Read Southern Kisi Chɛ̄nɛ̍se̍ē 48 Bible Online

Chɛ̄nɛ̍se̍ē 48 - Southern Kisi bible

Chɛ̄nɛ̍se̍ē 48

¹Vīōūwɔ̄ɔ̍ ha̍a̍a̍, pāa̍le̍ pi᷅lɛ̍, ma̍ dīmūl Chōo̍sɛ̍ āā, “Fi̍nyā nūm cho̍ a̍ nāa̍.” Dīmūllo̍ ndu̍, mbo̍ chūā pūa̍a̍ ndūāā ŋi̍ɔ̍ɔ̍ŋnda̍, Mānāa̍sē nda̍ E̍fi̍lūēm, mbo̍ kūā.

²O̍ ko̍ŋ kɔ̍ɔ̍lī, ma̍ dīmūl Che̍kɔ̍pū āā, “Fāllo̍, Chōo̍sɛ̍ po̍ nu̍m hīŋ nu̍m tōfāa̍.” Mɛ̄ɛ̍ nda̍ dīmu̍l Che̍kɔ̍pū māā Chōo̍sɛ̍ hīŋ, mbo̍ kīndī kīndi᷄ŋ, mbo̍ cha᷄ŋ mbo̍ chāl o̍ kpēlē.

³Mi̍ Che̍kɔ̍pū lo᷅ o̍ ko̍ŋ mbo̍ dīmūl Chōo̍sɛ̍ āā, “Chōo̍sɛ̍, bōōndi̍i̍ ya̍ I̍ wa̍ īchāli̍ Lu̍u̍sī chi̍e̍e̍ o̍ lɛ̄ŋndē Ke̍nāŋnde̍ŋ ni᷄ŋ nde̍, mi̍ Mɛ̄lɛ̄ka̍ Kpu̍lu̍ŋgūma̍ bɛ̄ndōo̍ chɔ̄mnu᷄ŋ nāa̍ ya̍ chu̍a̍. Mbo̍ dūāū ya̍ sa̍lā,

⁴āā, ‘Che̍kɔ̍pū, I̍ cho̍ nu̍m chūāūwa̍ kē cha̍po̍o̍li̍. Ndu̍yɛ̍, I̍ cho̍ tōsā mī chūāūwāā nūmnda̍ ā kūɛ̄ a̍ kūīīyo̍ mā sīmnu᷄ŋ lɛ̍ŋīī fāŋgā? Mi̍ Mɛ̄lɛ̄ka̍ dīmūl la̍ vɛ̄lɛ̄ āā, I̍ cho̍ wānāa̍ fu̍lā ni̍ŋ o̍ yu̍ŋgu̍ nu̍mndo̍ chōo̍ wa̍ lɛ̄ŋnde̍ŋ nde᷅ŋ kē mī lē wa̍ nyɛ̄ ndā le̍ fɛ̍ɛ̍ŋ a̍ fɛ̍ɛ̍ŋ.’ ”

⁵“Le̍la̍ŋ pūa̍a̍ ŋi̍ɔ̍ɔ̍ŋāā ŋ̄ hu᷄ŋ vi̍o̍lū o̍ lɛ̄ŋndē I̍chi̍pīle̍ŋ ni᷄ŋ na̍ŋ nda̍, bōōndi̍i̍ ya̍ i̍i̍ hi̍ŋ ndɔ̍ na̍ŋ te̍ ve̍, E̍fi̍lūēm pɛ̍, Mānāa̍sē pɛ̍, ya̍ nɔ̍ ka̍ŋ ni̍. Vīōlɔ̄ɔ̄ ya̍ ve̍lū Lūbɛ᷅ŋ nda̍ Si̍mīɔ̄ŋ ndo̍, vīōlɔ̄ɔ̄ kōŋ ya̍ I̍ ve̍lū E̍fi̍lūēm nda̍ Mānāa̍sē ni̍.

