Read Southern Kisi Chɛ̄nɛ̍se̍ē 50 Bible Online

Chɛ̄nɛ̍se̍ē 50 - Southern Kisi bible

Chɛ̄nɛ̍se̍ē 50

¹Mɛ̄ɛ̍ Che̍kɔ̍pū vi᷅, mi̍ Chōo̍sɛ̍ dēl ndu̍ chōo̍ a̍ cha᷄ŋndo̍, mbo̍ kɔ̄ma᷄ŋ ndu̍. Mbo̍ chāŋ, mbo̍ chāŋ.

²O̍ ko̍ŋ kɔ̍ɔ̍lī, mbo̍ dīmūl wānāa̍ to̍o̍sīāā wa̍nā vi̍lɛ̍i̍yo̍ ō ya̍lā i̍ ta̍mbu̍ le̍ wā, le̍ mā kɔ̍ to̍o̍sīāā dīāllo̍ŋ. O̍ ko̍ŋ, ma̍ kūā, ma̍ kɔ̍ to̍o̍sīāā dīāllu᷄ŋ Che̍kɔ̍pū wo̍ŋ.

³Le̍ dīāllūŋ wānā vi̍lɛ̍i̍yo̍ŋ tōōsīāā wāā le̍ndo̍o̍ ŋ̄ ya̍lā i̍ ta̍mbu̍ le̍, ndu̍ o̍o̍ chu̍ā wa̍nāa̍ to̍o̍sīāā ka̍ŋ nda̍ pālɛ̍i̍ be̍le̍-hi̍ɔ̍ɔ̍lu̍. O̍ ko̍ŋ kɔ̍ɔ̍lī, mi̍ wāŋnda̍ I̍chi̍pī a̍ cha᷅ŋ Che̍kɔ̍pū le̍ pālɛ̍i̍ be̍le̍-ŋɔ̍mmɛ̍ū.

⁴Mɛ̄ɛ̍ pālɛ̍i̍ nda̍ a̍a̍ nɔ̍ le̍ Che̍kɔ̍pū cha᷄ŋndo̍ ve̍ ī chūū, mi̍ Chōo̍sɛ̍ dīmūl wānāa̍ cho̍ wa̍llo̍ o̍ chīɛ̄ī māsā bɛ̍ndōo̍ wa̍ āā, “Tē lā nɔ̄ fo̍ndāŋ pɛ̍ mɛ̄ɛ̍ lā yāndi̍i̍, lā kɔ̍ di̍mūl la̍ māsā bɛ̍ndōo̍ māā,

⁵bōōndi̍i̍ pa̍ fi̍nyā nūu̍ wū, mbo̍ dīmūl la̍ māā mɛ̄ɛ̍ o̍ cho̍ ni᷅ŋ wūo̍o̍ yɛ̍, māā ya̍ I̍ chu̍e̍l ndu̍ būŋgɛ̄i̍ mī me̍na̍ŋ māā I̍ to̍sā ni̍ŋ cho̍ŋgɔ᷄ŋ o̍ cho̍ wo̍. Mbo̍ chōŋgu᷄ŋ māā tē ō vī pɛ̍, māā ya̍ I̍ kɔ̍ a̍ dīāllūŋ ndɔ᷄ŋ mī kɔ̍ chɔ᷅ mu̍ŋ Ke̍nāŋ o̍ sɛ̄i̍ ndɔ̍ ndu̍ pi̍la̍ to̍ū wo̍ ni᷄ŋ. Le̍la̍ŋ ō yāndi̍i̍, I̍ ku̍ā wɔ̍ mī kɔ̍ chɔ᷅ ndu̍. Tē I̍ kɔ̍ chi̍ī ndu̍ chɔ̄ pɛ̍, I̍ mi̍i̍ŋgu̍ na̍ŋ.”

⁶O̍ ko̍ŋ kɔ̍ɔ̍lī, mi̍ māsā bɛ̍ndōo̍ mūlī āā, “Kɔ̍ mā kɔ̍ chɔ᷅ fi̍nyā nūm, mɛ̄ɛ̍ ŋ̄ chūe̍l ndu̍ būŋgɛ̄i̍ ma̍ mēna᷄ŋ yɛ̍.”

