Read Southern Kisi Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 18 Bible Online

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 18 - Southern Kisi bible

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 18

¹O̍ ko̍ŋ kɔ̍ɔ̍lī, mi̍ Dēēve̍ chūūŋgīāā pūa̍a̍ ndūa̍a̍ kpo̍u̍ na̍a̍ pi᷅lɛ̍, mbo̍ pīɔ̄ū nda̍ ku̍ndāla̍ŋ o̍ wāa̍la̍ŋ ni᷄ŋ a̍ o̍ kɛ̄mɛ̄la̍ŋ ni᷄ŋ. Mbo̍ hɛ̄lī pūa̍a̍ mbo̍ kɛ̄sī nda̍ ku̍ndālā lāŋ bōlle̍ kpɛ̍ kpɛ̍

²Mbo̍ mūli̍ŋ mbo̍ pīɔ̄ū ku̍ndālā la̍ŋ tɛ̄ɛ̄ŋ sālā yāa̍, mɛ̄ɛ̍ o̍ si̍mi̍ Cho̍wa̍bī ku̍ndāa̍ pīlɔ̍ɔ̍ bōlle̍ŋ, mbo̍ sīmī Ābi̍sīāā, pɔ̄mbɔ̄ɔ̍ Cho̍wa̍bī ku̍ndāa̍ pīlɔ̍ɔ̍ bōlle̍ŋ, mi̍ I̍tāī Kātītīi̍nɔ̍ ndu̍ wa᷅ ku̍ndāa̍ pīlɔ̍ɔ̍ bōlle̍ŋ. O̍ ko̍ŋ kɔ̍ɔ̍lī, mbo̍ yɔ̄ŋ nda̍ le̍ mā kɔ̍ sɔ̍ŋgā a̍ A̍bi̍sa̍lɔ̄m. Kɛ̍ mɛ̄ɛ̍ nda̍ wa̍ kɔ̄la̍ŋ mbo̍ dīmūl nda̍ āā, “Ya̍ pi̍la̍ bɛ̍ɛ̍ I̍ ye̍e̍ma̍ mī ku̍ɛ̄ a̍ nya̍ hɔ̍lāā tūlu̍.”

³Mi̍ pūa̍a̍ ndūa̍a̍ dīmūl ndu̍ āā, “Sāko̍ fāllo̍, nūm pi̍la̍ ku̍ā le̍. Na̍a̍ ŋ̄ kūā wɔ̍. Fo̍ndōle̍ na̍a̍ na̍a̍ ā yɔ᷄ŋ bɛ̍ɛ̍ mī ku̍nda̍ A̍bi̍sa̍lɔ̄m ndo̍ ā kɔ̍ yɔ̍m na̍a̍ mī ŋ̄ nyāānu̍ŋ nda̍, ā he̍ndū na̍a̍ lēhɔ̄l kɔ̄ɔ̄lī ta̍u̍ le̍. Ā dīu̍ bɛ̍ɛ̍ na̍a̍ ŋ̍ cho̍ kɔ̄la̍ŋ nda̍ tɛ̄ndāa̍ tɛ̄ɛ̄ŋ ki̍nɛ̍i̍, ā si̍nā bɛ̍ɛ̍ tē ā dīī ŋ̄wāŋndā chīe̍e̍ le̍. Kɛ̍ nūm nūm, nu᷄m pīlɛ̍ kpe̍ ā hīōū bɛ̍ɛ̍ wa᷅ŋnda̍ wāa̍la̍ŋ tɔ̍ nda̍ o̍ hɔ̄l. Le̍la̍ŋ ō bɛ̍ndā mā kūɛ̄ le̍, ō wā le̍tu̍u̍ mā lo̍ na̍nu᷄ŋ mā mālā na̍a̍ o̍ chɔ̄ūwo̍ lāchī.”

