Read Southern Kisi Chɛ̄nɛ̍se̍ē 43 Bible Online

Chɛ̄nɛ̍se̍ē 43 - Southern Kisi bible

Chɛ̄nɛ̍se̍ē 43

¹O̍ ko̍ŋ kɔ̍ɔ̍lī, mi̍ yīa̍a̍ŋ mā kīāndū o̍ lɛ̄ŋnde̍ŋ ni᷄ŋ, mi̍ mā kīāndū.

²Mɛ̄ɛ̍ ma̍ ke̍ndū le̍nde̍, mi̍ yu̍ŋgu̍ Che̍kɔ̍pū wo̍ chīī nyɛ̄ dīāā nda̍ chɛ᷄ŋ I̍chi̍pī wo̍ di̍o̍. O̍ ko̍ŋ, mi̍ fīnyā ndā di̍mūl nda̍ āā, “Lā kɔ̍ vɛ̍lɛ̄ I̍chi̍pī mī lā kɔ̍ pi̍o̍ndū nyɛ̄ dīāā pɔ̄mbɔ̄.”

³Kɛ̍ mi̍ Chu̍dā po̍ ndɔ̄ di̍mūl ndu̍ āā, “Fi̍nyā kōŋ ō dīmu̍l na̍a̍ ō kālā ka̍lā māā tē na̍a̍ ŋ̄ kūe̍ a̍ pɔ̄mbɔ̄ nāa̍ le̍, mɛ̄ɛ̍ ō cha᷅ na̍a̍ le̍.

⁴Tē a̍ yɔ̍ŋgu̍ pɔ̍mbɔ̄ nāa̍ mī ŋ̄ kūɛ̄ na̍a̍ nda̍ā pɛ̍, ŋ̄ nɔ̄lā mī ŋ̄ kūɛ̄, mī ŋ̄ kɔ̍ pi̍ndūl nu̍m nyɛ̄ dīa̍a̍.

⁵Kɛ̍ tē a̍ yɔ̍ŋgu̍ ndu̍ le̍, mɛ̄ɛ̍ ŋ̄ ku̍ē lɛ̍ lo̍ŋ te̍. Kāni̍ fu̍u̍le̍, fi̍nyāa̍ dīmu̍l na̍a̍ māā tē ŋ̄ kūe̍ na̍a̍ pɔ̄mbɔ̄ nāa̍ wa̍ā le̍, māā ō cha᷅ na̍a̍ le̍.”

⁶Mi̍ I̍sɔ̄lūɛ̄ī nyu̍nā nda̍ āā, “Kɛ̍ vɛ᷅ mi̍ lā dīmūl ndu̍ māā lā nɔ̄ pɔ̄mbɔ̄ chēle̍ŋ? Lā tōfa̍ wɔ̍ nyɛ̍ pālāā nya̍ chūu̍ ya̍ wo̍.”

⁷Ma̍ mūlī āā, “Nyūūnīa̍a̍ o̍ wa̍ na̍a̍ ta̍u̍ ni̍. Ō nyūūni̍a̍a̍ na̍a̍ fɛ̍lɛ̍ŋ a̍ na̍a̍ pi̍la̍ o̍kɔ̄ɔ̄, mbo̍ mūli᷄ŋ vɛ̍lɛ̄ nyūūnīa̍a̍ a̍ yu̍ŋgu̍ nāa̍ o̍kɔ̄ɔ̄. Mbo̍ nyūnā na̍a̍ āā, ‘Fi̍nyā nyā cho̍ wɔ̄ yōōmū?’ Mbo̍ nyūnā āā, ‘Lā nɔ̄ pɔ̄mbɔ̄ chēle̍ŋ?’ Nyūūnīāālā o̍ wa̍ na̍a̍ la̍ŋ la̍ to̍sa̍ ni̍ mi̍ ŋ̄ dīmūl ndu̍ māā ŋ̄ nɔ̄ pɔ̄mbɔ̄ɔ̍. Wānā o̍ wānā ve̍ kɔ̍l māā ō chō dīmī āā, ‘Lā hu᷄ŋ a̍ pɔ̄mbɔ̄ nyā ko̍ŋ’ te̍.”

⁸Mi̍ Chu̍dā di̍mūl I̍sɔ̄lūɛ̄ī fi̍nyā nda̍ āā, “Yɔ̍ŋgu̍ ya̍ pōo̍mbɔ̄ɔ̍ ŋ̄ bīī nɛ̍īyo̍, mī ŋ̄ kēle̍ŋa̍ lākɔ̄, mī ŋ̄ sɔ̄la̍ yɛ̄ dīa̍a̍, yɔ̄ŋi̍ na̍a̍ ŋ̄ wu̍. Tē ō cho̍ ko̍ŋ te̍, nūm ni̍, chūāūwāā nāā pɔ̍mbūa̍a̍ ni̍, na̍a̍ kpo̍u̍ ŋ̄ chō chūū a̍ yīa̍a̍ŋ.

