Read Southern Kisi Chɛ̄nɛ̍se̍ē 39 Bible Online

Chɛ̄nɛ̍se̍ē 39 - Southern Kisi bible

Chɛ̄nɛ̍se̍ē 39

¹O̍ ko̍ŋ kɔ̍ɔ̍lī, mɛ̄ɛ̍ Īsīmāli̍īya̍ kūɛ̄ kɔ̄lā lāŋ a̍ Chōo̍sɛ̍ I̍chi̍pī, mi̍ po̍ I̍chi̍pīnɔ̄ɔ̍ dīōla̍ŋ āā, Pɔ̍ti̍fāā o̍ pi̍a̍ndū Chōo̍sɛ̍. Pɔ̍ti̍fā ko̍ŋ yɛ̄, ndu̍ wa̍ wānāā chɔ̄ūwāa̍ ma̍ndā ma̍sā bɛ̍ndōo̍ I̍chi̍pī wa̍ bōlle̍ŋ ni̍.

²Kɛ̍, Mɛ̄lɛ̄ka̍ Ya̍a̍wɛ̄ɛ̄ o̍ wa̍ Chōo̍sɛ̍ kɔ̄ɔ̄lī. Ndu̍yɛ̍, mi̍ Mɛ̄lɛ̄ka̍ dūāū ndu̍ sa̍lā nāa̍ o̍ wa̍ o̍ wāna̍ ndɔ̄ bɛ̍ndū chi̍pīnɔ̄ɔ̍ ho̍ō lo̍ chi̍ɛ̍ī ni̍ŋ nda̍.

³Ndu̍yɛ̍, mi̍ wāna̍ ndɔ̄ bɛ̍ndōo̍ ho̍ō ō sāālu᷄ŋ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ Chōo̍sɛ̍ kɔ̄ɔ̄lī, ndu̍yɛ̍ mbo̍ dūāū ndu̍ sa̍lā o̍ nyɛ̄ o̍ nyɛ̄ ni᷄ŋ o̍ to̍sa̍.

⁴O̍ ko̍ŋ, mi̍ Pɔ̍ti̍fā o̍ cha᷅ Chōo̍sɛ̍ nyīnā ta̍u̍. Mbo̍ sīīŋgūū ndu̍ bu̍ɛ̍ī ndɔ̍ o̍ hi̍ni̍ kɔ̄l. Mbo̍ chūā ndu̍, mbo̍ hāndū ndu̍ chīɛ̄ī ndɔ̄ɔ̍ chīla̍ŋ a̍ nyɛ̄ o̍ nyɛ̄ o̍ nɔ̍ fa̍ū.

⁵Chɔ̍ŋ a̍ bōōndi̍i̍ Pɔ̍ti̍fā o̍ ha̍ndu̍ Chōo̍sɛ̍ chīɛ̄ī ndɔ̄ɔ̍ chīla̍ŋ a̍ nyɛ̄m ndɔ᷄ŋ fa̍ū ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍ū chīɛ̄ī I̍chi̍pīnɔ̄ɔ̍ ho̍ō sa̍lā le̍ sa̍bu̍ Chōo̍si̍ɔ̍ɔ̍. Nyɛ̄ o̍ nyɛ̄ ndu̍ o̍o̍ nɔ̍, chīɛ̄ī ni̍ŋ ni̍, chīɔ̄ɔ̄ŋ ndɔ᷄ŋ ni᷄ŋ ni̍, mi̍ Mɛ̄lɛ̄ka̍ Ya̍a̍wɛ̄ɛ̄ du̍a̍ū mu̍ŋ sa̍lā.

