Read Southern Kisi Chɛ̄nɛ̍se̍ē 41 Bible Online

Chɛ̄nɛ̍se̍ē 41 - Southern Kisi bible

Chɛ̄nɛ̍se̍ē 41

¹Mɛ̄ɛ̍ wɔ̄sīla̍ŋ lā hīōū lā tīɔ̍ɔ̍ŋ, mi̍ māsā bɛ̍ndōo̍ le̍ I̍chi̍pī sɔ᷅l lūa̍a̍ŋ. O̍ lɔ̄mā ndɔ̄ma̍ sɔ̍la᷄ŋ ni᷄ŋ, ō wa̍ īsīsi̍ o̍ Pīo̍o̍ Na̍īl kɔ̍ŋgɔ̍.

²O̍ lē pīlɛ̍ ni᷄ŋ kpe̍, mbo̍ chā mi̍ nāūwāā chēlu̍lɛ̍i̍ya̍a̍ kɛ̍ndɛ̄ kɛ̍ndīa̍a̍ ā fūlā pīo̍o̍ ni᷄ŋ nda̍ ŋɔ̍mmɛ̍ū, a̍ wā bīllo̍ dīo̍o̍ o̍ pīo̍o̍ kɔ̄ŋgɔ̍.

³O̍ ko̍ŋ kɔ̍ɔ̍lī, mbo̍ chā vɛ̄lɛ̄ mi̍ nāūwāā ŋɔ᷄mmɛ̍ū ā chēle̍ŋ ā fūlā pīo̍o̍ ni᷄ŋ, kɛ̍ nda̍ nda̍ ā nyāūvɛ̍i̍ sɛ̍ɛ̍ŋ sɛ̍ɛ̍ŋ. Mɛ̄ɛ̍ nda̍ fūla̍, ma̍ hu᷄ŋ si᷅m nāūwa̍ ā pīli̍a̍a̍ īkɛ̄i̍ o̍ pīo̍o̍ kɔ̄ŋgɔ̍.

⁴Mi̍ nāūwāā nyāūvɛ̍i̍ya̍a̍ ŋɔ̍mmɛ̍ūva̍ ha̍ā ā sɔ̄ɔ̄ŋgūū ma̍ dīā ā chēlu̍lɛ̍i̍ya̍a̍ ŋɔ̍mmɛ̍ūva̍ pa̍ku̍. O̍ ko̍ŋ kɔ̍ɔ̍lī, mi̍ māsā bɛ̍ndōo̍ ho̍ō tīāndū.

⁵Hīni̍la̍ŋ vɛ̄lɛ̄ kpɛ̍ɛ̍, mi̍ lūa̍a̍ŋ mā hīālū ndu̍. Lūa̍a̍ŋ hīɔ̄lɔ̄ɔ̍ ndu̍, mbo̍ sɔ̄l vɛ̄lɛ̄ lɔ̄mā chēle̍ŋ. Mbo̍ chā tɔ̄lɔ̄ɔ̄ nda̍ vēēlū āā wi̍tīi̍yo̍ŋ ndo̍ bɛ̄ŋgo̍o̍ ndu̍ pīlɛ̍. Kɛ̍ yāsāla̍ŋ lā wa̍ o̍ bɛ̄ŋgu̍ pi᷅lɔ̍ɔ̍ ho̍ō lā ŋɔ᷄mmɛ̍ū. Lā wa̍ lā kūāmāā lɔ̍pī lɔ̍pī bɛ̍ndū.

⁶O̍ ko̍ŋ kɔ̍ɔ̍lī, mbo̍ chā mi̍ bɛ̄ŋgu̍ ŋ̄wi̍tīi̍ chēle̍ŋ ō wūl. Yāsāla̍ŋ lā wa̍ o̍ bɛ̄ŋgu̍ pi᷅lɔ̍ɔ̍ ho̍ō la̍ŋ ŋɔ̍mmɛ̍ū. Kɛ̍ lā wa̍ lā nyāma̍lɛ̍i̍, a̍ hūēīyīī tūu̍ i̍ cha᷅ŋ ba᷅ pāa̍le̍ŋ lē chāŋndo̍ ve̍.

⁷O̍ ko̍ŋ kɔ̍ɔ̍lī, mbo̍ chā mi̍ yāsāla̍ nya̍ma̍lɛ̍i̍la̍ŋ nda᷅ŋ lā mīsī mīsī yāsāla̍ ŋɔ᷄mmɛ̍ūlā kūāmāālā kɛ̄ndɛ̄ kɛ̍ndɛ̄la̍ŋ kpo̍u̍. O̍ ko̍ŋ kɔ̍ɔ̍lī, mi̍ māsā bɛ̍ndōo̍ tīāndū o̍ lūa̍a̍ŋ. Mbo̍ sīnā māā lūa̍a̍ŋ o̍ wa̍ sɔ̄llo̍ ni̍.