⁹To̍fa̍ ya̍ a̍ sūɛ̍i̍ ndūɛ̍i̍. A̍ ya̍ ŋ̄ sɔ̄lā ndu̍ ni̍. Tē I̍ mi̍i̍ŋgu̍ a̍ ndu̍ nāa̍ nūm chu̍a̍ le̍, mɛ̄ɛ̍ tɔ̍ɔ̍ya̍ŋ ko̍ŋ ō wa̍ ya̍ chōo̍ le̍ fɛ̍ɛ̍ŋ fɛ̍ɛ̍ŋ.

¹⁰Tē ta̍ma̍lta̍ŋ nda᷅ŋ la̍a̍ yɔ̍nu̍ŋ te̍, māā na̍a̍ ŋ̍ ku̍ɛ̄ ni᷅ŋ lēdīi̍ŋ mī ŋ̄ mīīŋgū.”

¹¹O̍ ko̍ŋ, mi̍ fi̍nyā ndā di̍mūl nda̍ āā, “Tē ī wa̍ le̍nde̍ pɛ̍, mɛ̄ɛ̍ lā yōu̍ wa̍nā bɛ̍ndū kōŋ nyɛ̄ o̍ bā. Lā chūa̍ vɛ̍lɛ̄ nyɛ̄m chūŋ kɛ̄ndɔ᷄ŋ nyɛ̄ pɔ̄mbɔ̄, a̍ līa̍a̍ŋ nyɛ̄ pɔ̄mbɔ̄, a̍ nyɛ̄m na̍a̍ ŋ̄ dūāū o̍ nyɛ̄ dīa̍a̍ wo̍ŋ, yɔ̄mīī nɛ̄ī ku̍a̍mɛ̄i̍ na̍ŋ.

¹²O̍ ko̍ŋ kɔ̍ɔ̍lī, mī lā chu̍a̍ ka̍ni̍o̍ŋ mī ŋ̄ wa̍ mɛ̄ɛ̍ nya̍ kūɛ̄ o̍ tāse̍la̍ ndɔ̄ɔ̍ yɛ̍ lē dīi̍ŋ, mī lā yɛ̄ɛ̄ nyɛ̄ sɔ̄lāā nda̍ mīŋgi̍ wōū o̍ bɔ̄lɔ̄la̍ nyāla̍ŋ ni᷄ŋ ndo̍. Kɛ̄lɛ̄ŋgāā mbō wa̍ dɔ̍ɔ̍ pūɛ̍ɛ̍ŋndo̍ nda̍ pu̍ɛ̍ɛ̍ŋ ni̍.

¹³Lā chɔ᷄ŋ ni̍ko̍ lā kɔ̍ sa̍kpō nya̍ pɔ̄mbɔ̄ nyā wa̍ā.

¹⁴Mbɔ̄ Mɛ̄lɛ̄ka̍ Kpu̍lu̍ŋgūma̍ bɛ̄ndōo̍ ō tōsa̍ mī fi̍nyā kōŋ ō tūīīnu̍ŋ nya̍ īnyīɛ̍ɛ̍, mbō mīŋgi̍ nya̍ Bɛ̍ŋnja̍mīŋ, a̍ bɛ̄ nya̍ lo̍ lo̍ŋ ndo̍ o̍ bā fɔ̍. Ya̍ ya̍, tē ō wa̍ yɛ̄ pɛ̍ māā chūāūwa̍ ha̍ā ā nɔ̄ le̍ ya̍ fūlāa̍ o̍ bā, mɛ̄ɛ̍ ī yɔ̄nu̍ŋ le̍nde̍.”

¹⁵O̍ ko̍ŋ kɔ̍ɔ̍lī, mi̍ pūa̍a̍ ha̍ā ā chūā nyɛ̄m nda̍ wa̍ wānā bɛ̍ndōo̍ yōū o̍ bā wo̍ŋ. Ma̍ chūā vɛ̄lɛ̄ nyɛ̄ sɔ̄lāā nda̍ wa̍ lākɔ̄ nyɛ̄ dīa̍a̍ pīōndɔ̄ɔ̄ wo̍ sālā tīɔ̍ɔ̍ŋ. Ma̍ chūā Bɛ̍ŋnja̍mīŋ pɔ̍mbɔ̄ nda̍, ma̍ cha᷄ŋ tu̍u̍sōo̍ I̍chi̍pī. Mɛ̄ɛ̍ nda̍ fūūlu̍u̍, ma̍ kɔ̍ chɔ̍mnu᷄ŋ Chōo̍sɛ̍.