⁴Mi̍ Māsāa̍ Dēēve̍ dīmūl nda̍ āā, “Nyɛ̄ o̍ nyɛ̄ nya̍ yīya̍ŋ pɛ̍ māā ō bɛ̄nda̍ tōsāa̍ ya̍ I̍ to̍sā ni̍.” O̍ ko̍ŋ, mi̍ Dēēve̍ kɔ̍ si᷅m o̍ kpāki̍ chi̍o̍o̍ sōndōo̍ mbō mɛ̄ɛ̄nda᷄ŋ pu̍a̍a̍ ndūa̍a̍ hīōūwɔ̄ɔ̍ o̍ wāa̍la̍ŋ ni᷄ŋ a̍ o̍ kɛ̄mɛ̄la̍ŋ ni᷄ŋ.

⁵Kɛ̍ mɛ̄ɛ̍ nda̍ wa̍ kɔ̄la̍ŋ mi̍ Dēēve̍ vēēlū Cho̍wa̍bī nda̍ Ābi̍sīāā, a̍ I̍tāī, mbo̍ chōŋgu᷄ŋ nda̍ āā, “Yāndi̍i̍, lā yīya̍ŋ ya̍ chōo̍, lā di̍ī po̍ chu̍a̍ pīāāndōo̍ A̍bi̍sa̍lɔ̄m te̍.” Ndu̍yɛ̍ pūa̍a̍ Dēēve̍ wa̍ kpo̍u̍ ma̍ tūɛ̄ī sīlāa̍ ho̍ō.

⁶Mi̍ pūa̍a̍ Dēēve̍ wa̍ ā māl ma̍ kūā kūmbū pūa̍a̍ A̍bi̍sa̍lɔ̄m nda̍ ā wa̍ wo̍. Ma̍ kɔ̍ chi᷅ŋa̍la̍ŋ nda̍ a̍ sɔ̍ŋgɔ̄ɔ̍ o̍ yōndō E̍fi̍lūēmndo̍ ni᷄ŋ.

⁷Ndu̍yɛ̍ ma̍ yām pūa̍a̍ A̍bi̍sa̍lɔ̄m nda̍ ma̍ dīū nda̍ dīūwo̍ pīla̍. Ma̍ dīī pūa̍a̍ A̍bi̍sa̍lɔ̄m wāa̍la̍ŋ bi̍di̍i̍ŋ (20,000).

⁸Mi̍ sɔ̍ŋgɔ̄ɔ̍ kūā a̍ nda̍ tīmbu̍la᷅ŋndo̍ tɛ̄ɛ̄ŋ mbo̍ tīū lɛ̄ŋnde̍ŋ kpo̍u̍. Ndu̍yɛ̍ mi̍ pūa̍a̍ A̍bi̍sa̍lɔ̄m nda̍ ā wū ta̍u̍ ta̍u̍ a̍ vi᷅ yōndōo̍ ni᷄ŋ a̍ bā ndā wa̍ nda̍ a̍a̍ hi̍o̍ū a̍ nda̍ dīu̍ wa̍.

⁹Mi̍ ī yɔ̄nu᷄ŋ mi̍ A̍bi̍sa̍lɔ̄m o̍ bɔ̍ŋa᷅ŋ a̍ pūa̍a̍ Dēēve̍ wa̍ tɛ̍ɛ̄ndɛ᷅ŋ, ō wa̍ kīlta̍ŋ o̍ sōfɛ̍lɛ̍ ndɔ̄ɔ̍ chōo̍. Mɛ̄ɛ̍ o̍ chɛ̍ nda̍, ō lo̍ kīlta̍ŋ mi̍ sōfɛ̍lɛ̍ o̍ wa̍ kīlta̍ŋ chōo̍ wo̍ ō kɔ̍ lu̍ɛ̍ī o̍ yɔ̄m bɛ̄ndōo̍ bɛ̄ŋgu̍.[4] Mi̍ yīīŋīi̍ A̍bi̍sa̍lɔ̄m nde̍ ī kēī bāa̍ŋ o̍ lɛ̄vīī yɔ̄mndo̍, mi̍ sōfɛ̍lɔ̍ɔ̍ hīāū hɛ̍bɛ̄ mi̍ ndu̍ pi̍la̍ lō ō lānda᷄ŋ lo̍ŋ.