⁸Mɛ̄ɛ̍ pāa̍le̍ŋ lē sɛ̄ īdīi̍yo̍, mbo̍ sāā būūla᷄ŋndo̍ a̍ lɔ̄mā o̍ sɔ̍l la̍ŋ. Mbo̍ vīām le̍ wānāā māŋgālāa̍ I̍chi̍pī kpo̍u̍ a̍ wānāa̍ nɔ̍ kɔ̄l kālu̍ bɛ̍ndōo̍ wa̍. Mi̍ māsā bɛ̍ndōo̍ chɔ̄m nda̍ lɔ̄mā o̍ sɔ̍l la̍ŋ. Kɛ̍ nda̍ ki̍nɛ̍i̍, ō pīlɛ̍ bɛ̍ɛ̍ nɔ̍la̍ ma̍ŋ tɛ̄ɛ̄sīāā nāa̍ māsāa̍ chūā le̍.

⁹O̍ ko̍ŋ, mi̍ bōllē wānāa̍ ta̍lāl ma̍sā bɛ̍ndōo̍ mūɛ̄īya̍ŋ nda̍ ō dīmūl māsāa̍ āā, “He̍ī ī yīya̍la̍ŋ ya̍ hāū māā I̍ to̍sa̍ sūɛ̍i̍ wɔ̍ɔ̍ŋ.

¹⁰Māsāa̍, bōōndi̍i̍ ŋ̄ dɔ̄ɔ̄nu᷄ŋ tu̍mbe̍ a̍ ya̍ na̍a̍ bōllē wānāā nūm a̍ lu̍a̍māā bēe̍dīi̍ya̍, ma̍ yɔ̄ŋgū na̍a̍ o̍ bīyɔ̄ɔ̍ ni᷄ŋ o̍ chīɛ̄ī wāna̍ cho̍ pūa̍a̍ chɔ̄ūwāa̍ ma̍ndā nu̍m nda̍ chīla̍ŋ ndo̍ ve̍,

¹¹na̍a̍ ŋi̍ɔ̍ɔ̍ŋ mi̍ ŋ̄ sɔ̄l lūa̍a̍ŋ nyūmmā pīli̍āŋ kpe̍. Na̍a̍ ndu̍ mi̍ ŋ̄ sɔ̄l lūa̍a̍ŋ vēllāa̍ vēllē yɛ̍ yɛ̍, a̍ tɛ̄ɛ̄sīa̍a̍ yɛ̍ yɛ̍.

¹²Po̍ Hi̍būlūi̍nɔ̍ chu̍a̍ pīāāndū pīlɛ̍ ō wa̍ o̍ bīyɔ̄ɔ̍ ni᷄ŋ o̍ chīɛ̄ī mānyūm kōŋ ni᷄ŋ na̍a̍ nda̍ā, mi̍ ŋ̄ dīmūl ndu̍ lɔ̄mā sɔ̄la᷄ŋ ma᷅ŋ. Pūa̍a̍ chɔ̄ūwāa̍ ma̍ndā nu̍m nda̍ wānā nda̍ bānāa̍, chɛ̄ ndɔ̄ɔ̍ o̍ cho̍ ni̍. Mɛ̄ɛ̍ na̍a̍ ŋ̄ chɔ᷄m po̍ Hi̍būlūi̍nɔ̍ɔ̍ ho̍ō, mbo̍ tɛ̄ɛ̄sīāl na̍a̍ lɔ̄mā sɔ̄la᷄ŋ ma᷅ŋ. Na̍a̍ na̍a̍ ŋi̍ɔ̍ɔ̍ŋ mbo̍ tɛ̄ɛ̄sīāl na̍a̍ ma̍ŋ vēllāa̍ vēllē.

¹³Ndu̍yɛ̍, mɛ̄ɛ̍ o̍ tɛ̍ɛ̍si̍a̍a̍ ma̍ŋ yɛ̍, le̍nde̍ ki̍nɛ̍i̍ i̍ yɔ̍nu̍ŋ ni̍. Mi̍ sɔ̍lā mīŋgīo̍o̍ o̍ wa̍li̍ nūu̍ ni᷄ŋ mɛ̄ɛ̍ o̍ di̍mi̍ yɛ̍. Wāna̍ wa̍ wānāa̍ lu̍ām be̍e̍dīi̍ nu̍mndo̍ wa̍ chīla̍ŋ ndō ndu̍ ndu̍ mbo̍ sɔ̄lā lāndɔ̄ɔ̍.”

