Read Southern Kisi Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 22 Bible Online

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 22 - Southern Kisi bible

Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 22

¹Pāa̍le̍ Mɛ̄lɛ̄ka̍ Ya̍a̍wɛ̄ɛ̄ o̍ pi̍ŋi̍ Dēēve̍, Māsāa̍ Sɔ̍ɔ̄ a̍ ya̍a̍mɔ̍ɔ̍wa̍a̍ ndūa̍a̍ ā pīli̍a̍a̍ o̍ bā le̍ŋ, o̍ ko̍ŋ, Dēēve̍ sōlu̍l Mɛ̄lɛ̄ka̍ chōnde̍i̍ he̍ī mbo̍ līsā ndu̍ lēni᷄ŋ ni̍, chōndi̍i̍ ke̍ŋ cho̍ he̍ī ni̍.

²Ōo̍ Mɛ̄lɛ̄ka̍ Ya̍a̍wɛ̄ɛ̄ nu᷄m cho̍ pōū bɛ̄ndōo̍ ō ya̍ vi̍a̍ŋnūŋ le̍bɛ̍ŋgu̍ wo̍ ni̍, nu̍m cho̍ sāāsā ka̍la̍ cho̍ ya̍ ō bālāā wo̍ ni̍.

³Mɛ̄lɛ̄ka̍ nūu̍ chō māchūāā māā pōū kpo̍o̍wa̍ bɛ̍ndū, tē I̍ ve̍ŋnu᷄ŋ o̍ ndu̍ bɛ̍ŋgu̍ pɛ̍, nyɛ̄ o̍ nyɛ̄ yɔ̍ŋ ya̍ le̍. Ndu̍ ma̍ndā ya̍ a̍ te̍le̍ŋ chɔ̄ūwo̍ ni̍, mɛ̄ɛ̍ bōo̍ īchīli̍ŋ ka̍lā ka̍lāa̍ wā nu̍a̍ā pu̍a̍a̍ chɔ̄ūwa̍ o̍ lābā le̍ nda̍ māndāa̍ yɛ̍. Ndu̍ ma̍ndā ya̍ ni̍ ya̍a̍mɔ̍ɔ̍wa̍a̍ nīa̍a̍ ā nɔ̍lā ya̍ nyɛ̄ yɔ̄ŋ te̍. Ndu̍ cho̍ wāna̍ chi̍ɔ̍u̍ yo̍o̍mū nūu̍ wo̍ ni̍.

⁴Mɛ̄lɛ̄ka̍ Ya̍a̍wɛ̄ɛ̄ o̍ bɛ̍nda̍ mbō sɔ̄la̍ sāŋgālāa̍ wo̍, tē I̍ ve̍e̍lu̍ ndu̍ pɛ̍ le̍ ya̍ pīŋīo̍o̍ ya̍a̍mɔ̍ɔ̍wa̍a̍ nīa̍a̍ o̍ bā pīŋīo̍o̍ o̍ pi̍ŋī ya̍ ni̍.

⁵Pīɔ̍mndo̍ ndu̍ o̍o̍ chi̍i̍ ya̍ ni᷅ŋ mīōlɔ̄ɔ̄ chɔ̍ŋgɔ̍mu̍. Ndu̍ o̍o̍ lo̍ ni᷅ŋ cho̍be̍ mī ndu̍ o̍o̍ hi̍o̍ū a̍ ya̍, mɛ̄ɛ̍ tīndi̍le̍ kpāāyāle̍ŋ lē hīāū nu̍a̍ā a̍ wāŋndo̍ o̍ pēēlo̍ yɛ̍.

⁶Kpūndɛ̍ pīɔ̍mndo̍ ō wa̍ ni᷅ŋ ya̍ ō bālāā kpɔ̍kɔ̍su̍, pīɔ̍mndo̍ ndu̍ o̍o̍ ye̍ŋ ya̍ ni᷅ŋ yāŋɔ̄ɔ̄le̍ŋ.

