Read Southern Kisi Chɛ̄nɛ̍se̍ē 8 Bible Online

Chɛ̄nɛ̍se̍ē 8 - Southern Kisi bible

Chɛ̄nɛ̍se̍ē 8

¹Kɛ̍ ndu̍yɛ̍, Mɛ̄lɛ̄ka̍ wa̍ kɔ̄llo̍ o̍ Nu̍u̍wā lo̍, a̍ vīsīa̍a̍ kpo̍u̍ a̍ wa̍ ndu̍ o̍ bā o̍ dɛ̄ndɔ̄ɔ̍ ni᷄ŋ nda̍, vīsīāā yōndūa̍a̍ ni̍, a̍ vīsīāā chi̍e̍e̍ ni̍ŋnda̍. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ yɔ̄ŋgū hūēīye̍ mi̍ ī hūāŋ o̍ chi̍e̍ēŋndo̍ chōo̍. Mi̍ mɛ̄ŋnda̍ŋ mā kāndū tōlɔ̄ɔ̍.

²Mi̍ Mɛ̄lɛ̄ka̍ kīndā tɛ̄ɛ̄ŋgūlā mɛ̄ŋnda̍ŋ mā fūlā lɛ̄ŋ nda̍ŋ. Ndu̍yɛ̍, mbo̍ hāū pīɔ̍ɔ̍ chōo̍ cho̍o̍, mbo̍ pɛ̄ŋgī sīa̍a̍.

³Mi̍ mɛ̄ŋnda̍ŋ mā hīāū lāchī a̍ tōlɔ̄ɔ̍ mbo̍ kūā le̍ pālɛ̍i̍ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150).

⁴Mɛ̄ɛ̍ pālɛ̍i̍ kɛ̍mɛ̄ a̍ be̍le̍-ŋɛ̍ɛ̍nu̍e̍i̍ ī hīo̍u̍, mi̍ dɛ̄ndɔ̄ɔ̍ hu᷅ŋ cha᷅l o̍ pēmbēi̍ chōo̍ dīōla̍ŋ āā A̍lu̍a̍lu̍a̍tī. Pāŋgi̍i̍ ŋɔ̍mmɛ̍ūve̍ o̍ wɔ̄sī kōŋ ni᷄ŋ mālɔ̄ tɔ̍ a̍ lē ŋɔ᷄mmɛ̍ū, pāa̍le̍ le̍ŋ kpe̍e̍kpe̍i̍ dɛ̄ndɔ̄ɔ̍ hu᷄ŋ cha᷅l o̍ Pēmbīī A̍lu̍a̍lu̍a̍tīve̍ chōo̍ ni̍.

⁵O̍ ko̍ŋ kɔ̍ɔ̍lī, mi̍ mɛ̄ŋnda̍ŋ mā hīāū lāchī a̍ tōlɔ̄ɔ̍ mbo̍ fūūlūū a̍ pāŋgi̍i̍ tɔ̍ ve̍, o̍ wɔ̄sīo̍o̍ ni᷄ŋ. O̍ pāa̍le̍ tāse̍le̍ŋ chōo̍ o̍ pāŋgi̍i̍ tɔ̍ ve̍ mi̍ pēmbo᷄ŋ ŋ̄ fūla̍ bōlle̍.

⁶Mɛ̄ɛ̍ pālɛ̍i̍ ī hīōū be̍le̍-hi̍ɔ̍ɔ̍lu̍, mi̍ Nu̍u̍wā ku̍mbī dīō pɔ̄mbɔ̄ o̍ to̍o̍si̍a̍a̍ o̍ dɛ̄ndɔ̄ɔ̍ wo̍.

⁷Mbo̍ sōlī bāsa̍bāsa̍kūēndo̍o̍, le̍ mbō sīna̍ tē mɛ̄ŋnda̍ŋ mā chūū fāŋa᷅ŋ o̍ chi̍e̍ēŋndo̍ chōo̍. Kɛ̍ mɛ̄ɛ̍ bāsa̍bāsa̍kūēndo̍o̍ kūɛ̄, ō mīīŋgu̍ lɛ̍ Nu̍u̍wā o̍ ībūŋ te̍. Mbo̍ lō bālɔ̄ɔ̍ o̍ chi̍e̍ēŋndo̍ chōo̍ ha̍a̍a̍, mbo̍ lō o̍ ko̍ŋ mi̍ mɛ̄ŋnda̍ŋ mā vēlā o̍ chi̍e̍ēŋndo̍ chōo̍.