¹⁴Chɔ̄mndo̍ ndu̍ le̍nde̍, mi̍ māsā bɛ̍ndōo̍ o̍ vīām le̍ Chōo̍sɛ̍. Vīōmɔ̄ɔ̍ le̍ ndu̍, ma̍ sōlī ndu̍ chɔ̍ chɔ̍ o̍ chīɛ̄ī mānyūmndo̍ ni᷄ŋ. Mi̍ Chōo̍sɛ̍ sēndī sīɛ̍i̍ye̍, mbo̍ wōōnu᷄ŋ nyɛ̍lā chēle̍ŋ. Mbo̍ hu᷄ŋ si᷅m māsā bɛ̍ndōo̍ lāchī.

¹⁵Mi̍ māsāa̍ dīmūl Chōo̍sɛ̍ āā, “Lūa̍a̍ŋ ya̍ sɔ̍l ni̍, kɛ̍ wānā cho̍ o̍ tɛ̍ɛ̍sīāl la̍ ma̍ŋ te̍. Ndu̍yɛ̍, mi̍ tu̍ɛ̍ī māā tē wānā chɔ̍m nu̍m lɔ̄mā ndɔ̄ma̍ sɔ̍la᷄ŋ pɛ̍, māā ā nɔ̄lā mā tɛ̍ɛ̍si̍a̍l ndu̍ ma̍ŋ.”

¹⁶Mi̍ Chōo̍sɛ̍ dīmūl māsā bɛ̍ndōo̍ āā, “Ya̍ pi̍la̍ I̍ nɔ̍lā le̍. Kɛ̍ ndu̍yɛ̍, Mɛ̄lɛ̄ka̍ chō nu̍m ma̍ŋ tɛ̄ɛ̄sīāl, māsānɔ̄ɔ̍.”

¹⁷Mi̍ māsāa̍ lō o̍ ko̍ŋ mbo̍ dīmūl Chōo̍sɛ̍ āā, “Mi̍ sɔ᷅l lūa̍a̍ŋ, I̍ wa̍ īsīsi̍ o̍ Pīo̍o̍ Na̍īl kɔ̍ŋgɔ̍.

¹⁸Mi̍ cha᷅ nāūwa̍ fūlāa̍ pīo̍o̍ ni᷄ŋ nda̍ ŋɔ̍mmɛ̍ū, ā wa̍ ā chēlu̍lɛ̍i̍ nyɛ̍ kɛ̄ndɛ̄ kɛ̍ndɛ̄. Mɛ̄ɛ̍ nda̍ fūla̍ o̍ kɔ̄ŋgɔ̍, a̍ sāā bīllo̍ dīo̍o̍ o̍ pīo̍o̍ kɔ̄ŋgɔ̍.

¹⁹O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ nāūwāā chēle̍ŋ nda̍ ŋɔ̍mmɛ̍ū, ma̍ fūlā pīo̍o̍ ni᷄ŋ. Kɛ̍ ā wa̍ ā nyāūvɛ̍i̍ sɛ̍ɛ̍ŋ sɛ̍ɛ̍ŋ. O̍ lɛ̄ŋndē I̍chi̍pīle̍ŋ ni᷄ŋ ki̍nɛ̍i̍, I̍ chi̍ wɔ̍ na̍u̍vāā nyāūvɛ̍i̍ya̍a̍ wa̍ā le̍nde̍ le̍.

²⁰Mi̍ cha᷅ mi̍ nāūwāā nyāūvɛ̍i̍ya̍ ha̍ā ā sɔ̄ɔ̄ŋgūū ma̍ dīā nāūwāā chēlu̍lɛ̍i̍ya̍a̍ ŋɔ̍mmɛ̍ūva̍.

²¹Kɛ̍, a̍ di̍o̍ nda̍ dē ko̍ŋ nda̍ wo̍ fa̍ū, wānā a̍a̍ cha᷅ ko̍ bɛ̍ɛ̍ māā ā di̍ nyɛ᷅ o̍ nyɛ̄ le̍. Kāni̍, mɛ̄ɛ̍ nda̍ wa̍ o̍ tāse̍la̍ ndɔ̄ɔ̍ ā nyāūvɛ̍i̍ sɛ̍ɛ̍ŋ yɛ̍ ko̍ni̍ nda̍ wa̍ ni̍. Sɔ̄llo̍ ma̍ŋ le̍nde̍, mi̍ ti̍a̍ndū.