⁷Mi̍ Chōo̍sɛ̍ lo᷅ o̍ ko̍ŋ, mbo̍ cha᷄ŋ kɔ᷅la̍ŋ le̍ mbō kɔ̍ chɔ᷅ fi̍nyā ndɔ̍. Mi̍ wānāa̍ cho̍ wa̍llo̍ lātūlu̍ a̍ māsā bɛ̍ndōo̍, a̍ lāŋgba̍ā kālla̍ o̍ yu̍ŋgu̍ māsā bɛ̍ndōo̍ ni᷄ŋ, a̍ lāŋgba̍ā kālāā lēlɛ̄ŋnda̍ kpo̍u̍ I̍chi̍pī, ma̍ kūā nda̍ Chōo̍sīa̍a̍. O̍ ko̍ŋ kɔ̍ɔ̍lī, mi̍ māsā bɛ̍ndōo̍ mūlī āā, “Kɔ̍ mā kɔ̍ chɔ᷅ fi̍nyā nūm, mɛ̄ɛ̍ ŋ̄ chūe̍l ndu̍ būŋgɛ̄i̍ ma̍ mēna᷄ŋ yɛ̍.” Mi̍ Chōo̍sɛ̍ lo᷅ o̍ ko̍ŋ, mbo̍ cha᷄ŋ kɔ᷅la̍ŋ le̍ mbō kɔ̍ chɔ᷅ fi̍nyā ndɔ̍. Mi̍ wānāa̍ cho̍ wa̍llo̍ lātūlu̍ a̍ māsā bɛ̍ndōo̍ a̍, a̍ lāŋgba̍ā kālla̍ o̍ yu̍ŋgu̍ māsā bɛ̍ndōo̍ ni᷄ŋ, a̍ lāŋgba̍ā kālāā lēlɛ̄ŋnda̍ kpo̍u̍ I̍chi̍pī, ma̍ kūā nda̍ Chōo̍sīa̍a̍.

⁸Yu̍ŋgu̍ Chōo̍si̍ɔ̍ɔ̍ ni̍, bɛ̄ndāā ndūa̍a̍ ni̍, a̍ wānā o̍ wāna̍ wa̍ o̍ yu̍ŋgu̍ fi̍nyā ndɔ̄ wo̍ chōo̍, ma̍ kūā. Mɛ̄ɛ̍ chūāā ndāā pɔ̍mbūa̍a̍ a̍ chɔ̄lūa̍a̍ ma̍ lō Ku̍u̍sīɛ̄ŋ.

⁹Wāŋnda̍ ā pūm ā wa̍ o̍ nyɛ̄m nyāāna᷄ŋ su̍a̍a̍ nāŋ ndo̍ŋ ni᷄ŋ, ā pūm o̍ su̍a̍a̍ chōo̍. Fāŋgā bɛ̍ndōo̍ pi̍la̍ ku̍ɛ̄ ni̍.

¹⁰Mɛ̄ɛ̍ nda̍ lo̍ kɔ̄la̍ŋ ma̍ fūūlūū o̍ fo̍ndāa̍ dīōla̍ŋ āā, A̍ta̍dī, nāa̍ nda̍ a̍a̍ lu̍a̍ā wi̍tīi̍yo̍ŋ nda̍. O̍ Chɔ̍ɔ̍dāŋ nda̍ŋ ā pāa̍le̍ŋ lē chāŋ ndo̍ fo̍ndāa̍ ho̍ō chō ni̍. Fūūlūūwo̍ lo̍ŋ, ma̍ chāŋ vɛ̄lɛ̄ cha᷄ŋndo̍ pīla̍. Mbo̍ kūā a̍ te̍le̍ŋ vi̍lɛ̄ī ā a̍ cha᷄ŋndo̍. O̍ ko̍ŋ kɔ̍ɔ̍lī, mi̍ Chōo̍sɛ̍ to̍sā dɛ̍nɛ̍la̍ fi̍nyā ndɔ̄la̍ŋ lo̍ŋ le̍ pālɛ̍i̍ ī ŋɔ᷄mmɛ̍ū.

¹¹Mɛ̄ɛ̍ wāŋnda̍ Ke̍nāŋ a̍ che᷅ wāŋnda̍ ha̍ā o̍ cha᷄ŋnda̍ŋ Āta̍dī, nāa̍ nda̍ lūāā ka̍ŋ wi̍tīi̍yo̍ŋ nda̍, ma̍ dīmī āā, “I̍chi̍pīa̍a̍ ha̍ā ā chō o̍ dɛ̍nɛ̍ pa̍lāā bɛ̄ndū chōo̍, lā tūe̍i̍ cha̍ŋnda̍ bɛ̍ndūlā nda̍ chō la̍ŋ.” Le̍ he̍ī, ma̍ kē fo̍ndāŋ kōŋ dīōla̍ŋ āā E̍bɛ̄ɛ̄l Mi̍si̍lūīm.

¹²Mbo̍ lō o̍ ko̍ŋ mi̍ pūa̍a̍ Che̍kɔ̍pū wa̍ ā tōsā mɛ̄ɛ̍ fi̍nyā ndā cho̍ŋgu̍ŋ nda̍ yɛ̍.

