Read Southern Kisi Chɛ̄nɛ̍se̍ē 35 Bible Online

Chɛ̄nɛ̍se̍ē 35 - Southern Kisi bible

Chɛ̄nɛ̍se̍ē 35

¹Mi̍ Mɛ̄lɛ̄ka̍ dīmūl Che̍kɔ̍pū āā, “Che̍kɔ̍pū, chɔ̍ŋ mā kūɛ̄ Bɛ̍tɛ̄ɛ̄l, mā kɔ̍ cha᷅l lo̍ŋ. Ā kūɛ̄ pɛ̍, a̍ kɔ̍ ta̍ŋgūl ma̍āŋndo̍ lo̍ŋ le̍ ya̍ Mɛ̍lɛ̄ka̍ sōōlūūwo̍, ya̍ Mɛ̄lɛ̄ka̍ chɔ̍mnu̍ŋ nu̍m a̍ bōōndi̍i̍ nūm o̍o̍ nya̍a̍nu̍ŋ I̍īsɔ̄ bɛ̍nūm nde̍ wo̍.”

²Mɛ̄ɛ̍ Mɛ̄lɛ̄ka̍ dīmu̍l Che̍kɔ̍pū le̍nde̍, mbo̍ dīmūl yu̍ŋgu̍ ndɔ̄ɔ̍ āā, “Wānā o̍ wānā lā sōōlu̍u̍ nyɛ᷅m yɛ̍ yɛ̍ŋ ya̍ bīu̍ mi̍ ŋ̄ wā nya̍ o̍ lābā mī lā sōōlūū mu̍ŋ māā mɛ̄lɛ̄ka̍ā nyā wo̍ŋ, mī lā tɛ̄ɛ̄mbu̍u̍ mu̍ŋ kpo̍u̍. O̍ ko̍ŋ kɔ̍ɔ̍lī, mī lā dīndi̍ nya̍ pi̍la̍ Mɛ̄lɛ̄ka̍ o̍ hɔ̄l. Nyɛ̄la̍ cho̍ nya̍ lēkɔ̄ɔ̍ la̍ŋ ki̍nɛ̍i̍ mī lā sōōlu̍u̍ la̍ŋ, mī lā wōūnu̍ŋ a̍ che᷅le̍ŋ.

³Mī lā bɛ̄ɛ̄ndi̍a̍ŋ, mī lā chɛ᷄ŋ le̍ kɔ̄la̍ŋ Bɛ̍tɛ̄ɛ̄l. Kāni̍ fu̍u̍le̍, bōōndi̍i̍ ya̍ wa̍ o̍ nyɛ̄ pālāa̍ ni᷄ŋ nde̍, Mɛ̄lɛ̄ka̍ ya̍ pi̍ɛ̍i̍ mbo̍ mūlī pīɛ̄īlē nīle̍ŋ ndu̍yɛ̍, mbo̍ wā ya̍ kɔ̄ɔ̄lī bā o̍ bā ya̍ kɔ̍ wo̍, I̍ nɔ̍ mī kɔ̍ ta̍ŋgūl ma̍āŋndo̍ le̍ Mɛ̄lɛ̄ka̍ kōŋ sōōlūūwo̍.”

⁴O̍ ko̍ŋ kɔ̍ɔ̍lī, ma̍ sōōlūū nyɛ̄m yɛ̍ yɛ̍ŋ wa̍ nda̍ o̍ lābā mā sōōlūū mu̍ŋ ndo̍ŋ, a̍ kēla᷄ŋ wa̍ nda̍ o̍ lānī wo̍ŋ, a̍ chūū Che̍kɔ̍pū. Mbo̍ mūli᷄ŋ mbo̍ tūāū so̍o̍ŋndo̍ o̍ yɔ̄m tɔ̍ɔ̍ma̍a̍ pūm bɛ̄ŋgu̍ Si̍ɛ̍kɛ̄m i̍kɛ̍i̍, mbo̍ tūū nyɛ̄m mu᷅ŋ a̍ kēlāŋ mu̍ŋ ndo̍ŋ.

⁵Kɔ̄lā Che̍kɔ̍pū wa̍ a̍ yu̍ŋgu̍ ndɔ̄ɔ̍ la̍ŋ, chi̍e̍e̍ o̍ chi̍e̍e̍ ba̍lu̍ nda̍, mi̍ Mɛ̄lɛ̄ka̍ tōsā mi̍ sīōōŋnde̍ pēī nda̍ cha̍ cha̍. Le̍ he̍ī, ā nɔ̄la̍ mā tōl pūa̍a̍ Che̍kɔ̍pū wa̍ kɔ̄ɔ̄lī le̍.