²²O̍ ko̍ŋ kɔ̍ɔ̍lī, mi̍ sɔ᷅l vɛ̄lɛ̄ lɔ̄mā chēle̍ŋ. Mi̍ cha᷅ bɛ̄ŋgu̍ ŋ̄wi̍tīi̍yo̍ ndu̍ pīlɛ̍. Yāsāla̍ŋ lā wa̍ o̍ bɛ̄ŋgu̍ pi᷅lɔ̍ɔ̍ ho̍ō la̍ŋ ŋɔ̍mmɛ̍ū. Lā wa̍ lā kūāmāā nyɛ̄ kɛ̄ndɛ̄ lɔ̍pī lɔ̍pī bɛ̄ndū.

²³O̍ ko̍ŋ kɔ̍ɔ̍lī, mi̍ cha᷅ bɛ̄ŋgu̍ ŋ̄ wi̍tīi̍ che᷅le̍ŋ. Yāsāla̍ŋ lā wa̍ o̍ bɛ̄ŋgu̍ pi᷅lɛ̍ kōŋ lā ŋɔ᷄mmɛ̍ū. Kɛ̍, lā wa̍ lā nyāma̍lɛ̍i̍ a̍ hūēīyīī tūu̍ i̍ cha᷅ŋ ba᷅ pāa̍le̍ŋ lē chāŋ ndo̍ ve̍.

²⁴O̍ ko̍ŋ kɔ̍ɔ̍lī, mi̍ yāsāla̍ nya̍ma̍lɛ̍i̍la̍ŋ nda᷅ŋ lā mīsī mīsī wi̍tīi̍ŋ ŋ̍ ku̍a̍māā kɛ̄ndɛ̄ kɛ̍ndɛ̄ŋ yāsāla̍ ŋɔ̍mmɛ̍ū wo̍ŋ pa̍ku̍. Kɛ̍, mɛ̄ɛ̍ ya̍ chɔ̍m wānāā māŋgālāa̍ lūa̍a̍ŋ ma᷅ŋ, ā nɔ̄la̍ ma̍ŋ tɛ̄ɛ̄sīāā le̍.”

²⁵O̍ ko̍ŋ kɔ̍ɔ̍lī, mi̍ Chōo̍sɛ̍ dīmūl māsā bɛ̍ndōo̍ I̍chi̍pī āā, “Lɔ̄mā sālā tīɔ̍ɔ̍ŋ mā ŋ̄ sɔ᷄l la̍ŋ Māsāa̍, yɛ̄ pīlɛ̍ kpe̍ ma̍ cho̍ ni̍. Nyɛ̄ Mɛ̄lɛ̄ka̍ chō hūnɔ̄ɔ̄ tōsā wo̍ ndu̍ o̍ chɔ̍m nu̍m ho̍ō ni̍.

²⁶Nāūwāā chēlu̍lɛ̍i̍ya̍a̍ kɛ̍ndīāā ŋɔ᷄mmɛ̍ūwa̍, a̍ bɛ̄ŋgu̍ ŋ̄wi̍tīi̍ nɔ̍ yāsāla̍ ŋɔ᷄mmɛ̍ūlā, kūāmāālā lɔ̍pī lɔ̍pī la̍ŋ ndo̍, ā si᷄m le̍ wɔ̄sīla̍ŋ lā ŋɔ᷄mmɛ̍ū. Nyɔ̄ɔ̍ ō pīlɛ̍ kpe̍ tāāmāsi̍la̍ lāŋ lā chō ni̍.

²⁷Nāūwāā nyāūvɛ̍i̍ya̍a̍ ŋɔ̍mmɛ̍ūva̍ a̍ fu̍la̍ pīo̍o̍ ni᷄ŋ nda̍, a̍ bɛ̄ŋgu̍ ŋ̄wi̍tīi̍ nɔ̍ yāsāla̍ ŋɔ᷄mmɛ̍ūlā hūēīyīī tūu̍ i̍ cha᷅ŋ ba᷅ pāa̍le̍ŋ lē chāŋ ndo̍ ve̍ ī nyāma̍li̍a̍a̍ mi̍ lā fōōfi̍ la̍ŋ, lā si᷄m le̍ wɔ̄sīla̍ŋ lā ŋɔ᷄mmɛ̍ū. Lā chɔ᷄m māā yīa̍a̍ŋ mā chō wā le̍ wɔ̄sīla̍ŋ lā ŋɔ᷄mmɛ̍ū.

²⁸Mɛ̄ɛ̍ ya̍ di̍mu̍l nu̍m su̍ŋ yɛ̍ ko̍ni̍ Māsāa̍. Nyɛ̄ Mɛ̄lɛ̄ka̍ chō hūnɔ̄ɔ̄ tōsā wo̍ ndu̍ o̍ chɔ̍m nu̍m ni̍.

