Read Southern Kisi Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 21 Bible Online

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 21 - Southern Kisi bible

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 21

¹Bōōndi̍i̍ Dēēve̍ wa̍ Māsāa̍ I̍sɔ̄lūɛ̄ī ve̍, mi̍ ī yɔ̄nu̍ŋ a̍ te̍le̍ŋ pu᷅m mi̍ yīmā bɛ̄ndūa̍ŋ mā dēl I̍sɔ̄lūɛ̄ī kpu̍lɛ̄ŋ. Le̍ wɔ̄sīla̍ŋ lā yāa̍ yīa̍a̍ŋ māŋ mā chō wāŋnda̍ chōo̍. O̍ ko̍ŋ, mi̍ Dēēve̍ nyu̍nā Mɛ̄lɛ̄ka̍ a̍ ndi̍ o̍kɔ̄ɔ̄ ni̍ Mɛ̄lɛ̄ka̍ Ya̍a̍wɛ̄ɛ̄ di̍mūl ndu̍ āā, “Ō cho̍ fu̍u̍le̍ yīa̍a̍ŋ mā dēl I̍sɔ̄lūɛ̄ī le̍, le̍ yɔ̄ŋ wɔ̄ɔ̍ŋ dīyāā ŋ̄wāŋndā chīe̍e̍ Sɔ̍ɔ̄ nda̍ yu̍ŋgu̍ ndɔ̄ɔ̍ ā tōsa̍ wo̍. Le̍ dīū Sɔ̍ɔ̄ o̍ di̍u̍ wāŋnda̍ Ki̍bīɔ̄ŋ ndo̍ nyɛ̄ kōŋ yīa̍a̍ŋ māŋ mā de᷄l o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ni̍.”

²Ki̍bīɔ̄na̍i̍tīi̍ya̍ yɛ̍, ā ve̍ I̍sɔ̄lūɛ̍i̍ya̍a̍ le̍. O̍ pūlālē A̍mɔ̍lu̍a̍i̍tīi̍ya̍ chōo̍ wāŋnda̍ ha̍ā nda̍ a̍a̍ fūla̍ ni̍. Bōōndi̍i̍ I̍sɔ̄lūɛ̍i̍ya̍ ā chūa̍ lɛ̄ŋndē Ke̍nāŋnde̍ŋ nde̍, wāŋnda̍ ha̍ā nda̍ ā dīu̍ nda̍ le̍. Ma̍ chūēl nda̍ būŋgɛ̄i̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l māā ā cho̍ nda̍ dīyɔ̄ɔ̄ le̍. Kɛ̍ mɛ̄ɛ̍ Sɔ̍ɔ̄ o̍ si̍mnu᷄ŋ ma̍sāa̍ I̍sɔ̄lūɛ̄ī, mbo̍ kāndū wāŋnda̍ ha̍ā dīūwo̍. Ō wa̍ chīēī chīēīyo̍ le̍ wāŋnda̍ I̍sɔ̄lūɛ̄ī a̍ wāŋnda̍ Chu̍dā mālāa̍. Mɛ̄ɛ̍ Dēēve̍ tūēī nyɛ̄ Mɛ̄lɛ̄ka̍ dīmu̍l ndu̍ a̍ yīa̍a̍ŋ māŋ o̍kɔ̄ɔ̄ wo̍, mi̍ Dēēve̍ ve̍e̍lū Ki̍bīɔ̄na̍i̍tīi̍ya̍a̍ tu̍a̍ā lo̍ yōōmū wa̍.

³Mɛ̄ɛ̍ nda̍ hi᷄ŋ mi̍ Māsāa̍ Dēēve̍ dīmūl nda̍ āā, “Lā chɔ̍m ya̍ nyɛ̄ ya̍ i̍ to̍sa̍l nya̍ mī lā hīni̍ kɔ̄llo̍. I̍ ye̍e̍ma̍ mī nyɔ̍ɔ̍lu̍ nya̍ le̍ sūɛ̍i̍ wɔ̍ɔ̍ŋ Sɔ̍ɔ̄ to̍sa̍ a̍ nya̍ ve̍ mī lā pīɛ̍i̍ Mɛ̄lɛ̄ka̍ Ya̍a̍wɛ̄ɛ̄ mbō māla̍ wānāā ndūa̍a̍.”