¹⁰Mi̍ pūa̍a̍ Dēēve̍ wa̍ ō pīlɛ̍ ō sāālu᷄ŋ ndu̍ ō lānda᷄ŋndo̍ lo̍ŋ o̍ yɔ̄mndo̍. Mbo̍ nyāānu᷄ŋ mbo̍ kɔ̍ di̍mūl Cho̍wa̍bī āā, “Fāllo̍, I̍ sa̍a̍lu̍ŋ A̍bi̍sa̍lɔ̄m. Ō chō ō lānda᷄ŋndo̍ o̍ yɔ̄mndo̍.”

¹¹Mi̍ Cho̍wa̍bī di̍mī āā, “Ēe̍, ma̍ chā ndu̍? Vɛ᷅ a̍ di̍i̍ ndu̍ lē pīlɛ̍ kpe̍ le̍? I̍ wa̍ nu̍m ka̍ni̍o̍ŋ kē ta̍u̍ ta̍u̍, ndu̍yɛ̍ mī ya̍ i̍i̍ mūli᷄ŋ mī ya̍ i̍i̍ si̍i̍ŋgu̍u̍ nu̍m wānā bɛ̍ndū.”

¹²Kɛ̍ mi̍ pōo̍ dīmūl ndu̍ āā, “Ā yɔ̍ŋ bɛ̍ɛ̍ mā ke̍ ya̍ nyɛ̄ sɔ̄lāa̍ wa̍a̍ ō pīlɛ̍ I̍ bi̍ī kɔ᷅llo̍ mī di̍ī māsa̍ nāa̍ po̍ ndɔ̄ɔ̍ le̍. Hūnɔ̄ɔ̄ na̍a̍ ŋ̄ wa̍ wo̍ na̍a̍ kpo̍u̍ ŋ̄ tūēī sīlā māsāa̍ ō sīla̍ nya̍ wo̍. Mbo̍ dīmūl nya̍ āā, ‘Lā yīya̍ŋ ya̍ chōo̍, lā di̍ī po̍ chu̍a̍ pīāāndōo̍ A̍bi̍sa̍lɔ̄m te̍’.

¹³Tē ya̍ i̍i̍ so̍li̍ māsāa̍ dīōm pɛ̍ mī ya̍ i̍i̍ di̍ī po̍ ndɔ̄ɔ̍, Māsāa̍ wa̍ tūēīyɔ̄ɔ̄ māā ya̍ di̍ī po̍ ndɔ̄ɔ̍ ni̍, o̍ ko̍ŋ, mī ndu̍ o̍o̍ yɔ̍ŋ ya̍ nyɛ̄. Ndu̍yɛ̍ nūm o̍o̍ kɔ̍ɔ̍sā ni̍ŋ le̍ ya̍ mī nūm o̍o̍ so̍li̍ ya̍ lēni᷄ŋ te̍.”

¹⁴Mi̍ Cho̍wa̍bī di̍mūl ndu̍ āā, “Sɔ̄ɔ̍ŋ ta̍ma̍la̍ŋ nūm mu̍ŋ ō cho̍ bɛ̍ɛ̍ mu̍ŋ te̍ ya̍ I̍ ye̍e̍ma̍ mī tu̍e̍ī le̍.” Mi̍ Cho̍wa̍bī ku̍ā chɔ̍ chɔ̍ nāa̍ A̍bi̍sa̍lɔ̄m o̍ wa̍ ō lānda᷄ŋ o̍ yɔ̄mndo̍ wa̍. Ndu̍yɛ̍ A̍bi̍sa̍lɔ̄m ndu̍ o̍o̍ vi̍ wɔ̍ le̍, o̍ wa̍ yōōmū. Mi̍ Cho̍wa̍bī ba᷅ŋ ndu̍ ba̍lta̍ŋ o̍ tākpā lā yāa̍.

¹⁵O̍ ko̍ŋ kɔ̍ɔ̍lī, mi̍ pūa̍a̍ bi̍i̍lūl Cho̍wa̍bī wōlɔ̄ɔ̄lā chɔ̄ūla̍ŋ nda̍ ŋ̄ wāŋ tɔ̍ a̍ hu᷄ŋ to᷅l A̍bi̍sa̍lɔ̄m chōo̍ ma̍ sīōū ndu̍ dīyɔ̄ɔ̄.