²⁹Ī chō hūnɔ̄ɔ̄ yɔ̄nɔ᷄ŋ le̍ wɔ̄sīla̍ŋ lā ŋɔ᷄mmɛ̍ū, nyɛ̄ dīa̍a̍ sɔ̄lāŋ ni̍ŋ hɔ̍lɔ̄bi̍ hɔ̍lɔ̄bi̍ o̍ lɛ̄ŋndē I̍chi̍pīle̍ŋ ni᷄ŋ kpo̍u̍.

³⁰Kɛ̍ tē wɔ̄sīlā ŋɔ᷄mmɛ̍ūlā lāŋ lā hīōū pɛ̍, yīmā bɛ̄ndūa̍ŋ mā de᷄l le̍ wɔ̄sīla̍ŋ lā ŋɔ᷄mmɛ̍ū. Yīa̍a̍ŋ mā wā ni̍ŋ ha̍a̍a̍ mī wāŋnda̍ ā pu̍ɛ̍ɛ̍ŋ a̍ te̍le̍ŋnda̍ nyɛ̄ dīa̍a̍ wa̍ ta̍u̍ la̍ŋ. Yīa̍a̍ŋ mā fūlī ni̍ŋ lɛ̄ŋnde̍ŋ yu̍ku̍.

³¹Wāŋnda̍ pūɛ̄ɛ̄ŋ ni̍ŋ a̍ te̍le̍ŋnda̍ nyɛ̄ dīa̍a̍ wa̍ ta̍u̍ o̍ lɛ̄ŋnde̍ŋ ni᷄ŋ nda̍ŋ a̍ yīma̍ wa᷅ ni̍ŋ o̍ lɛ̄ŋnde̍ŋ ni᷄ŋ nda̍ŋ. Kāni̍ fu̍u̍le̍, mā wɔ̄ū ni̍ŋ ma̍ bɔ̍ɔ̍.

³²Sɔ̄l sālā tīɔ̍ɔ̍ŋ ŋ̄ sɔ᷄l lūa̍a̍ŋ ma᷅ŋ ndo̍, nyɛ̄ ko̍ŋ si̍m le̍ ndu̍ wo̍ cho̍ ni̍, māā Mɛ̄lɛ̄ka̍ chīi̍ kɛ̄ɛ̄sīāā māā ō chō sūɛ̍i̍ he̍ī tōsā mɛ̄ɛ̍ o̍ di̍mi̍ yɛ̍ o̍ bōōndi̍i̍ bi̍ŋgī bɛ̄ŋgu̍.

³³“Le̍la̍ŋ, hɛ̍li̍ wa᷅ŋndo̍ o̍ nɔ̍ kɔ̄l kālo̍o̍, ndu̍yɛ̍ mbo̍ nɔ̄ tāāsi̍o̍o̍ wo̍, mā ha̍ndu̍ ndu̍ lɛ̄ŋndē I̍chi̍pīle̍ŋ lāchī.

³⁴O̍ ko̍ŋ kɔ̍ɔ̍lī, mā hɛ̍li̍ wānāā lēbōlla̍ bā o̍ bā I̍chi̍pī. Nyɛ̄ dīāā o̍ nyɛ̄ dīa̍a̍ cho̍ sɔ̄la᷄ŋ I̍chi̍pī o̍ wɔ̄sīlā ŋɔ᷄mmɛ̍ūlā nyɛ̄ dīa̍a̍ chō wā ta̍u̍ la̍ŋ ni᷄ŋ, tē ō wa̍ nyɛ̄ pīɔ̄ūvāā sālā ŋūɛ̍ɛ̍nu̍ pɛ̍, kūmbōo̍ ō pīlɔ̍ɔ̍ ki̍nɛ̍i̍ mī wānāā lēbōlla̍ ha̍ā ā mānda̍ ndu̍.

³⁵Di̍mu̍l nda̍ mā chūūŋgi̍a̍a̍ nyɛ̄ dīa̍a̍ o̍ wɔ̄sīlā ŋɔ᷄mmɛ̍ūlā nyɛ̄ dīa̍a̍ chō wā ta̍u̍ la̍ŋ bɛ̄ŋgu̍. Ā chūūŋgi̍a̍a̍ ndu̍ mā dōvi̍ ndu̍ o̍ chi̍e̍e̍ŋ bɛ̍ndūŋ yɛ̍ yɔ̍ŋ ni᷄ŋ I̍chi̍pī, mā mānda̍ ndu̍ nyɛ̄ kɛ̄ndɛ̄ kɛ̍ndɛ̍ī.