¹⁶Mɛ̄ɛ̍ Chōo̍sɛ̍ che᷅ nda̍ ma̍ hūŋ a̍ Bɛ̍ŋnja̍mīŋ kɔ̍ɔ̍lī, mbo̍ dīmūl po̍ bu̍ɛ̍i̍ wa̍ o̍ ndu̍ lo̍ chi̍ɛ̍ī ni̍ŋ ndo̍ āā, “Kɔ̍ a̍ wāŋnda̍ ha̍ā o̍ chīɛ̄ī nūu̍. Lā kūɛ̄ pɛ̍, lā kɔ̍ di̍ī chɔ̄lōo̍ mī lā tōōsi̍a̍a̍ nyɛ̄ dīa̍a̍. Kāni̍ fu̍u̍le̍, a̍a̍ wāŋnda̍ ha̍ā ŋ̍ nɔ̍ le̍ nyɛ̄ dīa̍a̍ dīo̍o̍ hāū a̍ te̍le̍ŋ pāa̍le̍ŋ lē sīm o̍ bōlle̍ŋ chōo̍ wo̍ ni̍.”

¹⁷Mi̍ po̍ bu̍ɛ̍īyo̍ tōsā mɛ̄ɛ̍ o̍ di̍mu̍l ndu̍ yɛ̍. Mbo̍ kūā a̍ nda̍ o̍ chīɛ̍i̍ Chōo̍si̍ɔ̍ɔ̍.

¹⁸Kɔ̄la̍ŋ a̍ nda̍ o̍ chīɛ̍i̍ Chōo̍si̍ɔ̍ɔ̍, ma̍ kāndū sīōōŋnde̍ yɔ̄ŋndo̍. Ma̍ sāā yīya᷄ŋndo̍ āā, “Ō wā ni̍ŋ le̍ nyɛ̄ sɔ̄lāā nda̍ wōu̍ o̍ bɔ̄lɔ̄la̍ nāāla̍ŋ ni᷄ŋ bo̍o̍ndi̍i̍ na̍a̍ ŋ̄ hīŋ hūnɔ̄ɔ̄ tāso̍o̍ ve̍, le̍la̍ŋ o̍ yɔ̍ŋgu̍ na̍a̍ na̍nu᷄ŋ ni̍. Ō yēēma̍ mbō ho᷄l na̍a̍ sūɛ̍i̍ le̍ nyɛ̄ sɔ̄lāā kōŋ, mā de᷄l na̍a̍ chōo̍, mā pōōndi̍a̍a̍ sōfɛ̍li̍a̍a̍ nāa̍, o̍ ko̍ŋ kɔ̍ɔ̍lī, mbo̍ sīīŋgu̍u̍ na̍a̍ chīāā ndɔ̄.”

¹⁹O̍ ko̍ŋ kɔ̍ɔ̍lī, ma̍ kūā o̍ chīɛ̄īyo̍ dīō, ma̍ sūāā nāa̍ wāna̍ wa̍ chīɛ̍i̍ Chōo̍si̍ɔ̍ɔ̍ chīla̍ŋ ndo̍ chūā.

²⁰Ma̍ dīmūl ndu̍ āā, “Fāllo̍, bōōndi̍i̍ na̍a̍ ŋ̄ hīŋ nyɛ̄ dīa̍a̍ pīōndɔ̄ɔ̄ tāso̍o̍ ve̍ wāa̍ mīīŋgōo̍,

²¹mɛ̄ɛ̍ na̍a̍ ŋ̄ fūūlu̍u̍ nāa̍ na̍a̍ ŋ̍ nɔ̍ le̍ lūa̍a̍ŋ nda̍, mi̍ ŋ̄ kūmbī bɔ̄lɔ̄la̍ nāāla̍ŋ. Mɛ̄ɛ̍ na̍a̍ kūmbi̍ bɔ̄lɔ̄la̍ŋ, i̍ wānā o̍ wānā sa̍a̍lu᷄ŋ nyɛ̍ ndɔ̄ sɔ̍lāā o̍ pe̍ndū nyɛ̄ dīa̍a̍ wo̍ kpo̍u̍ o̍ bɔ̄lɔ̍ ndɔ̄ɔ̍ ni᷄ŋ. Le̍la̍ŋ, ŋ̄ mīīŋgu̍ na̍ŋ a̍ nyɛ̄ sɔ̄lāā kālāa̍.