⁶Chūāūwāā ŋ̄ chō ni᷅ŋ vīōlɔ̄ɔ̄ ka̍ŋ kɔ̍ɔ̍lī wa̍, mɛ̄ɛ̍ nu᷄m nɔ̍ ka̍ŋ ni̍. Ndu̍yɛ̍, lɛ̄ŋndē E̍fi̍lūēm cho̍ sɔ̄lā le̍ŋ a̍ lē Mānāa̍sē cho̍ sɔ̄lā le̍ŋ, lēni᷄ŋ ā ŋ̄ chō ni᷅ŋ vīōlɔ̄ɔ̄ wa̍ nɔ̄ mā sɔ̄la̍ būŋga᷄ŋ ni̍.

⁷Le̍ sa̍bū ya̍ cho̍ he̍ī tōsā wo̍ cho̍ ni̍ māā, bōōndi̍i̍ na̍a̍ ŋ̄ ma᷄l lɛ̄ŋndē Mɛ̄sōpōte̍e̍mīāāle̍ŋ mi̍ ŋ̄ wā mīīŋgōo̍ Ke̍nāŋ nde̍, hūnɔ̄ɔ̍ o̍ ti᷅ŋ E̍fi̍lu̍a̍tī wo̍ ni᷄ŋ ndu̍ yɔ̍nūŋ māā ti᷅ŋ Bɛ̍ti̍lɛ̍hɛ̄m ndo̍ ni̍, mi̍ Lu̍e̍chɛ̄l ka̍lā nu̍m wū ya̍ o̍ bā nɛ̄ī tɛ̍ɛ̄ŋ. Mɔ̍nɛ̍i̍ bɛ̍ndūe̍i̍ wa̍ ke̍ŋ ya̍ chōo̍ bo̍o̍ndi̍i̍ ke̍ŋ ni̍. Mɛ̄ɛ̍ o̍ vi᷅, mi̍ ŋ̄ chɔ̄ ndu̍ o̍ nɛ̄īyo̍ da̍ŋga̍la̍ o̍ ti᷅ŋ E̍fi̍lu̍a̍tī kōŋ ni᷄ŋ.”

⁸O̍ ko̍ŋ kɔ̍ɔ̍lī, mɛ̄ɛ̍ Che̍kɔ̍pū che᷅ pūa̍a̍ Chōo̍sɛ̍ wo̍, mbo̍ nyūnā Chōo̍sɛ̍ āā, “Ō nɛ̄ɛ̍ni̍a̍ā cho̍ yɛ̄ ha̍ā?”

⁹Mi̍ Chōo̍sɛ̍ di̍mūl fi̍nyā ndɔ̍ āā, “Pūa̍a̍ nīa̍a̍. Ha̍ā Mɛ̄lɛ̄ka̍ ke̍ ya̍ na̍ŋ ni̍.” Mi̍ fi̍nyā ndɔ̄ di̍mūl ndu̍ āā, “Sɔ̍ɔ̍ŋgu̍u̍ a̍ nda̍ na̍ŋ mī dɔ̍ū nda̍ sa̍lā.”

¹⁰Che̍kɔ̍pū wa̍ ni᷅ŋ sɔ̍ŋgɔ̍ wānā su̍mɛ̍i̍ a̍ yu̍wɛ̍i̍ ndu̍ o̍o̍ yu̍wa̍ ve̍. Ndu̍ o̍o̍ si̍o̍ū lɛ̍ chɔ̄ lāpi̍ le̍. Mi̍ Chōo̍sɛ̍ sɔ̍ɔ̍ŋgūū a̍ nda̍ Che̍kɔ̍pū īkɛ̄i̍. Mɛ̄ɛ̍ o̍ sɔ̍ɔ̍ŋgu̍u̍ nda̍, mi̍ Che̍kɔ̍pū kɔ̍ma᷄ŋ nda̍ vēllāa̍ vēllē.