³⁶Tē wɔ̄sīlā ŋɔ᷄mmɛ̍ūlā yīa̍a̍ŋ mā chō wā I̍chi̍pi̍ chōo̍ la̍ŋ lā fūūlu̍u̍ pɛ̍, nyɛ̄ dīāā ko᷄ŋ wa᷅ ni᷅ŋ le̍ lɛ̄ŋnde̍ŋ māndāa̍ ni̍. Ko̍ŋ to̍sā ni̍, yīa̍a̍ŋ mā hu᷄ŋ bɛ̍ɛ̍ wāŋnda̍ chu̍ū a̍ ma̍ŋ te̍.”

³⁷Mi̍ māsā bɛ̍ndōo̍ le̍ I̍chi̍pī nda̍ wānāā bɛ̄ndūa̍a̍ lēlɛ̄ŋnda̍ ā chɛ̄la᷅ŋ a̍ kɛ̄ɛ̄sīāā Chōo̍sɛ̍ hīŋ ndo̍.

³⁸Mi̍ māsā bɛ̍ndōo̍ dīmūl nda̍ āā, “Ŋ̄ nɔ̍lā wa̍nā sa̍a̍lɔ᷄ŋ mbō bɛ̄nda̍ le̍ fo̍ndāŋ kōŋ mbō hīōū Chōo̍sɛ̍ le̍. Kāni̍ fu̍u̍le̍, Mɛ̄lɛ̄ka̍ Nyi̍nā ndɔ̄ɔ̍ cho̍ ndu̍ kɔ̄ɔ̄lī ni̍.”

³⁹Mi̍ māsāa̍ lō o̍ ko̍ŋ mbo̍ dīmūl Chōo̍sɛ̍ āā, “Nūm, i̍ Mɛ̄lɛ̄ka̍ chɔ̄m nu̍m sɔ̄ɔ̍ŋ mu᷅ŋ ki̍nɛ̍i̍ nu̍a̍ā, wānā o̍ wānā bɛ̍ɛ̍ cho̍ mbō nɔ̄ kɔ̄l kālo̍o̍, ndu̍yɛ̍ mbō nɔ̄ tāāsi̍o̍o̍ māā nūm te̍.

⁴⁰Le̍la̍ŋ nu᷄m cho̍ wā chīɛ̄ī ni̍ lēmāsāa̍ chīla̍ŋ ni̍. Wānāā nīa̍a̍ ki̍nɛ̍i̍, nyɛ̄ o̍ nyɛ̄ ŋ̄ dīmu̍l nda̍, ndu̍ nda̍ nɔ̄ ā tōsa̍ ni̍. Mɛ̄ɛ̍ o̍ nɛ̄i̍ lēmāsāa̍ chōo̍ mi̍ hi̍a̍ū nu̍m, kɛ̍ nyɛ̄ o̍ nyɛ̄ ni᷅ŋ nu᷄m cho̍ chīla̍ŋ ni̍.”

⁴¹Mbo̍ dīmūl Chōo̍sɛ̍ āā, “Nūm Chōo̍sɛ̍, dɛ̍nɛ̍ o̍ dɛ̍nɛ̍ cho̍ lɛ̄ŋndē I̍chi̍pīle̍ŋ fa̍ū, I̍ ha̍ndu̍ nu̍m hāū chi᷅la̍ŋ.”

⁴²Mi̍ māsā bɛ̍ndōo̍ mūli᷄ŋ mbo̍ sōli᷄ŋ ke̍lɛ̄i̍ lēmāsɛ̄i̍ o̍ īsū. Ta̍mbūe̍i̍ lēlɛ̄ŋndo̍ le̍ I̍chi̍pī ō wa̍ o̍ kēlɛ̄i̍ he̍ī, mbo̍ wōū Chōo̍sɛ̍ o̍ īsū. Mbo̍ wōū ndu̍ nyɛ̄lā kɛ̄ndɛ̄ kɛ̍ndɛ̄la̍ŋ. Mbo̍ wōū ndu̍ yɔ̄lɔ᷄ŋ ŋ̄ko̍o̍līi̍yo̍ŋ o̍ lābo̍lō.

⁴³O̍ ko̍ŋ kɔ̍ɔ̍lī, nyɛ̄ nyāāna᷄ŋ wa̍ le̍ wāna̍ wa᷅ ndu̍ īkɛ̄i̍ o̍ māsāle̍ŋ chōo̍ wo̍, mbo̍ tōsā ma̍ hēēlū Chōo̍sɛ̍ lēni᷄ŋ, mbo̍ chāl. Mi̍ wāŋnda̍ hīāū nyɛ̄ nyāāna᷄ŋndo̍ lāchī, mā kūā a̍ yōndāa̍ āā, “Wāŋnda̍ lā tūndu̍ŋ ma̍sāa̍ lāchī, lā tūndu̍ŋ.” Mɛ̄ɛ̍ nu̍a̍ā māsā bɛ̍ndōo̍ ō hāndu̍ Chōo̍sɛ̍ lɛ̄ŋndē I̍chi̍pīle̍ŋ kpo̍u̍ la̍chi̍ ni̍.

