Read Southern Kisi Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 19 Bible Online

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 19 - Southern Kisi bible

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 19

¹Mi̍ wāŋnda̍ dīmūl Cho̍wa̍bī māā Māsāa̍ Dēēve̍ ta̍mbu̍ kɔ̄l le̍ pīɔ̍m A̍bi̍sa̍lɔ̄m po̍ ndɔ̄ wo̍, mbo̍ wā cha᷄ŋndo̍ kpe̍e̍kpe̍i̍.

²O̍ ko̍ŋ, mi̍ nya̍a̍le̍ I̍ pūa̍a̍ Dēēvi̍a̍a̍ ā wa̍ le̍ yōmɔ̄ɔ̄ nda̍ yēm ya̍a̍mɔ̍ɔ̍wa̍a̍ ndāa̍ wo̍ ō sīmnu᷄ŋ kɔ᷅l tāmbɛ̍i̍. Nda̍ kpo̍u̍ mɛ̄ɛ̍ nda̍ tūēī māā Dēēve̍ cho̍ cha᷄ŋndo̍ le̍ po̍ ndɔ̄ɔ̍ mi̍ kɔ̄lta̍ŋ lā tāmbū nda̍.

³Ma̍ mīīŋgū chi̍e̍e̍ sɔ̍lɔ̄ŋ sɔ̄lɔ̄ŋ mɛ̄ɛ̍ nda̍ yām nu̍a̍ā so̍vɛ̄i̍ya̍ o̍ chɔ̄ūwo̍ mā wa̍ mīīŋgōo̍ a̍ si̍ɔ̍mbu̍la̍ la̍ŋ yɛ̍.

⁴Mi̍ Māsāa̍ Dēēve̍ ha̍nu᷄ŋ ba᷅la̍ŋ o̍ hɔ̄l mbō chāŋ cho̍o̍ cho̍o̍ kpe̍le̍ŋ mbo̍ dīmī āā, “Ōo̍ ya̍ po̍ nūu̍! Po̍ nūu̍ A̍bi̍sa̍lɔ̄m vi᷅ fɔ̍! Āa̍ ya̍ po̍ nūu̍ A̍bi̍sa̍lɔ̄m!”

⁵Mi̍ Cho̍wa̍bī ma̍lnu᷄ŋ mbo̍ kūā nāa̍ Dēēve̍ wa̍ cha᷄ŋndo̍ chīɛ̄ī ni̍ŋ nda̍. Mbo̍ kɔ̍ di̍mūl ndu̍ āā, “Fāllo̍ a̍ tu̍si̍ pūa̍a̍ nu̍mnda̍ si̍ɔ̍mbu̍la̍ŋ pāa̍le̍ hāūle᷅ŋ. Tē ndu̍ o̍o̍ ve̍ pu̍a̍a̍ ha̍ā le̍, nūm ni̍, chūāā nūmnda̍ ni̍, lāāndāā nūm a̍ kpe̍e̍kpe̍i̍ ya̍ ni̍, ā yɔ̄ŋāa̍ ni̍, yōōmūlā nyāla̍ŋ lā pīsīāā chi̍ la̍ wa̍ ni̍. Kɛ̍ mi̍ pūa̍a̍ ha̍ā ā chīēī chīēī ma̍ pīŋī yōōmūlā nyāla̍ŋ.

⁶Wānāa̍ ka̍a̍la̍ nu̍m nda̍, I̍ che᷅ māā nda̍ ŋ̄ tūl le̍yɛ̍ ni̍, mā ka̍a̍la̍ a̍ nɔ̍ yɛ̄lē nūmnde̍ tu̍lāā le̍ŋ nda̍. A̍ chɔ̍m pāa̍le̍ hāūle̍ŋ nde᷅ŋ kpe̍nde̍ke̍le̍ māā wānāa̍ cho̍ pūa̍a̍ nu̍mnda̍ bōlle̍ŋ nda̍ ni̍, pūa̍a̍ nu̍mnda̍ ni̍, māā nda̍ nda̍ a̍ bu̍u̍la̍ŋ a̍ nda̍ pe̍sīŋ te̍. I̍ chɛ̍ māā tē na̍a̍ ko̍ nda̍ a̍a̍ di̍u̍ nu̍a̍ā kpo̍u̍ pa̍a̍le̍ hāūle᷅ŋ ni̍, mī A̍bi̍sa̍lɔ̄m po̍ nu̍m ndu̍ ndu̍ o̍o̍ lo̍ yōōmū, a̍ wa̍ kɔ̄l nāŋɔ̄ɔ̄ ta̍u̍ ta̍u̍.

