Read Southern Kisi Chɛ̄nɛ̍se̍ē 4 Bible Online

Chɛ̄nɛ̍se̍ē 4 - Southern Kisi bible

Chɛ̄nɛ̍se̍ē 4

¹O̍ ko̍ŋ kɔ̍ɔ̍lī, mi̍ A̍dām hi̍vi᷄ŋ I̍fī la̍a̍ ndɔ̍ kɔ̄ɔ̄lī. Mi̍ I̍fī chu̍ā yo᷄llo̍, mbo̍ vīālū pōo̍. Mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ o̍ ma̍la̍ ya̍ mi̍ vi̍a̍lū pōo̍.” Le̍ he̍ī, mbo̍ kē ndu̍ dīōla̍ŋ āā Ke᷅ŋ.[3]

²Mūlīo̍o̍, mbo̍ vīālū E̍bɛ̄ɛ̄l pɔ̍mbɔ̄ ndɔ̄. Mi̍ E̍bɛ̄ɛ̄l si̍mnu᷄ŋ wa̍nā ma̍ndāā lāsāā. Mi̍ Ke᷅ŋ ndu̍ si̍mnu᷄ŋ wa᷅na̍ wa̍li̍ īchīɛ̄ɛ̄.

³Bōōndi̍i̍ pi᷅lɛ̍, mi̍ Ke᷅ŋ chu̍ā tɔ̄lɔ̄ɔ̄lā ndɔ̄la̍ŋ lā ti᷄ŋ mbo̍ sōlī la̍ŋ sa̍lāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍.

⁴Mi̍ E̍bɛ̄ɛ̄l ndu̍ bi̍ī chɔ̄lūāā tāsi̍a̍a̍ chɔ̄lūāā ndūa̍a̍ kōm nda̍, mbō dīī mbo̍ sōlī vīsīŋ nda᷄ŋ ŋ̄ kɛ̄ndɛ̄ kɛ̍ndɔ᷄ŋ sa̍lāa̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍nī kɔ̄l a̍ E̍bɛ̄ɛ̄l a̍ sa̍lā ndɔ̄ɔ̍.

⁵Kɛ̍ ō hīni̍ kɔ̍l a̍ Ke᷅ŋ a̍ sa̍lā ndɔ̄ɔ̍ le̍. Le̍ he̍ī, mi̍ Ke᷅ŋ tu̍u̍lū kɔ̄l. Mi̍ hɔ̄lla̍ tāmbū ndu̍ pɛ̍.

⁶Mi̍ Mɛ̄lɛ̄ka̍ Ya̍a̍wɛ̄ɛ̄ nyu̍nā Ke᷅ŋ āā, “Kɔ̄l tūū yɛ̄ɛ̍nɛ̍ ŋ̄ chō yɛ̄? Vɛ̄ hɔ̄lla̍ tɛ̄ɛ̄mbūūwo̍?

⁷Tē a̍ to̍sa̍ sūɛ̍i̍ bɛ̍nda̍ le̍ to̍sāa̍ ve̍ pɛ̍, nūm bɛ̍ɛ̍ I̍ hi̍ni̍ kɔ̄l a̍ nūm. Kɛ̍ tē a̍ to̍sa̍ su̍ɛ̍i̍ bɛ̍nda̍ le̍ tōsāa̍ ve̍ le̍, mɛ̄ɛ̍ ma̍nda̍ŋ kāni̍, yɔ̄ŋ wɔ̄ɔ̍ŋndo̍ chō nu̍m mɛ̄ŋgɛ̄lāa̍. Ō yēēma̍ mbō tīu̍ nu̍m bā, mbō kūūmbu̍ŋ nu̍m chōo̍ kpu̍lu̍. Kɛ̍ ndu̍yɛ̍ nɔ̍ ndu̍ kpāāyāa̍ chōo̍.”

⁸Pāa̍le̍ pi᷅lɛ̍ mi̍ Ke᷅ŋ di̍mūl E̍bɛ̄ɛ̄l pɔ̍mbɔ̄ ndɔ̄ āā, “Pōo̍ ŋ̄ kɔ̍ ke̍lāa̍ o̍ chīɛ̍i̍ ni᷄ŋ.” Mɛ̄ɛ̍ nda̍ kūɛ̄ o̍ chīɛ̍i̍ ni᷄ŋ, mi̍ Ke᷅ŋ de᷅l E̍bɛ̄ɛ̄l pɔ̍mbɔ̄ ndɔ̍ chōo̍, mbo̍ dīī ndu̍.