⁴⁴Mi̍ māsāa̍ dīmūl Chōo̍sɛ̍ āā, “Ya̍ cho̍ māsā bɛ̍ndōo̍ le̍ I̍chi̍pī ni̍. Le̍ mi̍ wānā o̍ wānā to̍sa̍ nyɛ̄ o̍ nyɛ̄ o̍ lɛ̄ŋnde̍ŋ nde᷅ŋ ni᷄ŋ, mɛ̄ɛ̍ mā chɛ̍l.”

⁴⁵O̍ ko̍ŋ kɔ̍ɔ̍lī, mbo̍ kē Chōo̍sɛ̍ dīōla̍ŋ āā, Sāfɛ̄nātī Pa̍nīāā. Mbo̍ kē ndu̍ la̍nɔ̍ɔ̍ dīōla̍ŋ āā, A̍si̍na̍tī, chu̍a̍ Pɔ̄tīfɛ̍lūā wo̍. Pɔ̄tīfɛ̍lūā yɛ̍, ndu̍ wa̍ wānā so̍līāā lāsa̍lāa̍ o̍ chi̍e̍e̍ bɛ̍ndōo̍ Hɛ̄līo̍o̍po̍līī ni̍. O̍ ko̍ŋ, mi̍ Chōo̍sɛ̍ sīmnu᷄ŋ wa̍nā bɛ̍ndū le̍ lɛ̄ŋndē I̍chi̍pīle̍ŋ kpo̍u̍.

⁴⁶Chōo̍sɛ̍ wa̍ wɔ̄sīla̍ŋ be̍le̍-ya̍a̍ mbo̍ kāndū wa̍llo̍ le̍ māsā bɛ̍ndōo̍ I̍chi̍pī. O̍ ko̍ŋ kɔ̍ɔ̍lī, mi̍ Chōo̍sɛ̍ ma᷅l o̍ chīɛ̄ī māsā bɛ̍ndōo̍, mbo̍ bālū bā o̍ bā fe̍e̍ lɛ᷅ŋndē I̍chi̍pīle̍ŋ.

⁴⁷O̍ wɔ̄sīī ŋɔ᷄mmɛ̍ū nyɛ̄ dīa̍a̍ wa̍ ta̍u̍ ve̍ bɛ̄ŋgu̍, mi̍ tɔ̄lɔ̄ɔ̄la̍ŋ lā nāŋ o̍ chīɔ̍ɔ̍ŋ ni᷄ŋ ta̍u̍ ta̍u̍ I̍chi̍pī lo̍ŋ.

⁴⁸Mi̍ Chōo̍sɛ̍ bālū nyɛ̄ dīa̍a̍ chūūŋgīa̍a̍ o̍ chi̍e̍e̍ŋ bɛ̍ndūŋ yɛ̍ yɔ̍ŋ I̍chi̍pī. Chi̍e̍e̍ bɛ̍ndū o̍ ku̍ā ko̍, nyɛ̄ dīāā o̍ nyɛ̄ dīa̍a̍ cho̍ o̍ tāndā kōŋ ni᷄ŋ, ō chūūŋgīāā ndu̍ lo̍ŋ.

⁴⁹Mbo̍ chūūŋgīāā sūa̍a̍ŋ a̍ wi̍tīi̍yo̍ŋ hɔ̍lɔ̄bi̍. Mɛ̄ɛ̍ si̍o̍ōŋnde̍ ī wā nu̍a̍ā o̍ pēe̍ mɛ̄ŋmā īhɛ᷄llo̍ kɔ̄ŋgɔ̍ ī chu̍ū chɔ᷅m te̍ yɛ̍, le̍nde̍ nyɛ̄ dīa̍a̍ wa̍ ni᷅ŋ ni̍. Ō wa̍ ha̍a̍a̍ mi̍ Chōo̍sɛ̍ pɛ̄ŋgī ni᷅ŋ ndu̍ tūūwo̍, kāni̍ fu̍u̍le̍, nda̍ a̍a̍ nɔ̍lā lɛ̍ lōōnɔ᷄ŋ mɛ̄ɛ̍ kpɛ̍ o̍ wa̍ yɛ̍ le̍.

