Read Southern Kisi Chɛ̄nɛ̍se̍ē 33 Bible Online

Chɛ̄nɛ̍se̍ē 33 - Southern Kisi bible

Chɛ̄nɛ̍se̍ē 33

¹Mɛ̄ɛ̍ Che̍kɔ̍pū to̍fa̍ŋ la̍chi̍, mbo̍ chā I̍īsɔ̄ hūnɔ̄ɔ̍ a̍ pūa̍a̍ ndu̍ kɔ̄ɔ̄lī kɛ̄mɔ̄ɔ̍ lē hīɔ̍ɔ̍lu̍ (400). Mɛ̍ɛ̍ Che̍kɔ̍pū che᷅ nda̍ hūnɔ̄ɔ̍, mbo̍ sīmī yu̍ŋgu̍ ndɔ̄ɔ̍ a̍ ku̍ndāla̍ŋ. Li̍yā nda̍ chūāūwāā ndūa̍a̍, Lu̍e̍chɛ̄l nda̍ po̍ ndɔ̄ɔ̍, wāŋ lāāndūāā bu̍ɛ̍i̍yāā ŋīɔ̍ɔ̍ŋnda̍ nda̍ chūāūwāā ndāa̍ nda̍ bɛ̍ɛ̍ ku̍ndā.

²Wāŋ lāāndūāā bu̍ɛ̍īya̍ nda̍ chūāūwāā ndāa̍ fɛ̍ɛ̍ŋ o̍ si̍mi̍, mbo̍ sīmī Li̍yā nda̍ chūāūwāā ndūa̍a̍, mbo̍ sīmī Lu̍e̍chɛ̄l nda̍ Chōo̍sɛ̍ po̍ ndɔ̍ kɔ̄ɔ̄lī kpɔ̍ŋ.

³Sīmīo̍o̍ nda̍ le̍nde̍, mi̍ ndu̍ pi̍la̍ si᷅m nda̍ lāchī. Mɛ̄ɛ̍ nda̍ wāna᷅ŋ ni᷅ŋ kpɛ̍ɛ̍lūŋ nda̍ I̍īsɔ̄ bɛ̍ndɔ̄, mbo̍ tūndu᷄ŋ le̍ ŋɔ̍mmɛ̍ū le̍ ndu̍ bɛ̄ɛ̄le̍ŋ kīo̍o̍, ō kūɛ̄ pɛ̍ ti̍ŋ o̍ tūndu᷄ŋ, ō kūɛ̄ pɛ̍ ti̍ŋ ō tūndu᷄ŋ.

⁴Kɛ̍ mi̍ I̍īsɔ̄ ku̍ā ndu̍ lāchī a̍ kīlta̍ŋ, mbo̍ kɔ̄ma᷄ŋ ndu̍, mbo̍ sɔ̄sā ndu̍ kūu̍wo̍. Nda̍ nda̍ ŋi̍ɔ̍ɔ̍ŋ mā chāŋ.

⁵Mɛ̄ɛ̍ I̍īsɔ̄ mɛ̍ɛ̍ndi̍a̍ŋ, mbo̍ chā wāŋ lāāndūa̍a̍ a̍ chūāāmbūa̍a̍ Che̍kɔ̍pū kɔ̍ɔ̍lī. Mbo̍ nyūnā ndu̍ āā, “Nɛ̄ɛ̍ni̍a̍ā cho̍ yɛ̄ ha̍ā?” Mi̍ Che̍kɔ̍pū mu̍lī āā, “Chūāūwāā nīa̍a̍. Kɛ̄ndɛ̄i̍ he̍ī Mɛ̄lɛ̄ka̍ kɔ̍ to̍sāl ya̍ bu̍ɛ̍ī nūmndo̍ ni̍.”

⁶O̍ ko̍ŋ, mi̍ wāŋ lāāndūāā bu̍ɛ̍īya̍ fūlā a̍ chūāūwāā ndāa̍, ma̍ kɔ̍ tu̍ndu᷄ŋ I̍īsɔ̄ o̍ lābɛ̄ŋgu̍ ni̍ŋ.

