pi̍la̍ so̍ō nu̍a̍ā nāa̍ nūm chu̍a̍ o̍ lɔ̄mā sɔ̄la̍ŋ ni᷄ŋ chɔ̍chɔ̄l ni̍.”

⁴³O̍ ko̍ŋ kɔ̍ɔ̍lī, mi̍ Le̍bāŋ di̍mūl Che̍kɔ̍pū āā, “Wāŋ lāāndūa̍a̍ cho̍ ha̍ā nu̍m o̍ bā wa̍, chūāūwāā nīa̍a̍ nda̍ chō ni̍, chūāūwāā nda̍ vēlū wa̍ bɛ̍ɛ̍ hɔ̍ɔ̍vāā nīa̍a̍ nda̍ chō ni̍. Chɔ̄lūāā ŋ̄ nɔ̄ ha̍ā wa̍ bɛ̍ɛ̍ chɔ̄lūāā nīa̍a̍ nda̍ chō ni̍. Nyɛ̄ o̍ nyɛ̄ ŋ̄ chō chɔ̄ɔ̍, ya̍ nɔ̍ ni̍. Kɛ̍ ndu̍yɛ̍, chūāūwāā nīa̍a̍ ni̍, chūāūwāā nda̍ vēlū wa̍ ni̍, I̍ nɔ̍lā lɛ̍ ī bi̍ī nda̍ nu̍m o̍ bā le̍.

⁴⁴Le̍la̍ŋ, na̍a̍ nūm ŋ̄ yīi̍ kpe̍ma̍a̍, mī ŋ̄ dīī pōūta̍ŋ ku̍ndā le̍ wāa̍ māā nyɛ̄ yīyāla᷄ŋ na̍a̍ a̍ kpe̍ma̍ na̍a̍ ŋ̄ yīi̍ ko̍ŋ ndo̍.”

⁴⁵O̍ ko̍ŋ kɔ̍ɔ̍lī, mi̍ Che̍kɔ̍pū chu̍ā pōūwo̍, mbo̍ bāŋ ndu̍ le̍ lōōnɔ᷄ŋndo̍ a̍ kpe̍ma̍ lu̍ɛ̍ī nda̍ tɛ̄ɛ̄ŋ ndo̍.

⁴⁶Mi̍ Che̍kɔ̍pū di̍mūl pūa̍a̍ cho̍ ndu̍ o̍ bā wa̍ āā, “Lā ŋ̄ chūūŋgi̍āŋ pōūta̍ŋ.” Ma̍ chūūŋgīāā pōūta̍ŋ, a̍ dīī la̍ŋ ku̍ndāa̍. O̍ ko̍ŋ kɔ̍ɔ̍lī, ma̍ hūŋ a̍ nyɛ̄ dīa̍a̍, ma̍ dīā ndu̍ o̍ pōūtā ku̍ndālā lāŋ īkɛ̄i̍.

⁴⁷Mi̍ Le̍bāŋ ke᷅ pōūtā ku̍ndālā lāŋ dīōla̍ŋ āā, Chɛ̍kā Sāhādu̍tā. Kɛ̍ mi̍ Che̍kɔ̍pū ndu̍ ke᷅ pōūtā ku̍ndāla̍ŋ dīōla̍ŋ āā, Ka̍a̍līī.

⁴⁸Mi̍ Le̍bāŋ lo᷅ o̍ ko̍ŋ mbo̍ dīmūl Che̍kɔ̍pū āā, “Pōūta̍ ku̍ndāla̍ŋ ndāŋ lā chō māchūāā le̍ na̍a̍ lōōnɔ᷄ŋndo̍ a̍ kpe̍ma̍ na̍a̍ ŋ̄ yīi̍ na̍a̍ nūm ndo̍.” O̍ ko̍ŋ, ma̍ kē fo̍ndā kōŋ dīōla̍ŋ āā, Ka̍a̍lūū.

⁴⁹Mi̍ Le̍bāŋ di̍mī āā, “Mbɔ̄ māā hɔ̄lte̍ Mɛ̄lɛ̄ka̍le̍ŋ lē wa̍ na̍a̍ cho̍o̍ bo̍o̍ndi̍i̍ na̍a̍ ŋ̄ chō wāna᷅ŋ la̍nda̍ŋ la̍nda̍ŋ nde̍ fɔ̍!” Le̍ he̍ī, ma̍ kē vɛ̄lɛ̄ fo̍ndāŋ kōŋ dīōlā chēle̍ŋ āā Mi̍si̍pā.