¹³Ma̍ kūā a̍ dīāllūŋ ndɔ᷄ŋ lɛ̄ŋndē Ke̍nāŋnde̍ŋ. Ma̍ kɔ̍ chɔ᷅ ndu̍ o̍ būūlōo̍ le̍ hūnɔ̄ɔ̍ Māchīpɛ̍lā, kūmbū Ma̍mi̍lūē wo̍, bā pāa̍le̍ŋ lē chāŋ ndo̍. Būūlū ko̍ŋ E̍bīlāha᷅m pe̍ndū lātūlu̍ a̍ lɛ̄ŋndē būūlū ka̍lāa̍ chō ni᷄ŋ nde̍ŋ E̍fu̍lɔ̄ŋ Hi̍ta̍i̍tīi̍nɔ̍ o̍ bā le̍ wānāā ndūa̍a̍ chɔ̄ɔ̍ lēni᷄ŋ ni̍.

¹⁴Mɛ̄ɛ̍ Chōo̍sɛ̍ chi̍i̍ fi̍nyā ndɔ̍ kūmbɔ̄ɔ̄, mbo̍ mīīŋgū I̍chi̍pī nda̍ bɛ̄ndāā ndūa̍a̍ a̍ wānā o̍ wāna̍ hi᷅ŋ ndu̍ kɔ̄ɔ̄lī o̍ bīīsi̍ fi̍nyā ndɔ̄ɔ̍. Chōo̍sɛ̍ ma᷄l bɛ̍ndāā ndūa̍a̍ le̍ nyɛ̄ nda̍ tōsa̍ wo̍

¹⁵Mɛ̄ɛ̍ fi̍nyā ndā vi᷅, mi̍ bɛ̄ndāa̍ Chōo̍sɛ̍ wo̍ ā dīmu̍la᷅ŋ āā, “Kɛ̄lɛ̄ŋgāā dɔ̍ɔ̍ dɛ̍nɛ̍ wɔ̍ɔ̍ŋ na̍a̍ ŋ̄ tōsa̍ a̍ Chōo̍sɛ̍ lɔ̍ɔ̍ ko̍ŋ ndo̍, mī nɛ̄īyɔ᷄ŋ ko̍ŋ ō wa̍ wɔ̄ dɔ̍ɔ̍ ndu̍ o̍ kɔ̄l, mbō kɛ̄ɛ̄si̍a̍ŋ dɔ̍ɔ̍ o̍ kɔ̄l ni᷄ŋ le̍ na̍a̍ māa̍ mīŋgūl.”

¹⁶Le̍ he̍ī, ma̍ yɔ̄ŋ dīōmnde̍ŋ nāa̍ Chōo̍sɛ̍ chu̍a̍ āā, “Lɔ̍ɔ̍pa̍ kɛ̄kɛ̍ nāa̍ ō wū,

¹⁷mbo̍ dīmūl na̍a̍ māā na̍a̍ ŋ̄ dīmu̍l nu̍m mī nūm ma̍l na̍a̍ le̍ yɔ̄ŋ wɔ̄ɔ̍ŋ na̍a̍ ŋ̄ tōsa̍l nu̍m ndo̍. Le̍la̍ŋ, yāndi̍i̍ ma̍l na̍a̍, kāni̍ fu̍u̍le̍ na̍a̍ bɛ̍ɛ̍ Mɛ̄lɛ̄ka̍ fi̍nyā nūm ō wa̍ pīɛ̄īyo̍ wo̍ ndu̍ na̍a̍ ŋ̄ chō pīɛ̄īyo̍ ni̍. Le̍la̍ŋ, ma̍l na̍a̍.” Mɛ̄ɛ̍ nda̍ dīmu̍l ndu̍ yōōŋgū bɛ̄ndāā ndūa̍a̍ yɔ᷄ŋ ndo̍, mbo̍ chāŋ.

¹⁸O̍ ko̍ŋ kɔ̍ɔ̍lī, mi̍ bɛ̄ndāā ndūa̍a̍ pi̍la̍ a̍ hu᷅ŋ, ma̍ tūndu᷄ŋ lɛ᷅ŋ ndu̍ o̍ lābɛ̄ŋgu̍ ni̍ŋ. Ma̍ dīmūl ndu̍ āā, “Ā chē na̍a̍, chīāā nūmnda̍ na̍a̍ ŋ̄ chō ni̍.”

¹⁹Kɛ̍ mi̍ Chōo̍sɛ̍ dīmūl nda̍ āā, “Lā wɔ̍ ya̍ le̍. Ya̍ I̍ to̍sā nyɛ᷅ Mɛ̄lɛ̄ka̍ ndu̍ nɔ̍ kūēē le̍ tōsāa̍ wo̍ le̍.