⁵⁰Lɔ̍ɔ̍pa̍ bɛ̍ɛ̍ mī wɔ̄sīlā māyīla̍ŋ lā fūūlūū, mi̍ Chōo̍sɛ̍ vi̍a̍lū pūa̍a̍ ā ŋīɔ̍ɔ̍ŋ nda̍ A̍si̍na̍tī, chu̍a̍ Pɔ̄tīfɛ̍lūā wo̍, wa̍ wāna̍ so̍lī sa̍lāla̍ŋ o̍ chi̍e̍e̍ bɛ̍ndōo̍ Hɛ̄līo̍o̍po̍līī wo̍.

⁵¹Mi̍ Chōo̍sɛ̍ dīmī āā, “Mɛ̄lɛ̄ka̍ tōsa̍ mi̍ pu̍ɛ̍ɛ̍ŋ a̍ dɛ̍nɛ̍ pa̍lāā o̍ dɛ̍nɛ̍ pa̍lāa̍ ke̍e̍ku̍ ya̍ chōo̍, yu̍ŋgu̍ fi̍nyā nūu̍ kpo̍u̍.” Mbo̍ kē po̍ ndɔ̄ ta̍se̍ ko̍ŋ dīōla̍ŋ āā Mānāa̍sē.

⁵²Mɛ̄ɛ̍ o̍ ve̍lū po̍ ndɔ̄ di̍i̍ŋ ndɔ̄ɔ̍, mbo̍ dīmī āā, “Mɛ̄lɛ̄ka̍ tōsa̍ mi̍ ku̍i̍ī o̍ lɛ̄ŋndē ya̍ bi̍ī mɔ̍nɛ̍i̍ le̍ŋ ni᷄ŋ.” Mbo̍ kē ndu̍ dīōla̍ŋ āā E̍fi̍lūēm.

⁵³Mbo̍ lō o̍ ko̍ŋ mi̍ wɔ̄sīlā ŋɔ᷄mmɛ̍ūlā nyɛ̄ dīa̍a̍ sɔ̄la̍ŋ I̍chi̍pī sɔ̄la᷄ŋ bɛ̍ndōo̍ la̍ŋ lā chūū.

⁵⁴O̍ ko̍ŋ kɔ̍ɔ̍lī, mi̍ wɔ̄sīlā ŋɔ᷄mmɛ̍ūlā māyīla̍ŋ lā kāndu᷄ŋ, mɛ̄ɛ̍ Chōo̍sɛ̍ dīmi̍ yɛ̍. Mi̍ yīa̍a̍ŋ mā tīū lēlɛ̄ŋ o̍ lēlɛ̄ŋ. Kɛ̍, o̍ lɛ̄ŋndē I̍chi̍pīle̍ŋ ni̍ŋ ki̍nɛ̍i̍, nyɛ̄ dīa̍a̍ ō wa̍.

⁵⁵Mɛ̄ɛ̍ o̍ lo̍ o̍ ko̍ŋ mi̍ yīa̍a̍ŋ mā bīī wāŋnda̍ I̍chi̍pī, ma̍ sāā hūnɔ̄ɔ̍ nāa̍ māsā nda̍ bɛ̍ndōo̍ chūā le̍ nyɛ̄ dīa̍a̍. Kɛ̍ mi̍ māsāa̍ dīmūl wāŋnda̍ I̍chi̍pī kpo̍u̍ āā, “Lā kɔ̍ nāa̍ Chōo̍sɛ̍ chu̍a̍, mɛ̄ɛ̍ o̍ cho̍ nya̍ dīmūl lɛ̍, lā tōsa̍ le̍nde̍.”

⁵⁶Mɛ̄ɛ̍ yīa̍a̍ŋ mā tīu̍ ni᷅ŋ I̍chi̍pī fa̍ū, mi̍ Chōo̍sɛ̍ kūūmbūū chīɛ̄īlā nda̍ dōvi̍ nyɛ̄ dīa̍a̍ la̍ŋ kpo̍u̍. Mbo̍ kāndū wāŋnda̍ I̍chi̍pi̍ nyɛ̄ dīa̍a̍ pīsīo̍o̍ o̍ bā, kāni̍ fu̍u̍le̍, yīa̍a̍ŋ mā wa̍ ni᷅ŋ mā kālā ka̍lā bā o̍ bā fe̍e̍ I̍chi̍pī.

⁵⁷Mi̍ wāŋnda̍ ā kāndū fūlāa̍ bā o̍ bā fe̍e̍ o̍ chi̍e̍ēŋndo̍ chōo̍, ma̍ sāā hūnɔ̄ɔ̍ I̍chi̍pī le̍ sūa̍a̍ŋ pīōndɔ̄ɔ̍ a̍ wi̍tīi̍yo̍ŋ. Kāni̍ fu̍u̍le̍, mi̍ yīa̍a̍ŋ ma᷅ŋ mā tīū bā o̍ bā fe̍e̍ o̍ chi̍e̍ēŋndo̍ chōo̍.