⁷Mɛ̄ɛ̍ kpūndɔ̍ɔ̍ de᷄l la̍ chōo̍ mi̍ ve̍e̍lū Mɛ̄lɛ̄ka̍ Ya̍a̍wɛ̄ɛ̄, mi̍ ve̍e̍lū Mɛ̄lɛ̄ka̍ nūu̍ le̍ mbō māla̍ ya̍. Mbo̍ tūɛ̄ī dīōm nūu̍ nāa̍ o̍ cho̍ o̍ chīɛ̄ī ndɔ̄ so̍līāā lāsa̍lāa̍ ni᷄ŋ nda̍. Vēēlōo̍ ndu̍ le̍ ya̍ mālāa̍ mbo̍ mūlī ya̍ dīōm.

⁸Mɛ̄ɛ̍ Mɛ̄lɛ̄ka̍ dɔ̄ɔ̍ŋ tu̍mbe̍, mi̍ lɛ̄ŋnde̍ŋ lē nyīīyā, mi̍ lē hīīlu᷄ŋ wo᷅ŋa̍ wo᷅ŋa̍, chīyīī ha̍la̍a̍ chōo̍ cho̍o̍ o̍ si̍m chōo̍ ve̍ bɛ̍ɛ̍ mi̍ ī hīīlu᷄ŋ yo̍kpa᷄ŋ yo̍kpa᷄ŋ.

⁹Mɛ̄lɛ̄ka̍ dɔ̄ɔ̍ŋ tu̍mbe̍ pɛ̍, ku᷄mnde̍ fūlāa̍ ndu̍ o̍ mi᷄ŋnda̍ŋ. Yīŋndē wūle̍ wu᷅le̍ le̍ bɛ̍ndūle̍ lu̍ām nyɛ᷅ o̍ nyɛ̄ le̍ŋ a̍ dɛ̄ŋgūlta̍ŋ fūlāa̍ ndu̍ o̍ sōndō. Tē ō wa̍ kɔ̄la̍ŋ pɛ̍, dɛ̄ŋgūltā lēyīŋndā bɛ̄ŋnda̍ŋ kɔ̄la̍ŋ ndu̍ lāchī tɛ̍ŋgɛ̄sɛ̄ɛ̄.

¹⁰Ō kūmbi̍ ha̍la̍a̍ mbo̍ tūāl, ha̍la̍ tīŋīo̍o̍ chō ndu̍ o̍ pēlo̍ŋ bɛ̄ŋgu̍.

¹¹Ō hīŋ o̍ ha̍la̍a̍ ni᷄ŋ cho̍o̍ cho̍o̍ o̍ nyāā yōōmāā lākūmba᷅ŋnda̍ ā pūm chōo̍. Ō chō hūnɔ̄ɔ̍ o̍ hūēīye̍ ni᷄ŋ cho̍o̍ cho̍o̍ fu̍kū fūkū bɛ̄ndū.

¹²Ō bīī mbo̍ kūmbū ndu̍ pi̍la̍ kpu̍ a̍ ha̍la̍ tīŋī bɛ̄ndōo̍, pīɔ̄ɔ̄ bɛ̄ndōo̍ he᷄l mbo̍ bālū ndu̍ mu̍la̍a̍ bɛ̍ndū.

¹³Nāa̍ o̍ cho̍ wa̍, nyɛ̄ ŋūūla̍lɛ̍īyo̍ chō kīōlōo̍ ndu̍ lāchī, kpe̍e̍kpe̍i̍ mī pa̍ŋgēle̍ kōŋ ō tōsā wu̍lɛ̄ī wūlɛ̄ī, mī dɛ̄ŋgūltā lēyīŋnda̍ŋ lā hūūlū.

¹⁴Mɛ̄lɛ̄ka̍ Ya̍a̍wɛ̄ɛ̄ o̍ de̍ŋī o̍ ha̍la̍a̍ ni᷄ŋ cho̍o̍ cho̍o̍ pa̍ndāŋ. Sɛ̄kpɛ̄ Ā tūēī Mɛ̄lɛ̄ka̍ Bɛ̄ndōo̍ Kpo̍u̍ di̍ōm.