¹⁶O̍ ko̍ŋ kɔ̍ɔ̍lī, mi̍ Cho̍wa̍bī hɔ᷅ŋ bu̍lo̍o̍ le̍ pūa̍a̍ ndūa̍a̍ vēēlōo̍ māā chɔ̄ūwo̍ chūū. Dīmīo̍o̍ nu̍a̍ā mi̍ pūa̍a̍ ndūa̍a̍ ā tūēī bu̍lo̍o̍ ma̍ fa̍ŋa᷄ŋ I̍sɔ̄lūɛ̍i̍ya̍ kɔ̄ɔ̄lī ma̍ mīīŋgū Cho̍wa̍bī o̍ ībūŋ.

¹⁷Mi̍ Cho̍wa̍bī nda̍ pūa̍a̍ ndūa̍a̍ ā chūā dīāllu᷄ŋ A̍bi̍sa̍lɔ̄m ndo̍ŋ ma̍ kɔ̍ vi̍o̍ū mu̍ŋ o̍ so̍o̍ŋ yi̍ŋgi̍lɛ̍i̍yo̍ ni᷄ŋ o̍ yōndō kōŋ ni᷄ŋ lo̍ŋ. Ma̍ dīī pōūta̍ŋ ku̍ndā bɛ̄ndōo̍ o̍ so̍o̍ŋ ko̍ŋ chōo̍. O̍ ko̍ŋ kɔ̍ɔ̍lī, mi̍ pūa̍a̍ A̍bi̍sa̍lɔ̄m nda̍ ā nyāānu᷄ŋ mi̍ wānā o̍ wānā mi̍i̍ŋgu᷄ŋ o̍ ndu̍ lo̍.

¹⁸Bōōndi̍i̍ A̍bi̍sa̍lɔ̄m o̍ wa̍ yōōmū ve̍, mbo̍ tāŋgūl nyɔ̄ɔ̍ māā sūŋgbu̍le̍ vi̍lɛ̄ī o̍ dɛ̍ŋgbɛ̍ nda̍ vēēlū āā, Dɛ̍ŋgbɛ̍ Māsā bɛ̍ndōo̍ wo̍ ni᷄ŋ le̍ lōōnɔ᷄ŋndo̍ a̍ ndu̍ o̍kɔ̄ɔ̄. Fo̍ndōle̍ ndu̍ o̍o̍ nɔ̍ po̍ o̍ po̍ mī ndu̍ o̍o̍ lōo̍ dīōlā ndɔ̄la̍ŋ o̍ kɔ̄ŋgɔ̍ le̍. Mbo̍ kē nyɛ̄ vīlɛ̄ī o̍ ta̍ŋgu̍l ko̍ŋ māā lēsūŋgbu̍ wo̍ dīōla̍ŋ āā, “Nyɛ̄ lōōna᷄ŋndo̍ a̍ A̍bi̍sa̍lɔ̄m o̍kɔ̄ɔ̄.” Ndu̍yɛ̍ a̍ te̍le̍ŋ yāu̍wo̍ ho̍ō ō chō pōōnyīa̍ŋndo̍ wo̍ bɛ̍ɛ̍ le̍nde̍ wāŋnda̍ chō wɔ̄ nyɛ̄ o̍ ta̍ŋgu̍l ko̍ŋ ndo̍ vēēlōo̍ ni̍.

¹⁹O̍ ko̍ŋ kɔ̍ɔ̍lī, mi̍ Āhi̍ma̍a̍sī, po̍ Sa̍dɔ̍kī wo̍ ō dīmūl Cho̍wa̍bī āā, “Fāllo̍, I̍ nya̍a̍nūŋ ndɔ̍ mī kɔ̍ di̍mūl māsāa̍ yōōŋgū kɛ̄ndɔ̄ɔ̍ ho̍ō māā Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndi̍a̍a̍ ndu̍ ya̍a̍mɔ̍ɔ̍wa̍a̍ ndūa̍a̍ si̍mu̍l ndu̍ wa̍ o̍ bā.”