¹¹Mbo̍ lō o̍ ko̍ŋ mbo̍ dīmūl Chōo̍sɛ̍ āā, “Yīya᷄ŋ bɛ̍ɛ̍ ve̍ lɛ̍ ya̍ māā ya̍ i̍i̍ cha᷅ lɛ̍ nu̍m te̍. Kɛ̍ mi̍ Mɛ̄lɛ̄ka̍ tōsā a̍ sa̍bū, ō cho̍ lɛ̍ ko̍ nu᷅m te̍, kɛ̍ mbo̍ tōsā mi̍ cha᷅ chūāūwāā nūmnda̍ bɛ̍ɛ̍.”

¹²O̍ ko̍ŋ kɔ̍ɔ̍lī, mi̍ Chōo̍sɛ̍ tu̍si᷄ŋ pu̍a̍a̍mbūa̍a̍ o̍ bɛ̄ŋgu̍. Mbo̍ tūndu᷄ŋ fi̍nyā ndɔ̍ o̍ lābɛ̄ŋgu̍ ni̍ŋ, mbo̍ nāŋgū hɔ̄lla̍ lɛ̄ŋ le̍ ndu̍ bɛ̄ɛ̄le̍ŋ kīo̍o̍.

¹³Mi̍ Chōo̍sɛ̍ sāā E̍fi̍lūēm mbo̍ hīvī ndu̍ o̍ bā mīa̍l Che̍kɔ̍pū wo̍ chōo̍. Mbo̍ hīvī Mānāa̍sē o̍ bā ndɔ̄ kɛ̍ndɔ̄ɔ̍ chōo̍.

¹⁴Mɛ̄ɛ̍ o̍ hi̍vi̍ nda̍ le̍nde̍, mi̍ Che̍kɔ̍pū si̍ŋgāfīlā bāla̍ŋ. Mbo̍ hāndū bā ndɔ̄ kɛ̍ndɔ̄ɔ̍ E̍fi̍lūēm o̍ lēbōl o̍ wa̍ chūāāmbɔ̄ɔ̍ wo̍, mbo̍ hāndū bā ndɔ̄ mi̍āllo̍ Mānāa̍sē o̍ lēbōl, o̍ wa̍ wānā ba̍nāa̍ wo̍.

¹⁵Mbo̍ dūāū Chōo̍sɛ̍ sa̍lā āā, “Mbɔ̄ Mɛ̄lɛ̄ka̍ ō fi̍nyāā nīa̍a̍ E̍bīlāha᷅m nda̍ Āa̍se̍ a̍ lo̍ pīɛ̄īyo̍ ha̍a̍a̍ wo̍, ō dɔ̄u̍ pu̍a̍a̍mbūa̍a̍ ha̍ā sa̍lā fɔ̍. Mbɔ̄ Mɛ̄lɛ̄ka̍ o̍ lo̍ ya̍ māndā ha̍a̍a̍ mbo̍ fūūla᷅ŋ a̍ pāa̍le̍ hāūle᷅ŋ ndo̍, ō dɔ̄u̍ nda̍ sa̍lā fɔ̍.

¹⁶Mbɔ̄ ki̍i̍la̍nɔ̍ɔ̍ Mɛ̄lɛ̄ka̍a̍, o̍ ba̍ŋa̍ ya̍ o̍ īsɔ̄ɔ̍ o̍ īsɔ̄ɔ̍ ni̍ŋ ndo̍ ō dɔ̄u̍ nda̍ sa̍lā fɔ̍. Mbɔ̄ ya̍ ni̍, fi̍nyāā nīa̍a̍ E̍bīlāha᷅m nda̍ Āa̍se̍ ni̍, dīōlā nāāla̍ŋ lā hīo̍u̍ la̍chi̍ o̍ sa̍bū pūa̍a̍ ha̍ā ni᷄ŋ fɔ̍. Mbɔ̄ ā vīōlu̍ ŋ̍chu̍a̍ū mā kūɛ̄ a̍ kūīīyo̍ o̍ chi̍e̍ēŋndo̍ chōo̍ fɔ̍.”