¹⁵Ō vīi̍ ya̍a̍mɔ̍ɔ̍wa̍a̍ ndūa̍a̍ a̍ chīŋɔ̍ma̍ ndɔ̄ ma̍ lēyīŋnda̍ŋ mbo̍ sɛ̄ŋī nda̍ ā pīlɛ̍ŋ pi̍lɛ̍ŋ nda̍. Ō vīī vi̍i̍ nda̍ a̍ nyɛ̄ ŋūāla̍lɛ̍ī ŋūāla̍lɛ̍īyo̍ ma̍ nyāānu᷄ŋ.

¹⁶Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ dɔ̍ɔ̍ŋ tu̍mbe̍ mbo̍ dēŋī, mɛ̄ŋnda̍ŋ o̍ pēe̍ mɛ̄ŋmā īhɛ᷄llo̍ mi̍ mā fāŋa᷄ŋ, lūmūŋ yīŋgi̍lɛ̍i̍yo̍ŋ lēbɛ̄ŋgu̍ di̍ di̍ mi̍ ŋ̄ chɔ̄mnu᷄ŋ de̍ŋ de̍ŋ.

¹⁷Mɛ̄ɛ̍ ya̍ wa̍ o̍ dɛ̍nɛ̍ pa̍lāā bɛ̄ndōo̍ ni᷄ŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo̍ o̍ fo̍ndāŋ ndɔ̄ɔ̍ chōo̍ cho̍o̍ mbo̍ sīɛ̄ndī bāa̍ mbo̍ sāā ya̍, mbo̍ sōlī ya̍ o̍ lūmīī yīŋgi̍lɛ̍i̍ye̍ ni᷄ŋ.

¹⁸Ya̍a̍mɔ̍ɔ̍wa̍a̍ nīa̍a̍ nda̍ a̍a̍ hi̍o̍ū ya̍ māyōōmū, kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndīāā ya̍ nda̍ o̍ bā, wānāa̍ tu̍l ha̍ā ya̍ lēyɛ̄ wa̍ mbo̍ sōlī ya̍ nda̍ o̍ ba̍.

¹⁹Pāa̍le̍ kpūndɔ̍ɔ̍ wa̍ ya̍ chōo̍ le̍ŋ, pāa̍le̍ le̍ŋ nda̍ hu᷄ŋ de᷅l la̍ chōo̍ ni̍. Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍lū ya̍ nda̍ o̍ bā.

²⁰Mbo̍ sōlī ya̍ nda̍ tɛ̄ɛ̄ŋ, mbo̍ yāā ya̍ nāa̍ nyɛ̄ nyɛ̄ yɔ̍nūŋ ya̍ le̍ wa̍. Mbo̍ chīɔ̄ū yōōmū nūu̍, kāni̍ fu̍u̍le̍, le̍ mɛ̄ɛ̍ o̍ hi̍ni̍ kɔ̄l a̍ ya̍ yɛ̍.

²¹Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍l la̍ dɛ̍nɛ̍ kɛ̍ndɛ̄ bɛ̄ndū, kāni̍ fo̍ndōle̍ le̍ mɛ̄ɛ̍ ya̍ I̍ to̍sa̍ sūɛ̍i̍ cho̍ sa̍kpō ndu̍ o̍ hɔ̄l le̍ yɛ̍. Ō lo̍ o̍ ko̍ŋ mbo̍ dūāū ya̍ sa̍lā, fo̍ndōle̍ ō sāālu̍ŋ māā bālā nīla̍ cho̍ o̍ sūɛ̍i̍ wɔ̄ɔ̍ŋ ni᷄ŋ te̍.

²²I̍ bi̍ī mi̍ chu̍ā sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ kpo̍u̍. Mɛ̄lɛ̄ka̍ ni̍ ya̍ I̍ cho̍ pīɛ̄īyo̍ wo̍, I̍ fe̍e̍ŋ o̍ nɛ̄i̍ ndɔ̄ɔ̍ chōo̍ le̍. I̍ to̍sā yɔ᷅ŋ wɔ̄ɔ̍ŋ wāā le̍nde̍ le̍.

²³Nyɛ̄ o̍ nyɛ̄ sāwāla̍ ndɔ̄la̍ŋ lā dīmī, ō pīlɛ̍ bɛ̍ɛ̍ I̍ me̍l ndu̍ lɛ̄ŋ te̍. I̍ tɛ̍ɛ̍mbu̍u̍ sa̍wāla̍ ndɔ̄la̍ŋ ō pīlɛ̍ bɛ̍ɛ̍ le̍.

²⁴Ndu̍yɛ̍ Mɛ̄lɛ̄ka̍ sīnā māā I̍ to̍sa̍l i̍sɔ̍ɔ̍ o̍ īsɔ̄ɔ̍ wɔ̄ɔ̍ŋ te̍. Ō sīnā māā bālā nīla̍ cho̍ ō īsɔ̄ɔ̍ o̍ īsɔ̄ɔ̍ wɔ̍ɔ̍ŋ ni᷄ŋ te̍.

²⁵Le̍ he̍ī ō ke᷄ ya̍ fāndāa̍, fo̍ndōle̍ le̍ mɛ̄ɛ̍ ya̍ I̍ to̍sa̍ nyɛ᷄ cho̍ sa̍kpō ndu̍ o̍ hɔ̄l lo̍ yɛ̍, le̍ mɛ̄ɛ̍ o̍ si̍nā māā I̍ to̍sa̍ i̍sɔ̍ɔ̍ o̍ īsɔ̄ɔ̍ wɔ̄ɔ̍ŋ te̍ yɛ̍.

²⁶Ōo̍ Mɛ̄lɛ̄ka̍ Ya̍a̍wɛ̄ɛ̄, wānāa̍ hi̍a̍ū la̍chi̍ a̍ tīīnda᷄ŋnda̍ ndāla̍ŋ dɔ̄wɔ̄ɔ̍ o̍ nūm ni̍ŋ nda̍, wāa̍ ŋ̄ wā nda̍ kɔ̄ɔ̄lī ni̍. Wānāa̍ cho̍ nu̍m o̍ hɔ̄l sa̍kpō wa̍ dɛ̍nɛ̍ kɛ̍ndɔ̄ɔ̍ ŋ̄ tōsāl nda̍ le̍ te̍le̍ŋ o̍ te̍le̍ŋ ni̍.

²⁷Wānāa̍ kɔ̄ltā ndāla̍ŋ lā chō lā dīāndāā wa̍la̍ŋ nda̍, kɛ̄ndɛ̄i̍ ŋ̄ tōsāl nda̍ ni̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, nɛ̄i̍ nda̍ pi̍la̍ cho̍ chōo̍ wo̍, o̍ nɛ̄ī wa̍ā le̍ndo̍o̍ chōo̍ ko̍ni̍ ŋ̄ bīī nda̍ ni̍.

²⁸Wānāa̍ tu̍si̍ŋ to̍o̍lō wa̍, pīŋīo̍o̍ ŋ̄ pīŋī yo̍o̍mūlā ndāla̍ŋ ni̍, wānāā hɔ̄lāā hēēlāa̍ nda̍ mā tu̍si̍ nda̍ hɔ̄lla̍ lɛ̄ŋ.

²⁹Mɛ̄lɛ̄ka̍ Ya̍a̍wɛ̄ɛ̄, nu̍m yɔ̍ŋgū ya̍ nyɛ̄ wa̍wo̍ŋndo̍ o̍ nɛ̄ī ni̍, le̍ mī chɛ̍. Nu᷄m pi̍sī ya̍ nyūmnda̍ŋ nda̍ŋ lāchī a̍ nyɛ̄ nūm wa̍wo̍ŋndo̍ ni̍.