⁶O̍ ko̍ŋ kɔ̍ɔ̍lī, mi̍ Che̍kɔ̍pū nda̍ yu̍ŋgu̍ ndɔ̄ɔ̍ fa̍ū ā fūūlūū Lu̍u̍sī, ō nda̍ vēēlū ni᷄ŋ ho̍ō āā, Bɛ̍tɛ̄ɛ̄l wo̍, lɛ̄ŋndē Ke̍nāŋnde̍ŋ ni᷄ŋ.

⁷Mɛ̄ɛ̍ nda̍ fūūlu̍u̍, mbo̍ tāŋgūl ma̍āŋndo̍ lo̍ŋ le̍ Mɛ̄lɛ̄ka̍ sōōlūūwo̍. O̍ ko̍ŋ kɔ̍ɔ̍lī, mbo̍ kē fo̍ndāŋ kōŋ dīōla̍ŋ ā, Ɛ̄l Bɛ̍tɛ̄ɛ̄l, kāni̍ fu̍u̍le̍, lo̍ŋ Mɛ̄lɛ̄ka̍ chɔ̄mnu̍ŋ Che̍kɔ̍pū ni̍, bōōndi̍i̍ o̍ wa̍ bɛ̄ ndɔ̍ nyāānɔ᷄ŋndo̍ ve̍.

⁸O̍ ko̍ŋ kɔ̍ɔ̍lī, mi̍ Dībo̍o̍lūā, vɛ̄ɛ̍ŋ wa̍ Lūībɛ̍ka̍ māndāa̍ wo̍ ō wū. Mɛ̄ɛ̍ o̍ vi᷅, ma̍ chɔ̄ ndu̍ o̍ yɔ̄mndo̍ bɛ̄ŋgu̍ o̍ kpo̍lo̍ŋndo̍ Bɛ̍tɛ̄ɛ̄l ma̍ to̍ū. Ma̍ kē yɔ̄m nda̍ chɔ̍ ndu̍ ko̍ŋ le̍bɛ̍ŋgu̍ wo̍ dīōla̍ŋ āā Ālɔ̄ŋ Ba̍kūū.

⁹O̍ ko̍ŋ kɔ̍ɔ̍lī, chɔ̍ŋ a̍ mālɔ̄ɔ̄ Che̍kɔ̍pū o̍ ma̍l Mɛ̄sōpōte̍e̍mīāā wo̍ mi̍ Mɛ̄lɛ̄ka̍ chɔ̄mnu᷄ŋ ndu̍ vɛ̄lɛ̄.

¹⁰Mbo̍ dūāū ndu̍ sa̍lā, mbo̍ dīmūl ndu̍ āā, “Nda̍ a̍a̍, ve̍e̍lū nu̍m āā, Che̍kɔ̍pū, kɛ̍ dīōlā nūmnda̍ cho̍ lɛ̍ wā āā, Che̍kɔ̍pū le̍. Dīōlā nūmnda̍ŋ ni᷅ŋ āā I̍sɔ̄lūɛ̄ī.” Mi̍ Mɛ̄lɛ̄ka̍ kē ndu̍ I̍sɔ̄lūɛ̄īla̍ŋ.

¹¹Mi̍ Mɛ̄lɛ̄ka̍ dīmūl ndu̍ āā, “Ya̍ cho̍ Mɛ̄lɛ̄ka̍ kpu̍lu̍ŋgūma̍ bɛ̄ndōo̍ ni̍.” Mbo̍ dūāū Che̍kɔ̍pū sa̍lā āā, “Vi̍o̍lu̍ ŋ̍chu̍a̍u̍ mā kūīī ta̍u̍ ta̍u̍. Chūāūwāā nūm a̍ ma̍māa̍ chō kūīī mā sīmnu᷄ŋ ka̍a̍la̍ŋ. Māsāā bɛ̍ndūa̍a̍ ā vīālūŋ ni̍ŋ o̍ pūlālē nūmnde̍ŋ chōo̍.

¹²Lɛ̄ŋndē ya̍ I̍ ke̍ E̍bīlāha᷅m fi̍nyā nūm ma̍mā, a̍ Āa̍se̍ fi̍nyā nūm nde̍ŋ, I̍ cho̍ nu̍m le̍ŋ kē nya̍ wānāa̍ fu̍lā ni̍ŋ o̍ pūlālē nūmnde̍ŋ chōo̍ wa̍.”

¹³O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ kūānu᷄ŋ.

¹⁴Mi̍ Che̍kɔ̍pū ba᷅ŋ pōūwo̍ le̍ wāa̍ tāāmāsi̍o̍o̍ o̍ fo̍ndāŋ Mɛ̄lɛ̄ka̍ chɔ̄mnu̍ŋ ndu̍ ko̍ŋ mbo̍ sūāā nāa̍ ndu̍ chu̍a̍ wo̍. Mɛ̄ɛ̍ o̍ ba̍ŋ, mbo̍ tālā mūɛ̄īya̍ŋ a̍ chūɛ̄īya̍ŋ lēchōo̍ māā sa̍lā o̍ Mɛ̄lɛ̄ka̍ lo̍.

¹⁵Mi̍ Che̍kɔ̍pū ke᷅ fo̍ndāŋ Mɛ̄lɛ̄ka̍ sōō ko̍ŋ nāa̍ ndu̍ chu̍a̍ wo̍ dīōla̍ŋ āā, Bɛ̍tɛ̄ɛ̄l.

¹⁶O̍ ko̍ŋ kɔ̍ɔ̍lī, mi̍ Che̍kɔ̍pū ma᷅l Bɛ̍tɛ̄ɛ̄l le̍ kɔ̄la̍ŋ E̍fi̍lu̍a̍tī. Ndu̍yɛ̍ a̍ bōōndi̍i̍ ke̍ŋ, Lu̍e̍chɛ̄l wa̍ a̍ yo᷄llo̍. Mɛ̄ɛ̍ nda̍ bīī kɔ̄la̍ŋ, mi̍ pūle̍i̍ kāndū Lu̍e̍chɛ̍l nɛ̄īyo̍. Mi̍ wāŋ lāāndūa̍a̍ sɔ̄ɔ̄ŋgūū ndu̍ īkɛ̄i̍. Kɛ̍ ti᷅ŋndo̍ ndu̍ o̍o̍ lo̍ wɔ̄ la̍nda̍ŋ le̍ fūūlūūwo̍ E̍fi̍lu̍a̍tī chi̍e̍e̍.

¹⁷Lu̍e̍chɛ̄l wa̍ lāū lāū kōŋ a̍ nyɛ̄ nɛ̄īyāa̍, mi̍ so̍ko̍nɔ̍ vi̍a̍lāa̍ dīmūl ndu̍ āā, “Pɛ̍ŋgi̍ ni̍ko̍ bu̍u̍la᷄ŋndo̍, ā vēlū vɛ̄lɛ̄ pōo̍.”

¹⁸Kɛ̍ mɛ̄ɛ̄māā pīɔ̍mndo̍ ko̍ o̍ wa̍ ni᷅ŋ ni̍. Lɔ̍ɔ̍pa̍ o̍ ma̍lnūŋ kɔ̍l, mbo̍ dīmī āā, “Dīōlā ndɔ̄la̍ŋ āā, Bɛ̄ŋ Bɛ̍no̍nī.” Kɛ̍ mi̍ fi̍nyā ndɔ̄ ke᷅ ndu̍ dīōla̍ŋ āā, Bɛ̍ŋnja̍mīŋ.

¹⁹Mɛ̄ɛ̍ Lu̍e̍chɛ̄l vi᷅, ma̍ chɔ̄ ndu̍ nɛ̄ī tɛ̍ɛ̄ŋ le̍ hūnɔ̄ɔ̍ E̍fi̍lu̍a̍tī ndu̍ yɔ̍nūŋ ni̍ māā Bɛ̍ti̍lɛ̍hɛ̄m.

²⁰Mɛ̄ɛ̍ nda̍ chɔ̍ ndu̍, mi̍ Che̍kɔ̍pū chu̍ā pōūwo̍ mbo̍ bāŋ o̍ sɛ̄i̍ ndɔ̄ɔ̍ chōo̍ le̍ wāa̍ nyɛ̄ lōōna᷄ŋ. A̍ bōōndi̍i̍ yāu̍wo̍ ho̍ō chō pōōnyīa̍ŋndo̍ wo̍ bɛ̍ɛ̍, pōū kōŋ chō ō bāŋāā o̍ sɛ̄i̍ ndɔ̄ ko̍ŋ chōo̍ le̍ lōōnɔ᷄ŋndo̍ a̍ ndu̍.