⁷Mɛ̄ɛ̍ nda̍ fāŋa̍ŋ, mi̍ Li̍yā fu̍lā nda̍ chūāūwāā ndūa̍a̍, nda̍ bɛ̍ɛ̍ ma̍ kɔ̍ tu̍ndu᷄ŋ I̍īsɔ̄ o̍ lābɛ̄ŋgu̍ ni̍ŋ. Nda̍ fāŋa᷄ŋndo̍, mi̍ Chōo̍sɛ̍ nda̍ kāla̍ ndɔ̄ a̍ fu̍lā, nda̍ bɛ̍ɛ̍ ma̍ kɔ̍ tu̍ndu᷄ŋ ndu̍ o̍ lābɛ̄ŋgu̍ ni̍ŋ.

⁸O̍ ko̍ŋ kɔ̍ɔ̍lī, mi̍ I̍īsɔ̄ nyu̍nā āā, “Ku̍ndā na̍a̍ ŋ̄ bɔ̄ŋa᷅ŋ ko̍ŋ ndo̍ yɛ̍? A̍ kūɛ̍ɛ̍nɛ̍ a̍ cho̍ yɛ̄ ka̍ŋ?” Mi̍ Che̍kɔ̍pū di̍mī a̍a̍, “Chɔ̄lūāā ya̍ chu̍u̍ nu̍m nda̍ cho̍ ka̍ŋ ni̍ le̍ mā na̍ŋ kɔ̄l a̍ ya̍.”

⁹Kɛ̍ mi̍ I̍īsɔ̄ di̍mūl ndu̍ āā, “Ya̍ bɛ̍ɛ̍ I̍ nɔ̍ o̍ bā tūu̍le̍ŋ, pōo̍. Le̍la̍ŋ kɛ̍si̍ nyɔ̍ɔ̍ŋ ŋ̍ nu̍mndo̍ŋ le̍ nūm pīla̍.”

¹⁰Mi̍ Che̍kɔ̍pū di̍mī āā, “Yāndi̍i̍ bi̍i̍. Le̍ mī si̍na̍ māā a̍ hi̍ni̍ kɔ̄l a̍ ya̍, kɛ̍ɛ̄ chɔ̄lūāā ya̍ I̍ chu̍u̍ nu̍m nda̍ le̍. Chīīki̍āŋndo̍ ho̍ō na̍a̍ nūm, ma̍ chɔ̄m ya̍ kāālāa̍, kɔ̄llo̍ hīni̍ ya̍ ni᷅ŋ ni᷄ŋ. Kɛ̍ le̍ mī na̍a̍ ŋ̍ de̍la᷅ŋ le̍hɔ̍l na̍a̍ nūm, wa̍ bɔ̄ɔ̍ yi̍ŋgo̍lo̍ŋ ya̍ o̍ hɔ̄l, mɛ̄ɛ̍ wānā a̍a̍ yɔ᷅ŋ ko̍ āā Mɛ̄lɛ̄ka̍ ya̍ cho̍ kɔ̄la̍ŋ kōmāllo̍ ni̍.

¹¹Le̍la̍ŋ, yāndi̍i̍ bi̍i̍ nyɛ᷅ ya̍ I̍ chu̍u̍ nu̍m ndo̍. Kāni̍, Mɛ̄lɛ̄ka̍ ke̍ ya̍ dɛ̍nɛ̍ kɛ̍ndɔ̄ɔ̍ cha̍po̍o̍lī. Bi̍i̍ bɛ̍ɛ̍ I̍ lo̍ō o̍ bā tūu̍le̍ŋ.” Mɛ̄ɛ̍ o̍ dɛ̄ɛ̄ni̍a̍a̍ ndu̍ le̍nde̍, I̍īsɔ̄ bɛ̍ɛ̍ mbo̍ bīī.

¹²O̍ ko̍ŋ kɔ̍ɔ̍lī, mi̍ I̍īsɔ̄ di̍mūl ndu̍ a̍a̍, “Mɛ̄ɛ̍ ŋ̄ kɔ̄ŋnu᷅ŋ ni̍ko̍ na̍ā nya̍ā. I̍ wa᷅ wɔ̍ nya̍ lāchī mī nya̍ wa̍ kɔ̄ɔ̄lī.”

¹³Kɛ̍ mi̍ Che̍kɔ̍pū di̍mī āā, “Wāna̍ nī ba̍nāa̍ chūāāmbūa̍a̍ chō na̍a̍ tɛ̄ɛ̄ŋ, ndu̍yɛ̍ ā nɔ̍ di̍a̍llūŋ kālā le̍. Chɔ̄lūa̍a̍ bɛ̍ɛ̍ ā pūm ā nɔ̄ chūāūwāā lēndīa̍a̍. Tē wānā hi̍u̍u̍ lākɔ̄ a̍ ka̍lāŋ le̍ pāa̍le̍ŋ kpɛ᷅ŋ bɛ̍ɛ̍ pɛ̍, ā vī pa̍ku̍.