⁷Pūa̍a̍ nu̍mnda̍ kpo̍u̍ ā tāmbu̍ kɔ̄l a̍ nūm le̍ nyɛ̄ ŋ̄ tōsa̍ ho̍ō wo̍. Tē a̍ che̍ŋ mā kɔ̍ so̍ō nāa̍ nda̍ chūā mā nyɔ̍ɔ̍lu̍ nda̍ kɔ̄lta̍ŋ te̍, I̍ me̍na̍la̍ŋ nu̍m o̍ Mɛ̄lɛ̄ka̍ Ya̍a̍wɛ̄ɛ̄la̍ŋ po̍, chɔ̍ŋ na̍nu᷄ŋ a̍ dɔ̍ɔ̍ nda̍ kpo̍u̍ ā chō nu̍m fāŋa᷄ŋ kɔ̍ɔ̍lī, Ndu̍yɛ̍ tē ke̍ŋ i̍ yɔ̍nu̍ŋ pɛ̍, ndi̍ bɛ̍ɛ̍ i̍ hi̍a̍ū le̍ wɔ̍ū a̍ nyɛ̄ o̍ nyɛ̄ pālāa̍ ke̍e̍ku̍ nu̍m chōo̍, chɔ̍ŋ a̍ chūā pīāāndūyɛ̍ī nūmnde̍ mbo̍ bīī a̍ pāa̍le̍ hāūle᷅ŋ.”

⁸O̍ ko̍ŋ, mi̍ Māsāa̍ Dēēve̍ cha̍ŋ mbo̍ kɔ̍ cha᷅l o̍ dīō kpāki̍ chi̍o̍o̍ īkɛ̄i̍, Mɛ̄ɛ̍ pūa̍a̍ ndūa̍a̍ tūēī māā ō chō īchāli̍ lo̍ŋ, nda̍ kpo̍u̍ ma̍ kūā lo̍ŋ ma̍ kɔ̍ ba̍lū ndu̍. Ndu̍yɛ̍ a̍ te̍le̍ŋ ko̍ŋ, I̍sɔ̄lūɛ̍i̍ya̍a̍ wa̍ A̍bi̍sa̍lɔ̄m kɔ̄ɔ̄lī wa̍ nda̍ a̍a̍ nya̍a̍nu̍ŋ ni᷅ŋ kpo̍u̍ ma̍ mīīŋgu᷄ŋ o̍ chi̍e̍e̍ŋ nda̍ŋ.

⁹Mɛ̄ɛ̍ nda̍ mīīŋgu̍, mi̍ sɛ̄ɛ̄ŋgi̍āŋndo̍ kɔ̍ de᷅l nda̍ tɛ̄ɛ̄ŋ mbo̍ kūā a̍ tīmbu̍la᷅ŋndo̍ kpo̍u̍. Ma̍ wā dīmu̍la᷅ŋndo̍ āā, “ŋ̄ si̍nā le̍ sa̍bū kpe̍e̍kpe̍i̍ na̍a̍ ŋ̄ kɛ̄ɛ̍ Dēēve̍ wo̍ le̍. Dēēvi̍o̍o̍ ho̍ō, ndu̍ chi̍i̍ndi̍a̍a̍ na̍a̍ ya̍a̍mɔ̍ɔ̍wa̍a̍ nāa̍ o̍ bā ni̍. Ndu̍ so̍li̍ na̍a̍ Fīli̍i̍tīāŋnda̍ o̍ bā ni̍. Kɛ̍ mi̍ ŋ̄ bīī mi̍ ŋ̄ kɛ̄ɛ̄ ndu̍ o̍ lēmāsā, mi̍ ŋ̄ sūū A̍bi̍sa̍lɔ̄m po̍ ndɔ̍ chūɛ̄īya̍ŋ le̍ mbō wa̍ māsāa̍ nāa̍ cho̍o̍. Mi̍ Dēēve̍ māl chi̍o̍o̍ mbo̍ nyāānu̍ŋ. A̍bi̍sa̍lɔ̄m na̍a̍ ŋ̄ chūa̍ yɛ̄ o̍ lēmāsā wo̍ ndu̍ vi̍ŋnu᷄ŋ. Le̍la̍ŋ mɛ̄ɛ̍ o̍ vi᷅ yɛ̍, vɛ᷅ wānā pi᷅lɛ̍ di̍mī mī ŋ̄ mīŋgi̍ māsāa̍ Dēēve̍ na̍nu᷄ŋ te̍?”