⁹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ nyūnā Ke᷅ŋ āā, “Ke᷅ŋ, ɔ̍ɔ̄ E̍bɛ̄ɛ̄l pɔ̍mbɔ̄ nūm?” Mi̍ Ke᷅ŋ mu̍lī āā, “I̍ si̍nā ba᷅ o̍ cho̍ le̍. Bāā ya̍ cho̍ pɔ̄mbɔ̄ nūu̍ māndāa̍ ni̍?”

¹⁰Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “To̍fa̍ wɔ̍ nyɛ̄ ŋ̄ tōsa̍ wo̍. Pɔ̄mbɔ̄ nu᷄m ŋ̄ dīī yo̍, tē ō wa̍ māā yɔ̄ŋɔ̄ɔ̄ pɛ̍ kōo̍ma̍ ndɔ̄ ma̍ cho̍ lɛ̄ŋ nda̍ŋ mā chō cha᷄ŋndo̍ nāa̍ ya̍ chu̍a̍ le̍ nu̍m māa̍ mīŋgūllo̍.

¹¹A̍ so̍li̍ kōo̍ma̍ pɔ̄mbɔ̄ nūmnda̍ŋ, mi̍ lɛ̄ŋnde̍ŋ lē sɔ̄ɔ̄sīāā ma̍ŋ. Le̍ he̍ī, sēndi̍o̍o̍ chō nu̍m chōo̍ a̍ lɛ̄ŋnde̍ŋ o̍kɔ̄ɔ̄.

¹²Tɔ̍l bɛ̍ɛ̍ nyɛ̄ lɛ̄ŋ, ō ni᷅ŋ ndɛ̍ le̍. Ndu̍yɛ̍ le̍ nyɛ̄ ŋ̄ tōsa̍ wo̍, wānā nya̍a̍na᷄ŋndo̍ ŋ̄ chō lō ni̍, wānā ba̍la̍ŋ fo̍ndōo̍ ŋ̄ chō lō o̍ chi̍e̍ēŋndo̍ chōo̍ ni̍.”

¹³Mi̍ Ke᷅ŋ di̍mūl Mɛ̄lɛ̄ka̍ Ya̍a̍wɛ̄ɛ̄ āā, “Nyɛ̄ pālāā ŋ̄ tūu̍ le̍ ya̍ wo̍ chō ō bɔ̄ɔ̍, I̍ nɔ̍lā ndu̍ bīūwɔ᷅ŋ te̍.

¹⁴Ā bīī ma̍ tūāū ya̍ o̍ wa̍li̍ īchīɔ̍ɔ̍ chōo̍. Ā tōū ya̍ vɛ̄lɛ̄ nu̍m īkɛ̄i̍, vɛ̄lɛ̄ āā, wānā nya̍a̍na᷄ŋndo̍ ya̍ cho̍ lō ni̍, wānā ba̍la᷄ŋ fo̍ndōo̍ o̍ chi̍e̍ēŋndo̍ chōo̍. Kɛ̄lɛ̄ŋgāā yālāā wānā o̍ wānā cha᷅ ya̍ le̍, ō nɔ̄lā mbō dīī ya̍.”

¹⁵Mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Ke᷅ŋ āā, “Ā di̍ī nu̍m te̍. Wānā o̍ wāna̍ di̍ī Ke᷅ŋ pɛ̍, I̍ mi̍ŋgu̍l wānā ko̍ŋ māa̍ sālā ŋɔ᷄mmɛ̍ū.” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ ha̍ndū Ke᷅ŋ tāāmāsi̍o̍o̍, māā wānā chɔ̍ ndu̍ bɛ̍ɛ̍ ō di̍ī ndu̍ le̍.

¹⁶O̍ ko̍ŋ kɔ̍ɔ̍lī, mi̍ Ke᷅ŋ fa̍ŋa̍ŋ Mɛ̍lɛ̄ka̍ o̍ hɔ̄l, mbo̍ kūā o̍ lɛ̄ŋndē Nɔ̍ɔ̍dīle̍ŋ[4] ni᷄ŋ, I̍dɛ̄ŋ ma̍lu̍āŋ, bā pāa̍le̍ŋ lē chāŋ ndo̍.

¹⁷Mi̍ Ke᷅ŋ hi̍vi᷄ŋ la̍a̍ ndɔ̍ kɔ̄ɔ̄lī, mbo̍ chūā yo᷄llo̍. Mbo̍ vīālū pōo̍, dīōla̍ŋ āā I̍nɔ̍kī. Mi̍ Ke᷅ŋ ta̍ŋgūl chi̍o̍o̍. Mbo̍ kē ndu̍ dīōla̍ŋ āā I̍nɔ̍kī, mɛ̄ɛ̍ po̍ ndɔ̄ɔ̍ nɔ̄ dīōla̍ŋ yɛ̍.