²¹Mi̍ Che̍kɔ̍pū hi̍a̍ū lāchī a̍ kɔ̄la̍ŋ nda̍ yu̍ŋgu̍ ndɔ̄ɔ̍. Mɛ̄ɛ̍ nda̍ hīōū fo̍ndāŋ tāŋgūl vīlɛ̄īyo̍ chō E̍dɛ̄ɛ̄ wo̍, ma̍ tāŋgūl ki̍āmndo̍ lo̍ŋ.

²²A̍ bōōndi̍i̍ Che̍kɔ̍pū wa̍ o̍ lɛ̄ŋndē lēŋ ni᷄ŋ nde̍, mi̍ Lūbɛ᷅ŋ po̍ ndɔ̄ su̍u̍ndā a̍ Bi̍li̍hāā, lāāndāā pɔ̄mbūa̍a̍ fi̍nyā ndɔ̄ wa̍ ō pīlɔ̍ɔ̄. O̍ ko̍ŋ kɔ̍ɔ̍lī, mi̍ Che̍kɔ̍pū fi̍nyā ndɔ̄ tu̍ɛ̍ī a̍ ndi̍ o̍kɔ̄ɔ̄. Pūa̍a̍ Che̍kɔ̍pū ve̍lū wa̍ ki̍nɛ̍i̍ ā wa̍ fa̍ū fa̍ū ŋ̄wāŋ tɔ̍ a̍ wānāā ŋīɔ̍ɔ̍ŋ.

²³Pūa̍a̍ o̍ ve̍lū nda̍ Li̍yā wa̍ nda̍ cho̍ ha̍ā ni̍. Lūbɛ᷅ŋ, po̍ tāse̍ Che̍kɔ̍pū wo̍, a̍ Si̍mīɔ̄ŋ, a̍ Li̍va̍ī, a̍ Chu̍dā, I̍sa̍a̍kā, a̍ Sɛ̍bu̍lɔ̄ŋ.

²⁴Pūa̍a̍ o̍ ve̍lū nda̍ Lu̍e̍chɛ̄l wa̍ nda̍ cho̍ ha̍ā ni̍. Chōo̍sɛ̍, a̍ Bɛ̍ŋnja̍mīŋ.

²⁵Pūa̍a̍ o̍ ve̍lū nda̍ Bi̍li̍hāā, bu̍ɛ̍i̍ Lu̍e̍chɛ̄l wo̍ wa̍ nda̍ cho̍ ha̍ā ni̍. Da᷅ŋ, a̍ Nāfi̍ta̍lī.

²⁶Pūa̍a̍ o̍ ve̍lū nda̍ Si̍li̍pāā, bu̍ɛ̍i̍ Li̍yā wo̍ wa̍ nda̍ cho̍ ha̍ā ni̍. Ka̍a̍dī, a̍ A̍sīɛ̄ɛ̄. Pūa̍a̍ Che̍kɔ̍pū ve̍lū ki̍nɛ̍i̍ Mɛ̄sōpōte̍e̍mīāā wa̍ a̍ cho̍ ka̍ŋ ni̍.

²⁷O̍ ko̍ŋ kɔ̍ɔ̍lī, mi̍ Che̍kɔ̍pū hu᷅ŋ o̍ Āa̍se̍ fi̍nyā ndɔ̄ lo̍ Ma̍mi̍lūē, mā vēēlū vɛ̍lɛ̄ lo̍ŋ āā, Kīlūīyā A̍bā, āa̍ E̍bīlāha᷅m fi̍nyā ndɔ̄ ma̍mā a̍ Āa̍se̍ fi̍nyā ndɔ̄ a̍ wa̍ īchāli̍ wa̍. Kɛ̍ ā vēēlū ni᷅ŋ fo̍ndāa̍ ho̍ō āā Hi̍būlɔ̄ŋ.

²⁸A̍ bōōndi̍i̍ ke̍ŋ, Āa̍se̍ wa̍ ni᷅ŋ wɔ̄sīla̍ŋ kɛ̄mɛ̄ a̍ be̍le̍-ŋɔ̍ma̍a̍ (180).

²⁹O̍ ko̍ŋ kɔ̍ɔ̍lī, mi̍ Āa̍se̍ wu᷅. Ndu̍ o̍o̍ yu̍wa̍ ni᷅ŋ ta̍u̍. Mɛ̄ɛ̍ o̍ vi᷅, mi̍ pūa̍a̍ ndūa̍a̍ chɔ̄ ndu̍, nda̍ yɔ̍nūŋ māā Che̍kɔ̍pū nda̍ I̍īsɔ̄ ni̍.