⁴Mi̍ wāŋnda̍ Ki̍bīɔ̄ŋ a̍ di̍mūl ndu̍ āā, “Nyɛ̄ cho̍ na̍a̍ tɛ̄ɛ̄ŋ na̍a̍ Sɔ̍ɔ̄ wa̍ā a̍ yu̍ŋgu̍ ndɔ̄ɔ̍ wo̍, ka̍ni̍i̍ hu̍mbū ni̍, ŋ̄ko̍o̍līi̍ ni̍, ŋ̄ nɔ̍lā mī ŋ̄ chīi̍ ndu̍ le̍. Ndu̍yɛ̍ vɛ̍lɛ̄ ŋ̄ nɔ̍ di̍ mī ŋ̄ dīī I̍sɔ̄lūɛ̍i̍nɔ̍ o̍ I̍sɔ̄lūɛ̍i̍nɔ̍ le̍.” Mi̍ Dēēve̍ nyūnā nda̍ āā, “Ō yɛ̄ɛ̍nɛ̍ nya̍ yēēma̍ yɛ̄ ya̍ ni᷅ŋ mī to̍sa̍l nya̍?”

⁵Ma̍ dīmūl Dēēve̍ āā, “Sɔ̍ɔ̄ ndu̍ o̍o̍ ye̍e̍ma̍ mī ndu̍ o̍o̍ chi̍i̍ na̍a̍ lēpūlā, wānā pi᷅lɛ̍ bɛ̍ɛ̍ ndu̍ o̍o̍ lō o̍ lɛ̄ŋnde̍ŋ ni᷄ŋ te̍.

⁶Le̍la̍ŋ na̍a̍ bɛ̍ɛ̍ ke̍ na̍a̍ pūa̍a̍ ndūa̍a̍ ā ŋɔ᷄mmɛ̍ū mī ŋ̄ dīu̍ nda̍. Ke̍ na̍a̍ nda̍, mī ŋ̄ kɔ̍ la̍ndū nda̍ Ki̍bīāā Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l kpe̍e̍kpe̍i̍. Māsāa̍ Sɔ̍ɔ̄, ō Mɛ̄lɛ̄ka̍ Ya̍a̍wɛ̄ɛ̄ pi̍la̍ ndu̍ o̍o̍ hɛ̍li̍ wo̍, o̍ ndu̍ lo̍ chi̍e̍e̍ kpe̍e̍kpe̍i̍ na̍a̍ ŋ̄ chō nda̍ lākɔ̄ lāndɔ̄ɔ̄ ni̍.” Mi̍ Dēēve̍ di̍mūl nda̍ āā, “Bālā tīɔ̍ɔ̍ŋ, I̍ cho̍ nya̍ pūa̍a̍ ndūa̍a̍ kē.”

⁷Kɛ̍ Dēēve̍ nda̍ Chōna̍ta᷅ŋ po̍ Sɔ̍ɔ̄ wo̍, mi̍ nda̍ āā yi̍ī kpe̍ma̍a̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Le̍ he̍ī Dēēve̍ chɛ̍l mbō yɔ̄ŋgu̍ Mɛ̄fībo̍sīɛ̄ɛ̄ po̍ Chōna̍ta᷅ŋ ndo̍ le̍.

⁸Chūā pīlɛ̍ wa̍ dīōla̍ŋ āā Lu̍i̍si̍pā, fi̍nyā ndɔ̍ dīōla̍ŋ āā E̍yā. Chūa̍a̍ ho̍ō nda̍ Sɔ̍ɔ̄, nda̍ a̍a̍ ve̍lū pūa̍a̍ ā ŋīɔ̍ɔ̍ŋ, ō pīɔ̍ɔ̍ dīōla̍ŋ āā A̍mɔ̍nī, ō pīlɔ̍ɔ̍ āā Mɛ̄fībo̍sīɛ̄ɛ̄. O̍ ko̍ŋ kɔ̍ɔ̍lī, Sɔ̍ɔ̄ chūā ndɔ̄ pi᷅lɛ̍ wa̍ vɛ̄lɛ̄ dīōla̍ŋ āā Mɛ̍lu̍a̍bī ndu̍ o̍o̍ nɔ̍ pūa̍a̍ ā ŋūɛ̍ɛ̍nu̍. Po̍ nda̍ a̍a̍ ve̍lū chūāūwāā kāŋ ndo̍ dīōla̍ŋ āā A̍di̍lūɛ̄ɛ̄, fi̍nyā ndɔ̍ dīōla̍ŋ āā Ba̍a̍si̍lāī, wānā wa̍ā Mɛ̍ho̍lāā.