¹⁸Mi̍ I̍nɔ̍kī bɛ̍ɛ̍ vi̍a̍lū pōo̍ dīōla̍ŋ I̍lu̍a̍dī. Mi̍ I̍lu̍a̍dī vi̍a̍lū Mɛ̄hūcha̍yɛ̄l. Mi̍ Mɛ̄hūcha̍yɛ̄l vi̍a̍lū pōo̍ dīōla̍ŋ āā Mɛ̄tūsi̍a̍yɛ̄ɛ̄. Mi̍ Mɛ̄tūsi̍a̍yɛ̄ɛ̄ vi̍a̍lū pōo̍ dīōla̍ŋ āā Le̍i̍mɛ̍kī

¹⁹Mi̍ Le̍i̍mɛ̍kī chu̍ā lāāndūa̍a̍ ā ŋīɔ̍ɔ̍ŋ, ō pīlɔ̍ɔ̄ dīōla̍ŋ āā A̍dā, ō pīlɔ̍ɔ̍ āā Si̍lāā.

²⁰Mi̍ A̍dā vi̍a̍lū pōo̍ dīōla̍ŋ āā, Cha̍bāā. Wānāa̍ fu̍la̍ o̍ pūlāle̍ Cha̍bāāle̍ŋ chōo̍ wa̍ nda̍ wa̍ wānāā māndāā lāchɔ̄lūa̍a̍ ni̍, mā lɔ̄l o̍ tɛ̍ndɛ̄i̍la̍ tu̍a̍ndāāla̍ŋ ni᷄ŋ.

²¹Cha̍bāā pɔ̄mbɔ̄ ndɔ̍ wa̍ Chu̍bāā ni̍. Pūlāle̍ Chu̍bāāle̍ŋ nda̍ hi᷄ŋ a̍ tōwāa̍ lɔ̄ɔ̍ a̍ sɛ̄ŋnde̍ŋ hɔ̄ŋndo̍ ni̍.

²²Si̍lāā bɛ̍ɛ̍ mbo̍ vīālū pōo̍ dīōla̍ŋ āā Tūbāāl Ke᷅ŋ. Ndu̍ wa̍ sūmnɔ̍ tāso̍o̍ ni̍. Tūbāāl Ke᷅ŋ yēma̍ ndɔ̍ wa̍ Na̍a̍mā ni̍.

²³Bōōndi̍i̍ pi᷅lɛ̍, mi̍ La̍mɛ̍kī di̍mūl lāāndāā ndūa̍a̍ āā, “A̍dā nya̍ Si̍lāā, lāāndūa̍a̍ La̍mɛ̍kīa̍a̍, lā ya᷄ŋ ni᷅la̍ŋ, I̍ di̍ī pōo̍ le̍ ya̍ bōlīo̍o̍, po̍ chu̍a̍ pīāāndōo̍ ndu̍ lɔ̍ɔ̄ ya̍, kɛ̍ mi̍ di̍ī ndu̍.

²⁴Sāwāa̍ chō āā, tē wānā di̍ī Ke᷅ŋ pɛ̍, ā mīŋgu̍l wānā ko̍ŋ māa̍ sālā ŋɔ᷄mmɛ̍ū. La̍mɛ̍kī ndu̍, tē wānā di̍ī ndu̍ pɛ̍, ā mīŋgu̍l wānā ko̍ŋ māa̍ be̍le̍-ŋɔ̍mmɛ̍ū a̍ lē ŋɔ᷄mmɛ̍ū.”

²⁵Mi̍ I̍fī hi̍a̍ū pɔ̍nɔ̍ɔ̍ kɔ̄ɔ̄lī, mbo̍ chūā vɛ̄lɛ̄ yo᷄llo̍. Mbo̍ vīālū pōo̍. Mbo̍ dīmī āā, “Mɛ̄lɛ̄ka̍ ke̍ ya̍ po̍ chēle̍ŋ sɔ̍ŋgɔ̍ E̍bɛ̄ɛ̄l wo̍, ō Ke᷅ŋ di̍ī yo̍.” Mbo̍ kē ndu̍ dīōla̍ŋ āā Sɛ̍ɛ̍tī.[5]

²⁶Sɛ̍ɛ̍tī bɛ̍ɛ̍ mbo̍ vīālū pōo̍. Mbo̍ kē ndu̍ dīōla̍ŋ āā I̍nɔ̍ɔ̍sī. A̍ bōōndi̍i̍ ndūɛ̍i̍ chūāā ŋ̄wāŋndā chīe̍e̍ a̍ ka̍ndu̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍ ni̍.