Read Southern Kisi Chɛ̄nɛ̍se̍ē 9 Bible Online

Chɛ̄nɛ̍se̍ē 9 - Southern Kisi bible

Chɛ̄nɛ̍se̍ē 9

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dūāū Nu̍u̍wā sa̍lā nda̍ pūa̍a̍ ndūa̍a̍ āā, “Lā vīōlu̍ ŋ̍chu̍a̍u̍ mī lā kūi̍i̍ ta̍u̍ ta̍u̍ o̍ chi̍e̍ēŋndo̍ chōo̍.

²Vīsīa̍a̍ kpo̍u̍ o̍ chi̍e̍ēŋndo̍ chōo̍, a̍ yōūwa̍, a̍ sūūwa̍, a̍ nyɛ̄ o̍ nyɛ̄ yōōmāa̍ cho̍ o̍ chi̍e̍ēŋndo̍ chōo̍, sīōōŋnde̍ chō nda̍ wā ta̍u̍ le̍ nya̍. Nda̍ kpo̍u̍ nya̍ nɔ̍ nda̍ kpāāyāa̍ chōo̍ ni̍.

³I̍ ke̍ nya̍ nyɛ̄ o̍ nyɛ̍ cho̍ nyɛ̄ yōōmāā le̍ wāa̍ nyɛ̄ nyā di̍a̍ā, mɛ̄ɛ̍ ya̍ I̍ ke̍ nya̍ tɔ̄lɔ̄ɔ̄la̍ŋ le̍ dīo̍o̍ yɛ̍ ko̍ni̍. Le̍la̍ŋ, lā chē nyɛ̄ o̍ nyɛ̄ fe̍e̍.

⁴Kɛ̍ ndu̍yɛ̍, lā di̍ā vīsīo̍o̍ o̍ nya̍ sōli̍ fɛ̍ɛ̍ŋ kōo̍ma̍ ndūa̍a̍ŋ te̍ wo̍ le̍, kāni̍ fu̍u̍le̍, o̍ kōo̍wa̍ŋ ni᷄ŋ yōōmōo̍ chō ni̍.

⁵Le̍ yōōmū wāna̍ chi̍o̍o̍ tɛ̄ɛ̄mbūūwo̍, nyɛ̄ pālāa̍ ya̍ tu̍sī wa᷅ŋndo̍ kɛ̄lɛ̄ŋgāā chɔ̄lōo̍ o̍ tɛ̍ɛ̍mbūū ndu̍ wo̍ chōo̍ ni̍. Tē vīsīo̍o̍ kɛ̄lɛ̄ŋgāā chɔ̄lōo̍ ō dīī wāna̍ chi̍o̍o̍ pɛ̍, lā dīi̍ ndu̍. Wānā o̍ wāna̍ di̍ī chāa̍ŋ ndɔ̄ wa᷅na̍ chi̍o̍o̍ pɛ̍, ndu̍ bɛ̍ɛ̍ ō nɔ̄ mbō sɔ̄la̍ dīyɔ̄ɔ̍.

⁶Wānā o̍ wāna̍ di̍ī wāna̍ chi̍o̍o̍ pɛ̍, ndu̍ bɛ̍ɛ̍ wāna̍ chi̍o̍o̍ ko̍ni̍ di̍ī ndu̍ ni̍. Kāni̍ fu̍u̍le̍, tōōsīāā ya̍ Mɛ̍lɛ̄ka̍ tōōsi̍a̍a̍ wāna̍ chi̍o̍o̍ wo̍ māā vēla᷅ŋ nī ya̍ I̍ to̍o̍si̍a̍a̍ ndu̍ ni̍.

⁷“Lā vīōlu̍ chu̍a̍ūwa̍, mī lā kūi̍i̍, mī lā mīīŋgu̍ pīɔ̄ o̍ chi̍e̍ēŋndo̍ chōo̍.”

⁸O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dīmūl Nu̍u̍wā nda̍ pūa̍a̍ ndūa̍a̍ āā,

⁹“I̍ yi̍ī yɔ̍ kpe̍ma̍a̍ na̍a̍ nya̍ā tɛ̍ɛ̄ŋ, a̍ chūāūwāā nyāā ma̍māa̍ lēpūlā kɛ̄,

¹⁰a̍ nyɛ̄ o̍ nyɛ̄ yōōmāa̍ wa̍ o̍ dɛ̄ndɔ̄ɔ̍ ni᷄ŋ. Chɔ̄lū chi̍e̍e̍ ni̍ŋ ni̍, vīsī yōndō ni̍, yōū ni̍, kpo̍u̍.

¹¹Kpe̍ma̍ ko̍ŋ cho̍ ni̍ māā le̍ fɛ̍ɛ̍ŋ a̍ fɛ̍ɛ̍ŋ I̍ tɛ̍ɛ̍mbūū lɛ̍ nyɛ̄ o̍ nyɛ̄ yōōmāā a̍ mɛ̄ŋmā hūna᷄ŋ te̍. Ndu̍yɛ̍ I̍ tɛ̍ɛ̍mbūū lɛ̍ chi̍e̍ēŋndo̍ a̍ mɛ̄ŋmā hūna᷄ŋ te̍.”

¹²Mi̍ Mɛ̄lɛ̄ka̍ dīmī āā, “Tāāmāsi̍o̍o̍ chō ho̍ō le̍ kpe̍ma̍ ya̍ I̍ yi̍i̍ na̍a̍ nya̍ tɛ̍ɛ̄ŋ, a̍ nyɛ̄ o̍ nyɛ̄ yōōmāa̍ wa̍ nu̍m o̍ bā o̍ dɛ̄ndɔ̄ɔ̍ ni᷄ŋ ndo̍ ni̍. Wāŋndā chīe̍e̍ya̍ ni̍, a̍ nyɛ̄ o̍ nyɛ̄ yōōmāā ni᷅ŋ lāchī kɛ̄.

¹³I̍ ha̍ndu̍ ni̍ŋgi̍na̍ŋgā nūu̍ chōo̍ cho̍o̍ māā tāāmāsi̍ le̍ kpe̍ma̍a̍ na̍a̍ tɛ̄ɛ̄ŋ na̍a̍ chi̍e̍ēŋndo̍.

¹⁴Te̍le̍ŋ o̍ te̍le̍ŋ ya̍ I̍ to̍sa̍ pɛ̍ mī pīɔ̍ɔ̍ he᷄l, kɛ̍ mī ni̍ŋgi̍na̍ŋgāa̍ ō hīni̍ chōo̍ cho̍o̍,

¹⁵I̍ lo̍o̍nu̍ŋ dɔ̍ɔ̍ a̍ kpe̍ma̍ ya̍ yi̍i̍ na̍a̍ nya̍ā tɛ̍ɛ̄ŋ a̍ nyɛ̄ o̍ nyɛ̄ yōōmāā fe̍e̍, māā fɛ̍ɛ̍ŋ a̍ fɛ̍ɛ̍ŋ I̍ tɛ̍ɛ̍mbūū lɛ̍ nyɛ̄ o̍ nyɛ̄ yōōmāā kpo̍u̍ a̍ mɛ̄ŋmā hūna᷄ŋ te̍ wo̍.

¹⁶Tē ni̍ŋgi̍na̍ŋgāa̍ ō hīni̍ dɔ̍ɔ̍ chōo̍ pɛ̍ mī che᷅, I̍ lo̍o̍nu̍ŋ dɔ̍ɔ̍ a̍ kpe̍ma̍ fɛ̍ɛ̍ŋ fɛ̍ɛ̍ŋ cho̍ ya̍ Mɛ̍lɛ̄ka̍ tɛ̄ɛ̄ŋ a̍ nyɛ̄ o̍ nyɛ̄ yōōmāā fe̍e̍ o̍ chi̍e̍ēŋndo̍ chōo̍ wo̍.”

¹⁷O̍ ko̍ŋ, mi̍ Mɛ̄lɛ̄ka̍ dīmūl Nu̍u̍wā āā, “Tāāmāsi̍o̍o̍ cho̍ ho̍ō le̍ kpe̍ma̍ ya̍ I̍ to̍sa̍ ya̍ pi̍la̍ tɛ̄ɛ̄ŋ na̍a̍ nyɛ̄ o̍ nyɛ̄ yōōmāā fe̍e̍ o̍ chi̍e̍ēŋndo̍ chōo̍ wo̍ ni̍.”

¹⁸Pūa̍a̍ Nu̍u̍wā wa̍ a̍ fu̍la̍ o̍ dɛ̄ndɔ̄ɔ̍ ni᷄ŋ nda̍ cho̍ ha̍ā ni̍. Si̍ɛ̄m, a̍ Ha̍ām, a̍ Cha̍fɛ̍tī. Nu̍u̍wā po̍ ndɔ̄ɔ̍ pīlɔ̍ɔ̍ Ha̍ām ndu̍ ve̍lū Ke̍nāŋ ni̍.

¹⁹Pūa̍a̍ ya̍a̍wa̍a̍ Nu̍u̍wā wa̍ ha̍ā, nda̍ ve̍lū ni᷄ŋ chūāūwa̍ ni̍ mi̍ chūāūwāā kāŋ ā kūā a̍ kūi̍i̍yo̍ ma̍ tīū o̍ chi̍e̍ēŋndo̍ chōo̍ kpo̍u̍.

²⁰Wāna̍ wa̍li̍ īchīɔ̍ɔ̍ Nu̍u̍wā wa̍ ni̍. Mbo̍ tūāl kpe̍le̍ mākīle̍pīi̍yo̍ ndu̍yɛ̍, mbo̍ tōsā mūɛ̄īya̍ŋ a̍ kɔ̄mndē lēŋ.

²¹Mbo̍ kōl mūɛ̄īmā māŋ mi̍ mā bīī ndu̍. Nu̍u̍wā wa̍ wāna̍ tāso̍o̍ le̍ kpe̍le̍ wa̍ā nu̍a̍ā tōsāa̍ ni̍. Mɛ̄ɛ̍ ma̍ bi̍ī ndu̍, mbo̍ hīnī o̍ tɛ̍ndīi̍ ndɔ̄ɔ̍ ni᷄ŋ tu̍ū fo̍ndō.

²²Mɛ̄ɛ̍ Ha̍ām, fi̍nyāa̍ Ke̍nāŋ, che᷅ Nu̍u̍wā fi̍nyā ndɔ̍ īhīni̍ tu̍ū fo̍ndō, mbo̍ kɔ̍ di̍mūl bɛ̄ndāā ndūa̍a̍ o̍ bɛ̍ɛ̄.

²³Mi̍ Si̍ɛ̄m nda̍ Cha̍fɛ̍tī a̍ chu̍ā dōmāa̍, ma̍ sāā ndu̍ vēllāa̍ vēllē. Ma̍ pɛ̄ŋgɛ̄la᷄ŋ ndu̍ o̍ lāpɛ̄ɛ̄ŋ ma̍ lūɛ̄ī a̍ mākɔ̄ɔ̄, ma̍ kūūmbūū fi̍nyā nda̍. Hɔ̄lla̍ wa̍ nda̍ ā mūlīāā bā bīɔ̄ɔ̄. Le̍ he̍ī, ā chi̍ fi̍nyā nda̍ tūū fo̍ndō le̍.

²⁴Mɛ̄ɛ̍ mūɛ̄īya̍ŋ mā kīōlu̍ Nu̍u̍wā o̍ hɔ̄l, mbo̍ sīnā a̍ nyɛ̄ po̍ ndɔ̄ mɛ̍ɛ̍lāa̍ Ha̍ām to̍sa̍ wo̍ o̍kɔ̄ɔ̄. O̍ ko̍ŋ, mi̍ Nu̍u̍wā me̍nā Ha̍ām a̍ chūāūwāā ndūa̍a̍.

²⁵Mbo̍ dīmī āā, “Sēndi̍o̍o̍ chō pūlāle̍ Ke̍nāŋnde̍ŋ chōo̍. Nu̍a̍ā Ke̍na̍na̍i̍tīi̍ya̍ ā lō chi̍a̍a̍ ndi̍a̍ā ndāā pi̍lla̍ o̍ bā bɛ̄ŋgu̍ fɔ̍!”

²⁶Mbo̍ dīmī āā, “Mɛ̄lɛ̄ka̍ nūu̍ Ya̍a̍wɛ̄ɛ̄, o̍ dɔ̍u̍ Si̍ɛ̄m sa̍lā. Pūlāle̍ Ke̍nāŋnde̍ŋ lē sīmnu̍ŋ chi̍a̍a̍ le̍ Si̍ɛ̄m fɔ̍!

²⁷Mɛ̄lɛ̄ka̍, yāndi̍i̍, chɔ̍ɔ̍lu̍ Cha̍fɛ̍ti̍ lɛ̄ŋnde̍ŋ fɔ̍! Cha̍fɛ̍tī nda̍ Si̍ɛ̄m, cha᷄lta̍ nda̍la̍ŋ lā sīmnu̍ŋ nyɛ̄ pīlɛ̍ fɔ̍! Pūlāle̍ Ke̍nāŋnde̍ŋ lē sīmnu̍ŋ chi̍a̍a̍ le̍ pūlāle̍ Cha̍fɛ̍tīle̍ŋ fɔ̍”

²⁸Chɔ̍ŋ a̍ bōōndi̍i̍ mɛ̄ŋnda̍ŋ mā fāŋa̍ŋ o̍ chi̍e̍ēndo̍ chōo̍ ve̍, mi̍ Nu̍u̍wā chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ le̍yāa̍ a̍ be̍le̍-ŋu̍ɛ̍ɛ̍nu̍ (350).

²⁹Mɛ̄ɛ̍, Nu̍u̍wā chi̍i̍ wɔ̄sīla̍ŋ fa̍ū fa̍ū kɛ̄mɔ̄ɔ̍ lē ŋɔ̄ma̍hīɔ̍ɔ̍lu̍ a̍ be̍le̍-ŋu̍ɛ̍ɛ̍nu̍ (950) ma̍lāŋ o̍ wū.