²²O̍ ko̍ŋ kɔ̍ɔ̍lī, ŋ̄ hīŋ vɛ̄lɛ̄ a̍ nyɛ̄ sɔ̄lāā chēle̍ŋ le̍ nyɛ̄ dīa̍a̍ pīōndɔ̄ɔ̍. Ŋ̄ si̍nā wa᷅na̍ mi̍ŋgi̍ nyɛ̄ nāā sɔ̍lāa̍ o̍ bɔ̄lɔ̄la̍ nāāla̍ŋ ni᷄ŋ ndo̍ le̍.”

²³Mi̍ lāŋu̍nɔ̄ɔ̍ dīmūl nda̍ āā, “Lā bu̍u̍la᷄ŋ te̍, ndu̍yɛ̍ lā yɔ᷅ŋ īsīōōŋ te̍. Nya̍ ni̍ a̍ fi̍nyāā nyāa̍, Mɛ̄lɛ̄ka̍ nya̍ chō pīɛ̄īyo̍ wo̍, ō wā ni̍ŋ ndu̍ wo̍u̍ nyɛ̄ sɔ̄lāā kōŋ o̍ bɔ̄lɔ̄la̍ nyāla̍ŋ ni᷄ŋ ni̍. Kāni̍ fu̍u̍le̍, mi̍ lā kē ya̍ nyɛ̄ sɔ̄lāa̍.” O̍ ko̍ŋ kɔ̍ɔ̍lī, mbo̍ kūā, mbo̍ kɔ̍ hu᷅ŋ a̍ Si̍mīɔ̄ŋ nāa̍ nda̍ chūā.

²⁴Mi̍ la̍ŋu̍nɔ̄ɔ̍ ho̍ō ō kūā a̍ nda̍ o̍ Chōo̍sɛ̍ lo̍ chi̍ɛ̍ī ni̍ŋ. Mbo̍ kē nda̍ mɛ̄ŋnda̍ŋ mā pūlū pēlo᷄ŋ. Mbo̍ kē vɛ̄lɛ̄ sōfɛ̍li̍a̍a̍ ndāa̍ nyɛ̄ dīa̍a̍.

²⁵O̍ ko̍ŋ kɔ̍ɔ̍lī, nyɛ̄m nda̍ chūu̍ Chōo̍sɛ̍ wo̍ŋ, ma̍ bɛ̄ɛ̄ndīāā mu̍ŋ pɔ̍ɔ̍ le̍ hūnɔ̄ɔ̄ Chōo̍sɛ̍ wa̍ o̍ chīɛ̄īyo̍ a̍ te̍le̍ŋ pāa̍le̍ŋ lē sīm o̍ bōlle̍ŋ chōo̍ wo̍. Kāni̍, ma̍ tūɛ̄ī māā nda̍ nda̍ā cho̍ hūnɔ̄ɔ̄ nyɛ̄ dīa̍a̍ di̍o̍ ni̍.

²⁶Mɛ̄ɛ̍ Chōo̍sɛ̍ hīŋ o̍ chīɛ̄īyo̍, ma̍ hūŋ a̍ nyɛ̄m nda̍ chūu̍ ndu̍ wo̍ŋ chīɛ̄ī ni̍ŋ. Mɛ̄ɛ̍ nda̍ hīŋ, ma̍ tūndu᷄ŋ lɛ᷅ŋ ndu̍ o̍ lābɛ̄ŋgu̍ ni̍ŋ. Mbo̍ nyūnā nda̍ tē ā chō kɛ̄ndɛ̄.

²⁷Mbo̍ nyūnā nda̍ āā, “Fi̍nyā nyā yu̍wɛ̍i̍ nya̍ dīmu̍l la̍ a̍ ndu̍ o̍kɔ̄ɔ̄ wo̍, ō chō wɔ̄ pa̍ yōōmu̍? Ō chō kɛ̄ndɛ̍?”

²⁸Ma̍ chɛ̄l āā, “E̍ī, kɛ̄kɛ̍ nāa̍, bu̍ɛ̍ī nūmndo̍ chō wɔ̄ pa̍ yo̍o̍mū, ndu̍yɛ̍ ō chō kɛ̄ndɛ̄.” Ma̍ tūndū bōlle̍ lɛ̄ŋ le̍ ndu̍ bɛ̄ɛ̄le̍ŋ kīo̍o̍.