¹⁰

¹¹Mi̍ Māsāa̍ Dēēve̍ o̍ tu̍ɛ̍ī nyɛ̄ I̍sɔ̄lūɛ̍i̍ya̍ ā wa̍ ho̍ō sūūki̍āŋndo̍ wo̍. O̍ ko̍ŋ, mbo̍ yɔ̄ŋ yōōŋgōo̍ nāa̍ Sa̍dɔ̍kī chu̍a̍, nda̍ Ābīa̍a̍tā wānāā sōlīāā lāsa̍lāa̍, le̍ mā hīvi̍ yōōŋgū kōŋ nāa̍ wāŋ bɛ̄ndūa̍a̍ Chu̍dā chu̍a̍. Mbo̍ dīmūl wāŋ bɛ̄ndūa̍a̍ Chu̍dā āā, “Wāŋ bɛ̄ndūa̍a̍ Chu̍dā, lā sīnā māā na̍a̍ nya̍ā, wānāā pi᷄lla̍ na̍a̍ ŋ̄ chō ni̍. Kōo̍ma̍ pi᷅li̍a̍ŋ kpe̍ na̍a̍ ŋ̄ chō na̍a̍ nya̍ā ni̍. I̍ tu̍e̍ī māā wāŋnda̍ I̍sɔ̄lūɛ̄ī a̍ cho̍ kɛ̄ɛ̄sīa̍a̍ le̍ ya̍ māsāle̍ nīle̍ŋ mīŋgīo̍o̍ o̍ bā. Vɛ᷅ nya̍ cho̍ wānāā nīa̍a̍ wa̍, le̍ vɛ̍ wa̍nāā tāsi̍a̍a̍ le̍ ya̍ hūnɔ̄ɔ̍ kɔ̄ɔ̄lī, le̍?”

¹²

¹³O̍ ko̍ŋ kɔ̍ɔ̍lī, mbo̍ yɔ̄ŋ vɛ̄lɛ̄ yōōŋgōo̍ nāa̍ Āma̍sā chu̍a̍, mbo̍ dīmūl ndu̍ āā, “Āma̍sā, na̍a̍ nūm wānāyɛ̍i̍ na̍a̍ ŋ̄ chō ni̍. Kōo̍ma̍ pi᷅li̍a̍ŋ kpe̍ na̍a̍ ŋ̄ chō ni̍. Nūm ya̍ I̍ cho̍ pūa̍a̍ nīa̍a̍ chɔ̄ūwa̍ kpo̍u̍ ha̍ndɔ̄ɔ̄ bōlle̍ŋ o̍ fōōfo̍ Cho̍wa̍bī wo̍ ni̍. Tē I̍ to̍sa̍ ko̍ŋ te̍ Mɛ̄lɛ̄ka̍ tūsi̍ ya̍ nyɛ̄ pālāa̍ chōo̍.”

¹⁴O̍ ko̍ŋ, mi̍ Āma̍sā to̍sā, mi̍ wāŋnda̍ Chu̍dā kpo̍u̍ a̍ mu̍lī kɔ̄lta̍ŋ o̍ Dēēve̍ lo̍. Mi̍ wāŋnda̍ Chu̍dā a̍ yɔ᷅ŋ ndu̍ dīōmnde̍ŋ ma̍ dīmūl ndu̍ māā ō chu̍a̍ pūa̍a̍ ndūa̍a̍ kpo̍u̍ mbō mīīŋgu̍.

¹⁵O̍ ko̍ŋ kɔ̍ɔ̍lī, mi̍ Dēēve̍ chu̍ā wānāa̍ wa̍ ndu̍ kɔ̄ɔ̄lī wa̍ kpo̍u̍, mbo̍ bīī mīīŋgōo̍ a̍ nda̍. Mɛ̄ɛ̍ o̍ fu̍u̍lu̍u̍ Chɔ̍ɔ̍dāŋ o̍ pēēlo̍, ma̍ bɔ̄ŋa᷅ŋ nda̍ wāŋnda̍ Chu̍dā, nda̍ a̍a̍ hi᷅ŋ ndu̍ lāchī. Wāŋnda̍ Chu̍dā nda̍ a̍a̍ chu̍u̍ŋgi̍āŋ ni̍ŋ Ki̍lkāl chi̍e̍e̍ kpo̍u̍, Dēēve̍ chūmndo̍ le̍ ndu̍ Chɔ̍ɔ̍dāŋ nda̍ŋ tɛ̄ɛ̄ŋgōo̍.

¹⁶Po̍ pi᷅lɛ̍ wa̍ Ba̍hu̍lūīm chi̍e̍e̍, o̍ būŋgɛ̄ī Bɛ̍ŋnja̍mīŋnde̍ ni᷄ŋ dīōla̍ŋ āā Si̍mɛ̄ī, fi̍nyā ndɔ̍ dīōla̍ŋ āā Kɛ̍lūā ndu̍ bɛ̍ɛ̍ ndu̍ o̍o̍ ye̍e̍ma̍ le̍ Dēēve̍ chɔ̄ɔ̍. Mɛ̄ɛ̍ o̍ chē wāŋnda̍ Chu̍dā kɔ̄la̍ŋ Dēēve̍ lāchi̍, ndu̍ bɛ̍ɛ̍ mbo̍ tūāl nda̍ kɔ̄ɔ̄lī chɔ̍ chɔ̍ ma̍ kūā nda̍ nda̍ā.

¹⁷Mɛ̄ɛ̍ o̍ wa̍ kɔ̄la̍ŋ, mbo̍ chūā pūa̍a̍ Bɛ̍ŋnja̍mīŋ wāa̍ o̍ pīlɛ̍ mbo̍ kūā a̍ nda̍ kɔ̍ɔ̍lī. Si̍bā o̍ wa̍ yu̍ŋgu̍ Sɔ̍ɔ̄ wo̍ bu̍ɛ̍īle̍ŋ o̍ bā wo̍ ndu̍ bɛ̍ɛ̍ mɛ̄ɛ̍ o̍ tu̍e̍ī māā Dēēve̍ chō hūnɔ̄ɔ̍ Chɔ̍ɔ̍dāŋ o̍ pēēlo̍, mbo̍ chūā pūa̍a̍ ndūāā ŋ̍wa᷅ŋ tɔ̍ a̍ wānāā ŋūɛ̍ɛ̍nu̍a̍a̍, a̍ bu̍ɛ̍i̍yāā ndūāā ŋ̍wa᷅ŋ bi̍di̍i̍ŋ nda̍ ma̍ kūā Dēēve̍ lāchī chɔ̍ chɔ̍.

¹⁸Nda̍ kpo̍u̍ ma̍ tāŋ Chɔ̍ɔ̍dāŋ le̍e̍lōo̍ nāa̍ Dēēve̍ nda̍ yu̍ŋgu̍ ndɔ̄ɔ̍ ā wa̍ wa̍, le̍ nda̍ tɛ̄ɛ̄ŋgūūwo̍ ndu̍yɛ̍ a̍ le̍ nyɛ̄ Dēēve̍ o̍ wa̍ nda̍ dīmūl le̍ tōsāa̍ wo̍ tōsāa̍.

¹⁹Mɛ̄ɛ̍ Dēēve̍ hi᷅ŋ le̍ tāŋɔ̄ɔ̍, mi̍ Si̍mɛ̄ī de᷅l ndu̍ o̍ lābɛ̄ŋgu̍ni̍ŋ, mbo̍ dīmūl ndu̍ āā, “Fāllo̍, nyɛ̄ o̍ nyɛ̄ ya̍ I̍ to̍sa̍l nu̍m, bōōndi̍i̍ ŋ̄ ma᷄l Chūlu̍sɛ̄lɛ̄m ma̍ wa̍ nyāānɔ᷄ŋndo̍ ve̍, me̍lnu̍ŋ ya̍ le̍ ndu̍. Nyɛ̄ o̍ nyɛ̄ ya̍ I̍ to̍sa̍l nu̍m pāa̍le̍ le̍ŋ, yāndi̍i̍ pu̍ɛ̍ɛ̍ŋ a̍ ndu̍, kɛ̍si᷄ŋ ndu̍ o̍ kɔ̄l mā tu̍si̍ ya̍ nyɛ̄ pālāa̍ chōo̍ le̍ ndu̍ le̍.

²⁰I̍ si̍nā māā nyɛ̄ ya̍ I̍ to̍sa̍ pāa̍le̍ le̍ŋ a̍ nūmndo̍ ō bɛ̄nda̍ kpo̍sōŋ te̍. Le̍la̍ŋ bɛ̍ɛ̍ ya̍ i̍ ke̍le̍ŋa̍ hūnɔ̄ɔ̍ ho̍ō ni̍, mī hu̍ŋ so̍ō nāa̍ nūm chu̍a̍ mā ma̍l la̍. Yu̍ŋgu̍la̍ I̍sɔ̄lūɛ̍i̍la̍ cho̍ bā lūāŋndo̍ la̍ŋ ki̍nɛ̍i̍, ya̍ cho̍ wāna̍ tāso̍o̍ le̍ nu̍m hūnɔ̄ɔ̍ lāchī ni̍ le̍ nu̍m dēmūllo̍ māā māsā.”

²¹Mi̍ Ābi̍sīāā, po̍ Sɛ̄lu̍i̍yā wo̍ lō lo̍ŋ mbo̍ dīmī āā, “Si̍mɛ̄ī, nūm fɔ̍ ma̍ yēī wāna̍ Mɛ̄lɛ̄ka̍ sūu̍ chūɛ̄īya̍ŋ ndo̍, ā nɔ̄ mā sɔ̍la̍ pīɔ̍mndo̍.”

²²Kɛ̍ mi̍ Dēēve̍ dīmūl Ābi̍sīāā, nda̍ Cho̍wa̍bī bɛ̍ndɔ̄ āā, “Ō cho̍ su̍ɛ̍i̍ nya̍ le̍ cho̍ he̍ī le̍. Nya̍ pūa̍a̍ Sɛ̄lu̍i̍yā wa̍ ha̍ā lā cha᷄l le̍ ya̍ kpūndɔ̍ɔ̍ nūūvīāl. Ya̍ cho̍ ni᷅ŋ Māsāa̍ le̍ I̍sɔ̄lūɛ̄ī kpo̍u̍ ni̍. Pāa̍le̍ hāūle᷅ŋ wānā o̍ wānā nɔ̍ mbō sɔ̄la̍ pīɔ̍mndo̍ I̍sɔ̄lūɛ̄ī le̍.”

²³Mi̍ Dēēve̍ lō lo̍ŋ mbo̍ dīmūl Si̍mɛ̄ī āā, “I̍ chu̍e̍l nu̍m būŋgɛ̄i̍ māā a̍ cho̍ pi̍ɔ̍m sɔ̍la̍ le̍.”

²⁴Mɛ̄ɛ̍ Mɛ̄fībo̍sīɛ̄ɛ̄ tu̍e̍ī māā Dēēve̍ hīŋ Chɔ̍ɔ̍dāŋ o̍ pēēlo̍, ndu̍ bɛ̍ɛ̍ mbo̍ kūā le̍ ndu̍ bɔ̄ŋāa̍. Chɔ̍ŋ a̍ bōōndi̍i̍ Dēēve̍ nya̍a̍nu̍ŋ nya̍a̍nɔ᷄ŋ ko̍ŋ nde̍, ha̍a̍a̍ mbo̍ lō o̍ ko̍ŋ mbo̍ chi̍i̍ ya̍a̍mɔ̍ɔ̍wa̍a̍ ndūa̍a̍ yōmɔ̄ɔ̄ mbo̍ wā mīīŋgū kōŋ Mɛ̄fībo̍sīɛ̄ɛ̄ ndu̍ o̍o̍ pu̍lū ŋ̍pe̍lū le̍, ndu̍ o̍o̍ se̍ndī i̍ssi̍ɛ̍i̍ le̍ nyɛ̄la̍ŋ bɛ̍ɛ̍ ndu̍ o̍o̍ to̍ō le̍.

²⁵Mɛ̄ɛ̍ o̍ ko̍ma̍l Dēēve̍, chɔ̄nɔ᷄ŋndo̍ Chūlu̍sɛ̄lɛ̄m, mi̍ Dēēve̍ nyu̍nā ndu̍ āā, “Mɛ̄fībo̍sīɛ̄ɛ̄, vɛ᷅ nūm tu̍l la̍ kɔ̄ɔ̄lī, bōōndi̍i̍ ya̍ I̍ wa̍ nyāānɔ᷄ŋndo̍ ve̍ le̍, ma̍ lō Chūlu̍sɛ̄lɛ̄m?”

²⁶Mi̍ Mɛ̄fībo̍sīɛ̄ɛ̄ di̍mūl Dēēve̍ āā, “Fāllo̍, ŋ̄ wa̍ hūnɔ̄ɔ̄ na̍a̍ nūm, kɛ̍ nūm pi̍la̍ si̍nā māā nāmtāa̍ ya̍ I̍ cho̍ ni̍. Bōōndi̍i̍ ŋ̄ wa̍ hūnɔ̄ɔ̍ ve̍, mi̍ di̍mūl bu̍ɛ̍ī nūu̍ māā ō bɛ̄ɛ̄ndi̍a̍l la̍ sōfɛ̍lɔ̍ɔ̍ mī he̍l lēcho̍ō mī ŋ̄ hīŋ na̍a̍ nūm kɛ̍ mbo̍ tōsāl la̍ kāŋgālāa̍.

²⁷Mbo̍ mɛ̄ɛ̍ŋ ya̍ kɔ̄ɔ̄lī, mbo̍ hu᷄ŋ di̍mūl nu̍m chōōla̍ŋ a̍ ya̍ o̍kɔ̄ɔ̄. Kɛ̍ nūm nūm sɔ̍ŋgɔ̍ ki̍i̍la̍nɔ̍ Mɛ̄lɛ̄ka̍a̍ ŋ̄ chō ni᷅ŋ ni̍ Māsānɔ̄ɔ̍. Nyɛ̄ o̍ nyɛ̄ ŋ̄ yīya᷄ŋ pɛ̍ le̍ tōsāa̍ a̍ ya̍ to̍sa̍.

²⁸Nūm o̍o̍ nɔ̍ di̍ mī nūm o̍o̍ di̍u̍ na̍a̍ yu̍ŋgu̍ kpo̍u̍. Kɛ̍ a̍ chɛ̍l mā di̍u̍ na̍a̍ le̍. Ma̍ chɛ̄l la̍ le̍ mī wa̍ nyɛ̄ dīa̍a̍ dīo̍o̍ o̍ nūmndo̍ chi̍ɛ̍ī ni̍ŋ. Le̍la̍ŋ I̍ nɔ̍ lɛ̍ di̍ o̍ di̍ mī nyu̍na̍ nu̍m le̍ ya̍ mālā chēle̍ŋ te̍.”

²⁹Mi̍ Dēēve̍ lō o̍ ko̍ŋ mbo̍ dīmūl ndu̍ āā, “Mā di̍mi̍ lɛ̍ bɛ̍ɛ̍ nyɛ᷅ o̍ nyɛ̄ chēle̍ŋ te̍, nyɛ̄ ŋ̄ sōō wo̍ chō tūu̍le̍ŋ. Kɛ̍ ndu̍yɛ̍ I̍ chi̍i̍ ni᷅ŋ kɛ̄ɛ̄sīāā māā yōndō Sɔ̍ɔ̄ fi̍nyā nūm ma̍mā o̍ mɛ̍i̍ yo̍ ki̍nɛ̍i̍, nya̍ Si̍bā bu̍ɛ̍ī nu̍m nɔ̍ ni᷅ŋ yōndō kōŋ ni̍.”

³⁰Mi̍ Mɛ̄fībo̍sīɛ̄ɛ̄ di̍mūl ndu̍ āā, “Fāllo̍, Si̍bā chu̍a̍ yo̍ndō kōŋ kpo̍u̍. Mīīŋgū ŋ̄ mīīŋgu̍ ho̍ō bɛ̍ɛ̍ na̍nu᷄ŋ kɛ̍ndi̍a̍a̍ wo̍, I̍ na̍nu᷄ŋ kɔ̄l ō bɔ̄ɔ̍.”

³¹Bōōndi̍i̍ Dēēve̍ wa̍ mīīŋgōo̍ ve̍, fi̍nyā pīlɛ̍ wa̍ Lɔ̍chi̍līm chi̍e̍e̍ o̍ būngɛ̄ī Ki̍li̍a̍a̍dīve̍ ni̍ŋ mā vēēlū ndu̍ āā Ba̍a̍si̍lāī ndu̍ bɛ̍ɛ̍ mbo̍ hūŋ Chɔ̍ɔ̍dāŋ o̍ pēēlo̍ le̍ Dēēve̍ tɛ̄ɛ̄ŋgōo̍ lēe̍lo̍ō.

³²Fi̍nyāa̍ ho̍ō wa̍ ni᷅ŋ ō yūvɛ̍i̍ ku̍ndɛ̍ɛ̄. Ō wa̍ wɔ̄sīla̍ŋ be̍le̍-ŋɔ̍ma̍a̍ (80) a̍ te̍le̍ŋ ko̍ŋ. Kɛ̍ wānā su̍lāā bɛ̄ndōo̍ pīla̍ fi̍nyāa̍ ho̍ō ō wa̍ ni̍. Bōōndi̍i̍ Dēēve̍ nda̍ wānāā ndūa̍a̍ ā wa̍ Ma̍ha̍nēm nde̍, fi̍nyāa̍ ho̍ō ndu̍ o̍o̍ kɛ̍ nda̍ nyɛ̄ dīa̍a̍ ni̍.

³³Mɛ̄ɛ̍ Dēēve̍ wa̍ tāŋɔ̄ɔ̍, mbo̍ dīmūl fi̍nyāa̍ ho̍ō āā, “ŋ̄ kɔ̍ Chūlu̍sɛ̄lɛ̄m, I̍ cho̍ nu̍m lākɔ̄ māndā.”