³⁰Nu᷄m lu̍e̍ī ya̍ kpāāyāa̍ ni̍ Mɛ̄lɛ̄ka̍ mī nɔ̍la̍ mī sɔ̍ŋga̍ a̍ ya̍a̍mɔ̍ɔ̍wa̍a̍ nīa̍a̍. Kpākīla̍ ka̍lā ka̍lā yɔ̍ɔ̍mɔ̍ɔ̍va̍a̍ nīa̍a̍ tāŋgūl le̍ chi̍e̍e̍ŋ nda̍ŋ māndāa̍ la̍ŋ mī nɔ̍la̍ mī he̍l ta̍ŋ, mī kɔ̍ yɔ̍m nda̍.

³¹Mɛ̄lɛ̄ka̍ ho̍ō ō chō Mɛ̄lɛ̄ka̍ sa̍ndu̍. Dīōmndā ndɔ̄la̍ŋ lā chō dīōmndā wānā ti̍i̍nda̍ŋ. Wānāa̍ ku̍ā nāa̍ ndu̍ chu̍a̍ le̍ mbō mānda̍ nda̍ wa̍, māndāa̍ o̍ ma̍ndā nda̍ ni̍.

³²Mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ Mɛ̄lɛ̄ka̍ Ya̍a̍wɛ̄ɛ̄ kɔ̍ɔ̍lī le̍, ndu̍ pīlɛ̍ kpe̍ cho̍ Mɛ̄lɛ̄ka̍ ni̍. Mɛ̄lɛ̄ka̍ nāa̍, ndu̍ pīlɛ̍ kpe̍ cho̍ pōū kpo̍o̍wa̍ na̍a̍ ŋ̄ vīāŋnūŋ le̍bɛ̍ŋgu̍ le̍ na̍a̍ māndāa̍ wo̍ ni̍.

³³Mɛ̄lɛ̄ka̍ cho̍ wāna̍ ma̍ndā ya̍ wo̍ ni̍, mɛ̄ɛ̍ kpākī ka̍lā ka̍lā bɛ̄ndōo̍ ō māndā nu̍a̍ā chi̍o̍o̍ yɛ̍. Bā o̍ bā ya̍ I̍ kɔ̍, ndu̍ ma̍ndā ya̍ nī, nyɛ̄ o̍ nyɛ̄ yɔ̍nūŋ ya̍ le̍.

³⁴Mbō kīndi̍ ya̍ pēlo̍ŋ pɔ̍ŋ mɛ̄ɛ̍ kīa̍llo̍ ō wā nu̍a̍ā yɛ̍, I̍ nya̍a̍nu̍ŋ bɛ̍ɛ̍ I̍ de᷅l te̍. Mbō tōsa̍ mī si̍m o̍ pēmbēi̍ lāndɔ᷄ŋndo̍ I̍ nɔ̍lā mī de̍l te̍.

³⁵Mbo̍ pɛ̄ɛ̄kū ya̍ a̍ chɔ̄ūwo̍, ā yɔ᷄ŋ bɛ̍ɛ̍ āā chīɔ̄ū nda̍ tōōsi̍a̍a̍ a̍ chīli̍ŋnde̍ wo̍, I̍ nɔ̍lā mī sɔ̍ŋga̍ a̍ ndu̍.

³⁶Ōo̍ Mɛ̄lɛ̄ka̍ Ya̍a̍wɛ̄ɛ̄, nu᷄m cho̍ wāna̍ ma̍ndā ya̍ wo̍ ni̍, mɛ̄ɛ̍ pūa̍a̍ chɔ̄ūwa̍ bīī nu̍a̍ā nyɛ̄la̍ ma̍ndā ndā la̍ŋ o̍ lābā mī lā mānda̍ nda̍ o̍ chɔ̄ūwo̍ ni᷄ŋ yɛ̍, le̍nde̍ ŋ̄ lo̍ o̍ ko̍ŋ ni̍, ma̍ chīīndīāā yōōmū nūu̍. Mālā ŋ̄ māla̍ ya̍ wo̍, ō tōsa̍ mi̍ fu̍lā tɔ̍ɔ̍.