²⁰Kɛ̍ mi̍ Cho̍wa̍bī di̍mūl ndu̍ āā, “Sāko̍, nūm ku̍ā ha̍ū a̍ yōōŋgū o̍ yōōŋgū le̍. Pāa̍le̍ chɛ̍le̍ŋ ā kūɛ̄ a̍ yōōŋgū chēle̍ŋ. Kɛ̍ hāū ndu̍ ndu̍ nūm ku̍ā le̍. O̍ cho̍ yo̍o̍ŋgū kɛ̄ndɛ̄ cho̍ ho̍ō le̍, fo̍ndōle̍ Māsāa̍ po̍ ndɔ̄ɔ̍ vi᷅ ni̍.”

²¹Mi̍ Cho̍wa̍bī lō o̍ ko̍ŋ mbo̍ dīmūl chɛ̄ ndɔ̄ I̍to̍o̍pīāānɔ̄ɔ̍ āā, “Kɔ̍ mā kɔ̍ di̍mūl Māsāa̍ nyɛ̄ ŋ̄ chē wo̍.” Mi̍ lāŋu̍nɔ̄ chīo̍o̍ ō tūndu᷄ŋ ndu̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. O̍ ko̍ŋ kɔ̍ɔ̍lī, mbo̍ mālnu̍ŋ a̍ kīlta̍ŋ mbo̍ bīī la̍ŋ le̍ kɔ̄la̍ŋ Dēēve̍ dīmūl lo̍.

²²Mi̍ Āhi̍ma̍a̍sī nyɔ̍ɔ̍lū Cho̍wa̍bī mbo̍ dīmūl ndu̍ āā, “Yāndi̍i̍ fāllo̍, ma̍l la̍ mī ŋ̄ kūɛ̄ na̍a̍ chɛ̄ nūmndo̍ ho̍ō, nyɛ̄ o̍ nyɛ̍ wa̍ yɔ̄nɔ᷄ŋ a̍ ya̍ pɛ̍ ō yɔ̄nu̍ŋ.” Mi̍ Cho̍wa̍bī nyu̍nā ndu̍ a̍a̍, “Le̍ yɛ̄ɛ̍nɛ̍ ŋ̄ chō yɛ̄ lāūwo̍ le̍ kɔ̄la̍ŋ a̍ yōōŋgōo̍ ho̍ō? Kɔ̍ bɛ̍ɛ̍ a̍ yōōŋgōo̍ ho̍ō, pāāwā o̍ pāāwā o̍ cho̍ la̍kɔ̍ sɔ̄lā le̍.”

²³Mi̍ Āhi̍ma̍a̍sī di̍mūl ndu̍ āā, “Mī kɔ̍ sɔ̍lā bɛ̍ɛ̍ pa̍a̍wā o̍ pāāwā le̍, kɛ̍ I̍ ye̍e̍ma̍ mī ku̍ɛ̄.” Mi̍ Cho̍wa̍bī lō o̍ ko̍ŋ mbo̍ dīmūl ndu̍ āā, “Mɛ̄ɛ̍ kɔ̍.” Mi̍ Āhi̍ma̍a̍sī ma̍lnu᷄ŋ a̍ kīlta̍ŋ mi̍ ndu̍ ke̍ī a̍ dɛ̍ŋgbɛ̍ ho̍lnu̍ŋ Chɔ̍ɔ̍dāŋ nda̍ŋ ndo̍ Ndu̍yɛ̍ mbo̍ fūūlūū lāŋu̍nɔ̄ chīɔ̍ɔ̍ tāse̍.

²⁴Dēēve̍ wa̍ īchāli̍ o̍ dīōlā kpāki̍ chi̍e̍e̍ la̍ ti̍ɔ̍ɔ̍ŋnda̍ŋ tɛ̄ɛ̄ŋ. Mi̍ wānā mɛ̍ŋgɛ̄lāa̍ he̍l o̍ kpāki̍ chi̍o̍o̍ chōo̍ o̍ dīō kpākīo̍o̍ īkɛ̄i̍ mbo̍ wā mɛ̄ɛ̄nda᷄ŋndo̍. O̍ ko̍ŋ mbo̍ chā wāŋndo̍ hūnɔ̄ɔ̍ a̍ kīlta̍ŋ pɔ̍ɔ̍li̍ ndu̍ pīlɛ̍ kpe̍.