⁶Le̍ he̍ī, mi̍ Pɔ̍ti̍fā chu̍ā nyɛ̄ o̍ nyɛ̄ ndɔ̄ fa̍ū, mbo̍ yɔ̄ŋgū Chōo̍sɛ̍, mi̍ ŋ̄ wā o̍ bā ndɔ̄ɔ̍ bɛ̄ŋgu̍. Pɔ̍ti̍fā ndu̍ o̍o̍ nɔ̍ lɛ̍ būūla᷄ŋ o̍ būūla᷄ŋ che᷅le̍ŋ a̍ chīɛ̄ī ndɔ̄ɔ̍ o̍kɔ̄ɔ̄ le̍. Mɛ̄ɛ̍ nyɛ̄ dīa̍a̍ chūa̍a̍ mbō dē, ko̍ŋ ko̍ni̍ wa̍ ni᷅ŋ ndu̍ kūēē chīɛ̄ī ni̍ŋ ni̍. Chōo̍sɛ̍ yɛ̍ ndu̍ o̍o̍ na̍ŋ. Wānā a̍a̍ che᷅ ndu̍ dɔ̍ɔ̍ pɛ̍, nyɔ̄ɔ̍ hɛ̄na̍ŋ nu̍m.

⁷Mɛ̄ɛ̍ te̍le̍ŋnda̍ ti̍ŋ lā hīōū, mi̍ la̍nɔ̍ɔ̍ wāna̍ ndɔ̄ bɛ̍ndōo̍ ō sāā dɔ̍ɔ̍ hɔ̄lte̍ŋ lūɛ̄īyɔ̄ɔ̍ o̍ ndu̍ lo̍. Mbo̍ dīmūl Chōo̍sɛ̍ le̍ mā wa̍ nda̍ ndu̍.

⁸Kɛ̍ mi̍ Chōo̍sɛ̍ kɛ̄ɛ̄. Mbo̍ dīmūl ndu̍ āā, “I̍ di̍mūl lɔ̍ nu̍m, le̍ chō ya̍ I̍ cho̍ chīɛ̄ī ni̍ŋ na̍ŋ ndo̍, wāna̍ nī bɛ̍ndōo̍ ō pu̍ɛ̍ɛ̍ŋ ni᷅ŋ nyɛ̄ o̍ nyɛ̄ ndɔ̍ ŋ̄dīāl. Ndu̍yɛ̍, ō chūa̍ nyɛ̄ o̍ nyɛ̄ o̍ nɔ̍ mbo̍ hāndū ya̍ lāchī.

⁹Ō nɔ̍ lɛ̍ hāū mɛ̍ɛ̍ di̍mīāā o̍ nyɛ̄m wāā chīɛ̄ī ni̍ŋ na̍ŋ cho̍o̍ mbō hīōū ya̍ le̍. Ndu̍yɛ̍, ō hēndu̍l la̍ sāwā o̍ sāwā nyɛ̄ o̍ nyɛ̄ chōo̍ chi̍ɛ̍ī ni̍ŋ na̍ŋ te̍, mɛ̄ɛ̍ nūm, kāni̍ fo̍ndōle̍, la̍a̍ ndɔ̍ ŋ̄ chō ni̍. Vɛ᷅ mī to̍sa̍ sūɛ̍i̍ kɔ̄l vēsɛ̍i̍ bɛ̍ndūīī wāā le̍nde̍? Vɛ᷅ mī to̍sa̍ yɔ̄ŋ wɔ̄ɔ̍ŋ wāā le̍nde̍ Mɛ̍lɛ̄ka̍ o̍ hɔ̄l?”

¹⁰Lēpāa̍ o̍ lēpāa̍ chūa̍a̍ ho̍ō ō wa̍ Chōo̍sɛ̍ dīmūllo̍ le̍ mā wa̍ nda̍ ndu̍. Kɛ̍ Chōo̍sɛ̍ chɛ̍l ndu̍ dīōm mā wa̍ nda̍ ndu̍ le̍.