⁵⁰Mi̍ Le̍bāŋ si̍lā Che̍kɔ̍pū āā, “Tē ā bīī chūāūwāā nīa̍a̍ ya̍ I̍ ke̍ nu̍m nda̍ bīyɔ̄ɔ̄ wɔ̄ɔ̍ŋ pɛ̍, kɛ̄lɛ̄ŋgāā mā chu̍a̍ la̍nɔ̍ che᷅le̍ŋ o̍ nda̍ kɔ̍ɔ̍lī, le̍ mɛ̄ɛ̍ ya̍ I̍ cho̍ nu̍m chɔ̄ le̍ yɛ̍ pɛ̍, mɛ̄ɛ̍ si̍na̍ pɛ̍ŋgu̍ māā Mɛ̄lɛ̄ka̍ chō na̍a̍ chɔ̄ɔ̍ vēllāa̍ vēllē.”

⁵¹Mi̍ Le̍bāŋ lo᷅ vɛ̄lɛ̄ o̍ ko̍ŋ, mbo̍ dīmī āā, “Ā chē pōūtā ku̍ndāla̍ŋ nda᷅ŋ a̍ pōū ya̍ ba̍ŋ ho̍ō le̍ wāa̍ na̍a̍ yīyāla᷄ŋndo̍ vēllāa̍ vēllē wo̍.

⁵²Pōūtā ku̍ndāla̍ŋ nda᷅ŋ ni̍, a̍ pōu̍ ba̍ŋnu̍ŋ ho̍ō wo̍, lā chō le̍ na̍a̍ yīyāla᷄ŋndo̍ vēllāa̍ vēllē. Ya̍ I̍ che᷅ŋ ndɛ̍ mī hu̍u̍lu̍ la̍ŋ chōo̍ mī kɔ̍ sa̍ā nu̍m a̍ sɔ̍ŋgɔ̄ le̍. Nūm bɛ̍ɛ̍, a̍ hu̍u̍lū po̍ū yīyāla᷄ŋndo̍ ho̍ō chōo̍ ā hu̍ŋ sa̍ā ya̍ a̍ sɔ̍ŋgɔ̄ le̍.

⁵³Mɛ̄lɛ̄ka̍ E̍bīlāha᷅m a̍ Nāhɔ̍ɔ̄ a̍ pi̍ɛ̍ī yo̍ ndu̍ ki̍a̍lū na̍a̍ yāmɛ̍i̍ tɛ̄ɛ̄ŋ ni̍.” O̍ ko̍ŋ kɔ̍ɔ̍lī Che̍kɔ̍pū bɛ̍ɛ̍ mbo̍ chūā būŋgɛ̍i̍ o̍ Mɛ̄lɛ̄ka̍ lo̍, ō Āa̍se̍ fi̍nyā ndɔ̄ pi̍ɛ̍ī yo̍, māā ō chō kpe̍ma̍ nda̍ yīi̍ yo̍ māndā.

⁵⁴Mi̍ Che̍kɔ̍pū di̍ī chɔ̄lōo̍, mbo̍ sōlī sa̍lāa̍ o̍ pēmbēi̍ chōo̍ nāa̍ Mɛ̄lɛ̄ka̍ chūā. Mbo̍ vēēlū wāŋ pīāāndūa̍a̍ o̍ yu̍ŋgu̍ ndɔ̄ɔ̍ chōo̍, ma̍ dīā nyɛ̄ dīāā kōŋ. Mɛ̄ɛ̍ nda̍ chīi̍ nyɛ̄ dīa̍a̍ di̍o̍, ma̍ lɔ̄l o̍ pēmbēi̍ chōo̍ lo̍ŋ pi̍i̍ nyu᷅mmā māŋ.

⁵⁵Pāa̍le̍ŋ sīɔ̍ɔ̍ dīi̍mā ndɔ̄ɔ̍, mi̍ Le̍bāŋ pe̍nā chɔ̄nɔ᷄ŋ pu̍u̍ŋ, mbo̍ kɔ̄ɔ̄mīa̍ŋ chu̍a̍u̍wāā ndūāā ma̍māa̍ a̍ chūāūwāā ndūa̍a̍, mbo̍ chōŋgu᷄ŋ nda̍ ā pīlɛ̍ŋ pi̍lɛ̍ŋnda̍, mbo̍ dūāū nda̍ sa̍lā. Chi̍i̍yo̍ nda̍ sa̍lāa̍ dɔ̄wɔ̄ɔ̍, mbo̍ mīīŋgū o̍ ndu̍ lo̍.