³⁴Kɛ̍ mi̍ Ba̍a̍si̍lāī di̍mūl ndu̍ āā, “Tōnya̍ kpe̍e̍kpe̍i̍ I̍ cho̍ ni̍ fāllo̍. Kɛ̍ nūm pi̍la̍ si̍nā māā I̍ nɔ̍ lɛ̍ te̍le̍ŋ bɔ̍ɔ̄ o̍ chi̍e̍ēŋndo̍ chōo̍ le̍. Le̍ yɛ̄ɛ̄ vɛ̍lɛ̄ na̍a̍ ŋ̄ kūā yɛ̍ na̍a̍ nūm?

³⁵I̍ yu̍wa̍ ni᷅ŋ ō bɔ̄ɔ̍ na̍ŋnde̍e̍ chi̍ŋā ya̍ wɔ̄sīla̍ŋ be̍le̍-ŋɔ̍ma̍a̍ ni̍ (80). Chō ya̍ I̍ cho̍ ni᷅ŋ ho̍ō wo̍, I̍ si̍nā lɛ̍ nyɛ̍ o̍ nyɛ̄ pɛ̄ŋgu̍ le̍, īwɔ̄ɔ̍ŋ ni̍, īkɛ̄ndɛ̄ ni̍. Nyɛ̄ dīāā nyɛ̍ dīa̍a̍ ho̍ō I̍ di̍o̍ ndu̍ ni᷅ŋ bɛ̍ɛ̍ I̍ si̍nā lɛ̍ yēēlā ndɔ̄ le̍. Māmūɛ̄ī ni᷅ŋ ni̍, I̍ kɔ̍l ni᷅ŋ bɛ̍ɛ̍ ma̍ŋ I̍ si̍nā ye̍e̍lā ndɔ̄ le̍. Chōndo̍ŋ ni᷅ŋ bɛ̍ɛ̍ wāŋnda̍ wā ya̍ mu̍ŋ īkɛ̄i̍ I̍ tu̍i̍ī le̍. Le̍la̍ŋ chu̍ā lɛ̄ wōlɔ̄ɔ̄lā chēle̍ŋ te̍ fāllo̍.

³⁶I̍ cho̍ nyɛ᷅ o̍ nyɛ̄ mā to̍sa̍l la̍ kɛ̄ndɛ̄ī wa̍ā le̍nde̍ le̍. Pīo̍o̍ ko̍ ya̍ I̍ cho̍ nu̍m tɛ̄ɛ̄ŋgūū ni̍ fāllo̍,

³⁷mā ma̍l la̍ mī mi̍i̍ŋgu̍ mī kɔ̍ wu᷅ o̍ ya̍ lo̍ chi̍e̍e̍. I̍ ye̍e̍ma̍ mā chɔ̍ ya̍ nāa̍ nda̍ chɔ̍ wānāa̍ ve̍lū ya̍ wa̍ wa̍. Ā chē Chi̍mi̍hām po̍ ni̍, lā kɔ̍ nya̍ ndu̍ mbō kɔ̍ wa᷅ nu̍m wa̍llo̍ o̍ bā. Mālā o̍ mālā ŋ̄ yīya̍ŋ pɛ̍ le̍ ndu̍ mālā a̍ ma̍la̍ ndu̍.”

³⁸Mi̍ Dēēve̍ di̍mūl ndu̍ āā, “Bālā tīɔ̍ɔ̍ŋ, mɛ̄ɛ̍ ŋ̄ chō lākɔ̄ na̍a̍ chi̍mi̍hām po̍ nu̍m. Mālā o̍ mālā ŋ̄ yēēma̍ ya̍ pɛ̍ mī ma̍la̍ ndu̍ le̍ sa̍bū nūmndo̍, I̍ cho̍ ndu̍ mālā. Nyɛ̄ o̍ nyɛ̄ ŋ̄ nyūna̍ ya̍ pɛ̍ le̍ mī to̍sa̍ nu̍m I̍ cho̍ ō bɛ̄ɛ̄ndīa̍ŋ mī to̍sa̍l nu̍m.”

³⁹O̍ ko̍ŋ kɔ̍ɔ̍lī, mi̍ Dēēve̍ nda̍ wānāā ndūa̍a̍ kpo̍u̍ a̍ ta᷅ŋ Chɔ̍ɔ̍dāŋ nda̍ŋ. Mɛ̄ɛ̍ nda̍ ta̍ŋ, mi̍ Dēēve̍ kɔ̍ma᷄ŋ Ba̍a̍si̍lāī mbo̍ dūāū ndu̍ sa̍lā. Mi̍ Ba̍a̍si̍lāī mi̍i̍ŋgū, o̍ ndu̍ lo̍.