²⁹Mɛ̄ɛ̍ Chōo̍sɛ̍ mɛ̍ɛ̍ndi̍a̍ŋ, mbo̍ chā Bɛ̍ŋnja̍mīŋ, pɔ̄mbɔ̄ ndɔ̍ kālā pi᷅lɔ̍ɔ̄. Mbo̍ nyūnā nda̍ āā, “Pɔ̄mbɔ̄ nya̍ ya̍ dīmu̍l la̍ a̍ ndu̍ o̍kɔ̄ɔ̄ wo̍ cho̍ ho̍ō ni̍?” Ma̍ chɛ̄l. Mbo̍ dīmūl Bɛ̍ŋnja̍mīŋ āā, “Kɛ̄ndɛ̄i̍ Mɛ̄lɛ̄kɛ̍i̍ ī wa̍ nu̍m chōo̍ o̍ nūu̍.”

³⁰O̍ ko̍ŋ, mɛ̄ɛ̍ yēēmɛ̍i̍ pɔ̄mbɔ̄ ndūɛ̍i̍ ī pɛ̄ o̍ kɔ̄l ndɔ̄ɔ̍ ni᷄ŋ, mi̍ cha᷄ŋndo̍ hūŋ ndu̍ o̍ kɔ̄l. Mbo̍ cha᷄ŋ nya̍ le̍ mbō kūɛ̄ īnɛ̍, mbō kɔ̍ cha᷅ŋ. Mbo̍ lūɛ̄ī o̍ ndu̍ lo̍ chi̍ɛ̍ī ni̍ŋ, mbo̍ kɔ̍ cha᷅ŋ.

³¹Chīīyo̍ cha᷄ŋndo̍, mbo̍ pūlū hɔ̄lla̍ fo̍, mbo̍ fūlā. Mɛ̄ɛ̍ kɔ̄l ndɔ̄ɔ̍ sīmu̍l, mbo̍ dīmī māā bu̍ɛ̍īya̍ pīɔ̍u̍ nyɛ̍ dīa̍a̍.

³²Mi̍ ndu̍ pi̍la̍ cha᷅l nāa̍ ndɔ̄, ma̍ kē ndu̍ nyɛ̄ dīa̍a̍ o̍ ndɔ̍ɔ̍. Ma̍ tōsā mi̍ wānāā ndūa̍a̍ chāl nāa̍ ndā. I̍chi̍pīa̍a̍ a̍ lo̍ŋ nda̍, mi̍ nda̍ chāl nāa̍ ndā. I̍chi̍pīa̍a̍ nda̍ a̍a̍ di᷅ nyɛ̍ dīa̍a̍ nda̍ Hi̍būlūi̍ya̍ le̍, kāni̍ fu̍u̍le̍, māā dɔ̄ɔ̄nāa̍ nda̍ pi̍la̍ cho̍ ko̍ŋ ni̍.

³³Wānāa̍ Chōo̍sɛ̍ wo̍ nda̍ wa̍ īchāli̍ ku̍mbōo̍ pīlɔ̍ɔ̄ ndu̍ lāchī, ma̍ mūlī hɔ̄lla̍ kūmbu̍ Chōo̍si̍ɔ̍ɔ̍. Ā wa̍ īchāli̍ mɛ̄ɛ̍ wɔ̄sīlā ndāla̍ŋ lā chō yɛ̍, kāndɔ̄ɔ̍ a̍ bɛ̄ ndā bɛ̍ndōo̍ mbo̍ kūā a̍ lūm ndāa̍. Mɛ̄ɛ̍ nda̍ chē mɛ̄ɛ̍ nda̍ cha᷄l lɛ̍, mi̍ kɔ̄ndɔ̄fi̍llo̍ bīī nda̍.

³⁴O̍ ko̍ŋ kɔ̍ɔ̍lī, ma̍ kāndū nda̍ nyɛ̄ dīa̍a̍ pīɔ̄ūwo̍, ā kēlū pɛ̍ o̍ ti̍bi̍i̍ Chōo̍sɛ̍ a̍ īchāli̍ wo̍, ā yōu̍ nda̍. Kɛ̍ Bɛ̍ŋnja̍mīŋ ndu̍, nyɛ̄ dīāā nda̍ kīlūl ndu̍ wo̍, ndu̍ o̍o̍ chu̍ā nyɛ̍ dīāā ndā ke̍ wānā pi᷅lɛ̍ wo̍ sālā ŋūɛ̍ɛ̍nu̍. Mbo̍ lō o̍ ko̍ŋ ma̍ dīā nyɛ̄ dīa̍a̍, ma̍ kōl mūɛ̄īya̍ŋ. Nda̍ Chōo̍sīa̍a̍ ma̍ nāŋ kɔ̄l lātūlu̍.