¹⁷O̍ ko̍ŋ kɔ̍ɔ̍lī, mɛ̄ɛ̍ Chōo̍sɛ̍ chē mi̍ fi̍nyā ndɔ̄ ha̍ndū E̍fi̍lūēm bā ndɔ̄ kɛ̍ndɔ̄ɔ̍ chōo̍, mbo̍ tāmbū kɔ̄l. Mbo̍ sāā fi̍nyā ndɔ̍ bāa̍, mbo̍ fāŋā E̍fi̍lūēm o̍ lēbōl, mbo̍ hāndū Mānāa̍sē o̍ lēbōl.

¹⁸Mbo̍ dīmūl fi̍nyā ndɔ̍ āā, “Ō cho̍ E̍fi̍lūēm te̍ ŋ̄ hāndū ba̍ kɛ̄ndɔ̄ɔ̍ o̍ lēbōl te̍. Ha̍ndu̍ Māna̍a̍sē o̍ lēbōl.”

¹⁹Kɛ̍ mi̍ fi̍nyā ndɔ̄ kɛ̍ɛ̄. Mbo̍ dīmūl Chōo̍sɛ̍ āā, “Po̍ nūu̍, I̍ si̍nā. I̍ si̍nā cha̍la̍ŋ. Mānāa̍sē bɛ̍ɛ̍ pūlālē ndɔ̄le̍ŋ lē wā ni̍ŋ ka̍a̍le̍ bɛ̍ndū. Kɛ̍ ndu̍yɛ̍, pɔ̄mbɔ̄ ndɔ̍ hi̍a̍ū ni̍ŋ a̍ ndu̍. Kāni̍ fu̍u̍le̍, wānāa̍ fu̍lā ni̍ŋ o̍ pūlāle̍ E̍fi̍lūēmnde̍ŋ chōo̍ wa̍ ā sīmnūŋ ni̍ŋ ka̍a̍la̍ kpāāyā bɛ̍ndū.”

²⁰O̍ ko̍ŋ kɔ̍ɔ̍lī, mbo̍ dūāū pūa̍a̍mbūa̍a̍ ha̍ā sa̍lā pāa̍le̍ le̍ŋ, mbo̍ dīmī āā, “Wāŋnda̍ I̍sɔ̄lūɛ̄ī a̍ cho̍ hūnɔ̄ɔ̄ dīōlā nyāla̍ŋ pīɔ̄lɔ̄ɔ̄ o̍ sa̍lāla̍ŋ dūāūna᷅ŋndo̍ ni᷄ŋ. Ā dīmi̍ ni̍ŋ nu̍a̍ā āā, ‘Mɛ̄lɛ̄ka̍ tōsa̍ mā wa̍ māā E̍fi̍lūēm nda̍ Mānāa̍sē fɔ̍.’ ” Mɛ̄ɛ̍ nu̍a̍ā Che̍kɔ̍pū ha̍ndu̍ E̍fi̍lūēm Mānāa̍sē lāchī ni̍.

²¹O̍ ko̍ŋ kɔ̍ɔ̍lī, mi̍ Che̍kɔ̍pū di̍mūl Chōo̍sɛ̍ āā, “Te̍le̍ŋ ni̍ pīɔ̍mndo̍ ō fūūlu̍u̍. Kɛ̍ ndu̍yɛ̍, Mɛ̄lɛ̄ka̍ cho̍ nu̍m kɔ̄ɔ̄lī, ndu̍yɛ̍, ō chō vɛ̄lɛ̄ mīīŋgū a̍ nūm o̍ lɛ̄ŋndē Ke̍nāŋnde̍ŋ ni᷄ŋ, fi̍nyāā nūm a̍ ma̍māa̍ lɛ̄ŋndē ndāle̍ŋ.

²²Ō fūla̍ o̍ ko̍ŋ kɔ̍ɔ̍lī, lɛ̄ŋndē Si̍ɛ̍kɛ̄mnde̍ŋ, lē ya̍ sɔ̍ŋga̍ a̍ A̍mɔ̍lu̍a̍i̍tīi̍ya̍ mi̍ hi̍a̍lū le̍ŋ, nūm Chōo̍sɛ̍ ya̍ ke̍ le̍ŋ ni̍, ō cho̍ bɛ̍ndāā nūmnda̍ le̍.”