³⁷A̍ ke̍ ya̍ fo̍ndāŋ fɛ̄kɛ̄īyo̍ nāa̍ ya̍ I̍ nɔ̍lā mī sɔ̍ŋga̍ wa̍. Ndu̍yɛ̍ pēlūŋ nu᷄ŋ chō ŋ̄ sīmūlāā yi̍, le̍ sɔ̍ŋgɔ̄ɔ̍, I̍ de᷅l te̍.

³⁸I̍ lo̍ ya̍a̍mɔ̍ɔ̍wa̍a̍ nīa̍a̍ tōūwɔ̄ɔ̍ mɛ̄ɛ̍ mi̍ kɔ̍ bi̍ī nda̍. I̍ chūa̍a̍ nda̍ tōūwɔ̄ɔ̍ ka̍ū, mīīŋgū bɛ̍ɛ̍ I̍ mi̍i̍ŋgu̍ kɔ̄ɔ̄lī le̍, I̍ lo̍ sɔ̍ŋgɔ̄ɔ̍ a̍ nda̍ mi̍ chi̍ī nda̍ mɛ̍u̍.

³⁹Mi̍ su̍āŋ nda̍ ma̍ dēlī lɛ̄ŋ lɛ̍ɛ̍si̍ɛ̍ŋ, ō pīlɛ̍ bɛ̍ɛ̍ nɔ̍la̍ mbō chɛ᷄ŋ te̍, ō ya̍ I̍ su̍āŋ ko̍ mbō de᷄l I̍ nɛ̍i̍ ndu̍ a̍ bɛ̄ŋgu̍.

⁴⁰Kāni̍ fo̍ndōle̍, a̍ lo̍ o̍ ko̍ŋ ma̍ lūēī ya̍ kpāāyāa̍, le̍ mī chi̍e̍i̍ a̍ ya̍a̍mɔ̍ɔ̍wa̍a̍ nīa̍a̍ mī ye᷅m nda̍.

⁴¹A̍ to̍sa̍ mi̍ ya̍a̍mɔ̍ɔ̍wa̍a̍ nīa̍a̍ ā nyāānu᷄ŋ ya̍. Wānāa̍ to̍l la̍ lēyɛ̄ wa̍ I̍ di̍u̍ nda̍ mi̍ chi̍ī a̍ nda̍ kpo̍u̍.

⁴²Ya̍a̍mɔ̍ɔ̍wa̍a̍ nīa̍a̍ ā wa̍ ye̍e̍la̍ŋ mɛ̄līo̍o̍ kpe̍e̍kpe̍i̍ le̍ wāna̍ ma̍lā nda̍ wo̍, kɛ̍ ā sɔ̄la̍ wa̍nā le̍. Ma̍ kōŋūl nāa̍ Mɛ̄lɛ̄ka̍ chūā le̍ mālāa̍ kɛ̍ ō mūli̍ nda̍ dīōm te̍.

⁴³Mi̍ fu̍lī nda̍ ma̍ sīmnu᷄ŋ nyɛ᷅ fo̍ndō fu̍u̍ mɛ̄ɛ̍ chu̍ndo̍o̍ wā nu̍a̍ā lɛ̄ŋ. Nīɔ̄ūwo̍ nda̍ mi̍ pɛ̍tɛ̍kīāā nda̍ mɛ̄ɛ̍ lōōlīo̍o̍ ō wa̍ nu̍a̍ā o̍ nɛ̄i̍ mī wāŋnda̍ pɛ̄tɛ̍ki̍a̍a̍ ndu̍ yɛ̍.

⁴⁴Wānāa̍ si̍mu̍l la̍ māā I̍ vɛ̍ nda̍ chōo̍ Ma̍sā le̍ wa̍, ma̍ bīī ma̍ pīŋī ya̍ nda̍ o̍ bā, Mɛ̄lɛ̄ka̍, ma̍ bīī ma̍ sīīŋgūū ya̍ Māsāa̍ lɛ̄ŋīī fa̍ŋā fāŋā chōo̍. Wānāā ya̍ i̍i̍ si̍nā bɛ̍ɛ̍ pa̍a̍ndū le̍ wa̍, ā sīmnu᷄ŋ wa̍nāā wāā ya̍ o̍ bā bɛ̄ŋgu̍.