²⁰Nya̍ a̍a̍ tu̍u̍ le̍ ī wɔ̄ɔ̍ŋnde̍ tōsāa̍ a̍ ya̍, kɛ̍ mi̍ Mɛ̄lɛ̄ka̍ ndu̍ si̍i̍ŋgūū ndi̍ sūɛ̍i̍ kɛ̍ndɛ̄. Le̍la̍ŋ, nyɛ̍ yɔ̍nu̍ŋ ho̍ō wo̍, Mɛ̄lɛ̄ka̍ pi̍la̍ tōsa̍ ndi̍ ni̍. Ndu̍ nu̍u̍vi̍a̍a̍ nɛ̄īyo̍ ho̍ō le̍ yōōmūlā wānāā bɔ̄ɔ̍ bɔ̍ɔ̍ chi̍i̍ndi̍a̍a̍ ni̍.

²¹Le̍la̍ŋ sīōōŋīī o̍ sīōōŋīī ī wa᷅ nya̍ le̍. I̍ cho̍ hīōūwɔ̄ɔ̄ lāchī ā nyɛ̄ o̍ nyɛ̄ fe̍e̍ to̍sāa̍ le̍ nya̍ a̍ chūāūwāā nyāa̍.” Mbo̍ sūāā dīōmndā kɛ̄ndɛ̄ kɛ̍ndɛ̄la̍ŋ nāa̍ nda̍ chūā, ndu̍yɛ̍, mi̍ dīōmndā o̍ so̍ō la̍ŋ lā dɛ̄ɛ̄nīāā nda̍ kɔ̄lta̍ŋ.

²²O̍ ko̍ŋ kɔ̍ɔ̍lī, mi̍ Chōo̍sɛ̍ hi̍a̍ū lāchī a̍ wāa̍ I̍chi̍pī nda̍ yu̍ŋgu̍ fi̍nyā ndɔ̄ɔ̍. Mbo̍ lō o̍ ko̍ŋ ha̍a̍a̍ mbo̍ chīŋā wɔ̄sīla̍ŋ kɛ̄mɛ̄ a̍ tɔ̍ (110), ma̍lāŋ o̍ wu᷅.

²³O̍ lo̍ yōōmū mbo̍ bīī chūāūwāa̍ E̍fi̍lūēm po̍ ndɔ̄ wa̍, mbo̍ bīī vɛ̄lɛ̄ chūāūwāā māmāa̍ E̍fi̍lūēm nda̍. Ō lo̍ yōōmū, po᷄ Mānāa̍sē po̍ ndɔ̄ o̍ ve̍lū wo̍, dīōla̍ŋ āā, Māka̍yā, ndu̍ bɛ̍ɛ̍ mbo̍ vīālū chūāūwa̍ o̍ yu̍ŋgu̍ Chōo̍sīɔ̍ɔ̍ ni᷄ŋ.

²⁴O̍ ko̍ŋ kɔ̍ɔ̍lī, mbo̍ dīmūl bɛ̄ndāā ndūa̍a̍ āā, “Te̍le̍ŋ nī wu̍a̍a̍ ō fūūlu̍u̍. Kɛ̍ ndu̍yɛ̍, Mɛ̄lɛ̄ka̍ chō hīōūwɔ̄ɔ̄ lāchī a̍ nya̍ māndāa̍ ha̍a̍a̍ mbō lo̍ o̍ ko̍ŋ mbō sōli̍ nya̍ na̍ŋ. Ō chō nya̍ sōlī mbō kūɛ̄ a̍ nya̍, mbō fūūlu̍u̍ a̍ nya̍ sa̍lā le̍ nda̍ kīo̍o̍ le̍ŋ.”

²⁵Mi̍ Chōo̍sɛ̍ lō o̍ ko̍ŋ mbo̍ dīmūl wānāā ndūa̍a̍ āā, “Lā chūe̍l la̍ ībūŋgā mī lā mēna̍ŋ māā tē Mɛ̄lɛ̄ka̍ hu᷄ŋ wa᷅ kɔ̄la̍ŋ a̍ nya̍ pɛ̍, māā lā kūā ni̍ŋ a̍ dīāllūŋ nu᷄ŋ.”

²⁶O̍ ko̍ŋ kɔ̍ɔ̍lī, mi̍ Chōo̍sɛ̍ wu᷅ o̍ lɛ̄ŋndē I̍chi̍pīle̍ŋ ni᷄ŋ. O̍ wa̍ wɔ̄sīla̍ŋ kɛ̄mɛ̄ a̍ tɔ̍ (110) mbo̍ wū. Ma̍ bɛ̄ɛ̄ndīāā dīāllūŋ ndɔ᷄ŋ o̍ nɛ̄i̍ ŋ̍ ya̍lā ta̍mbu̍ le̍ wo̍ŋ. Ma̍ wōū mu̍ŋ o̍ kɔ̍fū nda̍ wōū wa᷅ŋ vīlɛ̍i̍ya̍ wo̍ ni᷄ŋ.