⁹Sɔ̍ɔ̄ pūa̍a̍ ndūāā ŋi̍ɔ̍ɔ̍ŋāā o̍ ve̍lū a̍ chūā kōŋ nda̍ kāŋ ni̍, a̍ pūa̍a̍ ŋu̍ɛ̍ɛ̍nu̍a̍a̍ chūā ndɔ̄ɔ̍ ndu̍ o̍o̍ ve̍lū ka̍ŋ nda̍ mi̍ Dēēve̍ chu̍ā mbo̍ kē wāŋnda̍ Ki̍bīɔ̄ŋ le̍ mā dīu̍ nda̍. Mi̍ wāŋnda̍ Ki̍bīɔ̄ŋ a̍ ku̍ā a̍ nda̍ pe̍mbēi̍ chōo̍ ma̍ kɔ̍ la̍ndū nda̍ lo̍ŋ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Nda̍ ŋɔ̍mmɛ̍ū kpo̍u̍ ma̍ dīū nda̍ dīōm pīlɛ̍. Su̍ɛ̍i̍ he̍ī yɔ̄nu̍ŋ a̍ te̍le̍ŋ wāŋnda̍ kāndu̍ ba̍a̍līi̍yo̍ŋ kōwɔ̄ɔ̍ o̍ chīɔ̍ɔ̍ŋ ni᷄ŋ nde̍ ki̍nɛ̍i̍.

¹⁰Mi̍ Lu̍i̍si̍pā chūā nda̍ a̍a̍ ve̍lū ko̍ŋ nda̍ Sɔ̍ɔ̄ wo̍ ō kɔ̍ cha᷅l dīāllūŋ vīlɛ̍i̍ mu̍ŋ īkɛ̄i̍ o̍ pōūwo̍ chōo̍. Mbo̍ tāŋgūl nyɔ̄ɔ̍ o̍ pōū ko̍ŋ chōo̍ a̍ nyɛ̄lā lābɛ̍kīla̍ŋ mbo̍ chāl lēbɛ̄ŋgu̍. Tē yōūwāā bɛ̄ndūa̍a̍ hīŋ le̍ dīāllūŋ mu᷅ŋ dīo̍o̍ īpāla̍ pɛ̍ ō kpēŋa̍ nda̍. Tē nyūmnda̍ŋ mā tōl pɛ̍ mi̍ vīsīa̍a̍ hīŋ le̍ mu̍ŋ dīo̍o̍, ō tōū nda̍. Ō lo̍ īchāli̍ lo̍ŋ, chɔ̍ŋ a̍ te̍le̍ŋ wāŋnda̍ kāndū ba̍a̍līi̍ŋ kōūwɔ̄ɔ̍ wo̍ ha̍a̍a̍ mbo̍ lō o̍ ko̍ŋ mi̍ te̍le̍ŋ pīɔ̍ɔ̍ ō fūūlūū.

¹¹O̍ ko̍ŋ kɔ̍ɔ̍lī, mi̍ wāŋnda̍ kɔ̍ di̍mūl Dēēve̍ a̍ nyɛ̄ chūa̍a̍ ho̍ō ō wa̍ tōsāa̍ wo̍ o̍kɔ̄ɔ̄.