⁴⁵Wānāa̍ cho̍ o̍ lɛ̄ŋīī chēle̍ŋ ni᷄ŋ nda̍, mɛ̄ɛ̍ nda̍ tūēī a̍ ya̍ o̍kɔ̄ɔ̄, ma̍ hu᷄ŋ tu̍ndu᷄ŋ ya̍ o̍ lābɛ̄ŋgu̍ ni᷄ŋ, ma̍ tōsā nyɛ̄ ya̍ I̍ di̍mūl nda̍ le̍ tōsāa̍ wo̍.

⁴⁶Mɛ̄ɛ̍ nda̍ chīi̍ tūēī a̍ ya̍ o̍kɔ̄ɔ̄, kpo̍u̍ mi̍ yōōmūa̍ŋ mā fūlā a̍ nda̍ po̍, ma̍ fūlā nyīīyāa̍ o̍ chi̍e̍e̍ŋ nda̍ŋ cho̍ ŋ̄ bālāā a̍ kpākīla̍ ka̍lā ka̍lā la̍ŋ le̍ nda̍ māndāa̍ wo̍ŋ ni᷄ŋ, ma̍ hūŋ.

⁴⁷Mbɔ̄ lēkɛ̍ndɛ̍ī Mɛ̄lɛ̄ka̍ Ya̍a̍wɛ̄ɛ̄ ā chō yōōmū. Sāŋgālāa̍ chō le̍ nūm Mɛ̄lɛ̄ka̍ nūu̍, Mɛ̄lɛ̄ka̍ ma̍ndā ya̍ wo̍. Ā chō ō bɛ̄ndū Mɛ̄lɛ̄ka̍. Nu᷄m cho̍ wāna̍ pi̍ŋī ya̍ wo̍ ni̍.

⁴⁸Mɛ̄lɛ̄ka̍ ke̍ ya̍ kpāāyāa̍ mi̍ ya᷅m ya̍a̍mɔ̍ɔ̍wa̍a̍ nīa̍a̍. Ō tōsa̍ mi̍ lɛ̄ŋīi̍ cho̍ bɛ̍ɛ̍ lɛ̄ŋīī chēle̍ŋnde̍ ve̍ Ī lūɛ̄ī ya̍ o̍ bā bɛ̄ŋgu̍.

⁴⁹Mɛ̄lɛ̄ka̍ bāŋa̍ ya̍ ya̍a̍mɔ̍ɔ̍wa̍a̍ nīa̍a̍ o̍ bā. Ōo̍ Mɛ̄lɛ̄ka̍ Ya̍a̍wɛ̄ɛ̄, a̍ to̍sa̍ mi̍ ya᷅m ya̍a̍mɔ̍ɔ̍wa̍a̍ nīa̍a̍. A̍ so̍li̍ ya̍ wānāā kɔ̄l vēsɛ̍i̍ bɛ̍ndū o̍ bā Mɛ̄lɛ̄ka̍.

⁵⁰Le̍ he̍ī, I̍ cho̍ nu̍m līsā wānāā lēkāa̍wa̍ tɛ̄ɛ̄ŋ, mī chɔ̍m a̍ wa̍lta̍ kɛ̍ndɛ̄lā ŋ̄ tōsā la̍ŋ o̍kɔ̄ɔ̄. I̍ cho̍ nu̍m chūūndūū o̍ chōndo̍ŋ ni᷄ŋ.

⁵¹Mɛ̄lɛ̄ka̍ tōsa̍ mi̍ Māsa̍ ndɔ̍ o̍ hɛ̍li̍ wo̍ ō yām chɔ̄ūlā bɔ̄ɔ̍ bɔ̍ɔ̍. Ō chɔ᷄m kāālā sa̍kpōo̍ nāa̍ Māsāa̍ Dēēve̍ chu̍a̍, māsa̍ o̍ hɛ̍li̍ a̍ pūlālē ndɔ̄ kpo̍u̍ wo̍.