²⁵Mɛ̄ɛ̍ o̍ chɛ̍ ndu̍ hūnɔ̄ɔ̍, mbo̍ dīmūl Māsāa̍ Dēēve̍ chōo̍ cho̍o̍ māā wāŋndo̍ chō hūnɔ̄ɔ̍ a̍ kīlta̍ŋ. Mi̍ Dēēve̍ di̍mūl ndu̍ āā, “Tē ō wa̍ ndu̍ pīlɛ̍ pɛ̍ cho̍ hūnɔ̄ɔ̍ ni̍ mɛ̄ɛ̍ a̍ yōōŋgū kɛ̄ndɔ̄ɔ̍ o̍ cho̍ hūnɔ̄ɔ̍ ni̍.” Mi̍ wānā ko̍ŋ lō hūnɔ̄ɔ̍ a̍ kīlta̍ŋ mbo̍ sɔ̄ɔ̄ŋgūū chi̍o̍o̍ īkɛ̄i̍.

²⁶O̍ ko̍ŋ kɔ̍ɔ̍lī, mi̍ wānā mɛ̍ŋgɛ̄lāa̍ ō chā vɛ̄lɛ̄ wānā chɛ̍le̍ŋ hūnɔ̄ɔ̍ a̍ kīlta̍ŋ ndu̍ pīlɛ̍ kpe̍. Mi̍ wānā mɛ̍ŋgɛ̄lāa̍ dīmūl wāna̍ wa̍ dīō kpāki̍ chi̍o̍o̍ māndāa̍ wo̍ cho̍o̍ āā, “Wānā chɛ̍le̍ŋ chō vɛ̄lɛ̄ hūnɔ̄ɔ̍ a̍ kīlta̍ŋ ndu̍ pīlɛ̍.” Mi̍ Māsāa̍ Dēēve̍ di̍mī āā, “Ndu̍ bɛ̍ɛ̍ yōōŋgū kɛ̄ndɔ̄ɔ̍ o̍ cho̍ hūnɔ̄ɔ̍ ni̍.”

²⁷Mi̍ wānā mɛ̍ŋgɛ̄lāa̍ dīmī chōo̍ cho̍o̍ āā, “Wāna̍ tāse̍ hu᷅ŋ ho̍ō wo̍ ndu̍ wānā chɛ̍ ndu̍ kīlta̍ŋ pɛ̍ āā Āhi̍ma̍a̍sī, po̍ Sa̍dɔ̍kī wo̍ ni̍.” Mi̍ Māsāa̍ Dēēve̍ di̍mī āā, “Wānā kɛ̍ndɔ̄ɔ̍ pīla̍ cho̍ ko̍ŋ hu̍nɔ̄ɔ̍ ni̍. I̍ la̍a̍la̍ŋ māā a̍ yōōŋgū kɛ̄ndɔ̄ɔ̍ o̍ cho̍ hūnɔ̄ɔ̍ ni̍.”

²⁸Mɛ̄ɛ̍ Āhi̍ma̍a̍sī fu̍u̍lu̍u̍, ō lo̍ la̍nda̍ŋ mbo̍ dīmūl Dēēve̍ āā, “Fāllo̍ bɔ̄kɔ̄tɔ̄ ŋ̄ kɔ̍ yɔ̍m ya̍a̍mɔ̍ɔ̍wa̍a̍ nāa̍.” Mbo̍ kɔ̍ tu̍ndu᷄ŋ Dēēve̍ o̍ lābɛ̄ŋgu̍ ni̍ŋ, mbo̍ dīmūl ndu̍ āā, “Māsāa̍, sāŋgālā bɛ̄ndōo̍ chō le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nu̍m ŋ̄ chō pīɛ̄īyo̍ wo̍. Ō tōsa̍l nu̍m hāū dɛ̍nɛ̍ kɛ̍ndɛ̄ bɛ̄ndū fāllo̍. Ya̍a̍mɔ̍ɔ̍wa̍a̍ si̍mu̍l nu̍m nda̍ ki̍nɛ̍i̍, Mɛ̄lɛ̄ka̍ tōsa̍ mi̍ ŋ̄ chīī a̍ nda̍.”