¹²Bōōndi̍i̍ Fīli̍i̍tīāŋnda̍ dīī sɔ̍ɔ̄ nda̍ Chōna̍ta᷅ŋ po̍ ndɔ̄ o̍ Pēmbīī Ki̍būāāve̍ chōo̍ ve̍ mā chūā dīāllūŋ nda̍ŋ ma̍ kɔ̍ la̍ndū mu̍ŋ Bɛ̄tī Si̍āŋ chi̍e̍e̍ o̍ lu᷅ŋ nde̍ŋ. O̍ ko̍ŋ, mi̍ wāŋnda̍ Cha̍bɛ̍sī a̍ ma̍lnu᷄ŋ sɔ̍ɔ̍ sɔ̍ɔ̍ ma̍ kɔ̍ chi̍i̍mbu̍u̍ dīāllūŋ nda̍ŋ ma̍ hūŋnu᷄ŋ a̍ mu̍ŋ Cha̍bɛ̍sī o̍ lɛ̄ŋndē Ki̍li̍a̍a̍dīle̍ŋ ni᷄ŋ ma̍ hu᷄ŋ chɔ᷅ mu̍ŋ lo̍. Cha̍bɛ̍sī lo̍ŋ pāālā ndāla̍ŋ lā wa̍ ni̍. Mɛ̄ɛ̍ Dēēve̍ tūēī nyɛ̄ chu̍a̍a̍ ho̍ō ō tōsa̍ wo̍, mbo̍ kūā Cha̍bɛ̍sī, mbo̍ kɔ̍ chu̍ā pāāla̍ Sɔ̍ɔ̄ nda̍ Chōna̍ta᷅ŋ po̍ ndɔ̄ la̍ŋ mbo̍ hūŋ a̍ la̍ŋ.

¹³Mɛ̄ɛ̍ o̍ hi᷅ŋ a̍ la̍ŋ, mbo̍ dīmūl vɛ̄lɛ̄ pūa̍a̍ ndūa̍a̍ ma̍ kɔ̍ chu̍ā pāālā pūa̍a̍ ŋɔ̍mmɛ̍ū wāā wāŋnda̍ Ki̍bīɔ̄ŋ a̍ di̍u̍ ka̍ŋ nda̍. Sɔ̍ɔ̄ ni̍, Chōna̍ta᷅ŋ po̍ ndɔ̄ ni̍, ma̍ kūā a̍ pāālā ndāla̍ŋ Sɛ̍lā chi̍e̍e̍ o̍ būŋgɛ̄ī Bɛ̍ŋnja̍mīŋnde̍ ni᷄ŋ ma̍ kɔ̍ chɔ᷅ la̍ŋ o̍ sɛ̄i̍ nda̍ yu̍ŋgo̍o̍ ni᷄ŋ nāa̍ nda̍ chɔ̍ Ki̍sī, fi̍nyāa̍ Sɔ̍ɔ̄ wa̍. O̍ ko̍ŋ, mi̍ Mɛ̄lɛ̄ka̍ tūɛ̄ī pīɛ̄īlē ndāle̍ŋ, mbo̍ dūāū lɛ̄ŋndē ndāle̍ŋ sa̍lā a̍ nyɛ̄ dīa̍a̍.

¹⁴

¹⁵Te̍le̍ŋ pi᷅lɛ̍ wa̍, mi̍ sɔ̍ŋgɔ̄ɔ̍ kīōlū I̍sɔ̄lūɛ̍i̍ya̍ tɛ̄ɛ̄ŋ nda̍ Fīli̍i̍tīāŋnda̍. Mi̍ Dēēve̍ chu̍ā pūa̍a̍ ndūa̍a̍ ma̍ kɔ̍ chi᷅ŋa̍la᷅ŋ Fīli̍i̍tīāŋnda̍ a̍ sɔ̍ŋgɔ̄ɔ̍ ma̍ sɔ̄ŋgā sɔ̍ŋgɔ̄ɔ̍ pīla̍ a̍ nda̍. O̍ sɔ̍ŋgɔ̄ pīlɛ̍ ni᷄ŋ, mɛ̄ɛ̍ nda̍ sɔ̍ŋga̍ te̍i̍, mi̍ Dēēve̍ sa̍ŋga̍.

¹⁶Ndu̍yɛ̍ o̍ sɔ̍ŋgɔ̄ kōŋ ni᷄ŋ po᷄ pi᷅lɛ̍ wa̍ Fīli̍i̍tīāŋnda̍ tɛ̄ɛ̄ŋ dīōla̍ŋ āā Īsībībɛ̍nɔ̍bī pōo̍ ho̍ō bɛ̄ndā ō vīlɛ̄ī kpo̍lo̍ŋ. Ku̍ndā o̍ fu̍la̍ chōo̍ wo̍ wānāā kpāāyāa̍ pīla̍ nda̍ wa̍ ni̍, ā bɛ̄ndū ā vīlɛ̄ī kpo̍lo̍ŋ. Ba̍l wa̍ ndu̍ o̍ bā wo̍ bōllē ndɔ̄le̍ŋ a̍ chīli̍ŋi̍i̍ Būlɔ᷄ŋsīi̍ye̍ nda̍ tōōsi̍a̍a̍ le̍ŋ ni̍. Bōllē ba̍l ko̍ŋ le̍e̍ wa᷅ lu̍su̍llo̍ le̍ pa᷅ŋnda̍ŋ lā ŋɔ᷄mmɛ̍ū a̍ tɛ̄ndāa̍ tɛ̄ɛ̄ŋ. Mūɛ̄ī fāŋīī sɛ̄nɛ̄ī bɛ̄ndūe̍i̍ ī wa̍ ndu̍ ī sāāyīa̍ŋ. Pōo̍ ho̍ō ō wa̍ kīndī kīndīo̍o̍ kpe̍e̍kpe̍i̍ le̍ Dēēve̍ dīyɔ̄ɔ̍.

¹⁷Kɛ̍ mi̍ Ābi̍sīāā, po̍ Sɛ̄lu̍i̍yā wo̍ ō sīmūl ndu̍ a̍ sɔ̍ŋgɔ̄ɔ̍ mbo̍ dīī ndu̍. Mbo̍ chīīndīāā yōōmu̍ Dēēvi̍o̍o̍. Mɛ̄ɛ̍ sɔ̍ŋgɔ̄ɔ̍ chūu̍, mi̍ pūa̍a̍ Dēēvi̍a̍a̍ ā sīlā Dēēve̍ āā, “Fāllo̍, wa᷅ lɛ̄ na̍a̍ kɔ̄la̍ŋ kɔ̄ɔ̄lī o̍ chɔ̄ū le̍. Fo̍ndōle̍ I̍sɔ̄lūɛ̍i̍ya̍ kpo̍u̍, nūm nda̍ tīīnda̍ŋ ni̍. Ŋ̄ yēēma̍ mā hɛ̄lu᷄ŋ na̍a̍ le̍.”

¹⁸Mɛ̄ɛ̍ sɔ̍ŋgɔ̄ kōŋ ō hīo̍u̍, mi̍ sɔ̍ŋgɔ̄ chēle̍ŋ yɔ̄nu᷄ŋ vɛ̍lɛ̄ I̍sɔ̄lūɛ̍i̍ya̍ tɛ̄ɛ̄ŋ nda̍ Fīli̍i̍tīāŋnda̍ Kɔ̍bī chi̍e̍e̍. Po̍ pi᷅lɛ̍ wa̍ Fīli̍i̍tīāŋnda̍ tɛ̄ɛ̄ŋ o̍ sɔ̍ŋgɔ̄ kōŋ ni᷄ŋ dīōla̍ŋ āā Sa̍fī ō bɛ̄ndū ō vīlɛ̄ī kpo̍lōŋ. O̍ ku̍ndā ndu̍ bɛ̍ɛ̍ o̍ fu̍la̍ chōo̍ wo̍, wānāā kpāāyāa̍ pīla̍ nda̍ wa̍ ni̍, ā bɛ̄ndū ā vīlɛ̄ī kpo̍lo̍ŋ. Kɛ̍ mi̍ I̍sɔ̄lūɛ̍i̍nɔ̍ pi᷅lɛ̍ dīī nu̍m o̍ sɔ̍ŋgɔ̄ kōŋ. Po̍ di̍ī ndu̍ ko̍ŋ ndo̍ dīōlā ndɔ̄la̍ŋ āā Si̍bɛ̍kāī, fūlāa̍ Hu̍sīāā chi̍e̍e̍.