¹¹Kɛ̍ ō wa̍ a̍ pāa̍le̍ pi᷅lɛ̍, pāa̍le̍ le̍ŋ chūa̍a̍ ho̍ō pūa̍a̍ ndūāā bu̍ɛ̍īyāa̍ to̍sā wa̍llo̍ chīɛ̄ī ni̍ŋ nda̍ ā ve̍ chi̍ɛ̍ī ni̍ŋ te̍. Mi̍ Chōo̍sɛ̍ lūɛ̄ī wa̍li̍ ndu̍ o̍o̍ nɔ̍ le̍ tōsāa̍ wo̍ tōsāa̍.

¹²Mɛ̄ɛ̍ o̍ lu̍ɛ̍ī wa̍llo̍, mi̍ la̍nɔ̍ɔ̍ wāna̍ ndɔ̄ bɛ̍ndōo̍ ō kɔ̍ sa̍ā ndu̍ dōmāa̍ lēkɔ̄ɔ̍, mbo̍ dīmūl ndu̍ āā, “Hu̍ŋ ŋ̄ wa̍ na̍a̍ nūm.” Kɛ̍ mi̍ Chōo̍sɛ̍ hīālu᷄ŋ ndu̍, mbo̍ mɛ̄ī ndu̍ dōmāa̍ o̍ bā mbo̍ fūla᷄ŋ o̍ bɛ̍ɛ̄ a̍ kīlta̍ŋ.

¹³Mɛ̄ɛ̍ Chōo̍sɛ̍ mɛ̄i̍ ndu̍ dōmāa̍ o̍ bā, mbo̍ fūla᷄ŋ o̍ bɛ̍ɛ̄ a̍ kīlta̍ŋ,

¹⁴mbo̍ vēēlū pūa̍a̍ bu̍ɛ̍i̍yāa̍ to̍sā wa̍llo̍ o̍ ndu̍ lō chi̍ɛ̍īni̍ŋ nda̍. Mbo̍ dīmūl nda̍ āā, “Wāŋnda̍ lā tōfa̍ wɔ̍ i̍sɔ̍ɔ̍. Hi̍būlūi̍nɔ̍ pɔ̍nɔ̍ nūu̍ hīŋ ho̍ō chīɛ̄ī ni̍ŋ na̍ŋ ndo̍, bɛ̄ɛ̄la̍ŋ ko̍ni̍ o̍ hi᷅ŋ na̍a̍ tɛ̄ɛ̄mbūū ni̍. Lūɛ̄īyɔ̄ɔ̍ o̍ lu̍ɛ̍ī ya̍ chōo̍ nu̍a̍ā mbo̍ kīndī le̍ ya̍ kpūwāa̍ ni̍, mɛ̄ɛ̍ mi̍ mɛ̍lūl ndu̍ ye̍e̍la̍ŋ.

¹⁵Dīmīo̍o̍ nu̍a̍ā āā, I̍ ma̍l yi̍o̍o̍, mbo̍ hīālu᷄ŋ, mbo̍ mɛ̄ī ya̍ dōma̍ ndɔ̄ɔ̍ o̍ bā, mbo̍ fūla᷄ŋ a̍ kīlta̍ŋ.”

¹⁶O̍ ko̍ŋ kɔ̍ɔ̍lī, mi̍ la̍nɔ̍ɔ̍ Pɔ̍ti̍fā kɛ̍si᷄ŋ do᷅ma̍ ndɔ̄ ko̍ŋ īkɛ̄i̍, mbo̍ lō o̍ ko̍ŋ mi̍ wāna̍ ndɔ̄ bɛ̍ndōo̍ hūŋ.

¹⁷Mɛ̄ɛ̍ Chōo̍sɛ̍ wāna̍ ndɔ̄ bɛ̍ndōo̍ hīŋ, mi̍ la̍nɔ̍ɔ̍ dōo̍ŋ ndu̍ ko̍na̍ le̍nde̍ kpo̍lo̍to̍to̍. Mbo̍ dīmūl ndu̍ āā, “Po̍ chɛ᷅ Hi̍būlūi̍nɔ̍ ŋ̄ hīŋ ho̍ō chīɛ̄ī ni̍ŋ na̍ŋ ndo̍, ō chɛ᷄ŋ ha̍ū mbo̍ lūɛ̄ī ya̍ chōo̍ o̍ ya̍ lo̍ chi̍ɛ̍īni̍ŋ le̍ ya̍ kpūwāa̍.