¹⁴Le̍la̍ŋ hi̍o̍u̍ la̍chi̍, fāllo̍. Ya̍ bu̍ɛ̍ī nūmndo̍, I̍ hɛ̍na̍ŋ mī ku̍ɛ̄ a̍ nda̍ dɛ̍ndɛ̄ dɛ̍ndɛ̄, mɛ̄ɛ̍ kpɛ̍ chɔ̄lūa̍a̍ ā tīū ba̍ le̍ kɔ̄la̍ŋ yɛ̍. Chūāāmbūa̍a̍ bɛ̍ɛ̍ mɛ̄ɛ̍ kɔ̄la̍ŋ le̍nde̍ dɛ̍ndɛ̄ dɛ̍ndɛ̄ a̍ nda̍ ha̍a̍a̍ mī ŋ̄ kōma̍l nu̍m I̍dɔ̄m.”

¹⁵Mi̍ I̍īsɔ̄ lo᷅ o̍ ko̍ŋ mbo̍ dīmūl Che̍kɔ̍pū āā, “Mɛ̄ɛ̍ I̍ mɛ̍ī yɔ̍ pūa̍a̍ ā ti᷄ŋ mī lā kōma̍ hu᷅ŋ nya̍ nda̍.” Kɛ̍ mi̍ Che̍kɔ̍pū di̍mī āā, “Mbɔ̄ ō wa̍ le̍nde̍, ŋ̄ chō hūnɔ̄ɔ̄ tē ī bɛ̄ndā le̍nde̍ pɛ̍, fāllo̍.”

¹⁶Mi̍ I̍īsɔ̄ cha̍ŋ mbo̍ mīīŋgū pāa̍le̍ le̍ŋ I̍dɔ̄m.

¹⁷Mi̍ Che̍kɔ̍pū ndu̍ ku̍ā Su̍kɔ̍tī. Fūūlūūwo̍, mbo̍ bāŋ chīɛ̄īyo̍ le̍ ndu̍ pi̍la̍. Mbo̍ mūli᷄ŋ mbo̍ bāŋ vɛ̄lɛ̄ tɛ̍ndɛ̄i̍la̍ŋŋ le̍ chɔ̄lūāā ndūa̍a̍. Le̍la̍ŋ nda̍ ke̍ chi̍e̍e̍ kōŋ dīōla̍ŋ ni̍ āā Su̍kɔ̍tī.

¹⁸Mɛ̄ɛ̍ nu̍a̍ā Che̍kɔ̍pū lo̍o̍ku̍ chɔ̄nɔ᷄ŋ Mɛ̄sōpōte̍e̍mīāā mbo̍ mīīŋgū Si̍ɛ̍kɛ̄m chi̍e̍e̍ o̍ lɛ̄ŋndē Ke̍nāŋnde̍ŋ ni᷄ŋ kɛ̍ndi̍a̍a̍ yɛ̍lɛ̍kɛ̍lɛ̍ɛ̍ ni̍. Fūūlūūwo̍ Si̍ɛ̍kɛ̄m i̍kɛ̍i̍, mbo̍ tūāndū tɛ̍ndīi̍la̍ŋ ndo̍ŋ.

¹⁹Mbo̍ pīāndū lɛ̄ŋnde̍ŋ a̍ ka̍ni̍ŋ hu̍mbo᷄ŋ kɛ̄mɛ̄ (100), pūa̍a̍ Ha̍mɔ̍ɔ̄ wa̍ o̍ bā. Ha̍mɔ̍ɔ̄ yɛ̍ fi̍nyā ndɔ̍ wa̍ Si̍ɛ̍kɛ̄m ni̍. Mɛ̄ɛ̍ o̍ dɔ̍ū le̍ŋ wɔ̄ŋgū, mbo̍ bāŋ tɛ̍ndɛ̄i̍la̍ŋ ndo̍ŋ.

²⁰O̍ ko̍ŋ kɔ̄ɔ̍lī, mi̍ Che̍kɔ̍pū tāŋgūl ma̍āŋndo̍ o̍ fo̍ndāŋ kōŋ, mbo̍ kē ndu̍ dīōla̍ŋ āā, Ɛ̄lɛ̄lōhīī I̍sɔ̄lūɛ̄ī.