⁴⁰Pūa̍a̍ Chu̍dā kpo̍u̍, a̍ pūa̍a̍ I̍sɔ̄lūɛ̄ī tɛ̄ndāa̍ tɛ̄ɛ̄ŋ ki̍nɛ̍i̍, ma̍ chūūŋgi̍āŋ Chɔ̍ɔ̍dāŋ o̍ pēēlo̍ le̍ Dēēve̍ pīo̍o̍ tɛ̄ɛ̄ŋgōo̍. Mɛ̄ɛ̍ nda̍ ta᷄ŋ, ma̍ kūā Ki̍lkāl chi̍e̍e̍ nda̍ chi̍mi̍hām wa̍ā lātūlu̍.

⁴¹O̍ ko̍ŋ kɔ̍ɔ̍lī, mi̍ I̍sɔ̄lūɛ̍i̍ya̍ ā cha᷄ŋ kpo̍u̍, ma̍ kūā nāa̍ Māsāa̍ Dēēve̍ chu̍a̍. Ma̍ kɔ̍ di̍mūl ndu̍ āā, “Fāllo̍, wāŋnda̍ Chu̍dā na̍a̍ nda̍ā wānāā pi᷄lla̍ na̍a̍ ŋ̄ cho̍ ni̍. Vɛ᷅ ma̍ tɛ̄ɛ̄ŋgūū nya̍ sɔ̍ɔ̍ sɔ̍ɔ̍, nūm ni̍, a̍ yu̍ŋgu̍ nu̍mndo̍ na̍a̍ ŋ̄ sīna̍ a̍ ndi̍ o̍kɔ̄ɔ̄ le̍? Bāā na̍a̍ ŋ̄ cho̍ wa̍nāā nūm te̍?”

⁴²Mi̍ wāŋnda̍ Chu̍dā a̍ lō lo̍ŋ ma̍ dīmūl nda̍ āā, “Wāna̍ nāa̍ Dēēve̍ o̍ cho̍ ni̍, nyɛ̄ kōŋ na̍a̍ ŋ̄ tɛ̄ɛ̄ŋgu̍u̍ ndu̍ ni̍. Lā nɔ̍ mī lā dɔ̄ɔ̍ŋ tu̍mbe̍ le̍ ke̍ŋ te̍. Ō cho̍ ma̍chu̍a̍ā māā nyɛ̄ le̍ Dēēve̍ o̍ ke̍ na̍a̍ le̍. Nyɛ̄ dīāā na̍a̍ ŋ̄ dē wo̍ bɛ̍ɛ̍, ō cho̍ ndu̍ le̍ ke̍ na̍a̍ ndu̍ le̍. Le̍ chō na̍a̍ ŋ̄ chō wānāyɛ̍i̍ yo̍ na̍a̍ ŋ̄ tɛ̄ɛ̄ŋgu̍u̍ ndu̍ ni̍.”

⁴³Mi̍ wāŋnda̍ I̍sɔ̄lūɛ̄ī a̍ di̍mūl nda̍ āā, “Tē ō wa̍ māā dīmī pɛ̍, na̍a̍ ŋ̍ hi̍o̍ū bɛ̍ɛ̍ Dēēve̍ nɔ̄ a̍ nya̍. Fo̍ndōle̍, pūlālē māsāle̍ŋ nde᷅ŋ lē fūla̍ chōo̍ le̍ŋ, na̍a̍ ŋ̄ chō yu̍ŋgu̍la̍ŋ tɔ̍, fūlāa̍ o̍ pūlālē le̍ŋ chōo̍. Ndu̍yɛ̍ tē ō wa̍ bɛ̍ɛ̍ māā dīmī pɛ̍, na̍a̍ ŋ̍ cho̍ wānāā tāsi̍a̍a̍ le̍ kɛ̄ɛ̄sīa̍a̍ le̍ Māsāa̍ Dēēve̍ mīīŋgōo̍ na̍nu᷄ŋ ni̍. Lā nɔ̍ mī lā dūūvi̍a̍a̍ na̍a̍ o̍ Dēēve̍ cho̍o̍ le̍.” O̍ ko̍ŋ, mi̍ wānāā ku̍ndālā tīɔ̍ɔ̍ŋnda̍ ha̍ā ā kāndū dīōmnda̍ŋ hīŋa᷅ŋndo̍ vēllāa̍ vēllē. Kɛ̍ wāŋnda̍ Chu̍dā a̍ wa̍ hīōūwɔ̄ɔ̄ dīōmndā wɔ̄ɔ̍ŋ dīmī.