¹⁸Kɛ̍ mɛ̄ɛ̍ ya̍ mɛ̍li̍ dɔ̍ɔ̍ ye̍e̍la̍ŋ, mbo̍ mɛ̄ī ya̍ dōma̍ ndɔ̄ɔ̍ o̍ bā, mbo̍ fūla᷄ŋ o̍ bɛ̍ɛ̄ a̍ kīlta̍ŋ.”

¹⁹Wāna̍ ndɔ̄ bɛ̍ndōo̍ bɛ̍ɛ̍, mɛ̄ɛ̍ la̍a̍ ndɔ̄ di̍mu̍l ndu̍ āā, “Nu̍a̍ā ki̍nɛ̍i̍ bu̍ɛ̍ī nūmndo̍ ō tōsa̍ a̍ ya̍ ni̍,” mbo̍ tūūlū kɔ̄l ta̍u̍.

²⁰Mbo̍ bīī Chōo̍sɛ̍, mbo̍ dūāū ndu̍ o̍ chīɛ̄ī mānyūmndo̍ ni᷄ŋ, nāa̍ māsā bɛ̍ndōo̍ I̍chi̍pī o̍ du̍a̍ū wa̍nāā ndūa̍a̍ wa̍lla̍ a̍ tɛ̍ɛ̍mbūū sɔ̍ɔ̍ŋ nda̍. Mi̍ Chōo̍sɛ̍ wā ni̍ko̍ o̍ chīɛ̄ī mānyūmndo̍ ni᷄ŋ lo̍ŋ.

²¹Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ wa̍ Chōo̍sɛ̍ kɔ̄ɔ̄lī, ndu̍yɛ̍, mbo̍ dūāū ndu̍ sa̍lā. Mi̍ Mɛ̄lɛ̄ka̍ tōsā mi̍ wāna̍ du̍a̍ū wāŋnda̍ o̍ chīɛ̄ī mānyūmndo̍ ni᷄ŋ ndo̍ ō chā Chōo̍sɛ̍ nyīnā ta̍u̍.

²²Ndu̍yɛ̍, mbo̍ hāndū Chōo̍sɛ̍ wānāa̍ cho̍ o̍ chīɛ̄ī mānyūmndo̍ ni᷄ŋ nda̍ ki̍nɛ̍i̍ chi᷅la̍ŋ. Dɛ̍nɛ̍ o̍ dɛ̍nɛ̍ wa̍ le̍ bɛ̄ɛ̄ndīa̍a̍ o̍ chīɛ̄ī mānyūm kōŋ ni᷄ŋ Chōo̍sɛ̍ ndu̍ o̍o̍ bɛ̍ɛ̍ndīāā ni᷅ŋ ni̍.

²³Wa̍li̍ o̍ wa̍li̍ Chōo̍sɛ̍ o̍ wa̍ chīla̍ŋ, wāna̍ ndu̍ o̍o̍ ma̍ndā ko̍ŋ wāŋnda̍ o̍ chīɛ̄ī mānyūmndo̍ ni᷄ŋ ndo̍, ndu̍ o̍o̍ bu̍u̍la̍ŋ ndɛ̍ bɛ̍ɛ̍ a̍ la̍ŋ te̍ fo̍ndōle̍, nyɛ̄ o̍ nyɛ̄ Chōo̍sɛ̍ ndu̍ o̍o̍ to̍sa̍ nɛ̄ŋīo̍o̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ nɛ̍ŋī ndu̍ ni̍. Mɛ̄lɛ̄ka̍ Ya̍a̍wɛ̄ɛ̄ o̍ wa̍ Chōo̍sɛ̍ kɔ̄ɔ̄lī.