¹⁹Mɛ̄ɛ̍ sɔ̍ŋgɔ̄ kōŋ ō chūu̍, mi̍ sɔ̍ŋgɔ̄ chēle̍ŋ kīōlū vɛ̄lɛ̄ I̍sɔ̄lūɛ̍i̍ya̍ tɛ̄ɛ̄ŋ nda̍ Fīli̍i̍tīāŋnda̍. Po̍ pi᷅lɛ̍ wa̍ vɛ̄lɛ̄ Fīli̍i̍tīāŋnda̍ tɛ̄ɛ̄ŋ mā vēēlū ndu̍ āā Kōōla̍yā, fūlāa̍ Ka̍a̍tī chi̍e̍e̍ ndu̍ bɛ̍ɛ̍ ndu̍ bɛ̍ɛ̍ ō bɛ̄ndū ō vīlɛ̄ī kpo̍lo̍ŋ Ba̍l wa̍ ndu̍ o̍ bā wo̍, ō bɛ̄ndū kpi᷅. Kɛ̍ mi̍ I̍sɔ̄lūɛ̍i̍ya̍ dīī ndu̍ o̍ chɔ̄ū kōŋ. Po̍ di̍ī ndu̍ wo̍, dīōlā ndɔ̄la̍ŋ āā Ɛ̄līha̍nāŋ, fi̍nyā ndɔ̍ dīōla̍ŋ āā Cha̍yɛ̄ɛ̄ Lu̍ɛ̍chīm, wānā wa̍ā Bɛ̍ti̍lɛ̍hɛ̄m chi̍e̍e̍.

²⁰Sɔ̍ŋgɔ̄ kōŋ chūwɔ̄ɔ̍ mi̍ sɔ̍ŋgɔ̄ chēle̍ŋ kīōlū nda̍ vɛ̄lɛ̄ tɛ̄ɛ̄ŋ Ka̍a̍tī chi̍e̍e̍. Po̍ pi᷅lɛ̍ wa̍ Fīli̍i̍tīāŋnda̍ tɛ̄ɛ̄ŋ ku̍u̍ba̍nɔ̍ chɔ̄ūwo̍ o̍ wa̍ ni̍, o̍ wa̍ ō bɛ̄ndū ō vɛ̄lɛ̄ kpo̍lo̍ŋ. Ku̍ndā o̍ fu̍la̍ chōo̍ wo̍ wānāā dīāllūŋ kālāa̍ pīla̍ nda̍ wa̍ ni̍, ā bɛ̄ndū ā vīlɛ̄ī kpo̍lo̍ŋ. Ndu̍ o̍o̍ nɔ̍ sōōŋ lābɛ̄ŋgo̍ŋ tɔ̍ a̍ ŋ̄ mūu̍ŋ sōōŋ lābāa̍ŋ tɔ̍ a̍ ŋ̄ mūu̍ŋ.

²¹Mɛ̄ɛ̍ pōo̍ ho̍ō ō chē I̍sɔ̄lūɛ̍i̍ya̍, mbō mām nda̍, mbo̍ sīm mbo̍ kīālū nda̍ īchīɛ̍ɛ̍. Kɛ̍ ndu̍ bɛ̍ɛ̍ mī I̍sɔ̄lūɛ̍i̍ya̍ dīī ndu̍. Si̍a̍māā, o̍ wa̍ bɛ̄ndōo̍ Dēēve̍ wo̍, Chōna̍ta᷅ŋ po̍ ndɔ̍ di̍ī ndu̍ ni̍.

²²Ku̍u̍ba̍a̍ hi̍ɔ̍ɔ̍lu̍a̍a̍ ka̍ŋ kpo̍u̍ mi̍ Dēēve̍ nda̍ pūa̍a̍ ndūa̍a̍ ā dīū nda̍. Ndu̍yɛ̍ nda̍ hi̍ɔ̍ɔ̍lu̍ kpo̍u̍ pūlālē pīlɛ̍le̍ŋ chōo̍ nda̍ fūla̍ ni̍. Pūlālē nda̍ fu̍la̍ chōo̍ le̍ŋ, wānāā kpāāyāā bɛ̍ndūa̍a̍ pīla̍ nda̍ wa̍ ni̍, ā bɛ̄ndū ā vīlɛ̄ī kpo̍lo̍ŋ, fūlāa̍ Ka̍a̍tī chi̍e̍e̍.