²⁹Mi̍ Māsāa̍ Dēēve̍ nyu̍nā ndu̍ āā, “Po̍ chu̍ā pīāāndōo̍ A̍bi̍sa̍lɔ̄m yɛ̍, nyɛ̄ yɔ̄nu̍ŋ a̍ ndu̍ le̍?” Mi̍ Āhi̍ma̍a̍sī di̍mūl ndu̍ āā, “Bōōndi̍i̍ bu̍ɛ̍ī nūmndo̍ Cho̍wa̍bī o̍ wa̍ ya̍ vīōmɔ̄ɔ̍ ve̍, mi̍ cha᷅ wāŋnda̍ ā wa̍ wo̍o̍lūŋ wo̍o̍lūŋ bɛ̄ndōo̍, kɛ̍ I̍ si̍na̍ nyɛ᷅ ndu̍ o̍o̍ yɔ̍nu̍ŋ kpe̍e̍kpe̍i̍ ndo̍ le̍.”

³⁰Mi̍ Māsāa̍ Dēēve̍ di̍mūl ndu̍ āā, “Mɛ̄ɛ̍ nūm si̍m ndɔ̍ nda̍.” Mi̍ Āhi̍ma̍a̍sī kɔ̍ si᷅m.

³¹O̍ ko̍ŋ kɔ̍ɔ̍lī, mi̍ lāŋu̍nɔ̄ chīɔ̍ɔ̍ bɛ̍ɛ̍ o̍ fu̍u̍lu̍u̍. Mbo̍ dīmūl Māsāa̍ Dēēve̍ āā, “Māsāa̍, I̍ chu̍u̍ nu̍m yōōŋgū kɛ̄ndɛ̄. Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍l nu̍m hāū dɛ̍nɛ̍ kɛ̍ndɛ̄ bɛ̍ndū. Wānāā nda̍ a̍a̍ si̍mu̍l nu̍m nda̍ ŋ̄ chīi̍ a̍ nda̍.”

³²Mi̍ Māsāa̍ Dēēve̍ nyu̍nā ndu̍ āā, “po̍ chu̍ā pīāāndōo̍ A̍bi̍sa̍lɔ̄m yɛ̍, nyɛ̄ yɔ̄nu̍ŋ a̍ ndu̍ le̍?” Mi̍ lāŋu̍nɔ̄ chīɔ̍ɔ̍ dīmūl ndu̍ āā, “Fāllo̍, nyɛ̍ yɔ̍nu̍ŋ a̍ ndu̍ wo̍, tē le̍nde̍ ko̍ ndi̍ i̍i̍ yɔ̍nu̍ŋ a̍ ya̍a̍mɔ̍ɔ̍wa̍a̍ nu̍mnda̍ ā tūa̍a̍ kpo̍u̍ ni̍, ndo̍o̍ na᷅ŋ o̍ bɔ̍ɔ̍.”

³³Mɛ̄ɛ̍ Māsāa̍ Dēēve̍ tūēī yōōŋgōo̍ ho̍ō, mbo̍ tāmbū kɔ̄l, mbo̍ cha᷄ŋ mbo̍ kūā o̍ lu̍mūi̍ wa̍ o̍ dīō kpāki̍ chi̍o̍o̍ īkɛ̄i̍ yo̍ ni᷄ŋ a̍ cha᷄ŋndo̍, mbo̍ kɔ̍ cha᷅ŋ cha᷄ŋndo̍ pīla̍. Ō wa̍ kɔ̄la̍ŋ a̍ dīmīo̍o̍ āā, “O̍o̍ ya̍ po̍ nūu̍! Po̍ nūu̍ A̍bi̍sa̍lɔ̄m sɔ̍la̍ pīɔ̍mndo̍ fɔ̍. Ōo̍ ya̍ po̍ nūu̍ A̍bi̍sa̍lɔ̄m! Ndu̍ o̍o̍ bɛ̍ndā bɔ̍ɔ̍ mī ya̍ pi̍la̍ ya̍ i̍i̍ vi᷅, mi̍ nūm o̍o̍ lo̍ yōōmū po̍ nūu̍.”