⁸Mɛ̄ɛ̍ Nu̍u̍wā che᷅ māā bāsa̍bāsa̍kūēndo̍o̍ ō mīīŋgu̍ ndu̍ o̍ ībūŋ te̍, mbo̍ sōlī vɛ̄lɛ̄ pīīŋndo̍.

⁹Kɛ̍ mɛ̄ɛ̍ pīīŋndo̍ kūɛ̄, ō sɔ̄la̍ na̍a̍ cha̍lāā le̍. Mbo̍ mīīŋgū o̍ dɛ̄ndɔ̄ɔ̍, kāni̍ fu̍u̍le̍, mɛ̄ŋnda̍ŋ mā wa̍ wɔ̄ o̍ lɛ̄ŋnde̍ŋ chōo̍. Mi̍ Nu̍u̍wā so̍lī bāa̍ mbo̍ lūēī pīīŋndo̍ o̍ dɛ̄ndɔ̄ɔ̍ ni᷄ŋ.

¹⁰Mbo̍ chūm le̍ pālɛ̍i̍ ī ŋɔ᷄mmɛ̍ū. Mbo̍ sōlī vɛ̄lɛ̄ pīīŋndo̍.

¹¹Vīōūwɔ̄ɔ̍ kpɛ̍ɛ̍, mi̍ pīīŋndo̍ mīīŋgū ndu̍ o̍ ībūŋ īchɔ̄llo̍. Kɛ̍ mɛ̄ɛ̍ o̍ hi᷅ŋ ni᷅ŋ, pēēle̍ ɔ̄li̍fīi̍lē kīyɛ̍i̍lē o̍ ke̍ndi̍ sɛ̄nɛ̄ī le̍ŋ lē wa̍ ndu̍ o̍ sōndō. O̍ ko̍ŋ, mi̍ Nu̍u̍wā si̍nā māā mɛ̄ŋnda̍ŋ mā vēla̍ o̍ lɛ̄ŋnde̍ŋ chōo̍.

¹²O̍ ko̍ŋ kɔ̍ɔ̍lī, mbo̍ chūm mi̍ pālɛ̍i̍ hīāū vɛ̄lɛ̄ ī ŋɔ᷄mmɛ̍ū. Mbo̍ sōlī vɛ̄lɛ̄ pīīŋndo̍. Kɛ̍ ō mīīŋgu̍ lɛ̍ ndu̍ o̍ ībūŋ te̍.

¹³Wɔ̄sī Nu̍u̍wā chi̍ŋa̍ wɔ̄sīla̍ŋ kɛ̄mɔ̄ɔ̍ lē ŋɔ᷄mpu᷅m a̍ ō pīlɛ̍ wo̍ (601), pāa̍le̍ tāse̍le̍ŋ, o̍ pāŋgi̍i̍ tāse̍i̍ ni᷄ŋ o̍ wɔ̄sī kōŋ ni᷄ŋ, mɛ̄ŋnda̍ŋ mā chūū fāŋa᷅ŋ o̍ lɛ̄ŋnde̍ŋ chōo̍ ni̍. Mi̍ Nu̍u̍wā ku̍mbī dɛ̄ndɔ̄ɔ̍, mbo̍ mɛ̄ɛ̄nda᷄ŋ. Mɛ̄ɛ̍ o̍ mɛ̍ɛ̍nda̍ŋ, mbo̍ sāālu᷄ŋ māā lɛ̄ŋnde̍ŋ lē vēsa̍.

¹⁴Pāŋgi̍i̍ di̍i̍ŋ ndūɛ̍i̍ o̍ wɔ̄sī kōŋ ni᷄ŋ, o̍ mālɔ̄ bi̍di̍i̍ŋ a̍ lē ŋɔ᷄mmɛ̍ū wa̍ŋ o̍ pāŋgi̍i̍ ke̍ŋ ni᷄ŋ, lɛ̄ŋnde̍ŋ lē vēsa̍ nyɛ̄ kɛ̄ndɛ̍ī ni̍.

¹⁵O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmūl Nu̍u̍wā āā,

¹⁶“Chɔ̍ŋ ni̍ko̍ mā fu̍la̍ o̍ dɛ̄ndɔ̄ɔ̍ ni᷄ŋ nya̍ la̍a̍ nu̍m, a̍ pūa̍a̍ nu̍mnda̍, a̍ lāāndāā pūa̍a̍ nu̍mnda̍.

¹⁷Mā so̍li̍ nyɛ̄ o̍ nyɛ̄ yōōmāa̍ cho̍ nu̍m o̍ bā o̍ dɛ̄ndɔ̄ɔ̍ ni᷄ŋ, yōūwa̍ ni̍, a̍ vīsī o̍ vīsī, mā ma̍l nda̍ mā kɔ̍ to̍sā chūāūwa̍ cha̍po̍. Ma̍l nda̍ mā kɔ̍ ku̍i̍ī ta̍u̍ o̍ chi̍e̍ēŋndo̍ chōo̍.”

¹⁸O̍ ko̍ŋ, mi̍ Nu̍u̍wā a̍ pūa̍a̍ ndūa̍a̍, a̍ la̍a̍ ndɔ̄, a̍ lāāndāā pūa̍a̍ ndāa̍ ā fūlā o̍ dɛ̄ndɔ̄ɔ̍ ni᷄ŋ.

¹⁹O̍ ko̍ŋ kɔ̍ɔ̍lī, vīsīa̍a̍ bɛ̍ɛ̍, a̍ yōūwa̍, a̍ nyɛ̄ o̍ nyɛ̄ yōōmāā, ma̍ fūlā o̍ dɛ̄ndɔ̄ɔ̍ ni᷄ŋ ā su̍u̍la̍ŋ le̍nde̍ yɛ̍ yɛ̍.

²⁰O̍ ko̍ŋ kɔ̍ɔ̍lī, mi̍ Nu̍u̍wā to̍o̍sīāā ma̍āŋndo̍ le̍ sa̍lāa̍ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Mbo̍ bīī vīsīa̍a̍ a̍ yōūwāa̍ cho̍ ā dīāndāā Mɛ̄lɛ̄ka̍ o̍ hɔ̄l la̍ ā ti᷄ŋ, mbo̍ sōlī nda̍ sa̍lāa̍, mbo̍ lūām nda̍ o̍ ma̍āŋndo̍ chōo̍.

²¹Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍e̍ī chūŋ kɛ̄ndɛ̄ sa̍lā Nu̍u̍wā so̍li̍ wo̍, mbo̍ dīmī o̍ kɔ̄l ni᷄ŋ āā, “Mi̍ chē bɛ̍ɛ̍ māā chɔ̍ŋ a̍ wāna̍ chi̍o̍o̍ chūāāmbɔ̄yɛ̍ī ndūɛ̍i̍ bɛ̍ɛ̍, māā yīya᷄ŋnda̍ wɔ̍ɔ̍ŋnda̍ŋ ko̍ni̍ la̍ hūŋ ndu̍ o̍ kɔ̄l ni̍, kɛ̍ I̍ he̍ndū lɛ̍ chi̍e̍ēŋndo̍ nyɛ̄ pālāa̍ chōo̍ le̍ wāna̍ chi̍o̍o̍ le̍. Ndu̍yɛ̍, I̍ di̍ū lɛ̍ nyɛ̄ o̍ nyɛ̄ yōōmāā nu̍a̍ā fa̍ū le̍.

²²Ha̍a̍a̍, a̍ bōōndi̍i̍ chi̍e̍ēŋndo̍ chō hīōūwɔ̄ɔ̍ lāchī a̍ wāa̍ ve̍, te̍le̍ŋnda̍ wa̍lta̍ īchīɛ̄ɛ̄la̍ŋ lā chō hīōūwɔ̄ɔ̄ lāchī a̍ wāa̍. Te̍le̍ŋnda̍ lēwɔ̄ɔ̄ la̍ŋ a̍ te̍le̍ŋnda̍ lēsīāl ta̍ŋ lā chō hīōūwɔ̄ɔ̄ lāchī a̍ wāa̍, mī te̍le̍ŋnda̍ pāa̍le̍ŋ lē fūlā la̍ŋ a̍ te̍le̍ŋnda̍ nyūmnda̍ŋ mā tūāl la̍ŋ lā hīōū lāchī a̍ wāa̍.”